کی تلاش کا نتیجه | موضو - نظم, صفحہ Tezaab

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "Tezaab"

نظم کے متعلقہ نتیجہ "Tezaab"

نظم

چلو میں نے مانا کہ شہر ہوس میں ہیں کافی درندے
جنہوں نے سدا ابن آدم کی شہرت کو پامال رکھا
مگر وہ درندے تو گنتی کے ہیں
انگنت مرد وہ ہیں جنہوں نے تمہیں شان و تکریم بخشی
کبھی باپ بن کر کبھی بھائی بن کر کبھی بیٹا بن کر
وہی باپ جس نے تمہارے لیے اپنی جاں بیچ کر بھی کھلونے خریدے
وہی بھائی جس نے تمہارے دوپٹے کو قرآن کی طرح پاکیزہ جانا
وہی بیٹا جس نے ہمیشہ تمہارے ہی پیروں تلے اپنی جنت تلاشی
یہ سب مرد ہیں اور تمہارے محافظ
گلی میں اگر اک درندے نے تم پر کسا کوئی جملہ
کئی اجنبی مرد بھی تب تمہاری حفاظت کو آئے
کوئی مرد تیزاب گردی کو آیا تو کتنے ہی مردوں نے تم کو بچایا

رحمان فارس

نظم

گرم ہو تیزاب کی کھولن سے لالے کا ایاغ
غنچۂ نورس کا طاق اور پیر مکتب کا چراغ

جوش ملیح آبادی

نظم

یہ دنیا تو ان شعلہ سامان لوگوں نے آپس میں تقسیم کر لی
جو ہتھیار کی شکل میں رنج و غم ڈھالتے ہیں
یا گولہ بارود کے کارخانوں کے مالک ہیں
یا پھر ثنا خواں ہیں ان کے
ہمارے لیے صرف نعرے بچے ہیں
صنعتی دور کے کج کلاہوں کی داد و دہش روح پرور ہو یا جان لیوا
مگر زندہ باد، آفریں، مرحبا، کے سوا کچھ نہیں پاس اپنے
یہ سب جانتا ہے ہماری شجاعت کی پرواز کیا ہے
ہماری جواں مردی اک صوبہ جاتی تعصب سے
یا فرقہ واری فسادات سے آگے کچھ بھی نہیں ہے
فتوحات اسکندری ہم نے تختی پہ لکھ کر مٹا دی ہیں کب کی
ہمارے بعد زمیں کے تلے سو رہے ہیں
عجائب گھروں میں لٹکتی ہیں تلواریں ان کی
اور ان کے زریں لبادوں کو گھن کھا گیا ہے
ذرہ بکتروں پر کلونس آ گئی ہے
یہ سب جانتا ہے ہماری تگ و تاز کیا ہے
ہمارے شکم گر ہمارے سروں پہ نہ ہوتے
اور چہروں میں اعضائے جنسی
تو ہم اچھے انسان بنتے
ہمارے گھروں کے کم و بیش سب عقبی دروازے پیہم کھلے ہیں
ہمارے لہو میں ہرے لال پیلے بہت سارے پرچم کھلے ہیں
کہیں سے مگر حق کی آواز آتی نہیں ہے
ہماری زباں دل کی ساتھی نہیں ہے
ہمارے لیے کھوکھلا لفظ جمہوریت ہے، تقاریر ہیں لیڈروں کی
ہمارے لیے روز ناموں کے صفحات ہیں، اشتہارات ہیں نیم جنسی
ہمارے لیے دیوتاؤں کے بت ہیں، خدا کے فرامین ہیں اور عقبیٰ
جو بد رنگ ہے حال کی طرح اور کورے لٹھے کی بو سے بھری ہے
ہمارے لیے صرف روٹی کی جد و جہد
عورتوں کے برہنہ بدن کی تمنا سے آگے کہیں کچھ نہیں ہے
ہماری رگوں میں جو تیزاب ہے اس کی شدت کبھی کم نہ ہوگی!

