Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "betaa"

Nazm MATCHES FOR "betaa"

Nazm

banjara-nama

jab chalte chalte raste me.n ye gaun tirii rah jaavegii
ik badhiyaa terii miTTii par phir ghaas na charne aavegii
ye khep jo tuu ne laadii hai sab hisso.n me.n baT jaavegii
dhii puut ja.nvaa.ii beTaa kyaa banjaaran paas na aavegii
sab ThaaTh pa.Daa rah jaavegaa jab laad chalegaa banjaaraa

Nazeer Akbarabadi
Nazm

ye bachcha kis ka bachcha hai

is bhuuk ke dukh kii duniyaa me.n
ye kaisaa sukh kaa sapnaa hai
vo kis dhartii ke Tuk.De hai.n
ye kis duniyaa kaa hissa hai
5
ham jis aadam ke beTe hai.n
ye us aadam kaa beTaa hai
ye aadam ek hii aadam hai
ye goraa hai yaa kaalaa hai
ye dhartii ek hii dhartii hai
ye duniyaa ek hii duniyaa hai
sab ik daataa ke bande hai.n
sab bando.n kaa ik daataa hai
kuchh puurab pachchham farq nahii.n
is dhartii par haq sab kaa hai
6
ye tanhaa bachcha be-chaara
ye bachcha jo yahaa.n baiThaa hai

