Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "daakhila"

Nazm MATCHES FOR "daakhila"

Nazm

KHuda ki jagah Khaali hai

sha.nkar Damruu kaa mutabaadil talaash kar chukaa
gopiyaa.n ab kisii uudhau kii muhtaaj nahii.n
trunk call
un kii samasyaa.o.n kaa hal hai
izraa.iil!
atom aur helium ke haq me.n
dast-bardaar hone kii fikr me.n hai
israafiil kii jamaaliyaatii his ko jilaa mil ga.ii
ab vo kisii music-school me.n daaKHila le legaa
food-corporation kaa mutaalbaa:
'mikhail kaa retirement' maan liyaa gayaa hai
wireless-telegraphy kaa mahkama
afsar-e-aalaa ke ohde ke liye
jibra.iil kii darKHvaast par Gaur kar rahaa hai
'KHudaa kii jagah KHaalii hai'
mutamannii hazraat fauran se pesh-tar darKHvaast de.n!

Aashufta Changezi
Nazm

aage baDhne wale

aage ba.Dhne vaale
badan ko kap.Do.n par o.Dhte
aur chhuriyaa.n tez kar ke nikalte hai.n
bhii.D ko chiir kar raasta banaate
naaKHuno.n se noch lete hai.n
libaas aur izzate.n-
surKH mircho.n se har aa.nkh ko andhaa kar dete hai.n
aur ba.Dh jaate hai.n
ra.uunat-bharii muskuraahaT ke saath
chiiKHte aur chup karaa dete hai.n
sar-e-aam raqs karte hai.n
aur gaa.Diyaa.n Takraa jaatii hai.n
la.Dke la.D pa.Dte
mard, patluune.n kas lete
aur buu.Dhe, tambaakuu me.n
gu.D kii miqdaar ba.Dhaa dete hai.n
ko.ii mez un ke saamne jamaa nahii.n rah saktaa
aur ko.ii mahfil
un kaa daaKHila rok nahii.n saktii
vo Thokar se darvaaza kholte hai.n
aur har kursii un ke liye KHaalii ho jaatii hai
un ke dabdabe se
diivaaro.n ke palastar ukha.D jaataa hai
kaaGaz, shor karnaa bhuul jaate hai.n
aur mausam, iraada tabdiil kar lete hai.n
aage ba.Dhne vaalo.n se panaah maa.ngte hai.n
un ke saath
Darte hai.n
zamiin par jhuk kar chalne vaale
bojhal KHaamoshii se unhe.n dekhte
aur guzar jaate hai.n
aage ba.Dhne vaale nahii.n jaante
ki aage ba.Dhaa jaa hii nahii.n saktaa
phir bhii vo ba.Dhte hai.n
pahu.nch kar dam lete hai.n
be-hayaa.ii kii shiddat
aa.nkho.n me.n
motiyaa utarne kii raftaar tez kar detii hai
har tane kii chhaal
badan par an-miT KHaraashe.n chho.D jaatii hai
phiTkirii aur vezliin se chiknaayaa hu.aa maas
haDDiyo.n se hamesha ju.Daa nahii.n rah saktaa
har badan aur har kursii kii
ek umr hu.aa kartii hai
aur phir ham unhe.n dekh sakte hai.n
ek din
lipTe hu.e libaas me.n
KHalaa ko ghuurte hu.e
kisii niim-taariik nasheb me.n
par-kaTe parinde kii tarah
miTTii par loTte hu.e
aage ba.Dhne kii paiham koshish me.n

Abrar Ahmad
Nazm

bebasi git bunti rahti hai

KHvaab garmii kii chuTTiyo.n pe ga.e
ho ga.e band gate aa.ankho.n ke
ishq ko daaKHila milaa hii nahii.n
KHvaahishe.n lockero.n me.n qaid rahii.n
jo bike us ke daam achchhe ho.n
zindagii ho ki ko.ii titlii ho
be-sabaatii ke rang kachche hai.n
kaun batlaa.e un zamiino.n ko
ja.ngalo.n ke ghane daraKHto.n me.n
gar KHizaa.n bele-Dance kartii ho
misr ko kaun yaad kartaa hai
kam nahii.n lucknow kii umraa.o
is se behtar yahaa.n pe hai.n fir.aun
kaun saa devtaa aur kyaa ra.amiis
mirzaa-'vaajid'-alii bhii kam to nahii.n

Faheem Shanas Kazmi
Nazm

qurrat-ul-ain-tahira ke liye ek nazm

ai qatiil-e-harf-e-laa
ai maah-e-qazvii.n sun
tire iqbaal kaa marqad charaaG-e-asr thaa
ab taaq-e-nisyaa.n me.n sajaayaa jaa chukaa hai
niil ke saahil se le kar taa-ba-KHaak kaa sher
ik KHvaab thaa shaayad bhulaayaa jaa chukaa hai
aur hamaarii lok-daanish kaa hamaare madraso.n me.n daaKHila mamnuu.a Thahraa hai
zar-e-KHaalis luTaayaa jaa rahaa hai ko.elo.n par saKHt pahraa hai
puraane maabado.n ke taaqcho.n me.n gard u.Dtii hai
gulistaa.n bostaa.n va bulbul-e-shiiraaz bhii yaa.n ajnabii Thahre
mujhe ab kaun puuchhegaa
qatiil-e-harf-e-laa
kaa.enaatii ishaariya
vahaa.n jo kuchh hu.aa hai raushnii mujh ko bataatii hai
yahaa.n jo ho rahaa hai raushnii tum ko bataa.ege
magar ye raushnii aage bhii jaa.egii
har ik shai ko bil-aaKHir nuur ke saa.nche me.n Dhalnaa hai
hame.n bhii do qadam is raushnii ke saath chalnaa hai
ye musht-e-KHaak bhii maqduur-bhar to jagmagaa.egii
mashiyyat muskuraa.egii
magar ye raushnii aage bhii jaa.egii

