shab-e-hijran

sozish-e-ġham kā bayāñ lab pe na lā.ūñ kyūñkar

dard hai had se sivā dil meñ chhupā.ūñ kyūñkar

tū yahīñ dost mire ġham kā mudāvā kar de

choT jo dil pe lagī hai vo dikhā.ūñ kyūñkar

kaise dohrā.ūñ ġham-e-zīst ke afsāne ko

sunñe vaalā na koī ho to sunā.ūñ kyūñkar

raushnī hotī nahīñ mere siyah-ḳhāne meñ

sham-e-dil ab shab-e-hijrāñ meñ jalā.ūñ kyūñkar

silk-e-anjum haiñ tirī yaad meñ aañsū ab tak

tere dāman ko sitāroñ se sajā.ūñ kyūñkar

jab ke tinke kā sahārā bhī nahīñ hai 'nāshād'

apnī kashtī ko talātum se bachā.ūñ kyūñkar

sozish-e-gham ka bayan lab pe na laun kyunkar

dard hai had se siwa dil mein chhupaun kyunkar

tu yahin dost mere gham ka mudawa kar de

choT jo dil pe lagi hai wo dikhaun kyunkar

kaise dohraun gham-e-zist ke afsane ko

sunne wala na koi ho to sunaun kyunkar

raushni hoti nahin mere siyah-KHane mein

sham-e-dil ab shab-e-hijran mein jalaun kyunkar

silk-e-anjum hain teri yaad mein aansu ab tak

tere daman ko sitaron se sajaun kyunkar

jab ke tinke ka sahaara bhi nahin hai 'nashad'

apni kashti ko talatum se bachaun kyunkar