Ibn۔e۔Insha
Nazm

muflisi

jab aadmii ke haal pe aatii hai muflisii
kis kis tarah se us ko sataatii hai muflisii
pyaasaa tamaam roz biThaatii hai muflisii
bhuukaa tamaam raat sulaatii hai muflisii
ye dukh vo jaane jis pe ki aatii hai muflisii
kahiye to ab hakiim kii sab se ba.Dii hai shaa.n
ta.aziim jis kii karte hai.n to ab aur KHaa.n
muflis hu.e to hazrat-e-luqmaa.n kiyaa hai yaa.n
iisaa bhii ho to ko.ii nahii.n puuchhtaa miyaa.n
hikmat hakiim kii bhii Dubaatii hai muflisii
jo ahl-e-fazl aalim o faazil kahaate hai.n
muflis hu.e to kalma talak bhuul jaate hai.n
vo jo Gariib-Gurabaa ke la.Dke pa.Dhaate hai.n
un kii to umr bhar nahii.n jaatii hai muflisii
muflis kare jo aan ke mahfil ke biich haal
sab jaane.n roTiyo.n kaa ye Daalaa hai is ne jaal
gir gir pa.De to ko.ii na liye use sambhaal
muflis me.n hove.n laakh agar ilm aur kamaal
sab KHaak bech aa ke milaatii hai muflisii
jab roTiyo.n ke baTne kaa aa kar pa.De shumaar
muflis ko deve.n ek tava.ngar ko chaar chaar
gar aur maa.nge vo to use jhi.Dke.n baar baar
muflis kaa haal aah bayaa.n kyaa karuu.n mai.n yaar
muflis ko is jagah bhii chabaatii hai muflisii
muflis kii kuchh nazar nahii.n rahtii hai aan par
detaa hai apnii jaan vo ek ek naan par
har aan TuuT pa.Dtaa hai roTii ke KHvaan par
jis tarah kutte la.Dte hai.n ik ustuKHvaan par
vaisaa hii mufliso.n ko la.Daatii hai muflisii
kartaa nahii.n hayaa se jo ko.ii vo kaam aah
muflis kare hai us ke ta.ii.n insiraam aah
samjhe na kuchh halaal na jaane haraam aah
kahte hai.n jis ko sharm-o-hayaa na.ng-o-naam aah
vo sab hayaa-o-sharm u.Daatii hai muflisii
ye muflisii vo shai hai ki jis ghar me.n bhar ga.ii
phir jitne ghar the sab me.n usii ghar ke dar ga.ii
zan bachche rote hai.n goyaa naanii guzar ga.ii
ham-saaya puuchhte hai.n ki kyaa daadii mar ga.ii
bin murde ghar me.n shor machaatii hai muflisii
laazim hai gar Gamii me.n ko.ii shor-Gul machaa.e
muflis baGair Gam ke hii kartaa hai haa.e haa.e
mar jaave gar ko.ii to kahaa.n se use uThaa.e
is muflisii kii KHvaariyaa.n kyaa kyaa kahuu.n mai.n haa.e
murde ko be kafan ke ga.Daatii hai muflisii
kyaa kyaa muflisii kii kahuu.n KHvaarii phaka.Diyaa.n
jhaa.Duu baGair ghar me.n bikhartii hai.n jhaka.Diyaa.n
kone me.n jaale lapTe hai.n chhappar me.n maka.Diyaa.n
paisaa na hove jin ke jalaane ko lak.Diyaa.n
dariyaa me.n un ke murde bahaatii hai muflisii
biibii kii nath na la.Dko.n ke haatho.n ka.De rahe
kap.De miyaa.n ke baniye ke ghar me.n pa.De rahe
jab ka.Diyaa.n bik ga.ii.n to kha.nDar me.n pa.De rahe
zanjiir ne kivaa.D na patthar ga.De rahe
aaKHir ko ii.nT ii.nT khudaatii hai muflisii
naqqaash par bhii zor jab aa muflisii kare
sab rang dam me.n kar de musavvir ke kirkire
suurat bhii us kii dekh ke mu.nh khi.nch rahe pare
tasviir aur naqsh me.n kyaa rang vo bhare
us ke to mu.nh kaa rang u.Daatii hai muflisii
jab KHuub-ruu pe aan ke pa.Dtaa hai din siyaah
phirtaa hai bose detaa hai har ik ko KHvaah-maKHvaah
hargiz kisii ke dil ko nahii.n hotii us kii chaah
gar husn ho hazaar ruupe kaa to us ko aah
kyaa kau.Diyo.n ke mol bikaatii hai muflisii
us KHuub-ruu ko kaun de ab daam aur diram
jo kau.Dii kau.Dii bose ko raazii ho dam-ba-dam
Topii puraanii do to vo jaane kulaah-e-jism
kyuu.nkar na jii ko us chaman-e-husn ke ho Gam
jis kii bahaar muft luTaatii hai muflisii
aashiq ke haal par bhii jab aa muflisii pa.De
ma.ashuuq apne paas na de us ko baiThne
aave jo raat ko to nikaale vahii.n use
is Dar se ya.anii raat o dhannaa kahii.n na de
tohmat ye aashiqo.n ko lagaatii hai muflisii
kaise hii dhuum-dhaam kii ranDii ho KHush-jamaal
jab muflisii ho kaan pa.De sar pe us ke jaal
dete hai.n us ke naach ko ThaTThe ke biich Daal
naache hai vo to farsh ke uupar qadam sambhaal
aur us ko u.ngliyo.n pe nachaatii hai muflisii
us kaa to dil Thikaane nahii.n bhaav kyaa bataa.e
jab ho phaTaa dupaTTa to kaahe se mu.nh chhupaa.e
le shaam se vo sub.h talak go ki naache gaa.e
auro.n ko aaTh saat to vo do Take hii paa.e
is laaj se ise bhii lajaatii hai muflisii
jis kasbii ranDii kaa ho halaakat se dil hazii.n
rakhtaa hai us ko jab ko.ii aa kar tamaash-bii.n
ik paun paise tak bhii vo kartii nahii.n nahii.n
ye dukh usii se puuchhiye ab aah jis ke ta.ii.n
sohbat me.n saarii raat jagaatii hai muflisii
vo to ye samjhe dil me.n ki Dhelaa jo paa.uu.ngii
dam.Dii ke paan dam.Dii ke missii ma.ngaa.uu.ngii
baaqii rahii chhadaam so paanii bharaa.uu.ngii
phir dil me.n sochtii hai ki kyaa KHaak khaa.uu.ngii
aaKHir chabiinaa us kaa bhunaatii hai muflisii
jab muflisii se hove kalaavant kaa dil udaas
phirtaa hai le tambuure ko har ghar ke aas-paas
ik paav ser aane kii dil me.n lagaa ke aas
gorii kaa vaqt hove to gaataa hai vo babhaas
yaa.n tak havaas us ke u.Daatii hai muflisii
muflis biyaah beTii kaa kartaa hai bol bol
paisaa kahaa.n jo jaa ke vo laave jahez mol
joruu kaa vo galaa ki phuuTaa ho jaise Dhol
ghar kii halaal-KHorii talak kartii hai ThiThol
haibat tamaam us kii uThaatii hai muflisii
beTe kaa biyaah ho to na byaahii na saathii hai
ne raushnii na baaje kii aavaaz aatii hai
maa.n piichhe ek mailii chadar o.Dhe jaatii hai
beTaa banaa hai duulhaa to baavaa baraatii hai
muflis kii ye baraat cha.Dhaatii hai muflisii
gar byaah kar chalaa hai sahar ko to ye balaa
shahdaar naanaa hiij.Daa aur bhaaT mu.nDcha.Daa
khii.nche hu.e use chale jaate hai.n jaa-ba-jaa
vo aage aage la.Dtaa hu.aa jaataa hai chalaa
aur piichhe Tap.Diyo.n ko bajaatii hai muflisii
darvaaze par zanaane bajaate hai.n taaliyaa.n
aur ghar me.n baiThii Domnii detii hai.n gaaliyaa.n
maalan gale kii haar ho dau.Dii le Daaliyaa.n
saqqaa kha.Daa sunaataa hai baate.n razaaliyaa.n
ye KHvaarii ye KHaraabii dikhaatii hai muflisii
ko.ii shuum be-hayaa ko.ii bolaa nikhaTTuu hai
beTii ne jaanaa baap to meraa nikhaTTuu hai
beTe pukaarte hai.n ki baabaa nikhaTTuu hai
biibii ye dil mai.n kahtii hai achchhaa nikhaTTuu hai
aaKHir nikhaTTuu naam dharaatii hai muflisii
muflis kaa dard dil me.n ko.ii Thaantaa nahii.n
muflis kii baat ko bhii ko.ii maantaa nahii.n
zaat aur hasab-nasab ko ko.ii jaantaa nahii.n
suurat bhii us kii phir ko.ii pahchaantaa nahii.n
yaa.n tak nazar se us ko giraatii hai muflisii
jis vaqt muflisii se ye aa kar hu.aa tabaah
phir ko.ii is ke haal pa kartaa nahii.n nigaah
daaliidarii kahe ko.ii Thahraa de ruu-siyaah
jo baate.n umr bhar na sunii hove.n us ne aah
vo baate.n us ko aa ke sunaatii hai.n muflisii
chuulhaa tavaanaa paanii ke maTke me.n aabii hai
piine ko kuchh na khaane ko aur ne rakaabii hai
muflis ke saath sab ke ta.ii.n be-hijaabii hai
muflis kii joruu sach hai ki yaa.n sab kii bhaabii hai
izzat sab us ke dil kii ga.nvaatii hai muflisii
kaisaa hii aadmii ho par iflaas ke tufail
ko.ii gadhaa kahe use Thahraa de ko.ii bail
kap.De phaTe tamaam ba.Dhe baal phail phail
mu.nh KHushk daa.nt zard badan par jamaa hai mail
sab shakl qaidiyo.n kii banaatii hai muflisii
har aan dosto.n kii mohabbat ghaTaatii hai
jo aashnaa hai.n un kii to ulfat ghaTaatii hai
apne kii mehr Gair kii chaahat ghaTaatii hai
sharm-o-hayaa o izzat-o-hurmat ghaTaatii hai
haa.n naaKHun aur baal ba.Dhaatii hai muflisii
jab muflisii hu.ii to sharaafat kahaa.n rahii
vo qadr zaat kii vo najaabat kahaa.n rahii
kap.De phaTe to logo.n me.n izzat kahaa.n rahii
ta.aziim aur tavaazo.a kii baabat kahaa.n rahii
majlis kii juutiyo.n pe biThaatii hai muflisii
muflis kisii kaa la.Dkaa jo le pyaar se uThaa
baap us kaa dekhe haath kaa aur paa.nv kaa ka.Daa
kahtaa hai ko.ii juutii na leve kahii.n churaa
naT-khaT uchakkaa chor daGaabaaz gaTh-kaTaa
sau sau tarah ke aib lagaatii hai muflisii
rakhtii nahii.n kisii kii ye Gairat kii aan ko
sab KHaak me.n milaatii hai hurmat kii shaan ko
sau mehnato.n me.n us kii khapaatii hai jaan ko
chorii pe aa ke Daale hii muflis ke dhyaan ko
aaKHir nadaan bhiik ma.ngaatii hai muflisii
duniyaa me.n le ke shaah se ai yaar taa-faqiir
KHaaliq na muflisii me.n kisii ko kare asiir
ashraaf ko banaatii hai ik aan me.n faqiir
kyaa kyaa mai.n muflisii kii KHaraabii kahuu.n 'naziir'
vo jaane jis ke dil ko jalaatii hai muflisii