Kausar Mahmood
Nazm

talib-e-ilm

ham-nashii.n puuchh na landan me.n mashaaGil mere
goyaa haalaat nahii.n zikr ke qaabil mere
ghar se niklaa thaa pa.Dhaa.ii kii tamanna le kar
dil me.n machle hu.e armaano.n kii duniyaa le kar
Bar karne kaa bahut jald iraada kar ke
apne maa.n-baap se do saal kaa vaa'da kar ke
daaKHila milne me.n lekin jo zaraa der hu.ii
goyaa ye kahiye ki taqdiir ulaT pher hu.ii
bore hotaa thaa sub.h-o-shaam akelaa ghar me.n
dard rahtaa thaa KHayaalaat se mere sar me.n
dil bahut jab Gam-e-tanhaa.ii se ghabraataa thaa
to zaraa sair-e-gulistaa.n ko nikal jaataa thaa
ek din yuu.nhii jo gul-gasht-e-chaman ko niklaa
dard se chuur mudaavaa-e-mehan ko niklaa
dekhtaa kyaa huu.n ki ek bench pe chashme ke qarii.n
mahv-e-nazaara-e-fitrat hai ko.ii zohra-jabii.n
us ke nazdiik mai.n chupke se vahii.n baiTh gayaa
but-shikan jaise ko.ii but ke qarii.n baiTh gayaa
baat mausam se jo niklii to mohabbat pe ga.ii
lazzat-e-vasl se ba.Dh kar Gam-e-furqat pe ga.ii
KHarch karne ke liye ghar se raqam aatii thii
foreign exchange ke permit pe go kam aatii thii
ham piccadily pe har ik shaam milaa karte the
biich baazaar sar-e-'aam milaa karte the
maGribii raqs mujhe go ki nahii.n aataa thaa
us ne ik din me.n sikhaa Daalaa magar chaa chaa chaa
roz kamre me.n slow waltz kiyaa kartaa thaa
mai.n mai-e-husn ko chakh chakh ke piyaa kartaa thaa
vo ga.ii aur milii phir vo ga.ii aur milii
baa'z auqaat bahut jald va fil-faur milii
ab ye 'aalam hai ki bas KHuun-e-jigar piitaa huu.n
zindagii maut se bad-tar hai magar jiitaa huu.n

Betab Amrohvi
Nazm

ai ishq hamein barbaad na kar

ummiid kii jhuuTii jannat ke rah rah ke na dikhlaa KHvaab hame.n
aa.inda kii farzii ishrat ke va.ado.n se na kar betaab hame.n
kahtaa hai zamaana jis ko KHushii aatii hai nazar kamyaab hame.n

Akhtar Shirani
Nazm

KHizr-e-rah

banda-e-mazduur ko jaa kar miraa paiGaam de
KHizr kaa paiGaam kyaa hai ye payaam-e-kaa.enaat
ai ki tujh ko khaa gayaa sarmaaya-daar-e-hiila-gar
shaaKH-e-aahuu par rahii sadiyo.n talak terii baraat
dast-e-daulat-aafrii.n ko muzd yuu.n miltii rahii
ahl-e-sarvat jaise dete hai.n Gariibo.n ko zakaat
saahir-al-muut ne tujh ko diyaa barg-e-hashiish
aur tuu ai be-KHabar samjhaa use shaaKH-e-nabaat
nasl qaumiyat kaliisaa saltanat tahziib rang
KHvaajgii ne KHuub chun chun ke banaa.e muskiraat
kaT maraa naadaa.n KHayaalii devtaa.o.n ke liye
sukr kii lazzat me.n tuu luTvaa gayaa naqd-e-hayaat
makr kii chaalo.n se baazii le gayaa sarmaaya-daar
intihaa-e-saadgii se khaa gayaa mazduur maat
uTh ki ab bazm-e-jahaa.n kaa aur hii andaaz hai
mashriq-o-maGrib me.n tere daur kaa aaGaaz hai
himmat-e-aalii to dariyaa bhii nahii.n kartii qubuul
Guncha saa.n Gaafil tire daaman me.n shabnam kab talak
naGma-e-bedaarii-e-jamhuur hai saamaan-e-'aish
qissa-e-KHvaab-aavar askandar-o-jam kab talak
aaftaab-e-taaza paidaa batn-e-giitii se hu.aa
aasmaan Duube hu.e taaro.n kaa maatam kab talak
to.D Daalii.n fitrat-e-insaa.n ne zanjiire.n tamaam
duurii-e-jannat se rotii chashm-e-aadam kab talak
baaGbaan-e-chaara-farmaa se ye kahtii hai bahaar
zaKHm-e-gul ke vaaste tadbiir-e-marham kab talak
kirmak-e-naadaa.n tavaaf-e-sham.a se aazaad ho
apnii fitrat ke tajallii-zaar me.n aabaad ho
duniyaa-e-islaam

Allama Iqbal
Nazm

zohd aur rindi

ik maulvii saahab kii sunaataa huu.n kahaanii
tezii nahii.n manzuur tabii.at kii dikhaanii
shohra thaa bahut aap kii suufii-manushii kaa
karte the adab un kaa a.aalii o adaanii
kahte the ki pinhaa.n hai tasavvuf me.n sharii.at
jis tarah ki alfaaz me.n muzmar ho.n ma.aanii
labrez mai-e-zohd se thii dil kii suraahii
thii tah me.n kahii.n durd-e-KHayaal-e-hama-daanii
karte the bayaa.n aap karaamaat kaa apnii
manzuur thii taadaad muriido.n kii ba.Dhaanii
muddat se rahaa karte the ham-saa.e me.n mere
thii rind se zaahid kii mulaaqaat puraanii
hazrat ne mire ek shanaasaa se ye puuchhaa
'iqbaal' ki hai qumri-e-shamshaad-e-ma.aanii
paabandi-e-ahkaam-e-sharii.at me.n hai kaisaa
go sher me.n hai rashk-e-kaliim-e-hamdaanii
suntaa huu.n ki kaafir nahii.n hinduu ko samajhtaa
hai aisaa aqiida asar-e-falsafa-daanii
hai us kii tabii.at me.n tashayyo bhii zaraa saa
tafziil-e-alii ham ne sunii us kii zabaanii
samjhaa hai ki hai raag ibaadaat me.n daaKHil
maqsuud hai maz.hab kii magar KHaak u.Daanii
kuchh aar use husn-faraamosho.n se nahii.n hai
aadat ye hamaare shoraa kii hai puraanii
gaanaa jo hai shab ko to sahar ko hai tilaavat
is ramz ke ab tak na khule ham pe ma.aanii
lekin ye sunaa apne muriido.n se hai mai.n ne
be-daaG hai maanind-e-sahar us kii javaanii
majmu.a-e-azdaad hai 'iqbaal' nahii.n hai
dil daftar-e-hikmat hai tabii.at KHafaqaanii
rindii se bhii aagaah sharii.at se bhii vaaqif
puuchho jo tasavvuf kii to mansuur kaa saanii
us shaKHs kii ham par to haqiiqat nahii.n khultii
hogaa ye kisii aur hii islaam kaa baanii
al-qissa bahut tuul diyaa vaaz ko apne
taa-der rahii aap kii ye naGz-bayaanii
is shahr me.n jo baat ho u.D jaatii hai sab me.n
mai.n ne bhii sunii apne ahibbaa kii zabaanii
ik din jo sar-e-raah mile hazrat-e-zaahid
phir chhi.D ga.ii baato.n me.n vahii baat puraanii
farmaayaa shikaayat vo mohabbat ke sabab thii
thaa farz miraa raah sharii.at kii dikhaanii
mai.n ne ye kahaa ko.ii gila mujh ko nahii.n hai
ye aap kaa haq thaa ze-rah-e-qurb-e-makaanii
KHam hai sar-e-tasliim miraa aap ke aage
piirii hai tavaazo ke sabab merii javaanii
gar aap ko maaluum nahii.n merii haqiiqat
paidaa nahii.n kuchh is se qusuur-e-hamaadaanii
mai.n KHud bhii nahii.n apnii haqiiqat kaa shanaasaa
gahraa hai mire bahr-e-KHayaalaat kaa paanii
mujh ko bhii tamannaa hai ki 'iqbaal' ko dekhuu.n
kii us kii judaa.ii me.n bahut ashk-fishaanii
'iqbaal' bhii 'iqbaal' se aagaah nahii.n hai
kuchh is me.n tamasKHur nahii.n vallaah nahii.n hai

Allama Iqbal
Nazm

jugnu

ye shaaKH-saar ke jhuulo.n me.n pe.ng pa.Dte hu.e
ye laakho.n pattiyo.n kaa naachnaa ye raqs-e-nabaat
ye be-KHudii-e-musarrat ye vaalihaana raqs
ye taal-sam ye chhamaa-chham ki kaan bajte hai.n
havaa ke dosh pe kuchh uudii uudii shaklo.n kii
nashe me.n chuur sii parchhaa.iyaa.n thiraktii hu.ii
ufuq pe Duubte din kii jhapaktii hai.n aa.nkhe.n
KHamosh soz-e-daruu.n se sulag rahii hai ye shaam!
mire makaan ke aage hai ek chau.Daa sahn vasii.a
kabhii vo ha.nstaa nazar aataa hai kabhii vo udaas
isii ke biich me.n hai ek pe.D piipal kaa
sunaa hai mai.n ne buzurgo.n se ye ki umr us kii
jo kuchh na hogii to hogii qariib chhiyaanve saal
chhi.Dii thii hind me.n jab pahlii ja.ng-e-aazaadii
jise dabaane ke baa'd us ko Gadr kahne lage
ye ahl-e-hind bhii hote hai.n kis qadar ma.asuum
vo daar-o-giir vo aazaadii-e-vatan kii ja.ng
vatan se thii ki Ganiim-e-vatan se Gaddaarii
biphar ga.e the hamaare vatan ke piir o javaa.n
dayaar-e-hind me.n ran pa.D gayaa thaa chaar taraf
usii zamaane me.n kahte hai.n mere daadaa ne
jab arz-e-hind si.nchii KHuun se ''sapuuto.n'' ke
miyaan-e-sahn lagaayaa thaa laa ke ik paudaa
jo aab-o-aatish-o-KHaak-o-havaa se paltaa hu.aa
KHud apne qad se ba-josh-e-numuu nikaltaa hu.aa
fusuun-e-ruuh banaatii rago.n me.n chaltaa hu.aa
nigaah-e-shauq ke saa.ncho.n me.n roz Dhaltaa hu.aa
sunaa hai raaviyo.n se diidanii thii us kii uThaan
har ik ke dekhte hii dekhte cha.Dhaa parvaan
vahii hai aaj ye chhitnaar pe.D piipal kaa
vo Tahniyo.n ke kamanDal liye jaTaadhaarii
zamaana dekhe hu.e hai ye pe.D bachpan se
rahii hai is ke liye daaKHlii kashish mujh me.n
rahaa huu.n dekhtaa chup-chaap der tak us ko
mai.n kho gayaa huu.n ka.ii baar is nazaare me.n
vo us kii gahrii ja.De.n thii.n ki zindagii kii ja.De.n?
pas-e-sukuun-e-shajar ko.ii dil dha.Daktaa thaa
mai.n dekhtaa thaa use hastii-e-bashar kii tarah
kabhii udaas kabhii shaadmaa.n kabhii gambhiir
fazaa kaa surma.ii rang aur ho chalaa gahraa
ghulaa ghulaa saa falak hai dhu.aa.n dhu.aa.n sii hai shaam
hai jhuTpuTaa ki ko.ii azhdahaa hai maa.il-e-KHvaab
sukuut-e-shaam me.n darmaandagii kaa aalam hai
rukii rukii sii kisii soch me.n hai mauj-e-sabaa

Firaq Gorakhpuri
Nazm

mazduron ka git

ham kyaa hai.n kabhii dikhlaa de.nge
ham nazm-e-kuhan ko Dhaa de.nge
ham arz-o-samaa ko hilaa de.nge
mazduur hai.n ham mazduur hai.n ham

Asrarul Haq Majaz
Nazm

hubb-e-watan

sunte ho saama.iin-e-baa-tamkii.n
sunte ho haazriin-e-sadr-nashii.n
jo hai.n duniyaa me.n qaum ke hamdard
banda-e-qaum un ke hai.n zan o mard
baap kii hai du.aa ye bahr-e-pisar
qaum kii mai.n banaa.uu.n us ko sipar
maa.n KHudaa se ye maa.ngtii hai muraad
qaum par se nisaar ho aulaad
bhaa.ii aapas me.n karte hai.n paimaa.n
tuu agar maal de to mai.n duu.n jaa.n
ahl-e-himmat kamaa ke laate hai.n
ham-vatan faa.ede uThaate hai.n
kahii.n hote hai.n madrase jaarii
daKHl aur KHarj jin ke hai.n bhaarii
aur kahii.n hote hai.n club qaa.em
mab.has-e-hikmat aur adab qaa.em
nit-na.e khulte hai.n davaa-KHaane
bante hai.n saik.Do.n shifaa-KHaane
mulk me.n jo maraz hai.n aalam-giir
qaum par un kii farz hai tadbiir
hai.n sadaa is udhe.D-bun me.n tabiib
ki ko.ii nusKHa haath aa.e ajiib
qaum ko pahu.nche manfa.at jis se
mulk me.n phaile.n faa.ede jis ke
khap ga.e kitne ban ke jhaa.Do.n me.n
mar ga.e saik.Do.n pahaa.Do.n me.n
likhe jab tak jiye safar-naame
chal diye haath me.n qalam thaame
go safar me.n uThaa.e ra.nj-e-kamaal
kar diyaa par vatan ko apne nihaal
hai.n ab in ke gavaah hubb-e-vatan
dar-o-diivaar-e-paris o london
kaam hai.n sab bashar ke ham-vatano.n
tum se bhii ho sake to mard bano
chho.Do afsurdagii ko josh me.n aa.o
bas bahut so.e uTTho hosh me.n aa.o
qaafile tum se ba.Dh ga.e koso.n
rahe jaate ho sab se piichhe kyuu.n
qaafilo.n se agar milaa chaaho
mulk aur qaum kaa bhalaa chaaho
gar rahaa chaahte ho izzat se
bhaa.iyo.n ko nikaalo zillat se
un kii izzat tumhaarii izzat hai
un kii zillat tumhaarii zillat hai
qaum kaa mubtadil hai jo insaa.n
be-haqiiqat hai garche hai sultaa.n
qaum duniyaa me.n jis kii hai mumtaaz
hai faqiirii me.n bhii vo baa-e.azaaz
izzat-e-qaum chaahte ho agar
jaa ke phailaa.o un me.n ilm-o-hunar
zaat kaa faKHr aur nasab kaa Guruur
uTh ga.e ab jahaa.n se ye dastuur
ab na sayyad kaa iftiKHaar sahiih
na barhaman ko shudr par tarjiih
hu.ii turkii tamaam KHaano.n me.n
kaT ga.ii ja.D se KHaandaano.n me.n
qaum kii izzat ab hunar se hai
ilm se yaa ki siim-o-zar se hai
ko.ii din me.n vo daur aa.egaa
be-hunar bhiik tak na paa.egaa
na rahe.nge sadaa yahii din raat
yaad rakhnaa hamaarii aaj kii baat
gar nahii.n sunte qaul 'haalii' kaa
phir na kahnaa ki ko.ii kahtaa thaa

Altaf Hussain Hali
Nazm

mohabbat ke raste mein

mohabbat ke raaste me.n
ek ghar hai
jis me.n mohabbat
kabhii nahii.n rahtii
aur ek qila
jis me.n andar daaKHil ho ke
ko.ii baahar nahii.n nikal saktaa

Zeeshan Sahil
Nazm

munajat-e-bewa

(1)
ai sab se avval aur aaKHir
jahaa.n-tahaa.n, haazir aur naazir
ai sab daanaa.o.n se daanaa
saare tavaanaa.o.n se tavaanaa
ai baalaa, har baalaa-tar se
chaa.nd se suuraj se ambar se
ai samjhe buujhe bin suujhe
jaane-pahchaane bin buujhe
sab se anokhe sab se niraale
aa.nkh se ojhal dil ke ujaale
ai andho.n kii aa.nkh ke taare
ai la.ng.De luulo.n ke sahaare
naatiyo.n se chhoTo.n ke naatii
saathiyo.n se bichh.Do.n ke saathii
naav jahaa.n kii khene vaale
dukh me.n tasallii dene vaale
jab ab tab tujh saa nahii.n ko.ii
tujh se hai.n sab tujh saa nahii.n ko.ii
jot hai terii jal aur thal me.n
baas hai terii phuul aur phal me.n
har dil me.n hai teraa baseraa
tuu paas aur ghar duur hai teraa
raah tirii dushvaar aur suk.Dii
naam tiraa rah-giir kii lak.Dii
tuu hai Thikaanaa miskiino.n kaa
tuu hai sahaaraa Gamgiino.n kaa
tuu hai akelo.n kaa rakhvaalaa
tuu hai a.ndhere ghar kaa ujaalaa
laaguu achchhe aur bure kaa
KHvaahaa.n khoTe aur khare kaa
bed niraase biimaaro.n kaa
gaahak mande baazaaro.n kaa
soch me.n dil bahlaane vaale
biptaa me.n yaad aane vaale
(2)
ai be-vaaris gharo.n ke vaaris
be-baazuu be-paro.n ke vaaris
be-aaso.n kii aas hai tuu hii
jaagte sote paas hai tuu hii
bas vaale hai.n yaa be-bas hai.n
tuu nahii.n jin kaa vo be-kas hai.n
saathii jin kaa dhyaan hai teraa
dusraayat kii vahaa.n nahii.n parvaa
dil me.n hai jin ke terii ba.Daa.ii
ginte hai.n vo parbat ko raa.ii
bekas kaa Gam-KHvaar hai tuu hii
burii banii kaa yaar hai tuu hii
dukhiyaa dukhii yatiim aur beva
tere hii haath un sab kaa hai khevaa
tuu hii maraz de tuu hii davaa de
tuu hii davaa-daaruu me.n shifaa de
tuu hii pilaa.e zahr ke pyaale
tuu hii phir amrit zahr me.n Daale
tuu hii dilo.n me.n aag lagaa.e
tuu hii dilo.n kii lagii bujhaa.e
chumkaare chumkaar ke maare
maare maar ke phir chumkaare
pyaar kaa tere puuchhnaa kyaa hai
maar me.n bhii ik terii mazaa hai
(3)
ai rahmat aur haibat vaale
shafqat aur dabaaGat vaale
ai aTkal aur dhyaan se baahar
jaan se aur pahchaan se baahar
aql se ko.ii paa nahii.n saktaa
bhed tire hukmo.n me.n hai.n kyaa kyaa
ek ko tuu ne shaad kiyaa hai
ek ke dil ko daaG diyaa hai
us se na teraa pyaar kuchh aisaa
us se na tuu bezaar kuchh aisaa
har dam terii aan na.ii hai
jab dekho tab shaan na.ii hai
yahaa.n pachhu.aa hai vahaa.n purvaa hai
ghar ghar teraa hukm nayaa hai
phuul kahii.n kumlaa.e hu.e hai.n
aur kahii.n phal aa.e hu.e hai.n
khetii ek kii hai lahraatii
ek kaa har dam KHuun sukhaatii
ek pa.De hai.n dhan ko Dubo.e
ek hai.n gho.De bech ke so.e
ek ne jab se hosh sambhaalaa
ra.nj se us ko pa.Daa na paalaa
ek ne is janjaal me.n aa kar
chain na dekhaa aa.nkh uThaa kar
me.nh kahii.n daulat kaa hai barastaa
hai ko.ii paanii tak ko tarastaa
ek ko marne tak nahii.n dete
ek uktaa gayaa lete lete
haal Garaz duniyaa kaa yahii hai
Gam pahle aur baa'd KHushii hai
ra.nj kaa hai duniyaa ke gilaa kyaa
tohfa yahii le de ke hai yaa.n kaa
yahaa.n nahii.n bantii ranj sahe bin
ra.nj nahii.n sab ek se lekin
ek se yahaa.n ranj ek hai baalaa
ek se hai dard ek niraalaa
ghaav hai go naasuur kii suurat
par use kyaa naasuur se nisbat
tap vahii diq kii shakl hai lekin
diq nahii.n rahtii jaan liye bin
diq ho vo yaa naasuur ho kuchh ho
de na jo ab ummiid kisii ko
roz kaa Gam kyuu.n-kar sahe ko.ii
aas na jab baaqii rahe ko.ii
tuu hii kar insaaf ai mire maulaa
kaun hai jo be-aas hai jiitaa
go ki bahut bande hai.n pur-armaa.n
kam hai.n magar maayuus hai.n jo yaa.n
KHvaah dukhii hai KHvaah sukhii hai
jo hai ik ummiid us ko ba.ndhii hai
khetiyaa.n jin kii kha.Dii hai.n suukhii
aas vo baa.ndhe baiThe hai.n me.nh kii
ghaTaa jin kii asaa.Dii me.n hai
saavanii kii ummiid nahii.n hai
Duub chukii hai un kii agetii
detii hai Dhaaras un ko pachhetii
ek hai is ummiid pe jiitaa
ab hu.ii beTii ab hu.aa beTaa
ek ko jo aulaad milii hai
us ko uma.ng shaadiyo.n kii hai
ra.nj hai yaa qismat me.n KHushii hai
kuchh hai magar ik aas ba.ndhii hai
Gam nahii.n un ko Gamgii.n hai.n
jo dil naa-umiid nahii.n hai.n
kaal me.n kuchh saKHtii nahii.n aisii
kaal me.n hai jab aas samay.n kii
sahal hai maujo.n se chhuTkaaraa
jab ki nazar aataa hai kinaaraa
par nahii.n uTh saktii vo musiibat
aa.egii jis ke baa'd na raahat
shaad ho us rah-giir kaa kyaa dil?
mar ke kaTegii jis kii manzil
un uj.Do.n ko kal pa.De kyuu.n-kar
ghar na basegaa jin kaa janam bhar
