zauq-e-shairana

maiñ talāsh kar rahī thī ġham-e-dil kā kuchh bahāna

mirī raah meñ ye nāhaq kahāñ aa gayā zamāna

mire haal par karam kar kabhī dost ġhā.ebāna

vo sukūn baḳhsh dil ko ki taḌap uThe zamāna

hai tavāf ab bhī jaarī tire āstāñ kā lekin

nahīñ mil sakā jabīñ ko tirā sañg-e-āstāna

tirī bārgāh tak ho mirī kis tarah rasā.ī

mujhe dī ga.ī gadā.ī tujhe taḳht-e-ḳhusravāna

maiñ taḌap taḌap ke ġham meñ rahī be-qarār-o-muztar

mire dil kī dhaḌkanoñ ko nahīñ sun sakā zamāna

mirā shauq-e-sajda-rezī hai hanūz nā-mukammal

mujhe koī ye batā de hai kahāñ vo āstāna

mire ġham kī zindagī par mire hāl-e-bekasī par

kabhī rahm un ko aa.e kabhī ro paḌe zamāna

ka.ī baar aa ke bijlī girī sehn-e-gulsitāñ par

ye rahī hamārī qismat ki jalā na āshiyāna

mujhe hosh hī nahīñ kuchh ki maiñ shaad huuñ ki 'nāshād'

hai surūr-e-mai se baḌh kar mirā zauq-e-shā.irāna

main talash kar rahi thi gham-e-dil ka kuchh bahana

meri rah mein ye nahaq kahan aa gaya zamana

mere haal par karam kar kabhi dost ghaebana

wo sukun baKHsh dil ko ki taDap uThe zamana

hai tawaf ab bhi jari tere aastan ka lekin

nahin mil saka jabin ko tera sang-e-astana

teri bargah tak ho meri kis tarah rasai

mujhe di gai gadai tujhe taKHt-e-KHusrawana

main taDap taDap ke gham mein rahi be-qarar-o-muztar

mere dil ki dhaDkanon ko nahin sun saka zamana

mera shauq-e-sajda-rezi hai hanuz na-mukammal

mujhe koi ye bata de hai kahan wo aastana

mere gham ki zindagi par mere haal-e-bekasi par

kabhi rahm un ko aae kabhi ro paDe zamana

kai bar aa ke bijli giri sehn-e-gulsitan par

ye rahi hamari qismat ki jala na aashiyana

mujhe hosh hi nahin kuchh ki main shad hun ki 'nashad'

hai surur-e-mai se baDh kar mera zauq-e-shairana