کی تلاش کا نتیجه | موضو - نظم, صفحہ sa.dak

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "sa.dak"

نظم کے متعلقہ نتیجہ "sa.dak"

نظم

جس کا ڈر تھا مجھے معلوم پڑا لوگوں سے
پھر وہ خوش بخت پلٹ آیا تری دنیا میں
جس کے جانے پہ مجھے تو نے جگہ دی دل میں
میری قسمت میں ہی جب خالی جگہ لکھی تھی
تجھ سے شکوہ بھی اگر کرتا تو کیسے کرتا
میں وہ سبزہ تھا جسے روند دیا جاتا ہے
میں وہ جنگل تھا جسے کاٹ دیا جاتا ہے
میں وہ در تھا جسے دستک کی کمی کھاتی ہے
میں وہ منزل تھا جہاں ٹوٹی سڑک جاتی ہے
میں وہ گھر تھا جسے آباد نہیں کرتا کوئی
میں تو وہ تھا کہ جسے یاد نہیں کرتا کوئی

تہذیب حافی

نظم

دوپہر کی گرمی میں
بے ارادہ قدموں سے
اک سڑک پہ چلتا ہوں
تنگ سی سڑک پر ہیں
دونوں سمت دوکانیں
خالی خالی آنکھوں سے
ہر دکان کا تختہ
صرف دیکھ سکتا ہوں
اب پڑھا نہیں جاتا
لوگ آتے جاتے ہیں
پاس سے گزرتے ہیں
پھر بھی کتنے دھندلے ہیں
سب ہیں جیسے بے چہرہ
شور ان دکانوں کا
راہ چلتی اک گالی
ریڈیو کی آوازیں
دور کی صدائیں ہیں
آ رہی میلوں سے
جو بھی سن رہا ہوں میں
جو بھی دیکھتا ہوں میں
خواب جیسا لگتا ہے
ہے بھی اور نہیں بھی ہے
دوپہر کی گرمی میں
بے ارادہ قدموں سے
اک سڑک پہ چلتا ہوں
سامنے کے نکڑ پر
نل دکھائی دیتا ہے
سخت کیوں ہے یہ پانی
کیوں گلے میں پھنستا ہے
میرے پیٹ میں جیسے
گھونسہ ایک لگتا ہے
آ رہا ہے چکر سا
جسم پر پسینہ ہے
اب سکت نہیں باقی
آج تیسرا دن ہے
آج تیسرا دن ہے

جاوید اختر

نظم

محبت کے راستے میں
ایک سڑک ہے
جو محبت کی طرف نہیں جاتی
اور ایک پل ہے
جو کسی سڑک یا دریا کو
پار کرنے میں استعمال نہیں ہوتا

ذیشان ساحل

نظم

سرخی سڑک پر کٹتی دیکھی
سانس بھی بھیڑ میں گھٹتی دیکھی
آتش بازی چھٹتی دیکھی
لطف کی دولت لٹتی دیکھی

اکبر الہ آبادی

نظم

بہت سے کام ہیں
لپٹی ہوئی دھرتی کو پھیلا دیں
درختوں کو اگائیں
ڈالیوں پہ پھول مہکا دیں
پہاڑوں کو قرینے سے لگائیں
چاند لٹکائیں
خلاؤں کے سروں پہ نیلگوں آکاش
پھیلائیں
ستاروں کو کریں روشن
ہواؤں کو گتی دے دیں
پھدکتے پتھروں کو پنکھ دے کر نغمگی دے دیں
لبوں کو مسکراہٹ
انکھڑیوں کو روشنی دے دیں
سڑک پر ڈولتی پرچھائیوں کو
زندگی دے دیں

ندا فاضلی

نظم

لمبی چوڑی سڑک کے دامن پر
قمقمے سہمے سہمے جلتے ہیں
جیسے اکثر بڑے گھرانوں میں
فاقہ کش رشتہ دار پلتے ہیں

مصطفی زیدی

نظم

جو سجائی جاتی ہے رات کو وہ ہماری بزم خیال ہے
جو سڑک پہ ہوتا ہے رات دن وہ مشاعرہ کوئی اور ہے

دلاور فگار

نظم

تکتے رہتے ہو اس سڑک کی طرف
دفن جن میں کئی کہانیاں ہیں
دفن جن میں کئی جوانیاں ہیں
جس پہ اک ساتھ بھاگی پھرتی ہیں
خالی جیبیں بھی اور تجوریاں بھی
جانے کس کا ہے انتظار تمہیں

کیفی اعظمی

نظم

سفید کاغذ پر
پنسل کے چلنے کی آواز
بہت کم ہے
سڑک پر ٹینک گزرنے کی آواز
اس سے کچھ زیادہ ہے
اور شاید میری آواز
ان دونوں آوازوں سے زیادہ ہے

ذیشان ساحل

نظم

ایک دوشیزہ سڑک پر دھوپ میں ہے بے قرار
چوڑیاں بجتی ہیں کنکر کوٹنے میں بار بار

جوش ملیح آبادی

نظم

ایک ہے ایسی لڑکی جس سے تم نے ہنس کر بات نہ کی
کبھی نہ دیکھا اس کی آنکھوں میں چمکے کیسے موتی
کبھی نہ سوچا تم سے ایسی باتیں وہ کیوں کہتی ہے
کبھی نہ سمجھا ملتے ہو تو گھبرائی کیوں رہتی ہے
کیسے اس رخسار کی رنگت سرسوں جیسی زرد ہوئی
جب تک ملی نہیں تھی تم سے وہ ایسی تنہا تو نہ تھی
مل کر آنکھ بہانے سے وہ کب تک آنسو روکے گی
اس کے ہونٹوں کی لرزش بھی تم نے کبھی نہیں دیکھی
کیوں ایسی سنسان سڑک پر اسے اکیلا چھوڑ دیا
اس کا دل تو اچھا دل تھا جس کو تم نے یوں توڑ دیا
وہ کچھ نادم وہ کچھ حیراں رستہ ڈھونڈا کرتی تھی
ڈھلتی دھوپ میں اپنا بے کل سایہ دیکھ کے ہنستی تھی
آخر سورج ڈوب گیا اور راہ میں اس کو شام ہوئی

فہمیدہ ریاض

نظم

کیسا سخت طوفاں تھا
کتنی تیز بارش تھی
اور میں ایسے موسم میں
جانے کیوں بھٹکتی تھی
وہ سڑک کے اس جانب
روشنی کے کھمبے سے!
سر لگائے استادہ
آنے والے گاہک کے
انتظار میں گم تھی!
خال و خد کی آرائش
بہہ رہی تھی بارش میں
تیر نوک مژگاں کے
مل گئے تھے مٹی میں
گیسوؤں کی خوش رنگی
اڑ رہی تھی جھونکوں میں
میں نے دل میں یہ سوچا
آب و باد کا ریلا!
اس کو راکھ کر دے گا
یہ سجا بنا چہرہ!
کیا ڈراؤنا ہوگا
پھر بھی اس کو لے جانا
آنے والے گاہک کا
اپنا حوصلہ ہوگا

زہرا نگاہ

نظم

دیکھو غریب کتنی زحمت اٹھا رہا ہے
گلیوں میں بھیڑ والی رکشا چلا رہا ہے
محروم ہے اگرچہ دنیا کی نعمتوں سے
ہر بوجھ زندگی کا ہنس کر اٹھا رہا ہے
برسات میں بھی دیکھو پھرتا ہوا سڑک پر
رکشا بھی بھیگتا ہے خود بھی نہا رہا ہے
گرمی کی دھوپ میں بھی رکتا نہیں ہے گھر میں
پر پیچ راستوں کے پھیرے لگا رہا ہے
سردی سے کانپتا ہے کپڑے پھٹے ہوئے ہیں
ٹھنڈی ہوا سے خود کو کیسے بچا رہا ہے
مستی میں دوڑتا ہے رکشا لیے سڑک پر
نغمہ کوئی سریلا اب گنگنا رہا ہے
رکشے کے پیڈلوں پر رکھے ہیں پاؤں دونوں
آنکھیں ہیں راستے پر گھنٹی بجا رہا ہے
ماں باپ منتظر ہیں گھر پر سبھی کے عادلؔ
بچوں کو اب وہ لینے اسکول جا رہا ہے

عادل اسیر دہلوی

نظم

یہ دیس مفلس و نادار کج کلاہوں کا
یہ دیس بے زر و دینار بادشاہوں کا
کہ جس کی خاک میں قدرت ہے کیمیائی کی
یہ نائبان خداوند ارض کا مسکن
یہ نیک پاک بزرگوں کی روح کا مدفن
جہاں پہ چاند ستاروں نے جبہ سائی کی
نہ جانے کتنے زمانوں سے اس کا ہر رستہ
مثال خانۂ بے خانماں تھا دربستہ

فیض احمد فیض

نظم

کل رات
وہ تھکا ہوا
چپ چپ
اداس اداس
سنتا رہا سڑک سے گزرتی بسوں کا شور

ندا فاضلی

نظم

گئے لیٹنے رات ڈھلتے ہوئے
اٹھے صبح کو آنکھ ملتے ہوئے
نہا دھو کے کپڑے بدلتے ہوئے
اٹھائی کتاب اور چلتے ہوئے
سویرے کا جب تک کہ اسکول ہے
یہی اپنا ہر روز معمول ہے
کھڑے ہیں سڑک پر کہ اب آئی بس
گزرتا ہے اک اک منٹ اک برس
بس آئی تو رش اس قدر پیش و پس
کہ اللہ بس اور باقی ہوس
بڑھے ہم بھی چڑھنے کو جب سب کے ساتھ
تو ہینڈل پہ تھا پاؤں پیڈل پہ ہاتھ
پسنجر کی وہ بھیڑ وہ بس کا گیٹ
گزرتے ہیں مچھر جہاں پر سمیٹ
کوئی ہو گیا چوٹ کھا کر فلیٹ
کسی کی ہے کہنی کسی کا ہے پیٹ
کھڑے ہوں کہاں پاؤں رکھیں کدھر
اندھیرا ادھر ہے اندھیرا ادھر
مگر حکم چیکر کا ہے آئیے
کھڑے کیوں ہیں آگے بڑھے جائیے
جہاں میں جہاں تک جگہ پائیے
کھسکتے کھسکتے چلے جائیے
ستاروں سے آگے جہاں اور ہیں
زمیں اور ہیں آسماں اور ہیں