Nazeer Akbarabadi
Nazm

marhum

mai.n phir se paas ho kar aa gayaa huu.n thapthapaa.o
tuu aaKHir meraa beTaa hai kaho maa.n ko chi.Dhaa.o
mujhe phir se usii halvaa.ii kii laa kar miThaa.ii do

Manoj Azhar
Nazm

hubb-e-watan

ai sip.har-e-barii.n ke sayyaaro
ai fazaa-e-zamii.n ke gul-zaaro
ai pahaa.Do.n kii dil-fareb fazaa
ai lab-e-juu kii ThanDii ThanDii havaa
ai anaadil ke naGma-e-saharii
ai shab-e-maahtaab taaro.n bharii
ai nasiim-e-bahaar ke jho.nko
dahr-e-naa-paa.edaar ke dhoko
tum har ik haal me.n ho yuu.n to aziiz
the vatan me.n magar kuchh aur hii chiiz
jab vatan me.n hamaaraa thaa ramnaa
tum se dil baaG baaG thaa apnaa
tum mirii dil-lagii ke saamaa.n the
tum mire dard-e-dil ke darmaa.n the
tum se kaTtaa thaa ra.nj-e-tanhaa.ii
tum se paataa thaa dil shakebaa.ii
aan ik ik tumhaarii bhaatii thii
jo adaa thii vo jii lubhaatii thii
karte the jab tum apnii Gam-KHvaarii
dho.ii jaatii thii.n kulfate.n saarii
jab havaa khaane baaG jaate the
ho ke KHush-haal ghar me.n aate the
baiTh jaate the jab kabhii lab-e-aab
dho ke uThte the dil ke daaG shitaab
koh o sahraa o aasmaan o zamii.n
sab mirii dil-lagii kii shakle.n thii.n
par chhuTaa jis se apnaa mulk o dayaar
jii hu.aa tum se KHud-ba-KHud bezaar
na gulo.n kii adaa KHush aatii hai
na sadaa bulbulo.n kii bhaatii hai
sair-e-gulshan hai jii kaa ik janjaal
shab-e-mahtaab jaan ko hai vabaal
koh o sahraa se taa lab-e-dariyaa
jis taraf jaa.e.n jii nahii.n lagtaa
kyaa hu.e vo din aur vo raate.n
tum me.n aglii sii ab nahii.n baate.n
ham hii Gurbat me.n ho ga.e kuchh aur
yaa tumhaare badal ga.e kuchh taur
go vahii ham hai.n aur vahii duniyaa
par nahii.n ham ko lutf duniyaa kaa
ai vatan ai mire bahisht-e-barii.n
kyaa hu.e tere aasmaan o zamii.n
raat aur din kaa vo samaa.n na rahaa
vo zamii.n aur vo aasmaa.n na rahaa
terii duurii hai morid-e-aalaam
tere chhuTne se chhuT gayaa aaraam
kaaTe khaataa hai baaG bin tere
gul hai.n nazro.n me.n daaG bin tere
miT gayaa naqsh kaamraanii kaa
tujh se thaa lutf zindagaanii kaa
jo ki rahte hai.n tujh se duur sadaa
in ko kyaa hogaa zindagii kaa mazaa
ho gayaa yaa.n to do hii din me.n ye haal
tujh bin ek ek pal hai ik ik saal
sach bataa to sabhii ko bhaataa hai
yaa ki mujh se hii teraa naataa hai
mai.n hii kartaa huu.n tujh pe jaan nisaar
yaa ki duniyaa hai terii aashiq-e-zaar
kyaa zamaane ko tuu aziiz nahii.n
ai vatan tuu to aisii chiiz nahii.n
jin o insaan kii hayaat hai tuu
murG o maahii kii kaa.enaat hai tuu
hai nabaataat kaa numuu tujh se
ruukh tujh bin hare nahii.n hote
sab ko hotaa hai tujh se nashv-o-numaa
sab ko bhaatii hai terii aab-o-havaa
terii ik musht-e-KHaak ke badle
luu.n na hargiz agar bahisht mile
jaan jab tak na ho badan se judaa
ko.ii dushman na ho vatan se havaa

