Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "gahvaaraa"

Nazm MATCHES FOR "gahvaaraa"

Nazm

aurat

uTh mirii jaan mire saath hii chalnaa hai tujhe
qalb-e-maahaul me.n larzaa.n sharar-e-ja.ng hai.n aaj
hausle vaqt ke aur ziist ke yak-ra.ng hai.n aaj
aabgiino.n me.n tapaa.n valvala-e-sa.ng hai.n aaj
husn aur ishq ham-aavaaz o ham-aaha.ng hai.n aaj
jis me.n jaltaa huu.n usii aag me.n jalnaa hai tujhe
uTh mirii jaan mire saath hii chalnaa hai tujhe
tere qadmo.n me.n hai firdaus-e-tamaddun kii bahaar
terii nazro.n pe hai tahziib o taraqqii kaa madaar
terii aaGosh hai gahvaara-e-nafs-o-kirdaar
taa-ba-kai gird tire vahm o ta.ayyun kaa hisaar
kau.nd kar majlis-e-KHalvat se nikalnaa hai tujhe
uTh mirii jaan mire saath hii chalnaa hai tujhe
tuu ki be-jaan khilauno.n se bahal jaatii hai
taptii saa.nso.n kii haraarat se pighal jaatii hai
paa.nv jis raah me.n rakhtii hai phisal jaatii hai
ban ke siimaab har ik zarf me.n Dhal jaatii hai
ziist ke aahanii saa.nche me.n bhii Dhalnaa hai tujhe
uTh mirii jaan mire saath hii chalnaa hai tujhe
zindagii jehd me.n hai sabr ke qaabuu me.n nahii.n
nabz-e-hastii kaa lahuu kaa.npte aa.nsuu me.n nahii.n
u.Dne khulne me.n hai nik.hat KHam-e-gesuu me.n nahii.n
jannat ik aur hai jo mard ke pahluu me.n nahii.n
us kii aazaad ravish par bhii machalnaa hai tujhe
uTh mirii jaan mire saath hii chalnaa hai tujhe
goshe goshe me.n sulagtii hai chitaa tere liye
farz kaa bhes badaltii hai qazaa tere liye
qahr hai terii har ik narm adaa tere liye
zahr hii zahr hai duniyaa kii havaa tere liye
rut badal Daal agar phuulnaa phalnaa hai tujhe
uTh mirii jaan mire saath hii chalnaa hai tujhe
qadr ab tak tirii taariiKH ne jaanii hii nahii.n
tujh me.n sho.ale bhii hai.n bas ashk-fishaanii hii nahii.n
tuu haqiiqat bhii hai dilchasp kahaanii hii nahii.n
terii hastii bhii hai ik chiiz javaanii hii nahii.n
apnii taariiKH kaa unvaan badalnaa hai tujhe
uTh mirii jaan mire saath hii chalnaa hai tujhe
to.D kar rasm kaa but band-e-qadaamat se nikal
zof-e-ishrat se nikal vahm-e-nazaakat se nikal
nafs ke khii.nche hu.e halqa-e-azmat se nikal
qaid ban jaa.e mohabbat to mohabbat se nikal
raah kaa KHaar hii kyaa gul bhii kuchalnaa hai tujhe
uTh mirii jaan mire saath hii chalnaa hai tujhe
to.D ye azm-shikan daGdaGa-e-pand bhii to.D
terii KHaatir hai jo zanjiir vo saugand bhii to.D
tauq ye bhii hai zamurrad kaa guluu-band bhii to.D
to.D paimaana-e-mardaan-e-KHirad-mand bhii to.D
ban ke tuufaan chhalaknaa hai ubalnaa hai tujhe
uTh mirii jaan mire saath hii chalnaa hai tujhe
tuu falaatuun o arastuu hai tuu zahraa parvii.n
tere qabze me.n hai garduu.n tirii Thokar me.n zamii.n
haa.n uThaa jald uThaa paa-e-muqaddar se jabii.n
mai.n bhii rukne kaa nahii.n vaqt bhii rukne kaa nahii.n
la.Dkha.Daa.egii kahaa.n tak ki sambhalnaa hai tujhe
uTh mirii jaan mire saath hii chalnaa hai tujhe

Kaifi Azmi
Nazm

mirza ghaalib

fikr-e-insaa.n par tirii hastii se ye raushan hu.aa
hai par-e-murG-e-taKHayyul kii rasaa.ii taa-kujaa
thaa saraapaa ruuh tuu bazm-e-suKHan paikar tiraa
zeb-e-mahfil bhii rahaa mahfil se pinhaa.n bhii rahaa
diid terii aa.nkh ko us husn kii manzuur hai
ban ke soz-e-zindagii har shai me.n jo mastuur hai
mahfil-e-hastii tirii barbat se hai sarmaaya-daar
jis tarah naddii ke naGmo.n se sukuut-e-kohsaar
tere firdaus-e-taKHayyul se hai qudrat kii bahaar
terii kisht-e-fikr se ugte hai.n aalam sabza-vaar
zindagii muzmar hai terii shoKHi-e-tahriir me.n
taab-e-goyaa.ii se jumbish hai lab-e-tasviir me.n
nutq ko sau naaz hai.n tere lab-e-ejaaz par
mahv-e-hairat hai surayyaa rif.at-e-parvaaz par
shaahid-e-mazmuu.n tasadduq hai tire andaaz par
KHanda-zan hai Guncha-e-dillii gul-e-shiiraaz par
aah tuu uj.Dii hu.ii dillii me.n aaraamiida hai
gulshan-e-viimar me.n teraa ham-navaa KHvaabiida hai
lutf-e-goyaa.ii me.n terii ham-sarii mumkin nahii.n
ho taKHayyul kaa na jab tak fikr-e-kaamil ham-nashii.n
haa.e ab kyaa ho ga.ii hindostaa.n kii sar-zamii.n
aah ai nazzaara-aamoz-e-nigaah-e-nukta-bii.n
gesu-e-urduu abhii minnat-paziir-e-shaana hai
sham.a ye saudaa.i-e-dil-sozi-e-parvaana hai
ai jahaanaabaad ai gahvaara-e-ilm-o-hunar
hai.n saraapaa naala-e-KHaamosh tere baam dar
zarre zarre me.n tire KHvaabiida hai.n shams o qamar
yuu.n to poshiida hai.n terii KHaak me.n laakho.n guhar
dafn tujh me.n ko.ii faKHr-e-rozgaar aisaa bhii hai
tujh me.n pinhaa.n ko.ii motii aabdaar aisaa bhii hai

Allama Iqbal
Nazm

himala

ai himaala ai fasiil-e-kishvar-e-hindustaan
chuumtaa hai terii peshaanii ko jhuk kar aasmaa.n
tujh me.n kuchh paidaa nahii.n deriina rozii ke nishaa.n
tuu javaa.n hai gardish-e-shaam-o-sahar ke darmiyaa.n
ek jalva thaa kaliim-e-tuur-e-siinaa ke liye
tuu tajallii hai saraapaa chashm-e-biinaa ke liye
imtihaan-e-diida-e-zaahir me.n kohistaa.n hai tuu
paasbaa.n apnaa hai tuu diivaar-e-hindustaa.n hai tuu
matla-e-avval falak jis kaa ho vo diivaa.n hai tuu
suu-e-KHalvat-gaah-e-dil daaman-kash-e-insaa.n hai tuu
barf ne baa.ndhii hai dastaar-e-faziilat tere sar
KHanda-zan hai jo kulaah-e-mehr-e-aalam-taab par
terii 'umr-e-rafta kii ik aan hai ahd-e-kuhan
vaadiyo.n me.n hai.n tirii kaalii ghaTaa.e.n KHema-zan
choTiyaa.n terii surayyaa se hai.n sargarm-e-suKHan
tuu zamii.n par aur pahnaa-e-falak teraa vatan
chashma-e-daaman tiraa aa.iina-e-sayyaal hai
daaman-e-mauj-e-havaa jis ke liye ruumaal hai
abr ke haatho.n me.n rahvaar-e-havaa ke vaaste
taaziyaana de diyaa barq-e-sar-e-kohsaar ne
ai himaala ko.ii baazii-gaah hai tuu bhii jise
dast-e-qudrat ne banaayaa hai 'anaasir ke liye
haa.e kyaa fart-e-tarab me.n jhuumtaa jaataa hai abr
fiil-e-be-zanjiir kii suurat u.Daa jaataa hai abr
jumbish-e-mauj-e-nasiim-e-sub.h gahvaara banii
jhuumtii hai nashsha-e-hastii me.n har gul kii kalii
yuu.n zabaan-e-barg se goyaa hai us kii KHaamushii
dast-e-gul-chii.n kii jhaTak mai.n ne nahii.n dekhii kabhii
kah rahii hai merii KHaamoshii hii afsaana miraa
kunj-e-KHalvat KHaana-e-qudrat hai kaashaana miraa
aatii hai naddii faraaz-e-koh se gaatii hu.ii
kausar o tasniim kii maujo.n ko sharmaatii hu.ii
aa.iina saa shaahid-e-qudrat ko dikhlaatii hu.ii
sa.ng-e-rah se gaah bachtii gaah Takraatii hu.ii
chhe.Dtii jaa is iraaq-e-dil-nashii.n ke saaz ko
ai musaafir dil samajhtaa hai tirii aavaaz ko
laila-e-shab kholtii hai aa ke jab zulf-e-rasaa
daaman-e-dil khii.nchtii hai aabshaaro.n kii sadaa
vo KHamoshii shaam kii jis par takallum ho fidaa
vo daraKHto.n par tafakkur kaa samaa.n chhaayaa hu.aa
kaa.nptaa phirtaa hai kyaa rang-e-shafaq kohsaar par
KHush-numaa lagtaa hai ye Gaaza tire ruKHsaar par
ai himaala daastaa.n us vaqt kii ko.ii sunaa
maskan-e-aabaa-e-insaa.n jab banaa daaman tiraa
kuchh bataa us siidhii-saadhii zindagii kaa maajraa
daaG jis par Gaaza-e-ra.ng-e-taklluf kaa na thaa
haa.n dikhaa de ai tasavvur phir vo sub.h-o-shaam tuu
dau.D piichhe kii taraf ai gardish-e-ayyaam tuu

Allama Iqbal
Nazm

hinDola

dayaar-e-hind thaa gahvaara yaad hai hamdam
bahut zamaana hu.aa kis ke kis ke bachpan kaa
isii zamiin pe khelaa hai 'raam' kaa bachpan
isii zamiin pe un nanhe nanhe haatho.n ne
kisii samay me.n dhanush-baan ko sambhaalaa thaa
isii dayaar ne dekhii hai 'krishn' kii liilaa
yahii.n gharo.ndo.n me.n siitaa sulochanaa raadhaa
kisii zamaane me.n gu.Diyo.n se kheltii ho.ngii
yahii zamii.n yahii dariyaa pahaa.D jangal baaG
yahii havaa.e.n yahii sub.h-o-shaam suuraj chaa.nd
yahii ghaTaa.e.n yahii barq-o-ra.ad o qaus-e-quzah
yahii.n ke giit rivaayaat mausamo.n ke juluus
hu.aa zamaana ki 'siddhaarth' ke the gahvaare
inhii nazaaro.n me.n bachpan kaTaa thaa 'vikram' kaa
sunaa hai 'bhartarharii' bhii inhii.n se khelaa thaa
'bharat' agastya' 'kapil' 'vyaas' 'pashii' 'kautilya'
'janak' vashishth' 'manu' 'vaalmik' vishvaamitr
'kanaad' 'gautam' o ramanuj 'kumaaril-bhatt'
mohanjoDaaro ha.Dappaa ke aur ajantaa ke
banaane vaale yahii.n ballamo.n se khele the
isii hi.nDole me.n 'bhavabhut' o 'kaaliidaas' kabhii
humak humak ke jo tutlaa ke gungunaa.e the
sarasvatii ne zabaano.n ko un kii chuumaa thaa
yahii.n ke chaa.nd va suuraj khilaune the un ke
inhii.n fazaa.o.n me.n bachpan palaa thaa 'KHusrav' kaa
isii zamii.n se uThe 'tansen' aur 'akbar'
'rahiim' 'nanak' o 'chaitanya' aur 'chishti' ne
inhii.n fazaa.o.n me.n bachpan ke din guzaare the
isii zamii.n pe kabhii shazaada-e-'KHurram'
zaraa sii dil-shikanii par jo ro diyaa hogaa
bhar aayaa thaa dil-e-naazuk to kyaa ajab is me.n
in aa.nsu.o.n me.n jhalak taaj kii bhii dekhii ho
'ahalyabaa.i' 'daman' 'padmini' o 'raziya' ne
yahii.n ke pe.Do.n kii shaaKHo.n me.n Daale the jhuule
isii fazaa me.n ba.Dhaa.ii thii pe.ng bachpan kii
inhii nazaaro.n me.n saavan ke giit gaa.e the
isii zamiin pe ghuTno.n ke bal chale ho.nge
'malik-mohammad' o 'raskhan' aur 'tulsi-das'
inhii.n fazaa.o.n me.n guu.njii thii totlii bolii
'kabir-das' 'Tukaaraam' 'suur' o 'miiraa' kii
isii hi.nDole me.n 'viddypati' kaa ka.nTh khulaa
isii zamiin ke the laal 'miir' o 'Gaalib' bhii
Thumak Thumak ke chale the gharo.n ke aa.ngan me.n
'aniis' o 'haalii' o 'iqbaal' aur 'vaaris-shaah'
yahii.n kii KHaak se ubhre the 'premchand' o 'tagore'
yahii.n se uTThe the tahziib-e-hind ke me.amaar
isii zamiin ne dekhaa thaa baal-pan in kaa
yahii.n dikhaa.ii thii.n in sab ne baal-liilaa.e.n
yahii.n har ek ke bachpan ne tarbiyat paa.ii
yahii.n har ek ke jiivan kaa baalkaa.nD khulaa
yahii.n se uThte baguulo.n ke saath dau.De hai.n
yahii.n kii mast ghaTaa.o.n ke saath jhuume hai.n
yahii.n kii madh-bharii barsaat me.n nahaa.e hai.n
lipaT ke kiicha.D o paanii se bachpane un ke
isii zamiin se uTThe vo desh ke saava.nt
u.Daa diyaa thaa jinhe.n company ne topo.n se
isii zamiin se uThii hai.n an-ginat nasle.n
pale hai.n hind hi.nDole me.n an-ginat bachche
mujh aise kitne hii gumnaam bachche khele hai.n
isii zamii.n se isii me.n supurd-e-KHaak hu.e
zamiin-e-hind ab aaraam-gaah hai un kii
is arz-e-paak se uTThii.n bahut sii tahziibe.n
yahii.n tuluu hu.ii.n aur yahii.n Guruub hu.ii.n
isii zamiin se ubhre ka.ii uluum-o-funuun
faraaz-e-koh-e-himaala ye daur-e-ga.ng-o-jaman
aur in kii god me.n parvarda kaarvaano.n ne
yahii.n rumuuz-e-KHiraam-e-sukuu.n-numaa siikhe
nasiim-e-sub.h-e-tamaddun ne bhairvii.n chhe.Dii
yahii.n vatan ke taraano.n kii vo pave.n phuuTe.n
vo be-qaraar sukuu.n-zaa tarannum-e-saharii
vo kapkapaate hu.e soz-o-saaz ke sho.ale
inhii fazaa.o.n me.n a.ng.Daa.iyaa.n jo le ke uThe
lavo.n se jin ke charaaGaa.n hu.ii thii bazm-e-hayaat
jinho.n ne hind kii tahziib ko zamaana hu.aa
bahut se zaaviyo.n se aa.iina dikhaayaa thaa
isii zamii.n pe Dhalii hai mirii hayaat kii shaam
isii zamiin pe vo sub.h muskuraa.ii hai
tamaam sho.ala o shabnam mirii hayaat kii sub.h
sunaa.uu.n aaj kahaanii mai.n apne bachpan kii
dil-o-dimaaG kii kaliyaa.n abhii na chaTkii thii.n
hamesha kheltaa rahtaa thaa bhaa.ii bahno.n me.n
hamaare saath mohalle kii la.Dkiyaa.n la.Dke
machaa.e rakhte the baalak udham har ek gha.Dii
lahuu tara.ng uchhal-phaa.nd kaa ye aalam thaa
mohalla sar pe uThaa.e phire jidhar guzre
hamaare chahchahe aur shor guu.njte rahte
chahaar-samt mohalle ke goshe goshe me.n
fazaa me.n aaj bhii laa-raib guu.njte ho.nge
agarche duusre bachcho.n kii tarah thaa mai.n bhii
ba-zaahir auro.n ke bachpan saa thaa miraa bachpan
ye sab sahii mire bachpan kii shaKHsiyat bhii thii ek
vo shaKHsiyat ki bahut shoKH jis ke the KHad-o-KHaal
adaa adaa me.n ko.ii shaan-e-infiraadii thii
Garaz kuchh aur hii lachchhan the mere bachpan ke
mujhe thaa chhoTe ba.Do.n se bahut shadiid lagaav
har ek par mai.n chhi.Daktaa thaa apnii nannhii sii jaa.n
dil umDaa aataa thaa aisaa ki jii ye chaahtaa thaa
uThaa ke rakh luu.n kaleje me.n apnii duniyaa ko
mujhe hai yaad abhii tak ki khel-kuud me.n bhii
kuchh aise vaqfe pur-asraar aa hii jaate the
ki jin me.n sochne lagtaa thaa kuchh miraa bachpan
ka.ii ma.aanii-e-be-lafz chhuune lagte the
butuun-e-Gaib se mere shu.uur-e-asGar ko
har ek manzar-e-maanuus ghar kaa har gosha
kisii tarah kii ho ghar me.n sajii hu.ii har chiiz
mire mohalle kii galiyaa.n makaa.n dar-o-diivaar
chabuutre ku.e.n kuchh pe.D jhaa.Diyaa.n bele.n
vo pherii vaale ka.ii un ke bhaa.nt bhaa.nt ke bol
vo jaane buujhe manaazir vo aasmaa.n o zamii.n
badalte vaqt kaa aa.iina garmii-o-KHunkii
Guruub-e-mahr me.n ra.ngo.n kaa jaagtaa jaaduu
shafaq ke shiish-mahal me.n gudaaz-e-pinhaa.n se
javaahro.n kii chaTaane.n sii kuchh pighaltii hu.ii.n
shajar hajar kii vo kuchh sochtii hu.ii duniyaa
suhaanii raat kii maanuus ramaziyat kaa fusuu.n
alassabaah ufuq kii vo thartharaatii bhave.n
kisii kaa jhaa.nknaa aahista phuuTtii pau se
vo dopahar kaa samay darja-e-tapish kaa cha.Dhaav
thakii thakii sii fazaa me.n vo zindagii kaa utaar
hu.aa kii bansiyaa.n ba.nsvaa.Diyo.n me.n bajtii hu.ii.n
vo din ke ba.Dhte hu.e saa.e sah-pahar kaa sukuu.n
sukuut shaam kaa jab dono.n vaqt milte hai.n
Garaz jhalakte hu.e sarsarii manaazir par
mujhe gumaan paristaaniyat kaa hotaa thaa
har ek chiiz kii vo KHvaab-naak asliyyat
mire shu.uur kii chilman se jhaa.nktaa thaa ko.ii
liye rubuubiyat-e-kaa.enaat kaa ehsaas
har ek jalve me.n Gaib o shuhuud kaa vo milaap
har ik nazaara ik aa.iina-KHaana-e-hairat
har ek manzar-e-maanuus ek hairat-zaar
kahii.n rahuu.n kahii.n khelo.n kahii.n pa.Dhuu.n likhuu.n
mire shu.uur pe ma.nDlaate the manaazir-e-dahr
mai.n akasr un ke tasavvur me.n Duub jaataa thaa
vafuur-e-jazba se ho jaatii thii mizha pur-nam
mujhe yaqiin hai in unsurii manaazir se
ki aam bachcho.n se letaa thaa mai.n ziyaada asar
kisii samay mirii tiflii rahii na be-parvaa
na chhuu sakii mirii tiflii ko Gaflat-e-tiflii
ye khel-kuud ke lamho.n me.n hotaa thaa ehsaas
du.aa.e.n detaa ho jaise mujhe sukuut-e-davaam
ki jaise haath abad rakh de dosh-e-tiflii par
har ek lamha ke raKHno.n se jhaa.nktii sadiyaa.n
kahaaniyaa.n jo sunuu.n un me.n Duub jaataa thaa
ki aadmii ke liye aadmii kii jag-biitii
se ba.Dh ke kaun sii shai aur ho hii saktii hai
inhii fasaano.n me.n pinhaa.n the zindagii ke rumuuz
inhii fasaano.n me.n khulte the raaz-haa-e-hayaat
unhe.n fasaano.n me.n miltii thii.n ziist kii qadre.n
rumuuz-e-besh-bahaa TheTh aadmiyat ke
kahaaniyaa.n thii.n ki sad-dars-gaah-e-riqqat-e-qalb
har ik kahaanii me.n shaa.istagi-e-Gam kaa sabaq
vo unsur aa.nsu.o.n kaa daastaan-e-insaa.n me.n
vo nal-daman kii kathaa sarguzasht-e-savitrii
'shakuntlaa' kii kahaanii 'bharat' kii qurbaanii
vo marg-e-bhishm-pitaamah vo sej tiiro.n kii
vo paan.cho paa.nDav kii sovarg-yaatraa kii kathaa
vatan se ruKHsat-e-'siddhaarth' 'raam' kaa ban-baas
vafaa ke baa'd bhii 'siitaa' kii vo jalaa-vatanii
vo raato.n-raat 'sirii-krishn' ko uThaa.e hu.e
balaa kii qaid se 'basdev' kaa nikal jaanaa
vo a.ndhkaar vo baarish, ba.Dhii hu.ii jamunaa
Gam-e-aafriin kahaanii vo 'hiir' 'raa.njhaa' kii
shu.uur-e-hind ke bachpan kii yaadgaar-e-aziim
ki aise vaise taKHayyul kii saa.ns ukha.D jaa.e
ka.ii muhayyur-e-idraak dev-maalaaye.n
hitopdesh ke qisse kathaa sarat-saagar
karo.Do.n siino.n me.n vo guu.njtaa hu.aa aalhaa
mai.n puuchhtaa huu.n kisii aur malak vaalo.n se
kahaaniyo.n kii ye daulat ye be-bahaa daulat
fasaane dekh lo in ke nazar bhii aatii hai
mai.n puuchhtaa huu.n ki gahvaare aur qaumo.n ke
base hu.e hai.n kahii.n aisii daastaano.n se
kahaaniyaa.n jo mai.n suntaa thaa apne bachpan me.n
mire liye vo na thii.n mahz baa.is-e-tafriih
fasaano.n se mire bachpan ne sochnaa siikhaa
fasaano.n se mujhe sanjiidgii ke dars mile
fasaano.n me.n nazar aatii thii mujh ko ye duniyaa
Gam o KHushii me.n rachii pyaar me.n basaa.ii hu.ii
fasaano.n se mire dil ne ghulaavaTe.n paa.ii.n
yahii nahii.n ki mashaahiir hii ke afsaane
zaraa sii umr me.n karte ho.n mujh ko muta.assir
mohalle Tole ke gumnaam aadamiyyo.n ke
kuchh aise sun.ne me.n aate the vaaqi.aat-e-hayaat
jo.n yuu.n to hote the farsuuda aur ma.amuulii
magar the aa.iine iKHlaas aur sharaafat ke
ye chand aa.ii ga.ii baate.n aisii baate.n thii.n
ki jin kii oT chamaktaa thaa dard-e-insaanii
ye vaardaat nahii.n razmiyye hayaat ke the
Garaz ki ye hai.n mire bachpane kii tasviire.n
nadiim aur bhii kuchh KHatt-o-KHaal hai.n un ke
ye merii maa.n kaa hai kahnaa ki jab mai.n bachcha thaa
mai.n aise aadmii kii god me.n na jaataa thaa
jo bad-qimaar ho aibii ho yaa ho bad-suurat
mujhe bhii yaad hai nau das baras hii kaa mai.n thaa
to mujh pe kartaa thaa jaaduu saa husn-e-insaanii
kuchh aisaa hotaa thaa mahsuus jab mai.n dekhtaa thaa
shagufta rang tar-o-taaza ruup vaalo.n kaa
ki un kii aa.nch mirii haDDiyaa.n galaa degii
ik aazmaa.ish-e-jaa.n thii ki thaa shu.uur-e-jamaal
aur us kii nashtariyyat us kii ustuKHaa.n-sozii
Gam o nashaat lagaavaT mohabbat o nafrat
ik intishaar-e-sakuu.n iztiraab pyaar itaab
vo be-panaah zakii-ul-hisii vo hilm o Guruur
kabhii kabhii vo bhare ghar me.n hiss-e-tanhaa.ii
vo vahshate.n mirii maahaul-e-KHush-gavaar me.n bhii
mirii sarisht me.n ziddain ke ka.ii jo.De
shuruu.a hii se the maujuud aab-o-taab ke saath
mire mizaaj me.n pinhaa.n thii ek jadaliyyat
rago.n me.n chhuuTte rahte the be-shumaar anaar
nadiim ye hai.n mire baal-pan ke kuchh aasaar
vafuur o shiddat-e-jazbaat kaa ye aalam thaa
ki kau.nde jast kare.n dil ke aabgiine me.n
vo bachpanaa jise bardaasht apnii mushkil ho
vo bachpanaa jo KHud apnii hii tevriyaa.n sii cha.Dhaa.e
nadiim zikr-e-javaanii se kaa.np jaataa huu.n
javaanii aa.ii dabe paa.nv aur yuu.n aa.ii
ki us ke aate hii big.Daa banaa-banaayaa khel
vo KHvaahishaat ke jazbaat ke umaDte hu.e
vo ho.nkte hu.e be-naam aag ke tuufaa.n
vo phuuTtaa hu.aa jvaalaa-mukhii javaanii kaa
rago.n me.n uThtii hu.ii aa.ndhiyo.n ke vo jhaTke
ki jo tavaazun-e-hastii jhi.njho.D ke rakh de.n
vo zalzale ki pahaa.Do.n ke pair ukha.D jaa.e.n
buluuGiyat kii vo Tiise.n vo karb-e-nashv-o-numaa
aur aise me.n mujhe byaahaa gayaa bhalaa kis se
jo ho na saktii thii hargiz mirii shariik-e-hayaat
ham ek duusre ke vaaste bane hii na the
siyaah ho ga.ii duniyaa mirii nigaaho.n me.n
vo jis ko kahte hai.n shaadii-e-KHaanaa-aabaadii
mire liye vo banii bevgii javaanii kii
luTaa suhaag mirii zindagii kaa maa.nDo me.n
nadiim khaa ga.ii mujh ko nazar javaanii kii
balaa-e-jaan mujhe ho gayaa shu.uur-e-jamaal
talaash-e-shola-e-ulfat se ye hu.aa haasil
ki nafrato.n kaa agan-ku.nD ban ga.ii hastii
vo halq o siina o rag rag me.n be-panaah chubhaa
nadiim jaise nigal lii ho mai.n ne naag-phanii
z ishq-zaadam o ishqam kamusht zaar-o-dareG
KHabar na burd ba-rustam kase ki sohraabam
na puuchh aalam-e-kaam-o-dahan nadiim mire
samar hayaat kaa jab raakh bin gayaa mu.nh me.n
mai.n chaltii-phirtii chitaa ban gayaa javaanii kii
mai.n kaa.ndhaa detaa rahaa apne jiite murde ko
ye sochtaa thaa ki ab kyaa karuu.n kahaa.n jaa.uu.n
bahut se aur masaa.ib bhii mujh pe TuuT pa.De
mai.n Dhuu.nDhne lagaa har samt sachchii jhuuTii panaah
talaash-e-husn me.n sher-o-adab me.n dostii me.n
ru.ndhii sadaa se mohabbat kii bhiik maa.ngii hai
na.e sire se samajhnaa pa.Daa hai duniyaa ko
ba.De jatan se sambhaalaa hai KHud ko mai.n ne nadiim
mujhe sambhalne me.n to chaaliis saal guzre hai.n
merii hayaat to vish-paan kii kathaa hai nadiim
mai.n zahr pii ke zamaane ko de sakaa amrit
na puuchh mai.n ne jo zahraaba-e-hayaat piyaa
magar huu.n dil se mai.n is ke liye sipaas-guzaar
larazte haatho.n se daaman KHuluus kaa na chhaTaa
bachaa ke rakkhii thii mai.n ne amaanat-e-tiflii
ise na chhiin sakii mujh se dast-burd-e-shabaab
ba-qaul shaa.er-e-mulk-e-fara.ng har bachcha
KHud apne ahd-e-javaanii kaa baap hotaa hai
ye kam nahii.n hai ki tiflii-e-rafta chho.D ga.ii
dil-e-hazii.n me.n ka.ii chhoTe chhoTe naqsh-e-qadam
mirii anaa kii rago.n me.n pa.De hu.e hai.n abhii
na jaane kitne bahut narm u.ngliyo.n ke nishaa.n
hanuuz vaqt ke be-dard haath kar na sake
hayaat-e-rafta kii zinda nishaaniyo.n ko fanaa
zamaana chhiin sakegaa na merii fitrat se
mirii safaa mire tahtush-shu.uur kii ismat
taKHaiyyulaat kii doshiizgii kaa radd-e-amal
javaan ho ke bhii be-laus tifl-vash jazbaat
syaanaa hone pe bhii ye jibillate.n merii
ye sarKHushii o Gam be-riyaa ye qalb-gudaaz
baGair bair ke an-ban Garaz se paak tapaak
Garaz se paak ye aa.nsuu Garaz se paak ha.nsii
ye dasht-e-dahr me.n hamdardiyo.n kaa sar-chashma
qubuuliyat kaa ye jazba ye kaa.enaat o hayaat
is arz-e-paak par iimaan ye ham-aaha.ngii
har aadmii se har ik KHvaab o ziist se ye lagaav
ye maa.n kii god kaa ehsaas sab manaazir me.n
qariib o duur zamii.n me.n ye buu-e-vataniyyat
nizaam-e-shams-o-qamar me.n payaam-e-hifz-e-hayaat
ba-chashm-e-shaam-o-sahar maamtaa kii shabnam sii
ye saaz o dil me.n mire naGma-e-analkaunain
har iztiraab me.n ruuh-e-sukuun-e-be-paayaa.n
zamaana-e-guzaraa.n me.n davaam kaa sargam
ye bazm-e-jashn-e-hayaat-o-mamaat sajtii hu.ii
kisii kii yaad kii shahnaa.iyaa.n sii bajtii hu.ii
ye ramaziiyat ke anaasir shu.uur-e-puKHta me.n
falak pe vajd me.n laatii hai jo farishto.n ko
vo shaa.erii bhii buluuG-e-mizaaj-e-tiflii hai
ye nashtariyyat-e-hastii ye is kii sheriyat
ye pattii pattii pe gulzaar-e-zindagii ke kisii
latiif nuur kii parchhaa.iyaa.n sii pa.Dtii hu.ii
baham ye hairat o maanuusiyat kii sargoshii
bashar kii zaat ki mahr-e-uluuhiyat ba-jabii.n
abad ke dil me.n ja.De.n maartaa hu.aa sabza
Gam-e-jahaa.n mujhe aa.nkhe.n dikhaa nahii.n saktaa
ki aa.nkhe.n dekhe hu.e huu.n mai.n ne apne bachpan kii
mire lahuu me.n abhii tak sunaa.ii detii hai.n
sukuut-e-huzn me.n bhii ghu.nghru.o.n kii jhankaare.n
ye aur baat ki mai.n is pe kaan de na sakuu.n
isii vadii.at-e-tiflii kaa ab sahaaraa hai
yahii hai.n marham-e-kaafuur dil ke zaKHmo.n par
unhii ko rakhnaa hai mahfuuz taa-dam-e-aaKHir
zamiin-e-hind hai gahvaara aaj bhii hamdam
agar hisaab kare.n das karo.D bachcho.n kaa
ye bachche hind kii sab se ba.Dii amaanat hai.n
har ek bachche me.n hai.n sad-jahaan-e-imkaanaat
magar vatan kaa hal-o-aqd jin ke haath me.n hai
nizaam-e-zindagii-e-hind jin ke bas me.n hai
ravayya dekh ke un kaa ye kahnaa pa.Dtaa hai
kise pa.Dii hai ki samjhe vo is amaanat ko
kise pa.Dii hai ki bachcho.n kii zindagii ko bachaa.e
KHaraab hone se Talne se suukh jaane se
bachaa.e kaun in aazurda honhaaro.n ko
vo zindagii jise ye de rahe hai.n bhaarat ko
karo.Do.n bachcho.n ke miTne kaa ik alamiyya hai
churaa.e jaate hai.n bachche abhii gharo.n se yahaa.n
ki jism to.D diye jaa.e.n un ke taaki mile
churaane vaalo.n ko KHairaat maagh-mele kii
jo is azaab se bach jaa.e.n to gale pa.D jaa.e.n
vo la.ante.n ki hamaare karo.Do.n bachcho.n kii
nadiim KHair se miTTii KHaraab ho jaa.e
vo muflisii ki KHushii chhiin le vo be-bargii
udaasiyo.n se bharii zindagii kii be-ra.ngii
vo yaasiyaat na jis ko chhu.e shu.aa-e-umiid
vo aa.nkhe.n dekhtii hai.n har taraf jo be-nuurii
vo TukTukii ki jo pathraa ke rah ga.ii ho nadiim
vo be-dilii kii ha.nsii chhiin le jo ho.nTo.n se
vo dukh ki jis se sitaaro.n kii aa.nkh bhar aa.e
vo gandagii vo kasaafat maraz-zada paikar
vo bachche chhin ga.e ho.n jin se bachpane un ke
hamii.n ne gho.nT diyaa jis ke bachpane kaa galaa
jo khaate-piite gharo.n ke hai.n bachche un ko bhii kyaa
samaaj phuulne-phalne ke de sakaa saadhan
vo saa.ns lete hai.n tahziib-kush fazaa.o.n me.n
ham un ko dete hai.n be-jaan aur Galat ta.aliim
milegaa ilm-e-jihaalat-numaa se kyaa un ko
nikal ke madraso.n aur universitiyyo.n se
ye bad-nasiib na ghar ke na ghaaT ke ho.nge
mai.n puuchhtaa huu.n ye ta.aliim hai ki makkaarii
karo.Do.n zindagiyo.n se ye be-panaah daGaa
nisaab aisaa ki mehnat kare.n agar is par
bajaa.e ilm jahaalat kaa iktisaab kare.n
ye ulTaa dars-e-adab ye sa.Dii hu.ii ta.aliim
dimaaG kii ho Gizaa yaa Gizaa-e-jismaanii
har ik tarah kii Gizaa me.n yahaa.n milaavaT hai
vo jis ko bachcho.n kii ta.aliim kah ke dete hai.n
vo dars ulTii chhurii hai gale pe bachpan ke
zamiin-e-hind hi.nDolaa nahii.n hai bachcho.n kaa
karo.Do.n bachcho.n kaa ye des ab janaaza hai
ham inqalaab ke KHatro.n se KHuub vaaqif hai.n
kuchh aur roz yahii rah ga.e jo lail-o-nahaar
to mol lenaa pa.Degaa hame.n ye KHatra bhii
ki bachche qaum kii sab se ba.Dii amaanat hai.n

Firaq Gorakhpuri
Nazm

KHak-e-dil

lucknow mere vatan mere chaman-zaar vatan
tere gahvaara-e-aaGosh me.n ai jaan-e-bahaar
apnii duniyaa-e-hasii.n dafn kiye jaataa huu.n
tuu ne jis dil ko dha.Dakne kii adaa baKHshii thii
aaj vo dil bhii yahii.n dafn kiye jaataa huu.n
dafn hai dekh miraa ahd-e-bahaaraa.n tujh me.n
dafn hai dekh mirii ruuh-e-gulistaa.n tujh me.n
merii gul-posh javaa.n-saal uma.ngo.n kaa suhaag
merii shaadaab tamannaa ke mahakte hu.e KHvaab
merii bedaar javaanii ke firozaa.n mah o saal
merii shaamo.n kii malaahat mirii sub.ho.n kaa jamaal
merii mahfil kaa fasaana mirii KHalvat kaa fusuu.n
merii diivaangii-e-shauq miraa naaz-e-junuu.n
mere marne kaa saliiqa mire jiine kaa shu.uur
meraa naamuus-e-vafaa merii mohabbat kaa Guruur
merii nabzo.n kaa tarannum mire naGmo.n kii pukaar
mere shero.n kii sajaavaT mire giito.n kaa si.ngaar
lucknow apnaa jahaa.n sau.np chalaa huu.n tujh ko
apnaa har KHvaab-e-javaa.n sau.np chalaa huu.n tujh ko
apnaa sarmaaya-e-jaa.n sau.np chalaa huu.n tujh ko
lucknow mere vatan mere chaman-zaar vatan
ye mire pyaar kaa madfan hii nahii.n hai tanhaa
dafn hai.n is me.n mohabbat ke KHazaane kitne
ek unvaan me.n muzmar hai.n fasaane kitne
ik bahan apnii rifaaqat kii qasam khaa.e hu.e
ek maa.n mar ke bhii siine me.n liye maa.n kaa gudaaz
apne bachcho.n ke la.Dakpan ko kaleje se lagaa.e
apne khilte hu.e ma.asuum shaguufo.n ke liye
band aa.nkho.n me.n bahaaro.n ke javaa.n KHvaab basaa.e
ye mire pyaar kaa madfan hii nahii.n hai tanhaa
ek saathii bhii tah-e-KHaak yahaa.n sotii hai
arsa-e-dahr kii be-rahm kashaakash kaa shikaar
jaan de kar bhii zamaane se na maane hu.e haar
apne tevar me.n vahii azm-e-javaa.n-saal liye
ye mire pyaar kaa madfan hii nahii.n hai tanhaa
dekh ik sham-e-sar-e-raah-guzar chaltii hai
jagmagaataa hai agar ko.ii nishaan-e-manzil
zindagii aur bhii kuchh tez qadam chaltii hai
lucknow mere vatan mere chaman-zaar vatan
dekh is KHvaab-gah-e-naaz pe kal mauj-e-sabaa
le ke nau-roz-e-bahaaraa.n kii KHabar aa.egii
surKH phuulo.n kaa ba.De naaz se guu.ndhe hu.e haar
kal isii KHaak pe gul-ra.ng sahar aa.egii
kal isii KHaak ke zarro.n me.n samaa jaa.egaa ra.ng
kal mire pyaar kii tasviir ubhar aa.egii
ai mirii ruuh-e-chaman KHaak-e-lahad se terii
aaj bhii mujh ko tire pyaar kii buu aatii hai
zaKHm siine ke mahakte hai.n tirii KHushbuu se
vo mahak hai ki mirii saa.ns ghuTii jaatii hai
mujh se kyaa baat banaa.egii zamaane kii jafaa
maut KHud aa.nkh milaate hu.e sharmaatii hai
mai.n aur in aa.nkho.n se dekhuu.n tujhe paivand-e-zamii.n
is qadar zulm nahii.n haa.e nahii.n haa.e nahii.n
ko.ii ai kaash bujhaa de mirii aa.nkho.n ke diye
chhiin le mujh se ko.ii kaash nigaahe.n merii
ai mirii sham-e-vafaa ai mirii manzil ke charaaG
aaj taariik hu.ii jaatii hai.n raahe.n merii
tujh ko ro.uu.n bhii to kyaa ro.uu.n ki in aa.nkho.n me.n
ashk patthar kii tarah jam se ga.e hai.n mere
zindagii arsa-gah-e-johd-e-musalsal hii sahii
ek lamhe ko qadam tham se ga.e hai.n mere
phir bhii is arsa-gah-e-johd-e-musalsal se mujhe
ko.ii aavaaz pe aavaaz diye jaataa hai
aaj sotaa hii tujhe chho.D ke jaanaa hogaa
naaz ye bhii Gam-e-dauraa.n kaa uThaanaa hogaa
zindagii dekh mujhe hukm-e-safar detii hai
ik dil-e-shola-ba-jaa.n saath liye jaataa huu.n
har qadam tuu ne kabhii azm-e-javaa.n baKHshaa thaa!
mai.n vahii azm-e-javaa.n saath liye jaataa huu.n
chuum kar aaj tirii KHaak-e-lahad ke zarre
an-ginat phuul mohabbat ke cha.Dhaataa jaa.uu.n
jaane is samt kabhii meraa guzar ho ki na ho
aaKHirii baar gale tujh ko lagaataa jaa.uu.n
lucknow mere vatan mere chaman-zaar vatan
dekh is KHaak ko aa.nkho.n me.n basaa kar rakhnaa
is amaanat ko kaleje se lagaa kar rakhnaa

Jan Nisar Akhtar
Nazm

goristan-e-shahi

aasmaa.n baadal kaa pahne KHirqa-e-deriina hai
kuchh mukaddar saa jabiin-e-maah kaa aa.iina hai
chaa.ndnii phiikii hai is nazzaara-e-KHaamosh me.n
sub.h-e-saadiq so rahii hai raat kii aaGosh me.n
kis qadar ashjaar kii hairat-fazaa hai KHaamushii
barbat-e-qudrat kii dhiimii sii navaa hai KHaamushii
baatin-e-har-zarra-e-aalim saraapaa dard hai
aur KHaamoshii lab-e-hastii pe aah-e-sard hai
aah jaulaa.n-gaah-e-aalam-giir yaanii vo hisaar
dosh par apne uThaa.e saik.Do.n sadiyo.n kaa baar
zindagii se thaa kabhii ma.amuur ab sunsaan hai
ye KHamoshii us ke ha.ngaamo.n kaa goristaan hai
apne sukkaan-e-kuhan kii KHaak kaa dil-daada hai
koh ke sar par misaal-e-paasbaa.n istaada hai
abr ke rauzan se vo baalaa-e-baam-e-aasmaa.n
naazir-e-aalam hai najm-e-sabz-faam-e-aasmaa.n
KHaak-baazii vus.at-e-duniyaa kaa hai manzar use
daastaa.n naakaami-e-insaa.n kii hai azbar use
hai azal se ye musaafir suu-e-manzil jaa rahaa
aasmaa.n se inqilaabo.n kaa tamaashaa dekhtaa
go sukuu.n mumkin nahii.n aalam me.n aKHtar ke liye
faatiha-KHvaanii ko ye Thahraa hai dam bhar ke liye
ra.ng-o-aab-e-zinagii se gul-ba-daaman hai zamii.n
saik.Do.n KHuu.n-gashta tahziibo.n kaa madfan hai zamii.n
KHvaab-gah shaaho.n kii hai ye manzil-e-hasrat-fazaa
diida-e-ibrat KHiraaj-e-ashk-e-gul-guu.n kar adaa
hai to goristaa.n magar ye KHaak-e-garduu.n-paaya hai
aah ik bargashta qismat qaum kaa sarmaaya hai
maqbaro.n kii shaan hairat-aafrii.n hai is qadar
jumbish-e-mizhgaa.n se hai chashm-e-tamaashaa ko hazar
kaifiyat aisii hai naakaamii kii is tasviir me.n
jo utar saktii nahii.n aa.iina-e-tahriir me.n
sote hai.n KHaamosh aabaadii ke ha.ngaamo.n se duur
muztarib rakhtii thii jin ko aarzuu-e-naa-subuur
qabr kii zulmat me.n hai in aaftaabo.n kii chamak
jin ke darvaazo.n pe rahtaa hai jabii.n-gustaar falak
kyaa yahii hai in shahanshaaho.n kii azmat kaa ma.aal
jin kii tadbiir-e-jahaa.nbaanii se Dartaa thaa zavaal
rob-e-faGfuurii ho duniyaa me.n ki shaan-e-qaisarii
Tal nahii.n saktii Ganiim-e-maut kii yuurish kabhii
baadshaaho.n kii bhii kisht-e-umr kaa haasil hai gor
jaada-e-azmat kii goyaa aaKHirii manzil hai gor
shorish-e-bazm-e-tarab kyaa uud kii taqriir kyaa
dardmandaan-e-jahaa.n kaa naala-e-shab-giir kyaa
arsa-e-paikaar me.n ha.ngaama-e-shamshiir kyaa
KHuun ko garmaane vaalaa naara-e-takbiir kyaa
ab ko.ii aavaaz soto.n ko jagaa saktii nahii.n
siina-e-viiraa.n me.n jaan-e-rafta aa saktii nahii.n
ruuh-e-musht-e-KHaak me.n zahmat-kash-e-bedaad hai
kuucha gard-e-nai hu.aa jis dam nafas fariyaad hai
zindagii insaa.n kii hai maanind-e-murG-e-KHush-navaa
shaaKH par baiThaa ko.ii dam chahchahaayaa u.D gayaa
aah kyaa aa.e riyaaz-e-dahr me.n ham kyaa ga.e
zindagii kii shaaKH se phuuTe khile murjhaa ga.e
maut har shaah o gadaa ke KHvaab kii taabiir hai
is sitamgar kaa sitam insaaf kii tasviir hai
silsila hastii kaa hai ik bahr-e-naa-paidaa-kanaar
aur is dariyaa-e-be-paayaa.n kii mauje.n hai.n mazaar
ai havas KHuu.n ro ki hai ye zindagii be-e'tibaar
ye sharaare kaa tabassum ye KHas-e-aatish-savaar
chaa.nd jo suurat-gar-e-hastii kaa ik ejaaz hai
pahne siimaabii qabaa mahv-e-KHiraam-e-naaz hai
charKH-e-be-anjum kii dahshatnaak vus.at me.n magar
bekasii is kii ko.ii dekhe zaraa vaqt-e-sahar
ik zaraa saa abr kaa Tuk.Daa hai jo mahtaab thaa
aaKHirii aa.nsuu Tapak jaane me.n ho jis kii fanaa
zindagii aqvaam kii bhii hai yuu.nhii be-e'tibaar
ra.ng-haa-e-rafta kii tasviir hai un kii bahaar
is ziyaa.n-KHaane me.n ko.ii millat-e-garduu.n-vaqaar
rah nahii.n saktii abad tak baar-e-dosh-e-rozgaar
is qadar qaumo.n kii barbaadii se hai KHuugar jahaa.n
dekhtaa be-e'tinaa.ii se hai ye manzar jahaa.n
ek suurat par nahii.n rahtaa kisii shai ko qaraar
zauq-e-jiddat se hai tarkiib-e-mizaaj-e-rozgaar
hai nagiin-e-dahr kii ziinat hamesha naam-e-nau
maadar-e-giitii rahii aabastan-e-aqvaam-e-nau
hai hazaaro.n qaafilo.n se aashnaa ye rahguzar
chashm-e-koh-e-nuur ne dekhe hai.n kitne taajvar
misr o baabul miT ga.e baaqii nishaa.n tak bhii nahii.n
daftar-e-hastii me.n un kii daastaa.n tak bhii nahii.n
aa dabaayaa mehr-e-iiraa.n ko ajal kii shaam ne
azmat-e-yuunaan-o-ruumaa luuT lii ayyaam ne
aah muslim bhii zamaane se yuu.nhii ruKHsat hu.aa
aasmaa.n se abr-e-aazaarii uThaa barsaa gayaa
hai rag-e-gul sub.h ke ashko.n se motii kii la.Dii
ko.ii suuraj kii kiran shabnam me.n hai uljhii hu.ii
siina-e-dariyaa shu.aa.o.n ke liye gahvaara hai
kis qadar pyaaraa lab-e-juu mehr kaa nazzaara hai
mahv-e-ziinat hai sanobar juu.ebaar-e-aa.iina hai
Guncha-e-gul ke liye baad-e-bahaar-e-aa.iina hai
na.ara-zan rahtii hai koyal baaG ke kaashaane me.n
chashm-e-insaa.n se nihaa.n patto.n ke uzlat-KHaane me.n
aur bulbul mutrib-e-ra.ngii.n navaa-e-gulsitaa.n
jis ke dam se zinda hai goyaa havaa-e-gulsitaa.n
ishq ke ha.ngaamo.n kii u.Dtii hu.ii tasviir hai
KHaama-e-qudrat kii kaisii shoKH ye tahriir hai
baaG me.n KHaamosh jalse gulsitaa.n-zaado.n ke hai.n
vaadi-e-kohsaar me.n na.are shabaa.n-zaado.n ke hai.n
zindagii se ye puraanaa KHaak-daa.n ma.amuur hai
maut me.n bhii zindagaanii kii ta.Dap mastuur hai
pattiyaa.n phuulo.n kii girtii hai.n KHizaa.n me.n is tarah
dast-e-tifl-e-KHufta se ra.ngii.n khilaune jis tarah
is nashaat-aabaad me.n go aish be-andaaza hai
ek Gam yaanii Gam-e-millat hamesha taaza hai
dil hamaare yaad-e-ahd-e-rafta se KHaalii nahii.n
apne shaaho.n ko ye ummat bhuulne vaalii nahii.n
ashk-baarii ke bahaane hai.n ye uj.De baam o dar
girya-e-paiham se biinaa hai hamaarii chashm-e-tar
dahr ko dete hai.n motii diida-e-giryaa.n ke ham
aaKHirii baadal hai.n ik guzre hu.e tuufaa.n ke ham
hai.n abhii sad-haa guhar is abr kii aaGosh me.n
barq abhii baaqii hai is ke siina-e-KHaamosh me.n
vaadi-e-gul KHaak-e-sahraa ko banaa saktaa hai ye
KHvaab se ummiid-e-dahqaa.n ko jagaa saktaa hai ye
ho chukaa go qaum kii shaan-e-jalaalii kaa zuhuur
hai magar baaqii abhii shaan-e-jamaalii kaa zuhuur

Allama Iqbal
Nazm

lucknow ki sair

chaar baaG station dekho
shahr me.n ek nayaa-pan dekho
sajii sajaa.ii dulhan dekho
qadam qadam par fashion dekho
aa.o tumhe.n lucknow dikhaa.e.n
aur yahaa.n kii sair karaa.e.n
kitnaa achchhaa chi.Diyaa ghar hai
sher hiran bhaaluu bandar hai
mor kabuutar aur tiitar hai
andar murda ajaa.ib ghar hai
aa.o tumhe.n lucknow dikhaa.e.n
aur yahaa.n kii sair karaa.e.n
hazrat ganj kii sair karaa.e.n
qaisar baaG kii laaT dikhaa.e.n
aur amiinaabaad ghumaa.e.n
shaam-e-avadh ra.ngiin banaa.e.n
aa.o tumhe.n lucknow dikhaa.e.n
aur yahaa.n kii sair karaa.e.n
ye puurii up kaa dil hai
is me.n ek chhatar-manzil hai
art school lab-e-saahil hai
nava dekhne ke qaabil hai
aa.o tumhe.n lucknow dikhaa.e.n
aur yahaa.n kii sair karaa.e.n
chauk naKHKHaas husain-aabaad
golaaganj naziiraabaad
pyaar mohabbat me.n aazaad
mard-o-zan shiirii.n farhaad
aa.o tumhe.n lucknow dikhaa.e.n
aur yahaa.n kii sair karaa.e.n
aa.o shahd ismaarak dikhaa.e.n
jhanDe vaale park me.n jaa.e.n
belly-gaurd ko samjhaa.e.n
medical collage dikhlaa.e.n
aa.o tumhe.n lucknow dikhaa.e.n
aur yahaa.n kii sair karaa.e.n
ye sab shahro.n me.n nyaaraa hai
naam is kaa kitnaa pyaaraa hai
sab kii aa.nkho.n kaa taaraa hai
amn-o-sukuu.n kaa gahvaaraa hai
aa.o tumhe.n lucknow dikhaa.e.n
aur yahaa.n kii sair karaa.e.n

Javed Iqbal
Nazm

aligarh

ye ilm-o-fan kaa gahvaara hai tahziibii idaara hai
nazar me.n ye hamaarii to siyaasat kaa akhaa.Daa hai