کلیم عاجز

نظم

گھٹ گیا اندھیرے کا آج دم اکیلے میں
ہر نظر ٹہلتی ہے روشنی کے میلے میں
آج ڈھونڈھنے پر بھی مل سکی نہ تاریکی
موت کھو گئی شاید زندگی کے ریلے میں
اس طرح سے ہنستی ہیں آج دیپ مالائیں
شوخیاں کریں جیسے ساتھ مل کے بالائیں
ہر گلی نئی دلہن ہر سڑک حسینہ ہے
ہر دیہات انگوٹھی ہے ہر نگر نگینہ ہے
پڑ گئی ہے خطرے میں آج یم کی یمراجی
موت کے بھی ماتھے پر موت کا پسینہ ہے
رات کے کروں میں ہے آج رات کا کنگن
اک سہاگنی بن کر چھائی جاتی ہے جوگن
قمقمے جلے گھر گھر روشنی ہے پٹ پٹ پر
لے کے کوئی منگل گھٹ چھا گیا ہے گھٹ گھٹ پر
روشنی کرو لیکن فرض پر نہ آنچ آئے
ہو نگاہ سیما پر اور کان آہٹ پر
ہوشیار ان سے بھی جو نگاہ پھیرے ہیں
پاک ہی نہیں تنہا اور بھی لٹیرے ہیں
چھوڑ اپنی ناپاکی یا بدل دے اپنی دھن
موت لے گا یا جیون دو میں جس کو چاہے چن
ہم ہیں کرشن کی لیلا ہم ہیں ویر بھارت کے
ہم نکل ہیں ہم سہدیو ہم ہیں بھیم ہم ارجن
دروپدیؔ سے درگھٹنا دور کر کے چھوڑیں گے
اے سمے کے دریودھن چور کر کے چھوڑیں گے
قبر ہو سمادھی ہو سب کو جگمگائیں گے
دھوم سے شہیدوں کا سوگ ہم منائیں گے
تم سے کام لینا ہے ہم کو دیپ مالاؤ
سارے دیپ کی لو سے دل کی لو بڑھائیں گے
سب سے گرمیاں لے کر سینے میں چھپانا ہے
دل کو اس دوالی سے اگنی بم بنانا ہے

نذیر بنارسی

نظم

وہ شام کے وقت خوں میں لت پت
سڑک کے کنارے پڑا ہوا تھا
گزرنے والوں سے کہہ رہا تھا
ہمیں ہمارے محافظوں سے
نجات کا راستہ بتاؤ
وہ خواہش اقتدار و دولت میں
ہم کو نیلام کر رہے ہیں
اخوت و اتحاد کا درد دینے والے
خود اپنے بچوں کے خوں سے
حرص و ہوس کی شمعیں جلا رہے ہیں
ہماری اقدار
آج متروک فیشنوں کے لباس کی طرح
ان کی نظروں سے گر چکی ہیں
اب ان کی اولاد ان کی ریشہ دوانیوں سے پناہ
تازہ بتازہ نشوں میں ڈھونڈتی ہے
انہی کی شہ پا کے نسل نو
اپنی پیاس اک دوسرے کے خوں سے بجھا رہی ہے
یہ سنگ دل جشن مرگ انبوہ بے گناہاں منا رہے ہیں
کوئی ہمیں ان نجیب صورت
حریص بے مہر کرگوں سے
نجات کا راستہ بتاؤ

ضیا جالندھری

نظم

سلاخوں سے ادھر
کچھ درخت، ایک سڑک، کتے کی زنجیر تھامے ایک آدمی
اور ایک ڈور جس پر رنگ برنگے کپڑے سوکھ رہے ہیں
جسموں کے بغیر یہ کپڑے، بچوں کے بغیر یہ میدان
محبت کے بغیر یہ راستے
دنیا کتنی چھوٹی نظر آتی ہے
رنگ برنگے کپڑے سوکھ جانے پر
ایک عورت آئے گی
تب ایک ایک کر کے یہ قمیضیں، پتلونیں اور فراکیں
اپنے اپنے جسم حاصل کر لیں گے
تب میدان بچوں سے
اور بچے خوشی سے بھر جائیں گے
یہ چھوٹی سی کائنات رنگوں سے بھر جائے گی
اتنے بہت سے رنگ
اے عورت، اتنے بہت سے رنگ!

ثروت حسین

نظم

کھلی سڑک ویران پڑی تھی
بہت عجب تھی شام
اونچا قد اور چال نرالی
نظریں خوں آشام

منیر نیازی

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے