Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "bindiyaa"

Nazm MATCHES FOR "bindiyaa"

Nazm

zindagi

agnii maa.n se bhii na jiine kii sanad jab paa.ii
zindagii ke na.e imkaan ne lii a.ng.Daa.ii
aur kaano.n me.n kahii.n duur se aavaaz aa.ii
buddham shara.Dam gachhamii
dhammam shara.Dam gacchami
sangham shara.Dam gacchami
chaar abruu kaa safaayaa kar ke
be-sile vastr se Dhaa.npaa ye badan
po.nchh ke patnii ke maathe se damaktii bi.ndiyaa
sote bachcho.n ko binaa pyaar kiye
chal pa.Daa haath me.n kashkol liye
chaahtaa thaa kahii.n bhikshaa hii me.n jiivan mil jaa.e
jo kabhii band na ho dil ko vo dha.Dkan mil jaa.e
mujh ko bhikshaa me.n magar zahr milaa
ho.nT tharraane lage jaise kare ko.ii gila
jhuk ke suulii se usii vaqt kisii ne ye kahaa
tere ik gaal pe jis pal ko.ii thappa.D maare
duusraa gaal bhii aage kar de
terii duniyaa me.n bahut hinsaa hai
us ke siine me.n ahinsaa bhar de
ki ye jiine kaa tariiqa bhii hai andaaz bhii hai
terii aavaaz bhii hai merii aavaaz bhii hai
mai.n uThaa jis ko ahinsaa kaa sabaq sikhlaane
mujh ko laTkaa diyaa suulii pe usii duniyaa ne

Kaifi Azmi
Nazm

aasar-e-qadima

ek patthar kii adhuurii muurat
chand taa.nbe ke puraane sikke
kaalii chaa.ndii ke ajab se zevar
aur ka.ii kaa.nse ke TuuTe bartan
ek sahraa mile
zer-e-zamii.n
log kahte hai.n ki sadiyo.n pahle
aaj sahraa hai jahaa.n
vahii.n ik shahr hu.aa kartaa thaa
aur mujh ko ye KHayaal aataa hai
kisii taqriib
kisii mahfil me.n
saamnaa tujh se miraa aaj bhii ho jaataa hai
ek lamhe ko
bas ik pal ke liye
jism kii aa.nch
uchaTtii sii nazar
surKH bindiyaa kii damak
sarsaraahaT tirii malbuus kii
baalo.n kii mahak
be-KHayaalii me.n kabhii
lams kaa nanhaa saa phuul
aur phir duur tak vahii sahraa
vahii sahraa ki jahaa.n
kabhii ik shahr hu.aa kartaa thaa

Javed Akhtar
Nazm

shahr-e-dost

vo shahr-e-dost bhii
ruKHsat hu.aa ki jis ne sadaa
hamaare dil me.n khilaa.e the chaahato.n ke gulaab
KHumaar baaqii hai ab tak hamaarii aa.nkho.n me.n
hasiin lamho.n kaa jo us ke dam se raushan the
tumhaare baa'd bhii aa.e.nge yuu.n to sab mausam
bahut sataa.e.nge lekin har ek mauqa par
jo hote tum to
ye kaam is tarah karte
kare.nge yaad tumhe.n ham ka.ii havaalo.n se
ajiib shaKHs thaa
ka.Dvii-kasiilii sun kar bhii
na tez bolaa kisii se
na vo hu.aa naaraaz
sajaa.e rahtaa thaa ho.nTo.n pe chaahato.n ke gulaab
bichha.D rahe ho to va.ada karo mire hamdam
kabhii jo guzro idhar se to bhuul mat jaanaa
yahii.n mile.nge kisii muulsarii ke pe.D tale
kare.nge baate.n shra.ngaar-ras ke doho.n kii
kare.nge baate.n bihaarii kii naaykaa.o.n kii
kare.nge baate.n kisii ke rasiile ho.nTo.n kii
mahaktii zulfo.n kii kaajal kii us kii bindiyaa kii
lachaktii shaaKH se jismo.n kii
chaa.nd-chehro.n kii
bichha.D rahe ho to va.ada karo
ki aa.oge
kabhii jo guzro idhar se to bhuul mat jaanaa
tumhaare hijr ke mausam kii sabz chaadar ko
mai.n apne tan pe sajaa.e
yahii.n miluu.ngaa tumhe.n

Farooq Bakshi
Nazm

jalti-bujhti si raushni ke pare

jaltii-bujhtii sii raushnii ke pare
ham ne ik raat aisii paa.ii thii
ruuh ko daa.nt se jis ne kaaTaa
jis kii har adaa muskuraa.ii thii
jis kii bhi.nchii hu.ii hathelii se
saare aatish-fishaa.n ubal uThe
jis ke ho.nTo.n kii surKHii chhuute hii
aag sii tamaam jangalo.n me.n lagii
raakh maathe pe chuTkii bhar ke rakhii
KHuun kii jyuu.n bindiyaa lagaa.ii ho
kis qadar javaan thii
masmasii thii
mah.ngii thii vo raat
ham ne jo raat yuu.nhii paa.ii thii

Meena Kumari Naz
Nazm

khoya hua ganw

chakkii pe aaTaa piise suhaagan
maathe pe bindiyaa haatho.n me.n kangan
thaalii kaToraa chaukaa raso.ii
rahtii ho jaise kuchh kho.ii-kho.ii
jalte tave par u.nglii jalaa le

Qaisarul Jafri
Nazm

be-karan wusaton mein tanha

safar me.n huu.n aur rukaa kha.Daa huu.n
mai.n chaaro.n samto.n me.n chal rahaa huu.n magar kahaa.n huu.n
vahii.n jahaa.n surKH raushnaa.ii kaa ek qatra
kisii qalam kii kasiif nib se Tapak pa.Daa hai
mai.n KHud bhii shaayad kisii qalam se giraa hu.aa ek surKH qatra huu.n
zindagii kii sajal jabii.n par chamaktii bindiyaa sii ban gayaa huu.n
magar mai.n bindiyaa nahii.n huu.n shaayad ki vo to taqdiis kaa nishaa.n hai
dilo.n ke dhaago.n kii ik girah hai
girah jo sadiyo.n me.n ban.ne vaale hasiin rishto.n kaa aashram hai
jo aane vaale ta.Daptii sadiyo.n kii ibtidaa hai
girah to junction hai pTriyo.n kaa musaafiro.n kaa na.ii-navelii rafaaqato.n kaa
mohabbato.n kaa aziyyato.n kaa
magar mai.n tanhaa huu.n be-karaa.n vus.ato.n me.n tanhaa
safed maazii safed fardaa safed ye lamha-e-ibaadat
ki jis pe ko.ii nahii.n ibaarat
safed maathe pe surKH dhabba huu.n
ibtidaa intihaa ke dhaago.n se kaT chukaa huu.n
mai.n surKH dhabba huu.n
kapkapaate latiif akso.n kaa silsila huu.n
tamaam chehre jo tere andar se jhaa.nkte hai.n
mire hii chehre kii jhalkiyaa.n hai.n
mire hii siine kii dha.Dkane.n hai.n
ye tez ra.ngo.n ke tund dariyaa
jo dukh ke koh-e-giraa.n se ras kar
zamii.n kii banjar udaas sii saltanat ko chhuu kar
us ek be-ant surKH nuqte ke bahr-e-zulmaat me.n gire hai.n
mire hii be-naam dast-o-paa hai.n
ye jagmagaatii sii kahkashaa.e.n jo ibtidaa se
KHalaa kii zulmat me.n qaid baahar ko u.D rahii hai.n
girhe.n banii hai.n
vahii.n kha.Dii hai.n
vahii.n jahaa.n surKH raushnaa.ii kaa ek qatra
kisii qalam kii kasiif nib se Tapak pa.Daa hai
vo ek qatra jo meraa dil hai
jo mere akso.n kaa silsila hai
jo mere hone se surKH-ruu hai
jo merii paa-basta aarzuu hai

Wazir Agha
Nazm

lowe aur gender

ik din park kii bench pe yuu.nhii
kyaa jaane kyaa soch ke tum ne
baiThe baiThe apnii bindiyaa
mere maathe par chipkaa dii
aur ha.nsii.n tum aa.e haa.e
us din bindiyaa lagaa ke jab mai.n
KHush thaa na ki sharminda thaa
tab hii mai.n ne jaan liyaa thaa
shaayad mujh ko ishq hu.aa hai