اختر الایمان

نظم

یہ مرے رو بہ رو کون ہے؟
جسم و جاں چیتھڑے کرنے والی مری جاں
تو مری کون ہے؟؟؟
تیری آہیں مری تیری چیخیں مری
تیرے زخموں کی آہٹ مرے جسم پر
درد سہہ کے مجھے زندگی دینے والی مری جاں
تو مری کون ہے؟
جبر تجھ کو ملے خوف اس کوکھ میں
ہجر تو نے پئے زہر اس سوچ میں
ریسماں باندھ کر پنکھڑی دینے والی مری جاں
تو مری کون ہے؟؟؟
تو سحر کی وہ بانکی ادا جس کو دن کھا گیا
وہ مرے دل کی اجڑی دعا جس کو دل ڈھا گیا
رات دن سرد لمحوں کے تیزاب میں گلنے والی مری جاں
تو مری کون ہے؟؟
تو پگھلتی رہی
آگ اس دل میں جلتی رہی
حرف ڈھلتے رہے شام ہاتھوں کو ملتی رہی
رقص کر کے مجھے آبلے دینے والی مری جاں
تو مری کون ہے؟؟؟

ثروت زہرا

نظم

آنکھوں کی شیشی میں کیسی زمروں کا تیزاب بھرا ہے
قطرہ قطرہ
اس تیزاب کی لفظوں میں تقطیر ہوئی ہے
دیکھتے دیکھتے
آس کی صورت
میری ہی تصویری ہوئی ہے

سرمد صہبائی

نظم

تحسین کے طالب نہیں اوصاف خداداد
آفاق ہلا دیتی ہے حق کیش کی فریاد
آباد کہاں حلقۂ شعری کی فضا میں
بت خانۂ مانی کہ صنم خانۂ بہزاد
مٹ جائے گا ایوان تفاخر کا تکلف
یک شعلہ‌ٔ جوالہ ہے آہ دل ناشاد
ضرغام ہے روباہ کے زرین قفس میں
آزاد ہیں پابند گرفتار ہیں آزاد
غازی نے کہا لوٹ لو بت خانۂ دولت
صوفی نے کہا چھوڑ دو عشرت گہ شداد
تیزاب سیاست میں خودی جس کی ہوئی غرق
وہ کاغذی لعبت بنے کیا پیکر فولاد
حاجات کے بت خانۂ تزویر ہزاروں
بندوں نے ترے نام پہ کر ڈالے ہیں ایجاد
لٹ جاتا ہے ہر گام پہ عصمت کا خزانہ
دل کش بہت ہے مانا کہ ہر رقص پری زاد
جمہور کی تہذیب سے اخلاص ہے معدوم
امروز نئی نسل کو اللہ نہیں یاد
جمہور کی برکت سے ہوئے آدمی ننگے
سائنس نے سو فتنۂ محشر کئے ایجاد

بیباک بھوجپوری

نظم

محبت مر نہیں سکتی
حقیقت پھر حقیقت ہے حقیقت مر نہیں سکتی
خداوند محبت کی شریعت مر نہیں سکتی
محبت مر نہیں سکتی
بہر سو جبر و استبداد چاہے سولیاں گاڑے
اتر آئیں بلائیں ہاتھ میں زہراب لے لے کر
فضا بارود بن کر بھی سلگ اٹھے تو کیا ہوگا
یہ وہ جذبہ ہے جو ذروں کے سینے میں نمو پائے
یہ وہ نغمہ ہے جو زخموں کے ہونٹوں سے ابھرتا ہے
محبت حسن فطرت ہے یہ فطرت مر نہیں سکتی
محبت مر نہیں سکتی
کمال فکر طاغوتی کوئی ترشول لے آئے
فراعین کہن ڈھل جائیں چاہے پیکر نو میں
سمندر کو ستم گر ہاتھ گر تیزاب کر ڈالیں
ہواؤں میں ہلاکت گیریاں تحلیل کر ڈالیں
محبت نور ہے آلودگی سے جسم مرتے ہیں
محبت میں کوئی آلودگی ضم ہو نہیں سکتی
یہ وہ قوت ہے جو شیطان سے بھی ڈر نہیں سکتی
محبت مر نہیں سکتی

گفتار خیالی

نظم

ہم ایک ایسی وادی دریافت کر چکے
جہاں صرف دکھوں کی فصل کاشت ہوتی ہے
جنت کی بات کرنے والوں کے ہونٹ
خامشی کے دھاگے سے سی کر
انہیں سناٹوں کی جہنم میں ڈال دیا جاتا ہے
محبت کے ماتھے پر ''نفرت'' لکھنے کی سیاہی
ہر سینے میں ڈال دی گئی ہے
دھرتی کے سینے پر خوشیاں سینچنے والوں کی آنکھیں
اب اپنے ہاتھ تلاشتی پھرتی ہیں
نفرت کے تیزاب سے ہم
ایک دوسرے کا چہرہ بگاڑنے پر تل چکے ہیں
ہماری معصومیت کے چہرے پر
خوف جالے بن چکا ہے

