yaaden

jab bhī bichhḌī huī dillī kā samāñ yaad aayā

bhūlī-bisrī huī yādoñ kā jahāñ yaad aayā

apne āġhāz-e-javānī kā samāñ yaad aayā

kūcha-e-rūd-garāñ laal kuaañ yaad aayā

usī phāTak meñ to guzrā thā laḌak-pan apnā

ek ik tifl to ek ek javāñ yaad aayā

chāchā kallan kī miThā.ī kī dūkāñ yaad aa.ī

us ke uupar kisī mahvash kā makāñ yaad aayā

haa.e vo nuqra.ī āvāz vo tīkhe ḳhad-o-ḳhāl

pas-e-chilman vo nazāroñ kā jahāñ yaad aayā

kyā na yaad aayā ġharīb-ul-vatanī meñ ham ko

ek ik vahm to ek ek gumāñ yaad aayā

aa.ī hamdard davā-ḳhāne kī jab yaad hameñ

ek tābinda-o-pā.inda jahāñ yaad aayā

al-jam'iyyat ke qarīñ ho ke tasavvur jo chalā

hifz-e-rahmān sā ik mard-e-jahāñ yaad aayā

jis kī taqrīr rag-o-pai meñ utar jaatī thī

sab se thā jis kā judā tarz-e-bayāñ yaad aayā

kaale sāhib kā ahāta bhī nazar meñ ghūmā

mahfil-e-she'r-o-suḳhan kā bhī samāñ yaad aayā

ballimārān se pahle galī qāsim-jāñ meñ

'ġhālib'-e-ḳhasta kā bosīda makāñ yaad aayā

vahīñ yaad aayā davā-ḳhāna-e-hindustānī

ḳhaan ajmal sā masīhā-e-zamāñ yaad aayā

kūcha-e-'dāġh' se ho kar jo chalā husn-e-ḳhayāl

shā'ir-e-ahl-e-nazar ahl-e-zabāñ yaad aayā

chāñdnī chauk kī yaad aa.ī jo gahmā-gahmī

vo hasīñ shaam kā pur-kaif samāñ yaad aayā

kaale burqa'oñ meñ vo malbūs hasīnāoñ ke ġhol

chāñd ke TukḌoñ kā ik sail-e-ravāñ yaad aayā

ghanTa-ghar log samajhte the jise dillī kī naak

puurī dillī kā vo tanhā nigarāñ yaad aayā

ho ke favvāre se jā pohñchā darībe meñ ḳhayāl

sone chāñdī kī dukānoñ kā jahāñ yaad aayā

jāme' masjid nazar aa.ī to udhar ko lapke

ḳhvānche vāloñ kā andāz-e-bayāñ yaad aayā

sīḌhiyoñ par vo kaToroñ kī sadā guuñj uThī

pech khātā huā huqqe kā dhuāñ yaad aayā

jāme' masjid ke mināroñ se jise dekhā thā

vo nazāra ki jo thā rāhat-e-jāñ yaad aayā

kābakoñ jaise makānāt nazar meñ ghūme

ek ik foot kā har ik pīr-o-javāñ yaad aayā

ik uchaTtī sī nazar laal qila par bhī paḌī

dil pe dhachkā sā lagā shāh-jahāñ yaad aayā

urdu bāzār kī yaad aa.ī is andāz ke saath

ki sahāfat kā koī bahr-e-ravāñ yaad aayā

aa ga.e yaad vahīñ 'sā.il'-o-'beḳhud' 'kaifī'

'dāġh' vāloñ kā phir andāz-e-bayāñ yaad aayā

‘mīr-mushtāq' kī mardāna-ravī yaad aa.ī

ḳhidmat-e-ḳhalq kā ik 'azm-e-javāñ yaad aayā

yaad aa.ī vahīñ maulānā samī'ullāh kī

jaise bā-himmat-o-pāmard javāñ yaad aayā

shā'iroñ kī jahāñ rahtī thī nishast-o-barḳhāst

'jigar'-e-ḳhasta ko dekhā thā kahāñ yaad aayā

'bismil'-o-'bedī'-o-'mahrūm'-o-'vafā'-o-'gulzār'