Vikram
Nazm

meri mohabbat ka pas rakhna

mai.n un fazaao.n me.n saa.ns letaa huu.n
jin me.n tum saa.ns le rahii ho
mai.n terii chunarii ko taan kar KHud pe raat taKHliiq kar rahaa huu.n
tirii hii bindiyaa se nuur le kar
mai.n raat ko din banaa rahaa huu.n

Nadeem Najid
Nazm

wasl ke baad

dhul ga.ii raat ke maathe kii damaktii bindiyaa
tiiliyaa.n nuur kii KHvaabiida nigaaho.n me.n chubhii.n
phir rule KHaak me.n shabnam ke larazte motii
yuu.n bujhii sham.e.n bahaaro.n kii ki dekhii na ga.ii.n

Sohan Rahi
Nazm

mere bhopal

mere bhopaal ai pyaar kii anjuman
suurmaa.o.n ke ghar 'aashiqo.n ke vatan
terii tahziib me.n ektaa kii jhalak
tere chehre pe hai 'ilm-o-fan kii damak
naGma-o-she’r terii fazaa me.n javaa.n
tere zarro.n me.n hastii hu.ii kahkashaa.n
tere maathe pe hindii kii bi.ndiyaa lagii
aur urdu kii maalaa gale me.n pa.Dii
is tire ruup ke 'aashiqo.n me.n hai.n ham
ham jo ahl-e-muhabbat hai.n ahl-e-qalam
tere taalaab dil ko lubhaate hu.e
raaste koh me.n pech khaate hu.e
mandiro.n me.n bhajan masjido.n me.n azaa.n
tujh me.n kashmiir-e-saanii kii hai.n vaadiyaa.n
roz-o-shab kitne pyaare hai.n is shahr me.n
dost hii sab hamaare hai.n is shahr me.n
shahr-e-bhopaal ai gulshan-e-rang-o-buu
tuu rahe yuu.nhii har dam javaa.n KHuub-ruu

Yunus Makhmoor
Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

nazm

safed shirt thii tum sii.Dhiyo.n pe baiThe the
mai.n jab class se niklii thii muskuraate hu.e
hamaarii pahlii mulaaqaat yaad hai naa tumhe.n
ishaare karte the tum mujh ko aate jaate hu.e
tamaam raat vo aa.nkhe.n na bhuultii thii.n mujhe
ki jin me.n mere liye 'izzat aur vaqaar dikhe
mujhe ye duniyaa bayaabaan thii magar ik din
tum ek baar dikhe aur be-shumaar dikhe
mujhe ye Dar thaa ki tum bhii kahii.n vahii to nahii.n
jo jism par hii tamanna ke daaG chho.Dte hai.n
KHudaa kaa shukr hai ki tum un se muKHtalif nikle
jo phuul to.D ke Gusse me.n baaG chho.Dte hai.n
ziyaada vaqt na guzraa thaa is ta'alluq ko
ki is ke baa'd vo lamha qarii.n qarii.n aaya
chhu.aa thaa tum ne mujhe aur mujhe mohabbat par
yaqiin aaya thaa lekin kabhii nahii.n aaya
phir us ke baa'd meraa nashsha-e-sukuut gayaa
mai.n kashmakash me.n thii tum mere kaun lagte ho
mai.n amritaa tumhe.n sochuu.n to mere saahir ho
mai.n faarehaa tumhe.n dekhuu.n to jaun lagte ho
ham ek saath rahe aur hame.n pata na chalaa
ta'alluqaat kii had-bandiyaa.n bhii hotii hai.n
mohabbato.n ke safar me.n jo raaste hai.n vahii
havas kii samt me.n pagDa.nDiyaa.n bhii hotii hai.n
tumhaare vaaste jo mere dil me.n hai 'haafii'
tumhe.n mai.n kaash ye sab kuchh kabhii bataa paatii
aur ab maziid na milne kii ko.ii vaj.h nahii.n
bas apnii maa.n se mai.n aa.nkhe.n nahii.n milaa paatii

Tahzeeb Hafi
Nazm

krishn kanhayya

ai dekhne vaalo
is husn ko dekho
is raaz ko samjho
ye naqsh-e-KHayaalii
ye fikrat-e-aalii
ye paikar-e-tanviir
ye krishn kii tasviir
ma.anii hai ki suurat
san.at hai ki fitrat
zaahir hai ki mastuur
nazdiik hai yaa duur
ye naar hai yaa nuur
duniyaa se niraalaa
ye baa.nsurii vaalaa
gokul kaa gvaalaa
hai sehr ki e.ajaaz
khultaa hii nahii.n raaz
kyaa shaan hai vallaah
kyaa aan hai vallaah
hairaan huu.n kyaa hai
ik shaan-e-KHudaa hai
but-KHaane ke andar
KHud husn kaa but-gar
but ban gayaa aa kar
vo turfa nazzaare
yaad aa ga.e saare
jamunaa ke kinaare
sabze kaa lahaknaa
phuulo.n kaa mahaknaa
ghanghor ghaTaa.e.n
sarmast havaa.e.n
ma.asuum uma.nge.n
ulfat kii tara.nge.n
vo gopiyo.n ke saath
haatho.n me.n diye haath
raqsaa.n hu.aa brijnaath
bansii me.n jo lai hai
nashsha hai na mai hai
kuchh aur hii shai hai
ik ruuh hai raqsaa.n
ik kaif hai larzaa.n
ek aql hai mai-nosh
ik hosh hai mad.hosh
ik KHanda hai sayyaal
ik girya hai KHush-haal
ik ishq hai maGruur
ik husn hai majbuur
ik sehr hai mas.huur
darbaar me.n tanhaa
laachaar hai kirishnaa
aa shyaam idhar aa
sab ahl-e-KHusuumat
hai.n dar pa.e izzat
ye raaj dulaare
buzdil hu.e saare
parda na ho taaraaj
bekas kii rahe laaj
aa jaa mere kaale
bhaarat ke ujaale
daaman me.n chhupaa le
vo ho ga.ii an-ban
vo garm hu.aa ran
Gaalib hai duryodhan
vo aa ga.e jagdiish
vo miT ga.ii tashviish
arjun ko bulaayaa
updesh sunaayaa
Gam-zaad kaa Gam kyaa
ustaad kaa Gam kyaa
lo ho ga.ii tadbiir
lo ban ga.ii taqdiir
lo chal ga.ii shamshiir
siirat hai aduu-soz
suurat nazar-afroz
dil kaifiyat-andoz
Gusse me.n jo aa jaa.e
bijlii hii giraa jaa.e
aur lutf par aa.e
to ghar bhii luTaa jaa.e
pariyo.n me.n hai gulfaam
raadhaa ke liye shyaam
balraam kaa bhayyaa
mathuraa kaa basayyaa
bindraa me.n kanhayyaa
ban ho ga.e viiraa.n
barbaad gulistaa.n
sakhiyaa.n hai.n pareshaa.n
jamunaa kaa kinaaraa
sunsaan hai saaraa
tuufaan hai.n KHaamosh
maujo.n me.n nahii.n josh
lau tujh se lagii hai
hasrat hii yahii hai
ai hind ke raajaa
ik baar phir aa jaa
dukh dard miTaa jaa
abr aur havaa se
bulbul kii sadaa se
phuulo.n kii ziyaa se
jaaduu-asarii gum
shoriida-sarii gum
haa.n terii judaa.ii
mathuraa ko na bhaa.ii
tuu aa.e to shaan aa.e
tuu aa.e to jaan aa.e
aanaa na akele
ho.n saath vo mele
sakhiyo.n ke jhamele

Hafeez Jalandhari
Nazm

east india company ke farzandon se KHitab

kis zabaa.n se kah rahe ho aaj tum saudaagaro
dahr me.n insaaniyat ke naam ko uu.nchaa karo
jis ko sab kahte hai.n hitler bhe.Diyaa hai bhe.Diyaa
bhe.Diye ko maar do golii pa.e-amn-o-baqaa
baaG-e-insaanii me.n chalne hii pe hai baad-e-KHizaa.n
aadamiyyat le rahii hai hichkiyo.n par hichkiyaa.n
haath hai hitler kaa raKHsh-e-KHud-sarii kii baag par
teG kaa paanii chhi.Dak do germany kii aag par
saKHt hairaa.n huu.n ki mahfil me.n tumhaarii aur ye zikr
nau-e-insaanii ke mustaqbil kii ab karte ho fikr
jab yahaa.n aa.e the tum saudaagarii ke vaaste
nau-e-insaanii ke mustaqbil se kiyaa vaaqif na the
hindiyo.n ke jism me.n kyaa ruuh-e-aazaadii na thii
sach bataa.o kyaa vo insaano.n kii aabaadii na thii
apne zulm-e-be-nihaayat kaa fasaana yaad hai
company kaa phir vo daur-e-mujrimaana yaad hai
luuTte phirte the jab tum kaarvaa.n-dar-kaarvaa.n
sar-barahna phir rahii thii daulat-e-hindostaa.n
dast-kaaro.n ke a.nguuThe kaaTte phirte the tum
sard laasho.n se ga.Dho.n ko paaTte phirte the tum
san.at-e-hindostaa.n par maut thii chhaa.ii hu.ii
maut bhii kaisii tumhaare haat kii laa.ii hu.ii
allaah allaah kis qadar insaaf ke taalib ho aaj
miir-ja.afar kii qasam kyaa dushman-e-haq thaa 'siraaj'
kyaa avadh kii begamo.n kaa bhii sataanaa yaad hai
yaad hai jhaa.nsii kii raanii kaa zamaana yaad hai
hijrat-e-sultaan-e-dehlii kaa samaa.n bhii yaad hai
sher-dil 'Tiipuu' kii KHuunii.n daastaa.n bhii yaad hai
tiisare faaqe me.n ik girte hu.e ko thaamne
kas ke tum laa.e the sar shaah-e-zafar ke saamne
yaad to hogii vo maTiyaa-burj kii bhii daastaa.n
ab bhii jis kii KHaak se uThtaa hai rah rah kar dhu.aa.n
tum ne qaisar-e-baaG ko dekhaa to hogaa baarhaa
aaj bhii aatii hai jis se haa.e 'aKHtar' kii sadaa
sach kaho kyaa haafize me.n hai vo zulm-e-be-panaah
aaj tak ragoon me.n ik qabr hai jis kii gavaah
zehn me.n hogaa ye taaza hindiyo.n kaa daaG bhii
yaad to hogaa tumhe.n jallianwala-bagh bhii
puuchh lo is se tumhaaraa naam kyuu.n taabinda hai
'dyer'-e-gurg-e-dahan-aaluud ab bhii zinda hai
vo 'bhagat-singh' ab bhii jis ke Gam me.n dil naashaad hai
us kii gardan me.n jo Daalaa thaa vo phandaa yaad hai
ahl-e-aazaadii rahaa karte the kis hanjaar se
puuchh lo ye qaid-KHaano.n ke dar-o-diivaar se
ab bhii hai mahfuuz jis par tantana sarkaar kaa
aaj bhii guu.njii hu.ii hai jin me.n ko.Do.n kii sadaa
aaj kashtii amn ke amvaaj par khete ho kyuu.n
saKHt hairaa.n huu.n ki ab tum dars-e-haq dete ho kyuu.n
ahl-e-quvvat daam-e-haq me.n to kabhii aate nahii.n
''bankii'' aKHlaaq ko KHatre me.n bhii laate nahii.n
lekin aaj aKHlaaq kii talqiin farmaate ho tum
ho na ho apne me.n ab quvvat nahii.n paate ho tum
ahl-e-haq raushan-nazar hai.n ahl-e-baatin kor hai.n
ye to hai.n aqvaal un qaumo.n ke jo kamzor hai.n
aaj shaayad manzil-e-quvvat me.n tum rahte nahii.n
jis kii laaThii us kii bhai.ns ab kis liye kahte nahii.n
kyaa kahaa insaaf hai insaa.n kaa farz-e-avvalii.n
kyaa fasaad-o-zulm kaa ab tum me.n kas baaqii nahii.n
der se baiThe ho naKHl-e-raastii kii chhaa.nv me.n
kyaa KHudaa-naa-karda kuchh moch aa ga.ii hai paa.nv me.n
guu.nj Taapo.n kii na aabaadii na viiraane me.n hai
KHair to hai asp-e-taazii kyaa shifaa-KHaane me.n hai
aaj kal to har nazar me.n rahm kaa andaaz hai
kuchh tabii.at kyaa nasiib-e-dushmanaa.n naa-saaz hai
saa.ns kyaa ukh.Dii ki haq ke naam par marne lage
nau-e-insaa.n kii havaa-KHvaahii kaa dam bharne lage
zulm bhuule raagnii insaaf kii gaane lage
lag ga.ii hai aag kyaa ghar me.n ki chillaane lage
mujrmo.n ke vaaste zebaa nahii.n ye shor-o-shain
kal 'yaziid' o 'shimr' the aur aaj bante ho 'husain'
KHair ai saudaagaro ab hai to bas is baat me.n
vaqt ke farmaan ke aage jhukaa do gardane.n
ik kahaanii vaqt likkhegaa na.e mazmuun kii
jis kii surKHii ko zaruurat hai tumhaare KHuun kii
vaqt kaa farmaan apnaa ruKH badal saktaa nahii.n
maut Tal saktii hai ab farmaan Tal saktaa nahii.n

Josh Malihabadi
Nazm

rishwat

ye hai mil vaalaa vo baniyaa hai ye saahuukaar hai
ye hai duukaa.n-daar vo hai ved ye attaar hai
vo agar Thag hai to ye Daaku hai vo baT-maar hai
aaj har gardan me.n kaalii jiit kaa ik haar hai

Josh Malihabadi
Nazm

KHatun-e-mashriq

aalam-e-nisvaa.n pe kaalii raat jab chhaa jaa.egii
ye tire maathe kii bi.ndii sub.h ko sharmaa.egii

Josh Malihabadi
Nazm

ibn-e-maryam

aur jab vo dahaktaa a.ngaara
chhan se saagar me.n Duub jaataa hai
tiirgii o.Dh letii hai duniyaa
kashtiyaa.n kuchh kinaare aatii hai.n
bha.ng gaa.ngaa, charas sharaab, afyuun
jo bhii laa.e.n jahaa.n se bhii laa.e.n
dau.Dte hai.n idhar se kuchh saa.e
aur sab kuchh utaar laate hai.n
gaa.Dii jaatii hai adl kii miizaan
jis kaa hissa usii ko miltaa hai
yahaa.n KHatra nahii.n KHayaanat kaa
tum yahaa.n kyuu.n kha.De ho muddat se
ye tumhaarii thakii thakii bhe.De.n
raat jin ko zamii.n ke siine par
sub.h hote u.nDel detii hai
manDiyo.n, daftaro.n milo.n kii taraf
haa.nk detii dhakel detii hai
raaste me.n ye ruk nahii.n saktii.n
to.D ke ghuTne jhuk nahii.n saktii.n
un se tum kyaa tavaqqo.a rakhte ho
bhe.Diyaa un ke saath chaltaa hai

Kaifi Azmi
Nazm

man ka hona

dakiyaanuusii kah kar biTiyaa tum par ha.nstii hai
tum ko nahii.n ma.aluum kii phabtii tum par kastii hai
siidhii aurat kii bhii upaadhii tum ko Dastii hai
aur tumhaarii us ghar me.n hii duniyaa bastii hai
chhat diivaare.n konaa konaa kaisaa hotaa hai
maa.n ho tum aur maa.n kaa honaa aisaa hotaa hai

Zia Zameer
Nazm

judai

shajar hajar pe hai.n Gam kii ghaTaa.e.n chhaa.ii hu.ii
subuk-KHiraam havaa.o.n ko nii.nd aa.ii hu.ii
rage.n zamii.n ke manaazir kii pa.D chalii.n Dhiilii
ye KHasta-haalii ye darmaandagii ye sannaaTaa
fazaa-e-niim-shabii bhii hai sansanaaii hu.ii
dhu.aa.n dhu.aa.n se manaazir hai.n shabnamistaa.n ke
sayyaara raat kii zulfe.n hai.n rasmasaa.ii hu.ii
ye rang taaro.n bharii raat ke tanaffus kaa
ki buu-e-dard me.n har saa.ns hai basaa.ii hu.ii
KHunuk udaas fazaa.o.n kii aa.nkho.n me.n aa.nsuu
tire firaaq kii ye Tiis hai uThaa.ii hu.ii
sukuut-e-niim-shabii gahraa hotaa jaataa hai
rage.n hai.n siina-e-hastii kii tilmilaa.ii hu.ii
hai aaj saaz-e-navaa-haa-e-KHuu.n-chakaa.n ai dost
hayaat terii judaa.ii kii choT khaa.ii hu.ii
mirii in aa.nkho.n se ab nii.nd parda kartii hai
jo tere panja-e-ra.ngii.n kii thii.n jagaa.ii hu.ii
sarishk paale hu.e tere narm daaman ke
nashaat tere tabassum se jagmagaa.ii hu.ii
laTak vo gesu.o.n kii jaise pech-o-taab-e-kamand
lachak bhavo.n kii vo jaise kamaa.n jhukaa.ii hu.ii
sahar kaa jaise tabassum damak vo maathe kii
kiran suhaag kii bi.ndii kii lahlahaa.ii hu.ii
vo a.nkh.Diyo.n kaa fusuu.n ruup kii vo deviyyat
vo siina ruuh-e-numuu jis me.n kanmanaa.ii hu.ii
vo sej saa.ns kii KHushbuu ko jis pe nii.nd aa.e
vo qad gulaab kii ik shaaKH lahlahaa.ii hu.ii
vo jhilmilaate sitaare tire pasiine ke
jabiin-e-shaam-e-javaanii thii jagmagaa.ii hu.ii
ho jaise but-kada aazar kaa bol uThne ko
vo ko.ii baat sii goyaa labo.n tak aa.ii hu.ii
vo dhaj vo dilbarii vo kaam-ruup aa.nkho.n kaa
sajal adaa.o.n me.n vo raagnii rachaa.ii hu.ii
ho KHvaab-gaah me.n sho.alo.n kii karvaTe.n dam-e-sub.h
vo bhairvii.n tirii bedaariyo.n kii gaa.ii hu.ii
vo muskuraatii hu.ii lutf-e-diid kii sub.he.n
tirii nazar kii shu.aa.o.n kii gudgudaa.ii hu.ii
lagii jo tere tasavvur ke narm sho.alo.n se
hayaat-e-ishq se us aa.nch kii tipaa.ii hu.ii
hanuuz vaqt ke kaano.n me.n chahchahaahaT hai
vo chaap tere qadam kii sunii-sunaa.ii hu.ii
hanuuz siina-e-maazii me.n jagmagaahaT hai
damakte ruup kii diipaavlii jalaa.ii hu.ii
lahuu me.n Duubii uma.ngo.n kii maut rok zaraa
hariim-e-dil me.n chalii aatii hai DhiTaa.ii hu.ii
rahegii yaad javaa.n-bevgii mohabbat kii
suhaag raat kii vo chuu.Diyaa.n ba.Dhaa.ii hu.ii
ye merii pahlii mohabbat na thii magar ai dost
ubhar ga.ii hai.n vo choTe.n dabii-dabaa.ii hu.ii
supurdagii o KHuluus-e-nihaa.n ke parde me.n
jo terii narm-nigaahii kii thii.n bi.Thaa.ii hu.ii
uThaa chukaa huu.n mai.n pahle bhii hijr ke sadme
vo saa.ns dukhtii hu.ii aa.nkh DabDabaa.ii hu.ii
ye haadsa hai ajab tujh ko paa ke kho denaa
ye saaneha hai Gazab terii yaad aa.ii hu.ii
ajiib dard se ko.ii pukaartaa hai tujhe
galaa rundhaa hu.aa aavaaz thar tharraa.ii hu.ii
kahaa.n hai aaj tuu ai ra.ng-o-nuur kii devii
a.ndherii hai mirii duniyaa luTii-luTaa.ii hu.ii
pahu.nch sakegii bhii tujh tak mirii navaa-e-firaaq
jo kaa.enaat ke ashko.n me.n hai nahaa.ii hu.ii

Firaq Gorakhpuri
Nazm

jahan zad

ai hasan
daaman-e-vaqt par jitne phuul aur buuTe saje hai.n
jahaa.n zaad kii zaKHm poro.n ne rang un me.n
apne junuu.n ke bhare hai.n
ye taavaan hai.n champa.ii u.ngliyo.n kaa
tire jaam-o-miinaa pe
jis KHaal-o-KHad kii nazaakat kii parchhaa.iyaa.n thii.n
tujhe kyaa KHabar ye kin aa.nkho.n kii biinaa.iyaa.n thii.n

Ishrat Afreen
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now