Syeda Farhat
Nazm

aap-biti

1
yuu.n to marne ke liye zahr sabhii piite hai.n
zindagii tere liye zahr piyaa hai mai.n ne
sham.a jaltii hai par ik raat me.n jal jaatii hai
yaa.n to ek umr isii tarah se jalte guzrii
kaun sii KHaak hai ye jaane kahaa.n kaa hai KHamiir
ik na.e saa.nche me.n har roz hii Dhalte guzrii
kis tarah mai.n ne guzaarii hai.n ye Gam kii gha.Diyaa.n
kaash mai.n aisii kahaanii ko sunaa bhii saktaa
ta.ana-zan hai.n jo mire haal pe arbaab-e-nashaat
un ko ik baar mai.n ai kaash rulaa bhii saktaa
mai.n ki shaa.er huu.n mai.n paiGaambar-e-fitrat huu.n
merii taKH.iil me.n hai ek jahaan-e-bedaar
dastaras me.n mirii nazzaara-e-gul-haa-e-chaman
mere idraak me.n hai.n kun-fayakuu.n ke asraar
mire ash.aar me.n hai qalb-e-hazii.n kii dha.Dkan
merii nazmo.n me.n mirii ruuh kii dil-doz pukaar
phir bhii rah rah ke khaTaktii hai mire dil me.n ye baat
ki mire paas to alfaaz kaa ik parda hai
sirf alfaaz se tasviir nahii.n ban saktii
sirf ehsaas me.n haalaat kii tafsiir kahaa.n
sirf fariyaad me.n zaKHmo.n kii vo zanjiir kahaa.n
aisii zanjiir ki ek ek ka.Dii me.n jis kii
kitnii kho.ii hu.ii KHushiyo.n ke manaazir pinhaa.n
kitnii bhuulii hu.ii yaado.n ke pur-asraar kha.nDar
kitne uj.De hu.e luuTe hu.e sunsaan nagar
kitne aate hu.e jaate hu.e chehro.n ke nuquush
kitne bante hu.e miTte hu.e lamhaat kaa raaz
kitnii uljhii hu.ii raaho.n ke nasheb aur faraaz
2
kyaa kahuu.n mujh ko kahaa.n laa.ii mirii umr-e-ravaa.n
aa.nkh kholii to har ik samt a.ndhero.n kaa samaa.n
re.ngtii uu.nghtii maGmuum sii ik raahguzaar
gard-e-aalaam me.n khoyaa hu.aa manzil kaa nishaa.n
gesuu-e-shaam se lipTii hu.ii Gam kii zanjiir
siina-e-shab se nikaltii hu.ii fariyaad-o-fuGaa.n
ThanDii ThanDii sii havaa.o.n me.n vo Gurbat kii thakan
dar-o-diivaar pe taariik se saa.e larzaa.n
kitnii kho.ii hu.ii biimaar o fasurda aa.nkhe.n
TimTimaate se diye chaar taraf nauha-kunaa.n
muzmahil chehre masaa.ib kii giraa.n-baarii se
dil-e-majruuh se uThtaa hu.aa Gamnaak dhu.aa.n
yahii taariikii-e-Gam to miraa gahvaara hai
mai.n isii kokh me.n thaa nuur-e-sahar ke maanind
har taraf sog me.n Duubaa hu.aa meraa maahaul
meraa uj.Daa hu.aa ghar 'miir' ke ghar ke maanind
ik taraf azmat-e-aslaaf kaa maathe pe Guruur
aur ik samt vo iflaas ke phaile hu.e jaal
bhuuk kii aag me.n jhulse hu.e saare armaa.n
qarz ke bojh se jiine kii uma.nge.n paamaal
vaqt kii dhund me.n lipTe hu.e kuchh pyaar ke giit
mehr o iKHlaas zamaane kii jafaa.o.n se niDhaal
bhaa.ii bhaa.ii kii mohabbat me.n niraale se shukuuk
nigah-e-Gair me.n jis tarah anokhe se savaal
''ek ha.ngaame pe mauquuf thii ghar kii raunaq''
muflisii saath liye aa.ii thii ik ja.ng-o-jidaal
faaqa-mastii me.n bikharte hu.e saare rishte
ta.ng-dastii ke sabab saarii fazaa.e.n behaal
ik jahannam kii tarah thaa ye miraa gahvaara
is jahannam me.n mere baap ne dam to.D diyaa
TuuT kar rah ga.e bachpan ke suhaane sapne
mujh se mu.nh pher liyaa jaise mirii shoKHii ne
mere ha.nste hu.e chehre pe udaasii chhaa.ii
jaise ik raat bhayaanak mire sar par aa.ii
raahe.n dushvaar magar raah-numaa ko.ii na thaa
saamne vus.at-e-aflaak KHudaa ko.ii na thaa
mere ajdaad kii miiraas ye viiraan saa ghar
jis ko ghere hu.e har samt tabaahii ke bha.nvar
jis kii chhat girtii hu.ii TuuTaa hu.aa darvaaza
har taraf jaise bikhartaa hu.aa ik shiiraaza
na kahii.n atlas-o-kamKHvaab na diibaa-o-hariir
har taraf mu.nh ko basore hu.e jaise taqdiir
mujh ko us ghar se mohabbat to bhalaa kyaa hotii
yaa.n agar dil me.n na jiine kii tamannaa hotii
ye samajh kar ki yahii hai mirii qismat kaa likhaa
us kii diivaar ke saa.e me.n lipTaa rahtaa
lekin is dil kii KHalish ne mujhe bedaar kiyaa
mujh ko haalaat se aamaada-e-paikaar kiyaa
be-kasii raKHt-e-safar ban kar mire saath chalii
yaad aa.ii thii mujhe gaa.nv kii ek ek galii
lahlahaatii hu.ii fasle.n vo mire aam ke baaG
vo makaano.n me.n larazte hu.e dhu.ndle se charaaG
duur tak paanii me.n phaile hu.e vo dhaan ke khet
aur taalaab-kinaare vo chamaktii hu.ii ret
mere ham-umr vo saathii vo mire ham-jolii
mere school ke vo dost mirii vo Tolii
ek baar un kii nigaaho.n ne mujhe dekhaa thaa
jaise ik baar mire dil ne bhii kuchh sochaa thaa
''mai.n ne jab vaadi-e-Gurbat me.n qadam rakkhaa thaa
duur tak yaad-e-vatan aa.ii thii samjhaane ko''

Khalilur Rahman Azmi
Nazm

sitare

nikal kar juu-e-naGma KHuld-zaar-e-maah-o-anjum se
fazaa kii vus.ato.n me.n hai ravaa.n aahista aahista
ba-suu-e-nauha-aabaad-e-jahaa.n aahista aahista
nikal kar aa rahii hai ik gulistaan-e-tarannum se
sitaare apne miiThe madh-bhare halke tabassum se
kiye jaate hai.n fitrat ko javaa.n aahista aahista
sunaate hai.n use ik daastaa.n aahista aahista
dayaar-e-zindagii mad.hosh hai un ke takallum se
yahii aadat hai roz-e-avvalii.n se un sitaaro.n kii
chamakte hai.n ki duniyaa me.n masarrat kii hukuumat huu.n
chamakte hai.n ki insaa.n fikr-e-hastii ko bhulaa Daale
liye hai ye tamannaa har kiran un nuur-paaro.n kii
kabhii ye KHaak-daa.n gahvaara-e-husn-o-lataafat ho
kabhii insaan apnii gum-shuda jannat ko phir paa le

Noon Meem Rashid
Nazm

mujhe le chal

vo mastaana bahaare.n jin pe qurbaa.n arz-e-jannat hai
jahaa.n har zarra ik gahvaara-e-mauj-e-lataafat hai
jahaa.n ra.ngat hii ra.ngat hai jahaa.n nik.hat hii nik.hat hai
mohabbat hukmaraa.n hai jin ke paakiiza dayaaro.n me.n!
mirii 'salmaa' mujhe le chal tuu un ra.ngii.n bahaaro.n me.n!

Akhtar Shirani
Nazm

dal ki fariyaad

ek la.Dkii baghaartii hai daal
daal kartii hai arz yuu.n ahvaal
ek din thaa harii-bharii thii mai.n
saarii aafaat se barii thii mai.n
thaa haraa khet meraa gahvaara
vo vatan thaa mujhe bahut pyaaraa
paanii pii pii ke thii mai.n lahraatii
dhuup letii kabhii havaa khaatii
me.nh barastaa thaa jho.nke aate the
godiyo.n me.n mujhe khilaate the
yahii suuraj zamii.n the maa.n baavaa
mujh se karte the nek bartaavaa
jab kiyaa mujh ko paal-pos ba.Daa
aah zaalim kisaan aan pa.Daa
ga.ii taqdiir yak-ba-yak jo palaT
khet kaa khet kar diyaa talpaT
KHuub luuTaa dha.Dii dha.Dii kar ke
mujh ko gauno.n me.n le ga.e bhar ke
ho ga.ii dam ke dam me.n barbaadii
chhin ga.ii haa.e merii aazaadii!
kyaa bataa.uu.n kahaa.n kahaa.n khii.nchaa
daal-manDii me.n mujh ko jaa bechaa
ek zaalim se vaa.n pa.Daa paalaa
jis ne chakkii me.n mujh ko dal Daalaa
hu.aa taqdiir kaa likhaa puuraa
dono.n paaTo.n ne kar diyaa chuuraa
na sunii merii aah aur zaarii
KHuub baniye ne kii KHariidaarii
chhaanaa chhalnii me.n chhaaj me.n phaTkaa
qaid-KHaana miraa banaa maTkaa
phir muqaddar mujhe yahaa.n laayaa
tum ne to aur bhii Gazab Dhaayaa
khaal khii.nchii alag kiye chhilke
zaKHm kyuu.n-kar hare na ho.n dil ke
Daalii.n marche.n namak lagaayaa KHuub
rakh ke chuulhe pe jii jalaayaa KHuub
us pe kaf-giir ke bhii Thoke hai.n
aur naaKHun ke bhii kachoke hai.n
mere galne kii le rahii ho KHabar
daa.nt hai aap kaa mire uupar
garm ghii kar ke mujh ko daaG diyaa
haa.e tum ne bhii kuchh na rahm kiyaa
haath dho kar pa.Dii ho piichhe tum
jaan par aa banii havaas hai.n gum
achchhii bii-bii tumhii.n karo insaaf
zulm hai yaa nahii.n qusuur-mu.aaf
kahaa la.Dkii ne merii pyaarii daal
mujh ko ma.aluum hai tiraa sab haal
tuu agar khet se nahii.n aatii
KHaak me.n mil ke KHaak ho jaatii
yaa ko.ii gaa.e bhai.ns char letii
peT me.n apne tujh ko bhar letii
mai.n to rutba tiraa ba.Dhaatii huu.n
ab chapaatii se tujh ko khaatii huu.n
na sataanaa na jii jalaanaa thaa
yuu.n tujhe aadmii banaanaa thaa
aglii biitii kaa tuu na kar kuchh Gam
mehrbaanii thii sab, na thaa ye sitam

Ismail Merathi
Nazm

urdu-e-mualla

apne mu.nh se kah rahii hai saaf urdu kii zabaa.n
maulid-o-maavaa hai meraa kishvar-e-hindostaa.n
is ke af.aal-o-ravaabit de rahe hai.n KHud nishaa.n
kis tarah paidaa hu.ii kyuu.n kar ba.Dhii pal kar yahaa.n
roz afzuu.n husn kaa har daur ik sayyaara hai
hai dabistaa.n lucknow dillii agar gahvaara hai

Safi Lakhnavi
Nazm

nai subh

vaadii-e-ga.ng-o-jaman jannat-e-nazaara hai
sar-zamii.n apnii zar-o-siim kaa gahvaara hai

Sahir Hoshiyarpuri
Nazm

ek KHat

samundar ne ye KHaalii siipiyaa.n
kaise ugal dii.n
aa ke saahil par
mai.n pahle bhii kahaa kartaa thaa
tujh ko yaad ho shaayad
ki terii ruuh ke gahre samundar me.n
meraa dil ek siipii hai
magar mai.n ne kabhii terii mohabbat ko numaa.ish me.n nahii.n rakkhaa
mai.n un logo.n se chi.Dtaa thaa
jo afsaane kahaa karte hai.n yaaro.n se mohabbat ke
magar vaise bhii duniyaa me.n kisii kii kaun suntaa hai
sunaataa hai ko.ii jab apnii baate.n
sun.ne vaalii apnii baate.n yaad karte hai.n
magar ye kaisii raate.n hai.n
ki aksar sote sote chau.nk uThtaa huu.n
mujhe to nii.nd bhii ik qarz chashm-e-ambar hai
mai.n sotaa jaagtaa rahtaa huu.n
ik aise musaafir kii tarah
jis ko kisii chhoTe se station pe
gaa.Dii se utartaa ho
tere hilte hu.e haatho.n se
ye kaisii havaa aa.ii
mirii jaa.n tujh se ruKHsat ho ke
mai.n kitnaa akelaa thaa
aur duniyaa so rahii thii
us dil kii tarah
jis ne abhii ronaa na siikhaa ho
ko.ii ko.npal
kabhii zor-e-numuu me.n
sa.ng-basta KHaak se la.Dtii hu.ii
baahar nikaltii hai
ki jaise shoKH bachche
haath aur daaman chhu.Daa kar
ghar se baahar bhaag jaa.e.n
aur guzargaaho.n pe so jaa.e.n
guzar-gaaho.n se bachcho.n ko uThaa kar laa.o
aur gahvaara-e-jaa.n me.n sulaa do
vo jaage.nge to un ke KHvaab puure ho chuke ho.nge
so aaKHir yuu.n hu.aa
ummiid kii shaaKHo.n pe aise barg-o-baar aa.e
mirii jaa.n
teraa milnaa tishnagii ke dasht me.n
vo aab-e-taaza thaa
jo shabnam bhii hai dariyaa bhii hai
aur ruuh me.n Gam ho to aa.nsuu bhii
mujhe aa.nsuu nahii.n milte nahii.n milte nahii.n milte
vo shab bhii kaisii shab thii
jis kaa naqd-e-sub.h ab tak qarz hai
jo mujh se puuchhtaa hai
ab mehnat ko kahaa.n le jaa.oge
kis dil me.n rakhoge
mai.n chup thaa
tuu bhii chup thii
aur KHaamoshii ke lamho.n ke
guzarte qaafile
saa.nso.n kii aavaaz-e-jaras jaa rahe the
ek manzil kii taraf
jo nisf jannat nisf dozaKH thii
mai.n kitnaa sa.ng-dil huu.n
jo terii jannat pe KHush hotaa nahii.n
dozaKH pe ha.nstaa huu.n

Saleem Ahmed
Nazm

ye dilli

qarno.n kii saqaafat hai yahaa.n ab bhii humaktii
har daur kaa gahvaara-e-aasaar hai dillii

Ram Parkash Rahi
Nazm

dua

har pe.D is chaman kaa phuule phale hamesha
gahvaara shaa.ntii kaa yaa rab ise banaa de

Kausar Siddiqi
Nazm

naya tarana

ye apnaa vatan hai apnaa vatan hai apne vatan se pyaar hame.n
is des ke har zarre me.n nazar aataa hai nayaa sansaar hame.n
is des kaa paanii chaa.ndii hai is des kii miTTii sonaa hai
bharpuur hasii.n nazzaaro.n se is des kaa konaa konaa hai
ye apnaa vatan hai apnaa vatan hai apne vatan se pyaar hame.n
is des ke har zarre me.n nazar aataa hai nayaa sansaar hame.n
is des me.n jamunaa bahtii hai is des me.n ga.ngaa lahraatii
barsaat me.n is kii mast pavan kyaa giit suhaane hai gaatii
ye apnaa vatan hai apnaa vatan hai apne vatan se pyaar hame.n
is des ke har zarre me.n nazar aataa hai nayaa sansaar hame.n
ye des ajantaa elora kaa ye taaj-mahal kaa gahvaara
ye sub.h-e-banaras shaam-e-avadh kashmiir kaa dilkash nazzaara
ye apnaa vatan hai apnaa vatan hai apne vatan se pyaar hame.n
is des ke har zarre me.n nazar aataa hai nayaa sansaar hame.n
vo koh himaala is me.n hai aakaash se baate.n kartaa hai
vo is kii shaan ba.Dhaataa hai vo is kii hifaazat kartaa hai
ye apnaa vatan hai apnaa vatan hai apne vatan se pyaar hame.n
is des ke har zarre me.n nazar aataa hai nayaa sansaar hame.n
is des kii izzat kyuu.n na kare.n ye des hai gaa.ndhii baapuu kaa
is des se kyuu.n na pyaar hame.n ye des hai chaachaa nehru kaa
ye apnaa vatan hai apnaa vatan hai apne vatan se pyaar hame.n
is des ke har zarre me.n nazar aataa hai nayaa sansaar hame.n
aazaad isii ke sevak the zaakir the isii ke rakhvaale
ek prem nagar hai des hai apnaa milte hai.n isii me.n dil vaale
ye apnaa vatan hai apnaa vatan hai apne vatan se pyaar hame.n
is des ke har zarre me.n nazar aataa hai nayaa sansaar hame.n
ye des use apnaa.egaa jo dil se is ko chaahegaa
is des ke jo kaam aa.egaa vo mar ke amar ho jaa.egaa
ye apnaa vatan hai apnaa vatan hai apne vatan se pyaar hame.n
is des ke har zarre me.n nazar aataa hai nayaa sansaar hame.n

Syeda Farhat
Nazm

mera watan hindostan

meraa vatan hindostaa.n har raah jis kii kahkashaa.n
koh-e-giraa.n se kam nahii.n jis ke jiyaale naujavaa.n
ye viir-o-gautam kii zamii.n amn-o-ahinsaa kaa chaman
akbar ke KHvaabo.n kaa jahaa.n chishtii-o-naanak kaa vatan
sham.e.n hazaaro.n hai.n magar hai ektaa kii anjuman
tahziib kaa gahvaara hai.n ga.ng-o-jaman kii vaadiyaa.n
meraa vatan hindostaa.n
taariiKH kii azmat hai ye jamhuuriyat kii shaan hai
ruuhaaniyat kii ruuh hai sab maz.habo.n kii jaan hai
ye apnaa hindostaan hai ye apnaa hindostaan hai
haasil yahaa.n insaan ko har tarah kii aazaadiyaa.n
meraa vatan hindostaa.n
jab dil se dil milte ga.e miTte ga.e sab faasle
ye aaj kaa naGma nahii.n sadiyo.n ke hai.n ye silsile
sadiyo.n se mil kar hii ba.Dhe sab ahl-e-dil ke qaafile
ik saath uThtii hai yahaa.n aavaaz-e-naaquus-o-azaa.n
meraa vatan hindostaa.n
taariiKH ke is mo.D par ham farz se Gaafil nahii.n
qaabuu na jis par paa sake.n aisii ko.ii mushkil nahii.n
jis ko na ham sar kar sake.n aisii ko.ii manzil nahii.n
haa.n baa.nkpan kii shaan se hai kaarvaa.n apnaa ravaa.n
meraa vatan hindostaa.n

Rifat Sarosh
Nazm

do ka pahaDa

zehn me.n apne ilm bhare.n
do kaa pahaa.Daa yaad kare.n
do aikam do do donaa chaar
sab se ulfat sab se pyaar
do tiyaa chhe aur do chauke aaTh
pa.Dh likh kar tum karnaa ThaaT
do panje das do chhakke baarah
bhaarat KHushiyo.n kaa gahvaara
do sat chaudah do aThe sola
yaad karo ai munnaa raaja
do nam aThaarah do dahaam biis
KHatm pahaa.Daa laa.o fees

Abrar Kiratpuri
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now