majma'-e-shā'ir-o-sāhib-nazarāñ yaad aayā

chāvḌī phir ga.ī āñkhoñ meñ javānī kī tarah

kūcha-hā-e-sanam-e-sīm-tanāñ yaad aayā

yak-ba-yak scene jo badlā to samāñ yaad aayā

dahshat-o-ḳhauf kā ek sail-e-ravāñ yaad aayā

ḳhaak uḌne lagī dillī ke galī kūchoñ meñ

mutafakkir sā har ik pīr-o-javāñ yaad aayā

chhoḌ kar dillī ko jaane lage dillī vaale

ik hujūm-e-ba-lab-e-āh-o-fuġhāñ yaad aayā

paaoñ tak jin kā na dekhā thā khule sar dekhā

nauhagar qāfila-e-lāla-ruḳhāñ yaad aayā

qāfile dillī se jaane lage ban ban ke jahāñ

maqbare kā vo humāyūñ ke samāñ yaad aayā

thā qayāmat kā vo manzar ki thī nafsī-nafsī

haal par apne falak girya-kunāñ yaad aayā

yā'nī barsāt ye kahtī thī ki barsūñ barsūñ

kitnā us daur meñ allāh miyāñ yaad aayā

aur ik parda uThā aur samāñ yaad aayā

aur ik manzar-e-dil-doz vahāñ yaad aayā

ġhadr kī khiñch ga.ī āñkhoñ meñ mukammal tasvīr

'zafar'-e-soḳhta-tan soḳhta-jāñ yaad aayā

shāhzādoñ ke jo sar pesh-e-'zafar' yaad aa.e

apnā ġham bhuul ga.e jab vo samāñ yaad aayā

tere ḳhurshīd tire chāñd sitāre dillī

chhūT kar tujh se muhājir haiñ bichāre dillī

be-vatan ho ke tire rāj-dulāre dillī

jī rahe haiñ tirī yādoñ ke sahāre dillī

jab bhi bichhDi hui dilli ka saman yaad aaya

bhuli-bisri hui yaadon ka jahan yaad aaya

apne aaghaz-e-jawani ka saman yaad aaya

kucha-e-rud-garan lal kuan yaad aaya

usi phaTak mein to guzra tha laDak-pan apna

ek ek tifl to ek ek jawan yaad aaya

chacha kallan ki miThai ki dukan yaad aai

us ke upar kisi mahwash ka makan yaad aaya

hae wo nuqrai aawaz wo tikhe KHad-o-KHal

pas-e-chilman wo nazaron ka jahan yaad aaya

kya na yaad aaya gharib-ul-watani mein hum ko

ek ek wahm to ek ek guman yaad aaya

aai hamdard dawa-KHane ki jab yaad hamein

ek tabinda-o-painda jahan yaad aaya

al-jam'iyyat ke qarin ho ke tasawwur jo chala

hifz-e-rahman sa ek mard-e-jahan yaad aaya

jis ki taqrir rag-o-pai mein utar jati thi

sab se tha jis ka juda tarz-e-bayan yaad aaya

kale sahib ka ahata bhi nazar mein ghuma

mahfil-e-she'r-o-suKHan ka bhi saman yaad aaya

ballimaran se pahle gali qasim-jaan mein

'ghaalib'-e-KHasta ka bosida makan yaad aaya

wahin yaad aaya dawa-KHana-e-hindustani

KHan ajmal sa masiha-e-zaman yaad aaya

kucha-e-'dagh' se ho kar jo chala husn-e-KHayal

sha'ir-e-ahl-e-nazar ahl-e-zaban yaad aaya

chandni chauk ki yaad aai jo gahma-gahmi

wo hasin sham ka pur-kaif saman yaad aaya

kale burqa'on mein wo malbus hasinaon ke ghol

chand ke TukDon ka ek sail-e-rawan yaad aaya

ghanTa-ghar log samajhte the jise dilli ki nak

puri dilli ka wo tanha nigaran yaad aaya

ho ke fawware se ja pohncha daribe mein KHayal

sone chandi ki dukanon ka jahan yaad aaya

jame' masjid nazar aai to udhar ko lapke

KHwanche walon ka andaz-e-bayan yaad aaya

siDhiyon par wo kaToron ki sada gunj uThi

pech khata hua huqqe ka dhuan yaad aaya

jame' masjid ke minaron se jise dekha tha

wo nazara ki jo tha rahat-e-jaan yaad aaya

kabakon jaise makanat nazar mein ghume

ek ek foot ka har ek pir-o-jawan yaad aaya

ek uchaTti si nazar lal qila par bhi paDi

dil pe dhachka sa laga shah-jahan yaad aaya

urdu bazar ki yaad aai is andaz ke sath

ki sahafat ka koi bahr-e-rawan yaad aaya

aa gae yaad wahin 'sail'-o-'beKHud' 'kaifi'

'dagh' walon ka phir andaz-e-bayan yaad aaya

‘mir-mushtaq' ki mardana-rawi yaad aai

KHidmat-e-KHalq ka ek 'azm-e-jawan yaad aaya

yaad aai wahin maulana sami'ullah ki

jaise ba-himmat-o-pamard jawan yaad aaya

sha'iron ki jahan rahti thi nishast-o-barKHast

'jigar'-e-KHasta ko dekha tha kahan yaad aaya

'bismil'-o-'bedi'-o-'mahrum'-o-'wafa'-o-'gulzar'

majma'-e-sha'ir-o-sahib-nazaran yaad aaya

chawDi phir gai aankhon mein jawani ki tarah

kucha-ha-e-sanam-e-sim-tanan yaad aaya

yak-ba-yak scene jo badla to saman yaad aaya

dahshat-o-KHauf ka ek sail-e-rawan yaad aaya

KHak uDne lagi dilli ke gali kuchon mein

mutafakkir sa har ek pir-o-jawan yaad aaya

chhoD kar dilli ko jaane lage dilli wale

ek hujum-e-ba-lab-e-ah-o-fughan yaad aaya

paon tak jin ka na dekha tha khule sar dekha

nauhagar qafila-e-lala-ruKHan yaad aaya

qafile dilli se jaane lage ban ban ke jahan

maqbare ka wo humayun ke saman yaad aaya

tha qayamat ka wo manzar ki thi nafsi-nafsi

haal par apne falak girya-kunan yaad aaya

ya'ni barsat ye kahti thi ki barsun barsun

kitna us daur mein allah miyan yaad aaya

aur ek parda uTha aur saman yaad aaya

aur ek manzar-e-dil-doz wahan yaad aaya

ghadr ki khinch gai aankhon mein mukammal taswir

'zafar'-e-soKHta-tan soKHta-jaan yaad aaya

shahzadon ke jo sar pesh-e-'zafar' yaad aae

apna gham bhul gae jab wo saman yaad aaya

tere KHurshid tere chand sitare dilli

chhuT kar tujh se muhajir hain bichaare dilli

be-watan ho ke tere raj-dulare dilli

ji rahe hain teri yaadon ke sahaare dilli