منیر احمد فردوس

نظم

برسوں بے طرح بے کل رہے
ایک دن آنکھوں میں صحرا جل اٹھا
وہ خیال آیا کہ چہرہ جل اٹھا
اپنے بیٹوں کو کلیجے سے لگایا
جی بھرا تھا ابر کے مانند روئے
رہ چکے تو ایک مہلک آتشیں تیزاب کے
شعلۂ سفاک سے
ان کی فاقہ سنج آنکھوں کو جلایا
اور سجدے میں گرے
جیسے گہری نیند میں ہوں
جیسے اک سکتے میں ہوں

ساقی فاروقی

نظم

ایک بوسے کی طلب میں
جسم کبڑے ہو گئے
زندگی پانی ہوئی
آسماں سے کہکشاؤں کی بہار
آگ برساتی رہی
زندگی فٹ پاتھ پر
ایک روٹی کی طلب میں
ہاتھ پھیلاتی رہی
قطرہ قطرہ بے بسی تیزاب سی
جسم پگھلاتی رہی
ردی چنواتی رہی
نیٹی جیٹی پر کھڑی خلق خدا
ہنستی رہی
اور خدا خاموش تھا

فہیم شناس کاظمی

نظم

مگر ان کے اندر جراثیم ہیں
روح کی جھریوں کو جھلس دینے والے
جنہیں زنگ آلود چہرے
فقط کاسٹک اور تیزاب سے صاف کرنا
سکوں بخشتا ہے
جن کی تھیوری
سگریٹوں کے دھوئیں چائے کی پیالیاں
کچھ نہ کچھ کر گزرنے کی باتیں
مگر کچھ نہ کرنے کی عادت پہ
موقوف ہے
سوچ میں روشنی ہے
عمل نفرتوں کے اندھیرے کی جانب لئے جا رہا ہے
انہیں پوچھنے کی اجازت نہیں ہے
انہیں دیکھنے کا کوئی حق نہیں ہے
کہ کتنے نئے نام
پھر روشنی نے صلیبوں کی دیوار پر لکھ دئے ہیں
کہ کتنے پرانے مٹائے گئے ہیں
سنو وقت شب خون جب مارتا ہے
تو خوابوں میں جاگے ہوئے کو بھی
مردہ ہی گردانتا ہے

سید حسن ناصر

نظم

زمین شعلے اگل رہی ہے
فضا سے تیزاب گر رہا ہے
زمین اگنی پہ لوٹتی ہے
ہوائیں چہرہ بگاڑتی ہیں

فاروق نازکی

نظم

تنہائی کی خاموشی میں
جی بے کار الجھتا ہے
زار و پریشاں رہتا ہوں
لیکن لوگوں کے جمگھٹ میں
اک مہمل سے شور و غل میں
شخصیت سمجھوتے کے تیزاب میں حل ہو جاتی ہے
دل ہوتا ہے اور پشیماں

راج نرائن راز

نظم

میرا باپ دانتوں میں ڈائنا مائٹ دبائے
انگلیوں کے پوروں میں تیزاب کے بن اگاتا ہے
اور پیلے مردہ مریل کاغذ کے چہرے پر
لہو کے پھول کاڑھتا ہے

فاروق نازکی

نظم

برہنہ پنڈلی پہ
سانپ خواہش کی انگلیوں کے
جو سرسرائے
تو لذتوں کی ہتھیلیوں میں
کبوتروں کے گداز جسموں
کی دھیمی گرمی
سلگ اٹھی ہے
کہ کرب اپنے بدن کا
سوکھے لبوں سے
اب جھانکنے لگا ہے
خود اپنے خوں کا تیزاب
رگ رگ میں دوڑتا ہے
مجھے تو اب کوئی ناگ ڈس لے
کہ زہر ہی زہر کی دوا ہے

صبا اکرام

نظم

ہمارے درمیاں اے دوست
یہ جو استعارہ پھول کا مہکا رہا
بندھن میں ہم کو باندھ کر
کھلتا رہا اک عمر
میرا دل
بہلتا ہی نہیں اب ان کی باتوں سے
کبھی تم خوشبوؤں کا ذکر کرتے ہو
تو میری ناک میں تیزاب کی بو پھیل جاتی ہے
تمہاری شاعری بار گراں اب ہے سماعت پر
کہ زرخیزی گلوں سے اس میں قائم ہے
وہ گل
کہ جن کو میں دیکھوں کبھی
زیب گلو ان کے
جو آئے ہیں مسل کر پھول ہی جیسا حسیں پیکر
بہت سے لوگ قاتل کے
گلے میں پھول کی مالائیں لٹکا کر
اسے اشکوں کا نذرانہ بھی دیتے ہیں
تو میں منصف کا چہرہ دیکھ کر حیران ہوتا ہوں
جنونی بھیڑ میں جا کر
سمٹ کر پھیل جاتا ہوں
اور اپنے درد کو سنسان کرتا ہوں