Altaf Hussain Hali
Nazm

sarkari aur ghair-sarkari do iden

beTaa kahtaa thaa ki kal shaitaan roza rakkhegaa
baap bolaa teraa abbaa jaan roza rakkhegaa

Dilawar Figar
Nazm

munajat-e-bewa

(1)
ai sab se avval aur aaKHir
jahaa.n-tahaa.n, haazir aur naazir
ai sab daanaa.o.n se daanaa
saare tavaanaa.o.n se tavaanaa
ai baalaa, har baalaa-tar se
chaa.nd se suuraj se ambar se
ai samjhe buujhe bin suujhe
jaane-pahchaane bin buujhe
sab se anokhe sab se niraale
aa.nkh se ojhal dil ke ujaale
ai andho.n kii aa.nkh ke taare
ai la.ng.De luulo.n ke sahaare
naatiyo.n se chhoTo.n ke naatii
saathiyo.n se bichh.Do.n ke saathii
naav jahaa.n kii khene vaale
dukh me.n tasallii dene vaale
jab ab tab tujh saa nahii.n ko.ii
tujh se hai.n sab tujh saa nahii.n ko.ii
jot hai terii jal aur thal me.n
baas hai terii phuul aur phal me.n
har dil me.n hai teraa baseraa
tuu paas aur ghar duur hai teraa
raah tirii dushvaar aur suk.Dii
naam tiraa rah-giir kii lak.Dii
tuu hai Thikaanaa miskiino.n kaa
tuu hai sahaaraa Gamgiino.n kaa
tuu hai akelo.n kaa rakhvaalaa
tuu hai a.ndhere ghar kaa ujaalaa
laaguu achchhe aur bure kaa
KHvaahaa.n khoTe aur khare kaa
bed niraase biimaaro.n kaa
gaahak mande baazaaro.n kaa
soch me.n dil bahlaane vaale
biptaa me.n yaad aane vaale
(2)
ai be-vaaris gharo.n ke vaaris
be-baazuu be-paro.n ke vaaris
be-aaso.n kii aas hai tuu hii
jaagte sote paas hai tuu hii
bas vaale hai.n yaa be-bas hai.n
tuu nahii.n jin kaa vo be-kas hai.n
saathii jin kaa dhyaan hai teraa
dusraayat kii vahaa.n nahii.n parvaa
dil me.n hai jin ke terii ba.Daa.ii
ginte hai.n vo parbat ko raa.ii
bekas kaa Gam-KHvaar hai tuu hii
burii banii kaa yaar hai tuu hii
dukhiyaa dukhii yatiim aur beva
tere hii haath un sab kaa hai khevaa
tuu hii maraz de tuu hii davaa de
tuu hii davaa-daaruu me.n shifaa de
tuu hii pilaa.e zahr ke pyaale
tuu hii phir amrit zahr me.n Daale
tuu hii dilo.n me.n aag lagaa.e
tuu hii dilo.n kii lagii bujhaa.e
chumkaare chumkaar ke maare
maare maar ke phir chumkaare
pyaar kaa tere puuchhnaa kyaa hai
maar me.n bhii ik terii mazaa hai
(3)
ai rahmat aur haibat vaale
shafqat aur dabaaGat vaale
ai aTkal aur dhyaan se baahar
jaan se aur pahchaan se baahar
aql se ko.ii paa nahii.n saktaa
bhed tire hukmo.n me.n hai.n kyaa kyaa
ek ko tuu ne shaad kiyaa hai
ek ke dil ko daaG diyaa hai
us se na teraa pyaar kuchh aisaa
us se na tuu bezaar kuchh aisaa
har dam terii aan na.ii hai
jab dekho tab shaan na.ii hai
yahaa.n pachhu.aa hai vahaa.n purvaa hai
ghar ghar teraa hukm nayaa hai
phuul kahii.n kumlaa.e hu.e hai.n
aur kahii.n phal aa.e hu.e hai.n
khetii ek kii hai lahraatii
ek kaa har dam KHuun sukhaatii
ek pa.De hai.n dhan ko Dubo.e
ek hai.n gho.De bech ke so.e
ek ne jab se hosh sambhaalaa
ra.nj se us ko pa.Daa na paalaa
ek ne is janjaal me.n aa kar
chain na dekhaa aa.nkh uThaa kar
me.nh kahii.n daulat kaa hai barastaa
hai ko.ii paanii tak ko tarastaa
ek ko marne tak nahii.n dete
ek uktaa gayaa lete lete
haal Garaz duniyaa kaa yahii hai
Gam pahle aur baa'd KHushii hai
ra.nj kaa hai duniyaa ke gilaa kyaa
tohfa yahii le de ke hai yaa.n kaa
yahaa.n nahii.n bantii ranj sahe bin
ra.nj nahii.n sab ek se lekin
ek se yahaa.n ranj ek hai baalaa
ek se hai dard ek niraalaa
ghaav hai go naasuur kii suurat
par use kyaa naasuur se nisbat
tap vahii diq kii shakl hai lekin
diq nahii.n rahtii jaan liye bin
diq ho vo yaa naasuur ho kuchh ho
de na jo ab ummiid kisii ko
roz kaa Gam kyuu.n-kar sahe ko.ii
aas na jab baaqii rahe ko.ii
tuu hii kar insaaf ai mire maulaa
kaun hai jo be-aas hai jiitaa
go ki bahut bande hai.n pur-armaa.n
kam hai.n magar maayuus hai.n jo yaa.n
KHvaah dukhii hai KHvaah sukhii hai
jo hai ik ummiid us ko ba.ndhii hai
khetiyaa.n jin kii kha.Dii hai.n suukhii
aas vo baa.ndhe baiThe hai.n me.nh kii
ghaTaa jin kii asaa.Dii me.n hai
saavanii kii ummiid nahii.n hai
Duub chukii hai un kii agetii
detii hai Dhaaras un ko pachhetii
ek hai is ummiid pe jiitaa
ab hu.ii beTii ab hu.aa beTaa
ek ko jo aulaad milii hai
us ko uma.ng shaadiyo.n kii hai
ra.nj hai yaa qismat me.n KHushii hai
kuchh hai magar ik aas ba.ndhii hai
Gam nahii.n un ko Gamgii.n hai.n
jo dil naa-umiid nahii.n hai.n
kaal me.n kuchh saKHtii nahii.n aisii
kaal me.n hai jab aas samay.n kii
sahal hai maujo.n se chhuTkaaraa
jab ki nazar aataa hai kinaaraa
par nahii.n uTh saktii vo musiibat
aa.egii jis ke baa'd na raahat
shaad ho us rah-giir kaa kyaa dil?
mar ke kaTegii jis kii manzil
un uj.Do.n ko kal pa.De kyuu.n-kar
ghar na basegaa jin kaa janam bhar
un bichh.Do.n kaa kyaa hai Thikaanaa?
jin ko na milne degaa zamaana
ab ye balaa Taltii nahii.n Taalii
mujh pe hai jo taqdiir ne Daalii
aa.ii.n bahut duniyaa me.n bahaare.n
aish kii ghar ghar pa.Dii.n pukaare.n
pa.De bahut baaGo.n me.n jhuule
Dhaak bahut jangal me.n phuule
ga.ii.n aur aa.e.n chaa.ndnii raate.n
barsii.n khulii.n bahut barsaate.n
par na khilii hargiz na khilegii
vo jo kalii murjhaa.ii thii dil kii
aas hii kaa bas naam hai duniyaa
jab na rahii yahii to rahaa kyaa?
aise bidesii kaa nahii.n Gam kuchh
jis ko na ho milne kii qasam kuchh
ronaa un ban-baasiyo.n kaa hai
des nikaalaa jin ko milaa hai
hukm se tere par nahii.n chaara
ka.Dvii miiThii sab hai gavaaraa
zor hai kyaa patte kaa havaa par
chaahe jidhar le jaa.e u.Daa kar
tinkaa ik aur saat samundar
jaa.e kahaa.n maujo.n se nikal kar
qismat hii me.n jab thii judaa.ii
phir Taltii kis tarah ye aa.ii?
aaj kii big.Dii ho to bane bhii
azal kii big.Dii KHaak banegii
tuu jo chaahe vo nahii.n Taltaa
bande kaa yaa.n bas nahii.n chaltaa
maare aur na de tuu rone
thapke aur na de tuu sone
Thahre ban aatii hai na bhaage
terii zabardastii ke aage
tujh se kahii.n gar bhaagnaa chaahe.n
band hai.n chaaro.n khuu.nT kii raahe.n
tuu maare aur KHvaah navaaze
pa.Dii hu.ii huu.n mai.n tere darvaaze
tujh ko apnaa jaantii huu.n mai.n
tujh se nahii.n to kis se kahuu.n mai.n
maa.n hii sadaa bachche ko maare
aur bachcha maa.n maa.n hii pukaare
(4)
ai mire zor aur qudrat vaale
hikmat aur hukuumat vaale
mai.n lau.nDii terii dukhyaare
darvaaze kii terii bhikaarii
maut kii KHvaahaa.n jaan kii dushman
jaan apnii hai aap ajiiran
apne paraa.e kii dhutkaarii
maike aur sasuraal pe bhaarii
sah ke bahut aazaar chalii huu.n
duniyaa se bezaar chalii huu.n
dil par mere daaG hai.n jitne
mu.nh me.n bol nahii.n hai.n utne
dukh dil kaa kuchh kah nahii.n saktii
is ke sivaa kuchh kah nahii.n saktii
tujh pe hai raushan sab dukh dil kaa
tujh se haqiiqat apnii kahuu.n kyaa
byaah ke dam paa.ii thii na lene
lene ke yaa.n pa.D ga.e dene
KHushii me.n bhii dukh saath na aayaa
Gam ke sivaa kuchh haat na aayaa
ek KHushii ne Gam ye dikhaa.e
ek ha.nsii ne gul hii khilaa.e
kaisaa thaa ye byaah ninaavaa.n
juu.nhii pa.Daa is kaa parchaavaa.n
chain se rahne diyaa na jii ko
kar diyaa maliyaameT KHushii ko
ro nahii.n saktii ta.ng huu.n yaa.n tak
aur ro.uu.n to ro.uu.n kahaa.n tak
ha.ns ha.ns dil bahlaa.uu.n kyuu.n-kar
oso.n pyaas bujhaa.uu.n kyuu.n-kar
ek kaa kuchh jiinaa nahii.n hotaa
ek na ha.nstaa bhalaa na rotaa
leTe gar sone ke bahaane
paa.entii kal hai aur na sirhaane
jaagiye to bhii ban nahii.n pa.Dtii
jaagne kii aaKHir ko.ii had bhii
ab kal ham ko pa.Degii mar kar
gor hai suunii sej se behtar
baat se nafrat kaam se vahshat
TuuTii aas aur bujhii tabii.at
aabaadii jangal kaa namuuna
duniyaa suunii aur ghar suunaa
din hai bhayaanak aur raat Daraanii
yuu.n guzrii saarii ye javaanii
bahne.n aur bahneliyaa.n merii
saath kii jo thii.n kheliyaa.n merii
mil na sakii.n jii khol ke mujh se
KHush na hu.ii.n ha.ns bol ke mujh se
jab aa.ii.n ro-dho ke ga.ii.n vo
jab ga.ii.n be-kal ho ke ga.ii.n vo
ko.ii nahii.n dil kaa bahlaavaa
aa nahii.n chuktaa meraa bulaavaa
aaTh pahar kaa hai ye julaapaa
kaaTuu.ngii kis tarah ra.nDaapaa
thak ga.ii dukh sahte sahte
tham ga.e aa.nsuu bahte bahte
aag khulii dil kii na kisii par
ghul ga.ii jaan andar hii andar
dekh ke chup jaanaa na kisii ne
jaan ko phuu.nkaa dil kii lagii ne
dabii thii bhobhal me.n chi.ngaarii
lii na kisii ne KHabar hamaarii
qaum me.n vo KHushiyaa.n biyaaho.n kii
shahr me.n vo dho.e.n saaho.n kii
tyauhaaro.n kaa aa.e din aanaa
aur sab kaa tyauhaar manaanaa
vo chait aur phaagun kii havaa.e.n
vo saavan bhaado.n kii ghaTaa.e.n
vo garmii kii chaa.ndnii raate.n
vo armaan bharii barsaate.n
kis se kahuu.n kis taur se kaaTe.n
KHair kaTe.n jis taur se kaaTe.n
chaav ke aur KHushiyo.n ke samay sab
aate hai.n KHush kal jaan ko ho jab
ra.nj me.n hai.n saamaan KHushii ke
aur jalaane vaale hii ke
ghar barkhaa aur piyaa bidesii
aa.iyo barkhaa kahii.n na aisii
din ye javaanii ke kaTe aise
baaG me.n panchhii qaid ho jaise
rut ga.ii saarii sar Takraate
u.D na sake par hote saare
kisii ne hogii kuchh kal paa.ii
mujhe to shaadii raas na aa.ii
aas ba.ndhii lekin na milaa kuchh
phuul aayaa aur phal na lagaa kuchh
rah gayaa de kar chaa.nd dikhaa.ii
chaa.nd hu.aa par iid na aa.ii
phal kii KHaatir barchhii khaa.ii
phal na milaa aur jaan ga.nvaa.ii
ret me.n zarre dekh chamakte
dau.D pa.Dii me.n jhiil samajh ke
chaaro.n khuu.nT nazar dau.Daa.ii
par paanii kii buu.nd na paa.ii

Altaf Hussain Hali
Nazm

jawan beTi se bap ka KHitab

mirii beTii mirii jaanaa.n
tumhe.n sab yaad to hogaa
bahut pahle bahut pahle
javaanii kaa thaa jab aalam
mire baazuu me.n taaqat thii
mire siine me.n himmat thii
unhe.n ayyaam me.n ik din
mirii aaGosh-e-ulfat me.n
kisii ne laa ke rakkhaa thaa
tumhaaraa phuul saa chehra
badan be-intihaa naazuk
mire in saKHt haatho.n me.n
ajab narmii sii aa.ii thii
mirii is aa.nkh ne buu se liye the aur ro.ii thii
mujhe to yaad hai sab kuchh
tumhe.n bhii yaad to hogaa
na.e kap.De khilaune duudh kii botal KHariidii thii
bahut bechain hotaa thaa jo tum raato.n ko rotii thii.n
chalii thii.n apne pairo.n par jo tum pahle-pahal beTaa
mujhe aisaa lagaa thaa chal pa.Dii dil kii mire dha.Dkan
qadam do chaar le kar tum jo ik-dam la.Dkha.Daa.ii thii.n
mirii saa.nse.n mire siine ke andar thartharaa.ii thii.n
mirii godii me.n rafta rafta din guzraa kiye aur tum
na jaane sote sote mere siine par javaanii tak
mirii jaa.n aaj aa.ii ho
tumhe.n mujh se shikaayat hai
ki mai.n ne saKHtiyaa.n kii hai.n
mirii vo saKHtiyaa.n tum ko bahut ranjuur kartii thii.n
mujhe bhii ranj hotaa thaa
magar thii tarbiyat laazim
tumhe.n saa.nche me.n Dhalnaa thaa
tabii.at ko badalnaa thaa
tumhe.n sab yaad to hogaa
mirii beTii mire baazuu me.n vo quvvat nahii.n baaqii
tumhaarii har KHushii kii hai.n zamaanat dha.Dkane.n merii
magar ik mashvara sun lo
ki ab sab bhuul jaa.o tum
na.e rishte banaa.o tum
hamaaraa saath chhuuTegaa
na.e rishto.n ke merii jaa.n masaa.il kam nahii.n hoge
magar tab ham nahii.n ho.nge
akelii jaan hogii tum
faqat vo tarbiyat hogii
jo mai.n ne saKHtiyaa.n kar ke
tumhaare dil me.n Daalii hai
vo tum ko yaad to hogii
sabaq sab yaad to hogaa

Afeef Siraj
Nazm

Daku

kal raat miraa beTaa mire ghar
chehre pe mun.Dhe KHaakii kap.Daa
banduuq uThaa.e aa pahu.nchaa
nau-umrii kii surKHii se rachii us kii aa.nkhe.n
mai.n jaan ga.ii
aur bachpan ke sandal se ma.nDhaa us kaa chehra
pahchaan ga.ii
vo aayaa thaa KHud apne ghar
ghar kii chiize.n le jaane ko
an-kahii kahii manvaane ko

Zehra Nigaah
Nazm

aurat march: taswir ka dusra ruKH

suno bint-e-havvaa!
mai.n aadam kaa beTaa huu.n
aa.o tasallii se nimTaayen jhag.Daa
ye havvaa kii izzat kaa havvaa banaa kar dikhaayaa gayaa hai
mujhe tum se naahaq la.Daayaa gayaa hai

Rehman Faris
Nazm

walid

bin tumhaare to suunaa sab ghar hai
dil me.n har vaqt ik nayaa Dar hai
kaun bolegaa khaanaa khaa beTaa
kaun puuchhegaa tuu kahaa.n par hai

Noor N Sahir
Nazm

chand ki buDhiya

maa.n se ik bachche ne puuchhaa
chaa.nd me.n ye dhabbaa kaisaa hai
maa.n ye bolii
chandaa beTe
jis ko tum dhabbaa kahte ho vo to ik paagal bu.Dhiyaa hai
bachche ne maasuum aa.nkho.n se kuchh lamho.n tak maa.n ko ba.Dii hairat se dekhaa
aur ye puuchhaa
maa.n jab mai.n chandaa beTaa huu.n to mujh me.n bhii ik paagal bu.Dhiyaa hogii
maa.n ne us ko bhe.nch liyaa
us ke lab chuume
gardan chuumii maathaa chuumaa
aur ye bolii haa.n tujh me.n bhii ik bu.Dhiyaa hai

Rahi Masoom Raza
Nazm

fatiha

agar qabristaan me.n
alag alag katbe na ho.n
to har qabr me.n
ek hii Gam soyaa hu.aa rahtaa hai
kisii maa.n kaa beTaa
kisii bhaa.ii kii bahan
kisii aashiq kii mahbuuba
tum!
kisii qabr par bhii faatiha pa.Dh ke chale jaa.o

Nida Fazli
Nazm

jagir

mai.n un ajdaad kaa beTaa huu.n jinho.n ne paiham
ajnabii qaum ke saa.e kii himaayat kii hai
uzr kii saa.at-e-naapaak se le kar ab tak
har ka.De vaqt me.n sarkaar kii KHidmat kii hai

Sahir Ludhianvi
Nazm

jaan beTa KHilafat pe de do

bolii.n amaa.n 'mohammad-alii' kii
jaan beTaa KHilaafat pe de do
saath tere hai.n 'shaukat-alii' bhii
jaan beTaa KHilaafat pe de do
gar zaraa sust dekhuu.ngii tum ko
duudh hargiz na baKHsuu.ngii tum ko
mai.n dilaavar na samjhuu.ngii tum ko
jaan beTaa KHilaafat pe de do
Gaib se merii imdaad hogii
ab hukuumat ye barbaad hogii
hashr tak ab na aabaad hogii
jaan beTaa KHilaafat pe de do
khaa.nsii aa.e agar tum ko jaanii
maa.ngnaa mat hukuumat se paanii
buu.Dhii amaa.n kaa kuchh Gam na karnaa
kalma pa.Dh pa.Dh KHilaafat pe marnaa
puure us imtihaa.n me.n utarnaa
jaan beTaa KHilaafat pe de do
hote mere agar saat beTe
kartii sab ko KHilaafat pe sadqe
hai.n yahii diin-e-ahmad ke raste
jaan beTaa KHilaafat pe de do
hashr me.n hashr barpaa karuu.ngii
pesh-e-haq tum ko le ke chaluu.ngii
is hukuumat pe da.avaa karuu.ngii
jaan beTaa KHilaafat pe de do
chain ham ne 'shafiiq' ab na paayaa
jaan beTaa KHilaafat pe de do

Shafiq Rampuri
Nazm

ek buDha

ik buu.Dhaa bistar-e-marg pe hai
biimaar badan laachaar badan
saa.nse.n bhii kuchh bojhal sii hai.n
aur aa.nkhe.n bhii jal-thal sii hai.n
aisaa bhii nahii.n tanhaa hai vo
paanii hai magar pyaasaa hai vo
ghar me.n bahuuve.n beTe bhii hai.n
hai.n potiyaa.n bhii pote bhii hai.n
lekin ko.ii paas nahii.n aataa
sab jhaa.nkte hai.n chale jaate hai.n
jaise ye is kaa ghar hii nahii.n
jaise vo sab begaane hai.n
jis bahuu kaa number hotaa hai
khaane ke nivaale Thuu.ns ke vo
farz apnaa mukammal kartii hai
phir vaqt pe ko.ii ik beTaa
vo jis ko tho.Dii fursat ho
pahle to aa kar Daa.nTtaa hai
detaa hai davaa.ii phir aise
jaise ehsaan kare ko.ii
jaise apmaan kare ko.ii
har din ye buu.Dhaa sochtaa hai
ko.ii baat na.ii ho aaj ke din
ko.ii do miiThe alfaaz kahe
kabhii mahfil us ke paas saje
kabhii ha.nsne kii ko.ii baat chale
magar aisaa pichhle barso.n me.n
kabhii ho paayaa nahii.n ho paayaa
apne us begaane-pan par
apne us viiraane-pan par
ye buu.Dhaa inkishaaf rahtaa hai
ye buu.Dhaa rotaa rahtaa hai
ik buu.Dhaa bistar-e-marg pe hai

Zia Zameer
Nazm

zimmedari

maa.n beTe ke darmiyaan ek manzuum mukaalima

Asna Badr
Nazm

aaKHiri khilaune ka matam

mai.n sautelaa beTaa
apne baap kii tiisrii biivii kaa
in tiino.n me.n
pahle merii maa.n aa.ii
phir mai.n aayaa
leTaa baiThaa
kha.Daa hu.aa diivaar paka.D kar
chalnaa jab aayaa to maa.n ko rog lagaa
mere khilaune
saste aur miTTii ke the
sab TuuT ga.e
baarii baarii sab kii KHaatir royaa mai.n
lekin maa.n ke marne par
mai.n royaa nahii.n
TuuTaa thaa
aur bikhraa thaa
jaise mere khilaune TuuTe bikhre the
meraa bachpan
meraa aaKHirii khilaunaa thaa
jis kii kirche.n
ab bhii mujh me.n chubhtii hai.n
aur TuuTne kii aavaaze.n
guu.njtii hai.n

Shakeel Azmi
Nazm

abba ka chaaliswan

buu.Dhe Gariib baap ke marne pe daf.atan
beTe ne sochaa kaise karuu.n dafn aur kafan
apne yahaa.n to maut me.n KHarche kaa hai chalan
Gam se niDhaal beTe ke maathe pe thii shikan
jo kuchh thaa paas dafn-o-kafan me.n uThaa diyaa
KHarche ne phir to maut kaa sadma bhulaa diyaa
karnaa pa.Daa jo dafan kaa taa-sub.h intizaar
mayyat ke paas chaltii rahii chaa.e baar baar
aur maut me.n jo aa.e the bairuunii rishta-daar
chaa.e se un kii to.Daa gayaa nii.nd kaa KHumaar
aur is ke baa'd chaltaa jo phir pandaan hai
lagtaa hai sogvaar nahii.n mezbaan hai
purse ko sub.h shaam phir aate hai.n rishta-daar
khaanaa nahii.n to chaa.e kam-az-kam ho ek baar
chaa.e ke saath vaa.e me.n KHarche hai.n be-shumaar
murde ko chho.D KHarche ko rotaa hai sogvaar
tiije ke baa'd dasvaa.n hai phir biisvaa.n bhii hai
phir chand roz baa'd hii chaaliisvaa.n bhii hai
har roz faatiha ke liye gosht chaahiye
saalan bhii sirf ek nahii.n do pakaa.iye
nazr-o-niyaaz ke liye halva banaa.iye
phir roz aane vaalo.n ko chaa.e pilaa.iye
beTaa bichaara dab gayaa qarze ke baar se
barso.n tak ab chhu.Daa.egaa piichhaa udhaar ke
phir is ke baa'd baate.n banaatii hai.n aurte.n
kyaa kyaa kamii rahii ye bataatii hai.n aurte.n
chaaliisvaa.n kuchh aise karaatii hai.n aurte.n
farmaa.isho.n ke Dher lagaatii hai.n aurte.n
is tarah maut ko bhii tamaasha banaa diyaa
vo e'tiraaz uThaa.e kaleja hilaa diyaa
beTe ne naam kar diyaa raushan jahaan me.n
aisii kisii ne maut na kii KHaandaan me.n
chaaliisvaa.n kuchh aisaa kiyaa aan-baan me.n
zevar bahuu kaa bik gayaa masnuu.ii shaan me.n
vo maut kii ki kumbe me.n Da.nkaa bajaa diyaa
chaaliisve.n pe shahr ko khaanaa khilaa diyaa

Nashtar Amrohvi
Nazm

sattarahwan singar

to.D ke ghu.nghruu
chho.D ke mahfil
chup kaa baran kyuu.n pahnaa hai
peT pe khujlii
mu.nh par daane
vaah teraa kyaa kahnaa hai
kyuu.n sharmaa.e
kyuu.n ghabraa.e
ye dukh ha.ns kar sahnaa hai
pyaarii beTaa
yahii maraz to
is peshe kaa gahna hai

Qateel Shifai
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now