un bichh.Do.n kaa kyaa hai Thikaanaa?
jin ko na milne degaa zamaana
ab ye balaa Taltii nahii.n Taalii
mujh pe hai jo taqdiir ne Daalii
aa.ii.n bahut duniyaa me.n bahaare.n
aish kii ghar ghar pa.Dii.n pukaare.n
pa.De bahut baaGo.n me.n jhuule
Dhaak bahut jangal me.n phuule
ga.ii.n aur aa.e.n chaa.ndnii raate.n
barsii.n khulii.n bahut barsaate.n
par na khilii hargiz na khilegii
vo jo kalii murjhaa.ii thii dil kii
aas hii kaa bas naam hai duniyaa
jab na rahii yahii to rahaa kyaa?
aise bidesii kaa nahii.n Gam kuchh
jis ko na ho milne kii qasam kuchh
ronaa un ban-baasiyo.n kaa hai
des nikaalaa jin ko milaa hai
hukm se tere par nahii.n chaara
ka.Dvii miiThii sab hai gavaaraa
zor hai kyaa patte kaa havaa par
chaahe jidhar le jaa.e u.Daa kar
tinkaa ik aur saat samundar
jaa.e kahaa.n maujo.n se nikal kar
qismat hii me.n jab thii judaa.ii
phir Taltii kis tarah ye aa.ii?
aaj kii big.Dii ho to bane bhii
azal kii big.Dii KHaak banegii
tuu jo chaahe vo nahii.n Taltaa
bande kaa yaa.n bas nahii.n chaltaa
maare aur na de tuu rone
thapke aur na de tuu sone
Thahre ban aatii hai na bhaage
terii zabardastii ke aage
tujh se kahii.n gar bhaagnaa chaahe.n
band hai.n chaaro.n khuu.nT kii raahe.n
tuu maare aur KHvaah navaaze
pa.Dii hu.ii huu.n mai.n tere darvaaze
tujh ko apnaa jaantii huu.n mai.n
tujh se nahii.n to kis se kahuu.n mai.n
maa.n hii sadaa bachche ko maare
aur bachcha maa.n maa.n hii pukaare
(4)
ai mire zor aur qudrat vaale
hikmat aur hukuumat vaale
mai.n lau.nDii terii dukhyaare
darvaaze kii terii bhikaarii
maut kii KHvaahaa.n jaan kii dushman
jaan apnii hai aap ajiiran
apne paraa.e kii dhutkaarii
maike aur sasuraal pe bhaarii
sah ke bahut aazaar chalii huu.n
duniyaa se bezaar chalii huu.n
dil par mere daaG hai.n jitne
mu.nh me.n bol nahii.n hai.n utne
dukh dil kaa kuchh kah nahii.n saktii
is ke sivaa kuchh kah nahii.n saktii
tujh pe hai raushan sab dukh dil kaa
tujh se haqiiqat apnii kahuu.n kyaa
byaah ke dam paa.ii thii na lene
lene ke yaa.n pa.D ga.e dene
KHushii me.n bhii dukh saath na aayaa
Gam ke sivaa kuchh haat na aayaa
ek KHushii ne Gam ye dikhaa.e
ek ha.nsii ne gul hii khilaa.e
kaisaa thaa ye byaah ninaavaa.n
juu.nhii pa.Daa is kaa parchaavaa.n
chain se rahne diyaa na jii ko
kar diyaa maliyaameT KHushii ko
ro nahii.n saktii ta.ng huu.n yaa.n tak
aur ro.uu.n to ro.uu.n kahaa.n tak
ha.ns ha.ns dil bahlaa.uu.n kyuu.n-kar
oso.n pyaas bujhaa.uu.n kyuu.n-kar
ek kaa kuchh jiinaa nahii.n hotaa
ek na ha.nstaa bhalaa na rotaa
leTe gar sone ke bahaane
paa.entii kal hai aur na sirhaane
jaagiye to bhii ban nahii.n pa.Dtii
jaagne kii aaKHir ko.ii had bhii
ab kal ham ko pa.Degii mar kar
gor hai suunii sej se behtar
baat se nafrat kaam se vahshat
TuuTii aas aur bujhii tabii.at
aabaadii jangal kaa namuuna
duniyaa suunii aur ghar suunaa
din hai bhayaanak aur raat Daraanii
yuu.n guzrii saarii ye javaanii
bahne.n aur bahneliyaa.n merii
saath kii jo thii.n kheliyaa.n merii
mil na sakii.n jii khol ke mujh se
KHush na hu.ii.n ha.ns bol ke mujh se
jab aa.ii.n ro-dho ke ga.ii.n vo
jab ga.ii.n be-kal ho ke ga.ii.n vo
ko.ii nahii.n dil kaa bahlaavaa
aa nahii.n chuktaa meraa bulaavaa
aaTh pahar kaa hai ye julaapaa
kaaTuu.ngii kis tarah ra.nDaapaa
thak ga.ii dukh sahte sahte
tham ga.e aa.nsuu bahte bahte
aag khulii dil kii na kisii par
ghul ga.ii jaan andar hii andar
dekh ke chup jaanaa na kisii ne
jaan ko phuu.nkaa dil kii lagii ne
dabii thii bhobhal me.n chi.ngaarii
lii na kisii ne KHabar hamaarii
qaum me.n vo KHushiyaa.n biyaaho.n kii
shahr me.n vo dho.e.n saaho.n kii
tyauhaaro.n kaa aa.e din aanaa
aur sab kaa tyauhaar manaanaa
vo chait aur phaagun kii havaa.e.n
vo saavan bhaado.n kii ghaTaa.e.n
vo garmii kii chaa.ndnii raate.n
vo armaan bharii barsaate.n
kis se kahuu.n kis taur se kaaTe.n
KHair kaTe.n jis taur se kaaTe.n
chaav ke aur KHushiyo.n ke samay sab
aate hai.n KHush kal jaan ko ho jab
ra.nj me.n hai.n saamaan KHushii ke
aur jalaane vaale hii ke
ghar barkhaa aur piyaa bidesii
aa.iyo barkhaa kahii.n na aisii
din ye javaanii ke kaTe aise
baaG me.n panchhii qaid ho jaise
rut ga.ii saarii sar Takraate
u.D na sake par hote saare
kisii ne hogii kuchh kal paa.ii
mujhe to shaadii raas na aa.ii
aas ba.ndhii lekin na milaa kuchh
phuul aayaa aur phal na lagaa kuchh
rah gayaa de kar chaa.nd dikhaa.ii
chaa.nd hu.aa par iid na aa.ii
phal kii KHaatir barchhii khaa.ii
phal na milaa aur jaan ga.nvaa.ii
ret me.n zarre dekh chamakte
dau.D pa.Dii me.n jhiil samajh ke
chaaro.n khuu.nT nazar dau.Daa.ii
par paanii kii buu.nd na paa.ii

Altaf Hussain Hali
Nazm

diwar-e-girya

vo kaisaa shobada-gar thaa
jo masnuu.ii sitaaro.n
aur naqlii suurajo.n kii
ik jhalak dikhlaa ke
mere saada dil logo.n
kii aa.nkho.n ke diye
ho.nTo.n ke jugnuu
le gayaa
aur ab ye aalam hai
ki mere shahr kaa
har ik makaa.n
ik Gaar kii maanind
mahruum-e-navaa hai
aur ha.nstaa boltaa har shaKHs
ik diivaar-e-girya hai

Ahmad Faraz
Nazm

taaqub

sub.h utraa thaa mai.n jangal me.n
to sochaa thaa ki us shoKH hiran ko
neze kii nok pe parcham kii tarah taan ke mai.n shahr me.n daaKHil huu.ngaa
din magar Dhalne lagaa hai
dil me.n ik KHauf saa ab baiTh rahaa hai
ki bil-aaKHir ye hiran hii
mujhe sii.ngo.n par uThaa.e hu.e ik Gaar me.n daaKHil hogaa

Gulzar
Nazm

bol! ari o dharti bol!

bol! arii o dhartii bol!
raaj singhaasan Daa.nvaaDol
baadal bijlii rain a.ndhyaarii
dukh kii maarii parjaa saarii
buu.Dhe bachche sab dukhiyaa hai.n
dukhiyaa nar hai.n dukhiyaa naarii
bastii bastii luuT machii hai
sab baniye hai.n sab byopaarii
bol! arii o dhartii bol!
raaj singhaasan Daa.nvaaDol
kaljug me.n jag ke rakhvaale
chaa.ndii vaale sone vaale
desii ho.n yaa pardesii ho.n
niile piile gore kaale
makkhii bhi.nge bhin bhin karte
Dhuu.nDe hai.n mak.Dii ke jaale
bol! arii o dhartii bol!
raaj singhaasan Daa.nvaaDol
kyaa afra.ngii kyaa taataarii
aa.nkh bachii aur barchhii maarii
kab tak jantaa kii bechainii
kab tak jantaa kii be-zaarii
kab tak sarmaaya ke dhande
kab tak ye sarmaaya-daarii
bol! arii o dhartii bol!
raaj singhaasan Daa.nvaaDol
naamii aur mash.huur nahii.n ham
lekin kyaa mazduur nahii.n ham
dhokaa aur mazduuro.n ko de.n
aise to majbuur nahii.n ham
manzil apne paa.nv ke niiche
manzil se ab duur nahii.n ham
bol! arii o dhartii bol!
raaj singhaasan Daa.nvaaDol
bol ki terii KHidmat kii hai
bol ki teraa kaam kiyaa hai
bol ki tere phal khaa.e hai.n
bol ki teraa duudh piyaa hai
bol ki ham ne hashr uThaayaa
bol ki ham se hashr uThaa hai
bol ki ham se jaagii duniyaa
bol ki ham se jaagii dhartii
bol! arii o dhartii bol!
raaj singhaasan Daa.nvaaDol

Asrarul Haq Majaz
Nazm

shahkar

magar haa.n bench ke badle use sofe pe biThlaa de
yahaa.n mere bajaa.e ik chamaktii car dikhlaa de

Sahir Ludhianvi
Nazm

mazuri

KHalvat-o-jalvat me.n tum mujh se milii ho baar-haa
tum ne kyaa dekhaa nahii.n mai.n muskuraa saktaa nahii.n
mai.n ki maayuusii mirii fitrat me.n daaKHil ho chukii
jabr bhii KHud par karuu.n to gungunaa saktaa nahii.n
mujh me.n kyaa dekhaa ki tum ulfat kaa dam bharne lagii.n
mai.n to KHud apne bhii ko.ii kaam aa saktaa nahii.n
ruuh-afzaa hai.n junuun-e-ishq ke naGme magar
ab mai.n in gaa.e hu.e giito.n ko gaa saktaa nahii.n
mai.n ne dekhaa hai shikast-e-saaz-e-ulfat kaa samaa.n
ab kisii tahriik par barbat uThaa saktaa nahii.n
dil tumhaarii shiddat-e-ehsaas se vaaqif to hai
apne ehsaasaat se daaman chhu.Daa saktaa nahii.n
tum mirii ho kar bhii begaana hii paa.ogii mujhe
mai.n tumhaaraa ho ke bhii tum me.n samaa saktaa nahii.n
gaa.e hai.n mai.n ne KHuluus-e-dil se bhii ulfat ke giit
ab riyaa-kaarii se bhii chaahuu.n to gaa saktaa nahii.n
kis tarah tum ko banaa luu.n mai.n shariik-e-zindagii
mai.n to apnii zindagii kaa baar uThaa saktaa nahii.n
yaas kii taariikiyo.n me.n Duub jaane do mujhe
ab mai.n sham-e-aarzuu kii lau ba.Dhaa saktaa nahii.n

Sahir Ludhianvi
Nazm

sab jaante hain ilm se hai zindagi ki ruh

sab jaante hai.n ilm se hai zindagii kii ruuh
be-ilm hai agar to vo insaa.n hai naa tamaam
be-ilm-o-be-hunar hai jo duniyaa me.n ko.ii qaum
nature kaa iqtizaa hai rahe ban ke vo Gulaam
ta.aliim agar nahii.n hai zamaane ke hasb-o-haal
phir kyaa umiid-e-daulat-o-aaraam-o-ihteraam
sayyad ke dil me.n naqsh ho is KHayaal kaa
Daalii binaa-e-madrasa le kar KHudaa kaa naam
sadme uThaa.e ranj sahe gaaliyaa.n sunii.n
lekin na chho.Daa qaum ke KHaadim ne ye kaam
dikhlaa diyaa zamaane ko zor-e-dil-o-dimaaG
batlaa diyaa vo karte hai.n karne vaale kaam
niyyat jo thii ba-KHair to barkat KHudaa ne dii
collage hu.aa durust ba-sad shaan-o-ehtishaam
sarmaa.e me.n kamii thii sahaaraa ko.ii na thaa
sayyad kaa dil thaa darpai takmiil-e-intizaam
aaKHir uThaa safar ko vo mard KHasta paye
ahbaab chand saath the zii-ilm-o-KHush-kalaam
qismat ki rahbarii se milii manzil-e-muraad
farmaa.n-ravaa-e-mulk-e-dakan ko kiyaa salaam
haalat dikhaa.ii aur zaruurat bayaan kii
KHuubii se iltimaas kiyaa qaum kaa payaam
rahm aa gayaa huzuur ko haalat pe qaum kii
phir kyaa thaa maujzan hu.aa dariyaa-e-faiz-e-aam
maahaana do hazaar kiyaa ik hazaar se
ummiid se ziyaada ataa thii ye laa-kalaam
'akbar' kii ye du.aa hai KHudaa kii janaab me.n
taa-hashr is ra.iis-o-riyaasat ko ho qayaam
kyaa vaqt par hu.ii hai ki be-ehtijjaj-e-fikr
taariik apnii aap hai fayyazii-e-nizaam

Akbar Allahabadi
Nazm

baad-az-waqt

dil ko ehsaas se do-chaar na kar denaa thaa
saaz-e-KHvaabiida ko bedaar na kar denaa thaa
apne ma.asuum tabassum kii faraavaanii ko
vus.at-e-diid pe gul-baar na kar denaa thaa
shauq-e-majbuur ko bas ek jhalak dikhlaa kar
vaaqif-e-lazzat-e-takraar na kar denaa thaa
chashm-e-mushtaaq kii KHaamosh tamannaa.o.n ko
yak-ba-yak maa.el-e-guftaar na kar denaa thaa
jalva-e-husn ko mastuur hii rahne dete
hasrat-e-dil ko gunahgaar na kar denaa thaa

Faiz Ahmad Faiz
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now