رفیع اللہ میاں

نظم

دو آنکھوں میں
ماضی حال اور مستقبل کے خواب جگائے
اک تیزاب سے مجھ کو اندھا کر کے
اک ٹیسٹ ٹیوب ذرا سا ٹیڑھا کر کے

مصحف اقبال توصیفی

نظم

منظر پس منظر
خاموش ہوتا ہے
پیڑ ساکت کھڑے رہتے ہیں
پتے ہلتے ہیں
پر نہ اڑتے ہیں
کہیں دور سے ریل کی سیٹیاں ابھرتی ہیں
اور نزدیک کے ریس کورس سے
بھاگتے تیزابی گھوڑوں کی ٹاپوں سے زیادہ
نو دولتیے گدھوں کی چیخ و پکار سے
کان پھٹنے لگتے ہیں
ہر کہیں کانوں کو
روئی میسر نہیں آتی ہے
کم از کم
آنکھیں موند لو
(یہ تمہارے بس میں ہے)
اندھیارے میں آوازیں زائل ہو جائیں گی
ذہن کے کالے پردے پر
کوئی تصویر نہیں ابھرے گی
کانوں میں
کوئی آواز نہیں آئے گی
گونگے بہرے اندھے ہو جاؤ
شاعری مت کرو
اور اندھیارے میں دور تلک دیکھتے جاؤ
دیر تلک
بے صبح و شام
بے جسم و جان
آکاش آسمان
دیکھتے جاؤ
شاید اسی لمحہ
یا کل پرسوں
یا صدیاں گزر جانے کے بعد
زمین اڑ جانے
آسمان بکھر جانے کے بعد
ہر شے کے مر جانے کے بعد
دھول سمٹ جائے گی
دھند مٹے گی
اندھیارے میں چاروں جانب
آئینہ ابھرے گا
کانوں میں نقرئی گھنٹیوں کے مدھم نغموں
کی شرابوں کا نشہ گونجے گا
چاروں سمت سنہری سفید موتی
سا چمکتا چہرا ابھرے گا
چاروں جانب سر سگندھ کی مالائیں
لہرائیں گی
نت نویلی صدا کی دوشیزہ
شاعری کی پالکی پر سوار آئے گی
مجھ کو
دور بدیس لے جائے گی

خلیل مامون

نظم

مجھے بچانا ہے
اس کائناتی ورثے کو
سرابوں کی تیزابی پھنکار کے ساتھ
زلزلوں کی جلتی پیٹھ کو ڈھال بنا کر
اور آگ کے فوارے کی کمک لے کر
جو کسی قدیم سیاف کی
پر خراش نیام میں محبوس ہے
اس لامتناہی خرابے کے لیے
مجھے ایجاد کرنی ہے ایک نئی بہار
موت کی مایوس اور مضمحل غضب ناکی کو
وقت کے غیر متوازن بوجھ سے تڑخی ہوئی زمینوں پر
از سر نو بالیدہ کر کے

احمد جاوید

نظم

نہ جانے کیا ملا کیا حسرتیں باقی رہیں دل میں
ابھی دنیا سے کیا کچھ اور لینا ہے
مجھے تو یہ خبر ہے
یہ دہکتی آگ
سب کچھ خاک کر دے گی
فقط میرا نشاں
اٹھتا دھواں
چاروں طرف رشتوں پہ میلی راکھ چھڑکاتا
یہ تیزابی
رگ و پے میں پنپتا زہر
مغرورانہ بے زاری
نگہ داری کی دیواریں کھڑی کرتی
یہ سب اس آگ میں کیوں جل نہیں جاتے
ابھی دنیا سے کیا کچھ مانگنا ہے
کیا جھپٹنا ہے
میں سائل ہوں لٹیرا ہوں
ہوئی ہے مسخ یوں صورت کی پہچانی نہیں جاتی
میں کب تک جھونکتا جاؤں گا یہ تنور
لہکی آگ سے کب نور پھوٹے گا
کوئی ننھی کرن دھیمی سی لو
مجھ سے کہیں تو چاندنی پھیلے
میں کب دنیا کو لوٹاؤں گا اس کے پیار کے تحفے

ابرارالحسن

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے