Search result for

Nazm

baqa-e-mohabbat

dar diivaar aur dariiche
ek mu.aahida hai.n
adam-e-mudaaKHalat kaa mashruut mu.aahida
do mohazzab insaano.n ke darmiyaa.n
do mutamaddin KHaandaano.n ke darmiyaa.n
diivaar
tahziib kii tarjumaan
tamaddun kii pahchaan
aur baqaa-e-baahamii kii aa.iina-daar
hiila huquuq kii zamaanat
baqaa-e-tahiiyat kii alaamat
hait aur ahaata
zehnii-o-jismaanii aasuudgii
aur
sukh-chain ke liye laazim hai
daKHl dar ma.aquulaat
Gair-aKHlaaqii hii nahii.n
Gair-insaanii ravayya bhii hai
ghar kaa haq hai ki vo
duusre ghar kii be-jaa mudaaKHalat se mahfuuz rahe
ham diivaar to
hamdard hotaa hai
KHabar-giir hotaa hai
KHabar-rasaa.n nahii.n ban saktaa
taKHayyul aasuudgii
sukh ghaTaatii
aur dukh ba.Dhaatii hai
shakar-ganjii paidaa kartii hai
aazurda-dilii kaa maujib bantii hai
faasle diivaar kii puKHtagii se nahii.n
dilo.n kii saKHtii se ba.Dhte hai.n
puKHta diivaar to tamaddun kii baqaa hai
suurii faasle be-ma.anii ho jaate hai.n
agar qalb-o-nazar shaad ho.n
haq KHalvat KHaliij nahii.n
faraaKHii tarfain hai
privacy kaa haq
tahziib-e-insaanii kii me.araaj hai

Shamim Alvi

Nazm

mohabbat mar nahin sakti

vahii be-taabiyaa.n dil kii
vahii phirtaa hu.aa dariyaa
vahii kachchaa gha.Daa hai muntazir sach ke musaafir kaa
vahii shab kii siyah chaadar
chhupii hai.n saazishe.n jis me.n aziizo.n kii
puraane dosto.n kii ham-jaliiso.n kii
vahii sargoshiyaa.n sail-e-sitam kii
vahii manzar
jo hotaa hai hamesha ruuh-farsaa haadso.n kaa pesh-KHema saa
vahii saare qariine saare hiile hai.n baham ab ke
jo ahl-e-dil ko be-manzil banaane kii hai.n tadbiire.n
magar ahl-e-jahaa.n ko kyaa KHabar
kachche gha.De par tair kar raah-e-mohabbat me.n fanaa honaa
alag se ik kahaanii hai
ki ye vo maut hai jis me.n
baqaa-e-jaavedaanii hai
mohabbat mar nahii.n saktii
mohabbat Gair-faanii hai
mohabbat Gair-faanii hai

Mohammad Tanviruzzaman

Nazm

ghamon ki aag mein jalna paDega umr bhar hum ko

bahut kuchh soch kar nikle the ghar se ham
ki hijrat kar rahe hai.n ik mohazzab mulk kii jaanib
ki shohra hai usii kaa saare aalam me.n
ki achchhaa hai usii KHush-haal KHitta me.n
ziyaada se ziyaada ho.ngii apnii KHvaahishe.n puurii
hamaare bachche bhii ik achchhe se maahaul me.n rah kar
mohazzab hii bane.nge
aur mustaqbil bhii ho jaa.egaa
un kaa har tarah raushan
to phir aa.iina-e-tahziib me.n
har aks hii uryaa.n nazar aaya
aur aa.nkhe.n bhii zamii.n se lag ga.ii.n
aisaa hu.aa phir
roz ghar me.n zid se
v c r T v me.n
hamaare bachcho.n ne dekhaa
vahii uryaa.n tamaasha
kyuu.nki KHabro.n se unhe.n ko.ii bhii dilchaspii nahii.n
ab sirf filme.n dekhnaa hii un kii aadat hai
ham un ko man.a karte the magar vo maante kaise
ki jis maahaul me.n vo rahte hai.n us me.n
aur jo bachche hai.n vo aazaad hai.n
maa.n-baap un ko Daa.nT bhii sakte nahii.n
is mulk kaa qaanuun us kii pusht par hai
jo baGaavat par unhe.n aamaada kartaa hai
lihaazaa ham dabaa.o un pe kaise Daal sakte hai.n
to ham ye sochte hai.n
ab yahaa.n rahnaa munaasib hii nahii.n hogaa
magar bachche kahaa.n ye chaahte hai.n
lauT kar jaa.e.n vatan
ya.anii hamaarii vaapsii mumkin nahii.n
is fikr me.n ham aur bhii hai.n mubtalaa-e-Gam
hamaare KHvaab kii duniyaa uja.D kar rah ga.ii hai
kis ne ye sochaa thaa
ho jaa.egaa kyaa se kyaa
hame.n to ab yahii mahsuus hotaa hai
Gamo.n kii aag me.n jalnaa pa.Degaa
umr bhar ham ko

Mohammad Salim

Nazm

ek zati nazm

mai.n aksar dekhne jaataa thaa us ko jis kii maa.n martii
aur apne dil me.n kahtaa thaa ye kaisaa shaKHs? hai ab bhii
jiye jaataa hai aaKHir kaun us ke ghar me.n hai jis ke
liye ye saKHtiyaa.n sahtaa hai takliife.n uThaataa hai
thakan din kii sameTe shab ko ghar jaane pe kaun us ke
liye dahliiz par baiThaa... du.aa kii mish.ale.n dil me.n
jalaa.e... diida-e-be-KHvaab kii har raah darvaaze
kii darzo.n se nikaalegaa... KHudaa kii mehrbaanii ik
haqiiqat hii sahii kuchh qahr-aaluuda bhii hai... jo us
kii naa-farmaa.iyo.n karte hai.n un ke vaaste us ne
dahaktii aag bhii tayyaar rakkhii hai... dil-e-kaafir
me.n us kii mehrbaanii aur rahmat kaa tasavvur bhii
jab aayaa maamtaa ke lafz kii suurat me.n aayaa hai
mirii viiraan aa.nkho.n ne phir aisaa vaqt bhii dekhaa
ki suuraj jal rahaa thaa raushnii manzar se Gaa.eb thii
KHudaa zinda thaa lekin us kii rahmat sar se Gaa.eb thii
unhii aa.nkho.n me.n mere KHairiyat se lauT aane par
na thaa ashk-e-masarrat bhii... ki merii raah taknaa jin
kii biinaa.ii kaa masraf thaa... vo lab do chaar din pahle
mire maathe pe ho kar sabt jo kahte the'' tum jaa.o
tumhaarii naukrii kii baat hai beTe! mai.n achchhii huu.n
mujhe ab jaan kaa KHatra nahii.n hai aur agar kuchh ho
gayaa to ham tumhe.n fauran bulaa le.nge chale jaa.o''
(agar mar jaa.uu.n mai.n to sabr kar lenaa... KHudaa-haafiz)
magar ye baat 'qaasir' in labo.n se kab sunii mai.n ne
ise ma.aluum thaa shaayad ki maa.e.n mar nahii.n saktii.n
dil-e-aulaad me.n ik yaad ban kar zinda rahtii hai.n
bulaayaa to gayaa mujh ko magar vo lab? kahaa.n vo lab?
mire faaqa-zada bachpan ko niindo.n se gureazaa.n, paa
ke jo pariyo.n ke afsaane sunaate the to mai.n KHvaabo.n
me.n KHud ko un ke dastar-KHvaano.n par maujuud paataa thaa
sakat baaqii nahii.n hai un labo.n me.n aaj itnii bhii
ki merii KHaatir ik harf-e-du.aa kaa bojh uThaa lete
mujhe jo dekhne aate hai.n kahte hai.n mai.n zinda huu.n
mai.n khaataa huu.n ki ye bhii zindagii kii ik zaruurat hai
magar har zaa.iqe me.n ek talKHii kaa izaafa hai
kisii diivaar kaa saaya ho yaa ho pe.D kii chhaa.nv
miraa jism-e-barhana chhedtii rahtii hai.n kirne.n ab
hu.aa vo haath Gaa.eb jo ki merii zaat par hote
hu.e har vaar ko ba.Dh ba.Dh ke KHud par rok letaa thaa
du.aa ko haath uThaataa huu.n du.aa.e.n us kii KHaatir hai.n
mai.n goyaa huu.n ki merii sab sadaa.e.n us kii KHaatir hai.n
mohabbat us kii KHaatir hai vafaa.e.n us kii KHaatir hai.n
ki merii ibtidaa.e.n, intihaa.e.n us kii KHaatir hai.n

Ghulam Mohammad Qasir

Nazm

unche darje ka sailab

zamii.n kaa husn sabza hai
magar ab sabz pate zard ho kar jha.Dte jaate hai.n
bahaare.n dair se aatii hai.n
jugnuu hai na titlii KHushbuu.o.n... se rang ruuThe hai.n
jahaa.n jangal hu.aa karte the aur baarish dhanak le kar utartii thii
jahaa.n barsaat me.n koyal, papiihe chahchahaate the
vahaa.n ab KHaak u.Dtii hai
daraKHto.n kii kamii se aa ga.ii hai dhuup me.n shiddat
fazaa kaa mehrbaa.n haala pighaltaa jaa rahaa hai
aasmaa.n taa.nbe me.n Dhaltaa jaa rahaa hai
is liye be-mehr mausam ab sataate hai.n
dhu.e.n ke, gard ke, aaluudgii ke, shor ke mausam
galii, kuucho.n, gharo.n me.n kaar-KHaano.n me.n bas ab
sa.Dak par shor bahtaa hai
sunaa.ii hii nahii.n detaa hamaaraa dil jo kahtaa hai
mohabbat kaa parinda aaj-kal KHaamosh rahtaa hai
parinde pyaas me.n Duube hai.n aur paanii nahii.n piite
ki dariyaa.o.n kii shiryaano.n me.n ab shaffaaf paanii kii jagah aaluudgii kaa zahr hai
hame.n jab bahr o bar kii hukmaraanii dii ga.ii hai to ye ham ko sochnaa hogaa
zamiino.n, paaniyo.n, maahaul kii biimaariyo.n kaa ko.ii mudaavaa hai
kahii.n in kaa sabab ham to nahii.n bante?
sabab ko.ii bhii ho aaKHir mudaavaa kuchh to karnaa hai
ye tasviir-e-jahaa.n hai rang is me.n ham ko bharnaa hai

Ghulam Mohammad Qasir

Nazm

samita-paTil

husn-e-insaa.n se fitrat kii sargoshiyaa.n ghul ga.ii.n tere lahje kii jhankaar me.n
fan kii takmiil sachchaa saraapaa tiraa, be-zabaanii ko laayaa jo iz.haar me.n
muddato.n tak numaa.ish kii KHvaahish rahii zindagii tab Dhalii tere kirdaar me.n
jo thii zinda mohabbat kii buniyaad par vaqt ne chun diyaa us ko diivaar me.n
dhuup har ruup me.n, ret har khet me.n, fasl jazbaat par KHushk-saalii rahe
do gha.Dii dil kisii ke KHayaalo.n me.n gum aur phir umr bhar be-KHayaalii rahe
aa.ina ab tarastaa rahe aks ko aur nazar raushnii kii savaalii rahe
mere hisse kaa ye aa.nkh bhar aasmaa.n jagmagaate sitaare se KHaalii rahe

Ghulam Mohammad Qasir

Nazm

kirae ka makan

ajab shai hai kiraa.e kaa makaa.n bhii
makaa.n bhii hai ye zaalim laa-makaa.n bhii
ba.Dii ujlat me.n banvaayaa gayaa hai
la.ii se chhat ko chipkaayaa gayaa hai
hai vaaq.e ek naalii ke kinaare
mayassar hai.n mujhe kyaa kyaa nazaare
naziir un kii jahaan-e-KHvaab me.n hai
bahaaraa.n kii shab-e-mahtaab me.n hai
na kyo.n ho jism meraa ranj se chuur
faqat do miil hai ye shahr se duur
yahaa.n aab-o-havaa kaa masKH chehra
milaa hargiz na mauqa dekhne kaa
ham aapas me.n bahut ghul-mil ga.e hai.n
mujhe jebo.n me.n chamgaada.D mile hai.n
hai.n baam-o-dar pe ye Gaarat-gar-e-hosh
bahaar-e-bistar-o-nau-roz-e-aaGosh
hamaarii ab ye haalat ho ga.ii hai
a.ndhero.n se mohabbat ho ga.ii hai
yahaa.n din ko bhii ulluu bolte hai.n
mire kaano.n me.n amras gholte hai.n
jo duniyaa me.n hai.n ye kii.De-mako.De
yahii.n pal kar javaa.n hote hai.n saare
Gubaar-aaluud yuu.n merii jabii.n hai
kahii.n sii.Dhii kahii.n kuchh bhii nahii.n hai
isii sii.Dhii kaa hai vo vaaqi.a bhii
lu.Dhak kar mar ga.ii jo saas merii
yahaa.n chuuho.n ke bil itne ba.De hai.n
ka.ii saabit qadam in me.n gire hai.n
mujhe bhii duur kii ik roz suujhii
kisii bil ko mai.n khoduu.n jii me.n aa.ii
jo khodaa chashm-e-hairaa.n ne ye dekhaa
ki ik leader numaa moTaa saa chuuhaa
dabaa.e mu.nh me.n ik KHaasa bataashaa
mire moze pahan kar jaa rahaa thaa
vahii.n ik chuhiyaa aa niklii kahii.n se
Tapaktaa naaz thaa us kii jabii.n se
basaa thaa itr me.n har resha us kaa
pare thaa arsh se andesha us kaa
bahut ban-Than ke niklii thii bichaarii
miyaa.n chuuhe ne fauran aa.nkh maarii
nigaah-e-Gair se sharmaa ga.ii vo
miyaa.n chuuhe se phir Takraa ga.ii vo
mile yuu.n taalib-o-matluub baaham
majaazii ishq kaa lahraayaa parcham
Garaz chuuhe qayaamat Dhaa rahe hai.n
dar-o-diivaar par ma.nDlaa rahe hai.n
mai.n laayaa thaa kahii.n se ek billii
paka.D kar le ga.e chuuhe use bhii

Qazi Ghulam Mohammad

Nazm

muflison ka qaumi tarana

yahii mirii KHvaab-gaah-e-ishrat yahii hai meraa nigaar-KHaana
dhu.e.n kii rangiin badliyo.n me.n pakaa rahii hai jahaa.n vo khaanaa
yahii.n a.ndhero.n se mil ke ham chaa.ndnii ke chhakke chhu.Daa rahe hai.n
yahii.n hamaaraa sila muqarrar hu.aa hai adbaar-e-jaavedaana
yahii.n use giilii lak.Diyo.n ne KHushii ke aa.nsuu bahaate dekhaa
yahii.n use raakh kii taho.n ne banaa diyaa Gair shaa.iraana
yahii.n mirii saKHt-jaan Gairat ye baarhaa sun chukii hai ab tak
abe tirii muflisii ke charche sune the mai.n ne to Gaa.ebaana
yahii.n vo jaan-e-vafaa mirii aarzuu kii rangiiniyo.n kii KHaatir
chhi.Dak ke baalo.n me.n itr-e-andesha kartii rahtii hai in me.n shaana
agar nahuusat kii jaan hai vo to banda iimaan-e-muflisii hai
isii liye ek duusre se hame.n mohabbat hai vaalihaana
ilaahii terii inaayato.n kaa ye ek adnaa saa hai karishma
hamaare iflaas-e-be-karaa.n kaa jo aaj hai mo'tarif zamaana
vo us kaa jaa.De kii sard raato.n me.n mujh se ii.ndhan kii baat karnaa
ki jaise ye chiiz maavaraa.ii ho yaa alif-lailvii fasaana
taviil faaqo.n ke baa'd dono.n kaa piich pii kar vo jhuum uThnaa
vo us kii sharmiilii sii nigaahe.n vo mere jazbaat-e-aashiqaana
KHushii me.n saarii KHudaa.ii me.n half-day manaayaa gayaa thaa us din
vajuud me.n aa gayaa thaa jis din hamaarii ulfat kaa shaaKHsaana

Qazi Ghulam Mohammad

Nazm

ghar

pyaare beTe tuu ne ii.nT gaare cement aur sariye vaalaa makaan to banaa liyaa hai
merii du.aa hai ki ye mohabbat amn KHushii aur KHush-haal se bharaa ghar ban jaa.e
is ke darvaaze se ko.ii badii aur buraa.ii daaKHil hii na hone paa.e
khi.Dkiyo.n se zindagii-baKHsh havaa to zaruur andar aa.e lekin har tuufaan baahar hii rah jaa.e
teraa ye ghar vo kashtii ban jaa.e jo tujhe har bha.nvar se ba-KHair nikaal le jaa.e
garmiyaa.n aa.e.n to ghar qurbato.n kii garmii se damak uTThe
KHizaa.n aa.e to diivaaro.n par saje fan-paaro.n se bahaar sharmaa jaa.e
bahaar aa.e to mahsuus ho ki teraa ghar hii is kaa mamba.a hai
baahar kitnaa hii shor-o-GauGaa ho tere ghar me.n sukuun-o-raahat ho
baahar kitnaa hii a.ndheraa ho tere ghar me.n na.e hauslo.n ke charaaG raushan ho.n
tere ghar kii chaar-diivaarii is qile kii fasiil ban jaa.e
jis me.n nafrat naqb na lagaa sake
mohabbat jis ke andar mahfuuz ho
ek duusre kii mohabbat
insaan kii mohabbat
KHudaa kii mohabbat
ghar kar jaa.e
ghar

Mohammad Haneef Rame

Nazm

jo yun hota to kya hota

chalo ghar kii taraf chalte hai.n
baahar barf-baarii hai
mai.n tum par nazm likhuu.ngaa
mohabbat la.Dkiyo.n ko astabal me.n chho.D aatii hai
mai.n tum ko beach khi.Dkii me.n biThaa kar nazm likhuu.ngaa
tumhe.n aataa to hogaa darmiyaa.n se lauTnaa
mai.n lauTne par nazm likhuu.ngaa

Mohammad Anvar Khalid

Nazm

sattar maon ka pyar

kitaabo.n kaa ziina banaa kar
machaanii se mai.n ne miThaa.ii churaa.ii to
ghar me.n kisii ko bhii Gussa na aayaa
ye kam-sin zehaanat kii taasiir thii
yaa sharaarat kii shiirii.n shakar-qandiyo.n jaisii umro.n kii lazzat
abhii tak vo KHush-zaa.eqa vaaqi.a
jab rag-e-jaa.n me.n ghultaa hai
bachpan ke baaGaat kii titliyaa.n
phuul ban kar barastii hai.n
pathriilii umro.n ke din raat kii
zard kaalii musiibat kaa Gam bhuul kar
muskuraahaT kii miiThii phuvaare.n
bayaabaa.n ko jal-thal banaatii hai.n gaatii hai.n
ek do tiin
allaah miyaa.n kii zamiin
chaar paa.nch chhe saat
saare mil kar khaa.e.n bhaat
aaTh nau das paanii miiThaa ras
paanii kii lahro.n pe hachkole khaatii hu.ii
kaaGazii-umr kii naav
karvaT badal kar ulaT detii hai KHvaab saare
kitaabo.n pe girte hu.e aa.nsu.o.n se
siyaahii ke dariyaa hii bante hai.n
dariyaa samundar banaate hai.n
saare samundar siyaahii qalam ban ga.ii.n saarii shaaKHe.n
qasam u.ngliyo.n kii
mohabbat bharaa KHat mire aur tire darmiyaa.n tiir hai
mai.n likkhuu.n aur likhtaa rahuu.n taa-qayaamat
mohabbat kii nazme.n
magar jaaniyaa.n in kitaabo.n ko ziina banaa kar
ka.ii baar mai.n ne
tire aasmaano.n pe jaa kar
tujhe Dhuu.nD laane kii naakaam koshish me.n
aa.nsuu bahaa.e
siyaahii ke dariyaa banaa.e

Ali Mohammad Farshi

Nazm

shaiKH salahuddin

ye suujhii hai kyaa aap ko shaiKH saahab
jo chup saadh lii aap ne shaiKH saahab
lapeTaa thaa naasir jab jab mu.nh sochaa mai.n ne
mohabbat hii kamzor thii aap kii jo nahii.n rok paa.ii use shaiKH saahab
sajiilaa thaa gul aap ke baaG kaa sab se vo shaiKH saahab
gayaa vo ga.ii bazm-e-yaaraa.n kii raunaq ga.ii us kii KHushbuu
tarannum se KHaalii hu.ii shaa.irii guftuguu me.n maza na rahaa shaiKH saahab
mujhe ilm thaa ki chhupaate hai.n Gam aap apnaa
magar aap ko mai.n bahut saKHt-jaan jaantaa thaa
bha.ii aql-e-kul maantaa thaa
kahaa aap kaa go nahii.n maantaa thaa
kahaa.n to ye da.avaa ki sau saal kii umr hogii hamaarii
kahaa.n ab yakaayak bataa.e binaa chal diye aap naasir se milne
akele me.n dil aap kaa bhii kahaa.n lagtaa hogaa
kitaabe.n KHvaah qur.aan hii kyuu.n na ho dostii kaa badal to nahii.n shaiKH saahab
vafaa ke taqaaze kiye aap ne saare puure
mirii vaapsii ke rahe muntazir aaKHirii saa.ns tak aap to shaiKH saahab
na to.Daa kabhii yaad kaa mujh se rishta
dhar me.n jise mil na paayaa kabhii raasta vaapsii kaa
bahut zor maaraa ki mai.n lauT aa.uu.n
karuu.n aa ke aabaad vo baaG-e-hikmat
chamakte the jis me.n misaal-e-mehr aap hii shaiKH saahab
masaa.il ke jangal me.n gum ho gayaa mai.n
siyaasat ke kambal ko jitnaa bhii mai.n chho.Dtaa vo nahii.n chho.Dtaa thaa mujhe shaiKH saahab
mujhe ab chalaa hai pataa ki mohabbat na kamzor thii aap kii shaiKH saahab
bulaave pe naasir ke yuu.n chal diye aap uTh kar
mohabbat thii kamzor merii
bulaate rahe aap barso.n mujhe mai.n na aayaa
bahut der kar dii hai aane me.n be-shak
magar ab me.n aayaa ki aayaa
zaraa do gha.Dii intizaar aur Gaalib se mil luu.n
bahut kuchh hai kahnaa unhe.n aap se shaiKH saahab
mai.n paiGaam le luu.n
sakiina se mariyam se anvar se ruKHsat me.n ho luu.n
gale se ibraahiim ko mai.n lagaa luu.n
mai.n aayaa ki aayaa KHudaa kii qasam shaiKH saahab

Mohammad Haneef Rame

Nazm

gungi iltija

rabb-ul-izzat
vo zamiin jise tuu ne banii aadam ke liye jannat banaayaa thaa
aur amn ke gahvaare kaa naam diyaa thaa
jahaa.n hamaarii aazmaa.ish ke liye shajar-e-mamnuu.a ke saath saath
hamaarii rubuubiyat ke liye tuu ne shajar-e-hayaat bhii ugaayaa thaa
hamaarii vo zamiin paanii havaa aur KHushkii kii maKHluuq kaa mushtarka ghar thii
is pyaarii zamiin par aabaad saarii maKHluuq ek duusre se raazii thii
aur jis kii saarii maKHluuq ko baaham raazii dekh kar tuu bhii ham se raazii thaa
ai rabb-ul-izzat ham ne vo zamiin apne haatho.n barbaad kar ke rakh dii hai
hamaaraa tujh par ko.ii haq nahii.n ki zid kare.n
lekin tuu ne tauba kaa darvaaza to khulaa rakkhaa hai
be-shak tauba kii ibtidaa e'tiraaf se hotii hai
magar is kii intihaa hamesha du.aa se hotii aa.ii hai
mere paas du.aa ke laa.eq alfaaz nahii.n hai.n
lekin tere paas merii guu.ngii iltijaa sun.ne ke liye bahut achchhe kaan hai.n
husn-e-samaa.at tujh par KHatm hai
is liye ki tuu azal se muztaro.n kii suntaa aur murda zamiino.n ko zinda kartaa aayaa hai
sun ai samii.a sun
ek martaba phir is zamiin par amn ummiid aur masarrat ke pharere lahraa de
ek martaba phir is ke beTe beTiyo.n kaa haath paka.D
unhe.n adhuure-pan se najaat de de
puuraa kar de unhe.n
vo havas aur be-sabrii kii khaultii daldal me.n
bad-suurat me.nDako.n kii tarah au.ndhe mu.nh pa.De hai.n
unhe.n puure qad se kha.Daa kar de
un kii azmat-e-aadam lauTaa de
unhe.n ek duusre par e'timaad karnaa sikhaa de
taufiiq de unhe.n ki terii ataa karda quvvat-e-taKHliiq se
zamiin ko husn aur ma.anii se maalaa-maal kar de.n
ehtiraam Daal de in ke dil-o-dimaaG me.n is zamiin ke liye
apnii us maa.n ke liye
us kii saarii maKHluuq ke liye
nasl aqiide jins aur saqaafat kaa farq in kii vahdat me.n na.e rang bhare
vo puure kurra-e-arz par phaile ho.n lekin ek duusre kaa haath paka.D kar
vo puure kurra-e-arz ko ek aise dastarKHvaa.n kii shakl de de.n
jis par zamiin kaa saaraa rizq zamiin kii saarii maKHluuq ke liye aam ho
chhe arab insaan hii nahii.n zamiin kii saarii maKHluuq sairaab-o-shaad-kaam ho
ai rabb-ul-izzat
tuu ne is zamiin kii suurat me.n jo jannat hame.n dii thii
ham ne use apne liye jahannam banaa liyaa hai
ye jahannam sirf nifaaq aur nafrat hii nahii.n KHauf se bhii labrez hai
ek duusre se KHauf apne aap se KHauf
aur KHauf to mohabbat kii nafii hotaa hai
aur saarii mohabbato.n kii ibtidaa aur intihaa
hame.n ek martaba phir mohabbat se sarshaar kar de
ki mohabbat ke baGair hame.n na to sachchaa amn nasiib hogaa aur na sachchii zindagii
ham mohabbat se mahruum rahe to KHvaah to zamiin ko sau martaba bhii jannat banaa de
ham hazaar martaba use jahannam banaa ke rakh de.nge
ham ne nafrat nifaaq aur KHauf ko aazmaa kar dekh liyaa hai
ai rabb-ul-izzat
hamaare vajuud mohabbat ke liye is tarah taras rahe hai.n
jaise pyaasii zamiin baarish ke liye tarastii hai
hame.n mohabbat nasiib kar de

Mohammad Haneef Rame

Nazm

KHarabi hai mohabbat mein

mohabbat raat mujh se kah rahii thii us ke ghar jaanaa
ki aa.nkhe.n dhul ga.ii hai.n aur chehra dhuup detaa hai
gahan kii maar ho us aa.nkh par jo is ghaTaa me.n dhuup dekhe

Mohammad Anvar Khalid

Nazm

musalsal chalte rahne ki KHushi mein

musalsal chalte rahne kii KHushii me.n leT jaatii hai mohabbat ghaas me.n
patthar kii sil par yaadgaarii sii.Dhiyo.n ke beach
giile mausamo.n me.n paa.nv me.n aatii hu.ii un sii.Dhiyo.n ke saath
jin par log chalte hai.n
aur ik dam ha.nsne lagte hai.n
musalsal chalte rahne kii KHushii me.n
ab un ke paa.nv par shabnam giregii
aa.o chal de.n baa.ndh le.n juuto.n ke tasme
aa.o chal de.n un kaniizo.n ke ta.aaqub me.n
jo aasuuda hu.ii.n
aur so ga.ii.n patthar kii sil par
yaadgaarii sii.Dhiyo.n ke beach
giile mausamo.n me.n
ab un ke paa.nv par shabnam giregii

Mohammad Anvar Khalid

Nazm

wo apne hath mein duniya ki tahziben uThae aaegi

vo apne haath me.n duniyaa kii tahziibe.n uThaa.e aa.egii aur gir pa.Degii
mai.n naqshe kii madad se us ke girne kii KHabar duu.ngaa
samundar be-bizaa.at hai ugal detaa hai niilii kashtiyo.n ko
aasmaa.n khi.Dkii se baahar phe.nk detaa hai jahaazo.n ko
sitaare dekh kar chalte nahii.n miTTii u.Daa le jaa.egii un ko
so ye vo saa.ate.n hai.n jab nahii.n chalte sitaare
aur miTTii phail jaatii hai
vo apnii aastiine.n dho ke ghar aa.egii aur un ko ujaale me.n sikhaa.egii
mohabbat ek Dhiilaa lafz hai is ke simaTne kaa
so vo to kushtanii hai jo nahii.n niklaa safar par aur naqshe kii madad se apne ghar pahu.nchaa
mai.n aa.nkhe.n band kar luu.ngaa
vo lambii raahdaarii ke sire par aa.egii aur gir pa.Degii
mai.n naqshe kii madad se us ke girne kii KHabar duu.ngaa

Mohammad Anvar Khalid

Nazm

ji Darta hai

tumhe.n lauT ke aanaa achchhaa lagaa
mujhe chhat kii bele.n harii mile.n
unhe.n dhuup na denaa jaa.Do.n me.n
ye bistar mere ghar ke nahii.n
tumhe.n fikr hu.ii mujhe KHauf aayaa
sab jaan.naa achchhaa hotaa hai magar aksar farq nahii.n pa.Dtaa sab jaan.ne se
jab kashtii Duubne lagtii hai
mai.n jaantaa huu.n
mujhe tairnaa aanaa chaahiye thaa
be-Garaz mohabbat karne vaale achchhii nasl ke dosto.n kii hamraahii me.n
mujhe un se alag
kuchh apne liye bhii sochnaa chaahiye thaa
mai.n jaantaa huu.n
ye aag izaafii koshish thii
jab kashtii Duubne lagtii hai tab kashtii Duubne lagtii hai
ab lauT aa.e to fikr karo
ye kashtii Duub bhii saktii thii
ye bistar bhiig bhii sakte the
ye dariyaa lauT bhii saktaa thaa
be-Garaz mohabbat karne vaale achchhii nasl ke dosto.n kii hamraahii me.n
har kaam ulaT ho saktaa thaa

Mohammad Anvar Khalid

Nazm

ishq ke banjh mausam

'ufuq ke zard gaalo.n par jamii hai gard sadiyo.n kii
thakan kii raakh me.n lipTii hu.ii taariik pagDanDii
kisii KHaalii kaTore me.n pa.Dii hai pyaas raadhaa kii
nafas kii dhuup me.n jal bujh ga.e hai.n vasl ke sapne
ruto.n ke baa.njh-pan se u.D rahii hai KHaak bastii me.n
na shaaKH-e-jaa.n pe ko.ii gul na ko.ii KHushbuu-e-hijraa.n
ye kaisii fasl-e-vahshat hai
ki jis me.n aarzuu ke naKHl-e-sabza-zaar suukhe hai.n
dariicho.n ke paTolo.n se lipaT kar mar ga.ii dastak
nigaaho.n ke piyaalo.n me.n ko.ii manzar nahii.n bastaa
faqat ik be-hisii kii jo.nk lipTii hai KHayaalo.n se
guzarte saa'ato.n ke reg-zaaro.n par
mohabbat ke kutub-KHaane larazte gard ke tuufaa.n
na ab vo lauh-e-dil baaqii na vo tahriir-e-jaa.n baaqii
vo jin ke lams se khilte the in be-jaan rasto.n par
Gul-e-tar kii tarah jaaduu
vo sab jaaduu vo sab qisse
isii be-mehr miTTii kii taho.n me.n jaa ke so.e hai.n
jahaa.n ab pyaar kii ko.npal nikalne se rahii saa.ii.n
'ajab ik habs hai shaam-e-tamannaa kii fazaao.n me.n
ki ab harf-e-vafaa kii raakh bhii u.Dtii nahii.n yaa.n par
ye 'ishq ke baa.njh mausam hai.n
'ishq ke baa.njh mausam hai.n

Muhammad Ijaz Ul Haq

Nazm

subh-e-watan

vo jalva sahar kaa vo chi.Diyo.n kaa gaanaa
vo ThanDii havaa.e.n vo manzar suhaanaa
vo phuulo.n kaa khilnaa vo buu bhiinii-bhiinii
masarrat se kaliyo.n kaa vo muskuraanaa
ufuq par vo surKHii vo rangiin baadal
vo puurab me.n suuraj kaa jalva dikhaanaa
daraKHto.n kaa vo jhuumnaa mast ho kar
vo patto.n kaa KHush ho ke taalii bajaanaa
KHudaa ke vo bando.n kaa bedaar honaa
vo mu.nh haath dhonaa vo un kaa nahaanaa
vo phir kaam me.n apne masruuf rah kar
mashaqqat se mehnat se rozii kamaanaa
vo bailo.n ke ghu.ngruu vo Tan Tan suhaanii
kisaano.n kaa uTh kar vo kheto.n me.n jaanaa
vo sarsabz kheto.n ke dilkash nazaare
vo shaadaab khetii kaa manzar suhaanaa
vo ek ek bastii ke ghar ghar me.n raunaq
vo jhaa.Duu buhaaruu vo khaanaa pakaanaa
vo aazaad rahne kii dil se du.aa.e.n
vatan kii mohabbat ke vo giit gaanaa
niraalii hai.n yuu.n to fazaa.e.n vatan kii
magar is kaa vaqt-e-sahar hai yagaana
chalo ham bhii 'nayyar' kaa ik giit gaa.e.n
vahii ya.anii apne vatan kaa taraana

Mohammad Shafiuddin Nayyar

Nazm

hamare des ki barsat

vo kaale kaale baadal har taraf ghir ghir ke chhaate hai.n
falak par KHushnumaa ik shaamiyaana saa sajaate hai.n
garaj kar apnii aamad ke vo naqqaare bajaate hai.n
vo ban kar barq partav qudrat-e-haq kaa dikhaate hai.n
vo kaisii un kii dilkash dilrubaayaana ravaanii hai
hamaare des kii barsaat bhii kaisii suhaanii hai
havaa.o.n kaa vo chal-chal kar kalii dil kii khilaa denaa
vo Guncho.n kaa masarrat se uchhal kar muskuraa denaa
vo patto.n kaa KHushii se jhuum kar taalii bajaa denaa
vo manzar ik nayaa baarish kii aamad kaa dikhaa denaa
vo baadal hai.n vo bijlii hai vo sabza hai vo paanii hai
hamaare des kii barsaat bhii kaisii suhaanii hai
vo nannhii-nannhii buu.ndo.n kaa vo halkii phuvaar kaa aanaa
vo garmii kii tapish me.n sardiyo.n kaa lutf dikhlaanaa
vo koyal kaa chaman me.n kuuknaa qumrii kaa itraanaa
vo moro.n kaa thiraknaa aur papiiho.n kaa vo pii gaanaa
Garaz har-har taraf aish-o-tarab hai shaadmaanii hai
hamaare des kii barsaat bhii kaisii suhaanii hai
vo gulzaaro.n me.n jhuule vo suhaane dil-fazaa gaane
KHushii ke chahchahe vo qahqahe sakhiyo.n ke mastaane
vo pakvaano.n kii lazzat vo maze ke chaTpaTe khaane
vo yaaro.n dosto.n kii shoKHiyaa.n ulfat ke afsaane
vo chuhle.n yaad bhii jin kii suruur-e-zindagaanii hai
hamaare des kii barsaat bhii kaisii suhaanii hai
vo dariyaa.o.n ke tuufaan aur vo shorish aabshaaro.n kii
suhaane giit chashmo.n ke vo KHushbuu sabza-zaaro.n kii
harii maKHmal kii pyaarii vardiyaa.n vo kohsaaro.n kii
ye manzar dekh kar vo chashmake.n phir chaa.nd taaro.n kii
muqaabil jin ke aakar kahkashaa.n ne haar maanii hai
hamaare des kii barsaat bhii kaisii suhaanii hai
KHudaa vo din kare aise bhii din is des ke aa.e.n
vatan ke rahne vaale ek dil aapas me.n ho jaa.e.n
mohabbat kaa vo ban kar abr saare des par chhaa.e.n
mohabbat hii ke motii ban ke har jaanib baras jaa.e.n
kahe.n phir mil ke ham allaah kii ye mehrbaanii hai
hamaare des kii barsaat bhii kaisii suhaanii hai
mazaa ho mehr aur ulfat kaa baadal har taraf chhaa.e
mazaa jab ho mohabbat hii kaa naGma kaan me.n aa.e
fasaado.n aur jhag.Do.n kaa ye dukh har qalb se jaa.e
mazaa jab ho ki har chhoTaa-ba.Daa ye sher dohraa.e
bas apnaa kaam ab 'nayyar' vatan kii paasbaanii hai
hamaare des kii barsaat bhii kaisii suhaanii hai

SEARCH RESULTS

Nazm MATCHES FOR "gair-mohazzab"

Nazm

Shamim Alvi

Nazm

Mohammad Tanviruzzaman

Nazm

Mohammad Salim

Nazm

Ghulam Mohammad Qasir

Nazm

Ghulam Mohammad Qasir

Nazm

Ghulam Mohammad Qasir

Nazm

Qazi Ghulam Mohammad

Nazm

Qazi Ghulam Mohammad

Nazm

Mohammad Haneef Rame

Nazm

Mohammad Anvar Khalid

Nazm

Ali Mohammad Farshi

Nazm

Mohammad Haneef Rame

Nazm

Mohammad Haneef Rame

Nazm

Mohammad Anvar Khalid

Nazm

Mohammad Anvar Khalid

Nazm

Mohammad Anvar Khalid

Nazm

Mohammad Anvar Khalid

Nazm

Muhammad Ijaz Ul Haq

Nazm

Mohammad Shafiuddin Nayyar

Nazm

Mohammad Shafiuddin Nayyar

Rekhta Foundation

Rekhta Dictionary

Sufinama

Hindwi

Rekhta Learning

Rekhta Books