Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "panah-gaah"

Nazm MATCHES FOR "panah-gaah"

Nazm

panah-gah

chii.D ke sard taaza labo.n se nikaltii hu.ii
baa.nsurii kii sadaa
anginat surKH chi.Diyo.n kaa ye qaafila
ghaas kii pattiyo.n kii ridaa
KHushk ThanDii havaa
gho.nsla gho.nsla
narm dhartii sadaa
jhilmilaatii guphaa
tez jaltii hu.ii dhuup se bach sako
to idhar aa raho

Khatir Hafizi
Nazm

ye kaghaz ki

ye kaaGaz kii diivaare.n
na merii panaah-gaah hai.n
na tumhaarii haafiza

Ghayas Mateen
Nazm

bahta pani

ek zarb-e-musalsal
numuudaar ho jaa
magar hai kahaa.n jo
numuudaar ho ab
ki ham is se aarii hu.e
ye bhulaavaa
panah-gaah-e-iKHfaa kaa kotaah-daaman ga.Dhaa
kitnaa paayaab thaa
jab vo miTTii nam-aaluud ab tak
vo uftaad-gaah
ilm daar kii
mai.n ne pahchaan lii
kaise pahchaan lii
garm chhuune me.n ab tak vo sach

Shafiq Fatima Shera
Nazm

parinda lauT kar nahin aata

parinda
sub.h se shaam tak
bhaTaktaa hai
shaam Dhaltii hai to
apnii panaah-gaah me.n lauT aataa hai
magar apne panjo.n me.n aTke KHvaab
ja.ngalo.n bayaabaano.n
vaadiyo.n aur maidaano.n ko sau.np aataa hai
KHvaab raat bhar idhar-udhar bhaTakte hai.n
magar aa.nkho.n kii khi.Dkiyaa.n un par nahii.n khultii
KHvaab phuuT phuuT kar rote hai.n
parinde ko bulaate hai.n
magar parinda lauT kar nahii.n aataa
magar parinda lauT kar nahii.n aataa

Najma Mansoor
Nazm

panah

fazaa me.n mu.allaq
ye shaaKHe.n hai.n
yaa ja.De.n hai.n
us buu.Dhe bargad kii
jis pe zamiin ta.ng ho ga.ii hai
hamaarii tarah
jis ko vaqt ne be-vaqt kiyaa hai
zamiin ek had tak panaah-gaah hotii hai
aasmaan kii panaah kii had ko.ii nahii.n
ye shaaKHe.n jo duusraa ruup hai.n ja.Do.n kaa
zamiin se palaT kar aasmaan kii khetii me.n ugne ko be-taab hai.n
aasmaan aur zamiin ke darmiyaan
bando.n ke azhdahaam me.n
kaun hai?
jo bargad kii aaGosh vaa kiye
merii raah dekhtaa hai

Mahmooda Ghaziya
Nazm

KHud-kushi ki ek KHabar paDh kar

zindagii talKHiyo.n se bharaa ek zindaa.n sahii
maut se to bahar-haal behtar hii hai
maut me.n kyaa dharaa hai bhalaa
ek be-rang sii KHaamushii ke sivaa
zindagii rang hai
har gha.Dii ik na.e se nayaa us kaa aahang hai
zindagii yaas-parvar umiido.n ke saa.e tale
nit na.e tajrabo.n kii panah-gaah hai
Dhalte saa.e ho.n yaa phailtii dhuup ho
aasmaa.n se barastii hu.ii baarisho.n
KHushbu.o.n me.n base phuul par to kisii kaa ijaara nahii.n
sub.h ko chahchahaate parinde kahii.n
aur zartaar jaisii sunahrii kiran
shaam kaa sahar-guu.n jhuTpuTaa
raat kii raaz-daarii me.n Duubii hu.ii tiirgii
zindagii kii vo arzaa.n 'inaayaat hai.n
jo ki an-mol hai.n

Ashkar Farooqui
Nazm

wo hatif ki zaban mein kalam karne lagi

ek shaam
us ne mujhe apnii panaah-gaah se baahar nikaalaa
aur apne sarsabz baazu.o.n ke shahtuut se
kashtii tayyaar kii
kashtii jis ne sab se pahle
duusraa kinaaraa iijaad kiyaa thaa
aasmaan par chaa.nd
aadhii masaafat tai kar chukaa
to vo mujhe apnii na.ii kashtii me.n biThaa kar
samundar kii tah me.n utarne lagii
jahaa.n us ne
apne KHvaab chhupaa rakkhe the

Jawaz Jafri
Nazm

bharose ka qatl

maz.hab kii talvaar banaa kar
KHvaahisho.n ke andhe gho.De par savaar
mere man aa.ngan ko rau.nd Daalaa
mere bharose ko suulii par Taa.ng kar
tum ne duusraa byaah rachaa liyaa
tumhaare sang guzaare pal pal ko
mai.n ne apne maas par khaal kii tarah mundh liyaa thaa
tumhaare saath aa.nchal baa.ndh kar
baabaa kaa aa.ngan paar kar ke
tumhaare laa.e saa.nche me.n
mai.n ne paayaa thaa apnaa vajuud
pyaar kyaa hai ye nahii.n jaantii
par tumhaare ghar ne ba.D ke pe.D sii chhaa.nv kii thii mujh par
bachaayaa thaa zamaane ke gunaaho.n ke
tiiro.n kii bauchha.D se
is saa.nche me.n rahne kii KHaatir
mai.n apne vajuud ko kaaTtii chha.nTtii taraashtii rahii
tumhaare lahuu kii buu.nd ko apne maas me.n janm diyaa
aulaad bhii ham dono.n kaa bandhan na ban sakii
bandhan kyaa hai ye nahii.n jaantii
mujhe faqat ek sabaq pa.Dhaayaa gayaa thaa
tumhaaraa ghar merii aaKHirii panaah-gaah hai
mai.n ne ka.ii baar dekhaa hai
zamaane kii nigaaho.n se sa.ngsaar hote
talaaq-yaafta aurat ko
is liye baarish se Darii billii kii tarah
ghar ke ek kone aur tumhaare naam ke istiima.al par
qanaa.at kiye baiThii rahii
jannat kyaa hai jahannam kyaa hai ye nahii.n jaantii
magar itnaa yaqiin hai
jannat bharose se baalaa-tar nahii.n
aur jahannam saut ke qahqaho.n se ba.Dh kar giraa.n nahii.n
taano.n aur rahm bharii nazro.n se ba.Dh kar mushkil
ko.ii pul-siraat nahii.n
kabhii kabhii sot kaa chehra mujhe apnaa jaisaa lagtaa hai
us kii peshaanii par bhii
mai.n ne be-e'tibaarii kii shikne.n dekhii hai.n
jab vo mujhe dekhtii hai
KHushii us ke siine me.n
haatho.n me.n dabaa.e kabuutar kii tarah pha.D pha.Daa uThtii hai
mai.n un se la.D nahii.n saktii
un me.n tum shaamil ho
mai.n tum se la.D nahii.n saktii
maz.hab qaanuun aur samaaj tumhaare saath hai.n
riite.n rasme.n tumhaare hathiyaar hai.n
dil chaahtaa hai ki zindagii kii kitaab se
vo baab hii phaa.D kar phe.nk duu.n
jo apne mafaad me.n tum ne
mere muqaddar me.n likkhaa hai

Ateeya Daud
Nazm

waris

vo abnormal nahii.n thaa
sirf us ko normal ban.ne kii hasrat thii
ka.ii KHaano.n me.n us kii zindagii baTne lagii thii
vo apnii koshish-e-naa-mo'tabar se ta.ng aa kar
niim-jaa.n ho kar
ek KHaane me.n panah lene lagaa thaa
banii aamaat-gaah-e-tiir-e-nafrat shaKHsiyat us kii
use bhii KHud se nafrat ho chukii thii
magar is nafrat-e-maanuus kii takraar se us ne
durusht o naa-muvaafiq zindagii se sulh kar lii thii
yahii thaa kiisa-e-aKHlaaq us kaa
Gariibii ne sharaafat chhiin lii thii
aur us kii shaKHsiyat ke pairahan me.n
guhar-baaro.n ke badle sa.ng-reze ja.D diye the
vo abnormal nahii.n thaa
magar ab us me.n KHud ko normal karne kaa yaaraa bhii nahii.n thaa
use ab ye gavaaraa bhii nahii.n thaa
galii-kuucho.n kii saarii gandagii kaa
tiirgii kaa
vo ab haqdaar vaaris ban chukaa thaa

Akbar Hyderabadi
Nazm

rustagari

zaKHm phir hare hu.e
phir lahuu ta.Dap ta.Dap uThaa
andhe raasto.n pe be-takaan u.Daan ke liye
band aa.nkh kii bahisht me.n
sab dariiche sab kivaa.D khul ga.e
aur phir
apnii KHalq kii hu.ii basiit kaa.enaat me.n
dhund ban ke phailtaa simaTtaa jaa rahaa huu.n mai.n
KHudaa-e-lam-yazal ke saa.ns kii tarah
mere aage aage ik hujuum hai
jis ko jo bhii naam de diyaa vo ho gayaa
mere vaaste se sab ke silsile
ba.ndhe hu.e hai.n sab kii maut zindagii
mere vaaste se hai
zamiin o aasmaa.n ke biich
jis ko bhii panaah na mil sake
vo aa.e mere saath saath
muntazir hai aaj bhii
fazaa jo lafz lafz par muhiit hai
amiiq aur basiit hai

Qazi Saleem
Nazm

kya KHabar thi

kyaa KHabar thii riyaasat-e-islaam
mujrmo.n kii panaah bhii hogii
kyaa KHabar thii ye adl kii jaagiir
rahm kii qatl-gaah bhii hogii
paa.e.nge dushmanaan-e-dii.n e.azaaz
qaatilo.n kii rifaah bhii hogii
zulm ke haath me.n asaa hogaa
aur sar par kulaah bhii hogii
jahl paa.egaa ilm par sabqat
aur KHirad gard-e-raah bhii hogii
a.alaa ohdo.n pe ho.nge sab naa-ahl
tang-nazarii athaah bhii hogii
ghaat me.n hogii fauj apnii bhii
dushmano.n kii sipaah bhii hogii
baadshah ke jo giit gaa.e.nge
un kii jaanib nigaah bhii hogii
jo likhegaa qasiida-e-shaahii
us ko taa.iid-e-shaah bhii hogii
jurm ho jaa.egaa bahut arzaa.n
ishtihaa-e-gunaah bhii hogii
sirf Gaddaar paa.e.nge tamGe
un kii hii izz-o-jaah bhii hogii
log har zulm par rahe.nge chup
is tarah se nibaah bhii hogii
qaum ta.Dpegii daad le.nge vaziir
aah bhii hogii vaah bhii hogii
phir giraanii kaa aa.egaa tuufaan
muflisii be-panaah bhii hogii
khul ke hogii zaKHiira-andozii
aur safed-o-siyaah bhii hogii
to.De.nge kamar avaam kii tex
aur ma.iishat tabaah bhii hogii
Gam kii parchhaa.iyo.n se arz-e-vatan
kyaa KHabar thii siyaah bhii hogii
aur vo vaqt phir se aa.egaa
jab taraqqii kii chaah bhii hogii
log maa.nge.nge ik na.ii hijrat
chal pa.De.nge to raah bhii hogii

Muhammad Rashid Athar
Nazm

shahr ki galiyan charaghon se bhar gain

vo papers ke ja.ngalo.n ke shumaalii kinaare pe baiThii
niil ke paaniyo.n ko kaat rahii thii
us ne mere KHaak-aaluud chehre ko
niil kaa aa.iina dikhaayaa
ham mutabarrik tel ke namkiin charaaG hatheliyo.n pe rakhe
shahr-e-panaah kii taraf chal diye
jahaa.n devtaa
baaryaabii ke muntazir the
hamaare qadmo.n kii aahaT paa kar
muqaddas phaaTak ke sunahre kivaa.D
zamiin ke aaKHirii kinaaro.n tak khul ga.e
aur shahar kii itr-bez galiyaa.n
hamaare talve chuumne lagii.n

Jawaz Jafri
Nazm

gandhi

shahiido.n kaa sartaaj jannat-maqaam
mohabbat kii me.araaj zii-ehtiraam
Gulaamaan-e-aalam kii pusht-o-panaah
ahinsaa ke bando.n kii ummiid-gaah
vo Gam bhii vatan kaa thaa Gam-KHvaar bhii
razaakaar bhii aur saalaar bhii
ahinsaa kaa pairav magar sher-e-mard
mohabbat me.n yaktaa sadaaqat me.n fard
hu.aa jis ke dam se ba-sad ehtishaam
siyaasat se uu.nchaa sadaaqat kaa naam
vo aadam kii azmat kaa aa.iina-daar
vo zarra ki chamkaa thaa KHurshiid-daar
vo jis ne diyaa aadamiyat ko auj
vo jis ne la.Daa.ii ahinsaa kii fauj
qafas hai ko.ii ab na sayyaad hai
vatan jis kii hikmat se aazaad hai
vo nuur-e-ziyaa-baar siimaa-e-KHair
vo juuyaa-e-KHair-o-shanaasaa-e-KHair
farishta-KHisaal-o-farishta-siyar
malak dar-haqiiqat ba-zaahir bashar
mohabbat kii vo ik shabiih-e-hasii.n
uKHuvvat kaa vo ek maah-e-mubii.n
vo haq aagahii kii kachhaaro.n kaa sher
sadaaqat ke maidaa.n kaa mard-e-diler
falak-aafrii.n aur garduu.n-taraaz
mariizaan-e-pastii kaa vo chaarasaaz
vo kotaah-biino.n kii sham-e-shu.uur
vo gumraahiyo.n me.n hidaayat kaa nuur
vo jis ne uThaayaa zamaane kaa baar
kiyaa jis ne jaabir ko be-iKHtiyaar
vo be-misl qaa.id mu.assar KHatiib
vo lashkar me.n jis ke amiir-o-Gariib
vo jis ne karo.Do.n ke kaaTe hai.n band
vo arfa.a vo a.alaa vo sab se buland
vo jis kii ataa hai niraalii ataa
vo jis ne diyaa ik nayaa falsafa
zamii.n par bahaa us jarii kaa lahuu
tafuubar tuu ai charKH-e-gardaa.n tafuu

Arsh Malsiyani
Nazm

wadi-e-pinhan

vaqt ke dariyaa me.n uTThii thii abhii pahlii hii lahr
chand insaano.n ne lii ik vaadi-e-pinhaa.n kii raah
mil ga.ii un ko vahaa.n
aaGosh-e-raahat me.n panaah
kar liyaa ta.amiir ik mausiiqii o ishrat kaa shahr
mashriq-o-maGrib ke paar
zindagii aur maut kii farsuuda shah-raaho.n se duur
jis jagah se aasmaa.n kaa qaafila letaa hai nuur
jis jagah har sub.h ko miltaa hai iima-e-zuhuur
aur bune jaate hai.n raato.n ke liye KHvaab ke jaal
siikhtii hai jis jagah parvaaz huur
aur farishto.n ko jahaa.n maltaa hai aaha.ng-e-suruur
Gam-nasiib ahriimano.n ko girya-e-aah-o-fuGaa.n

Noon Meem Rashid
Nazm

naya makan

chalo makaa.n kii musiibat se bhii najaat milii
ye KHvaab-gah, ye kitchen, Gusl-KHaane aur baiThak
mai.n sochtaa huu.n mujhe sochne ko baat milii
hu.ii hai.n sirf mashaqqat kii koshishe.n an-thak
nazar-rubaa dar-o-diivaar ke banaane me.n
ye qumqume ye tamaddun kii iKHtiraa-e-jadiid
ba.Dhii zalaalat-e-idraak tiirgii na miTii
ye sii.Dhiyaa.n hai.n nigaaho.n ke pech kii maz.har
hayaat kii ko.ii pechiidgii na duur hu.ii
magar mai.n mahv huu.n idbaar ke miTaane me.n
ye sii.Dhiyaa.n hai.n jo in par se gir pa.De ko.ii
barii gha.Dii na KHudaa laa.e jaane kab aa jaa.e
ye chiknaa farsh ise dekhtaa rahe ko.ii
jo kal ko paa.nv tumhaaraa kahii.n phisal jaa.e
KHudaa karam kare meraa to dam nikal jaa.e
mai.n sochtaa huu.n mujhe soch kaa junuu.n jo hu.aa
ye mere zehn kaa maahaul pur-fusuu.n jo hu.aa
ye meraa zehn mujhe le chalaa hai duur kahii.n
vahaa.n jahaa.n kabhii pahle bhii thaa makaa.n apnaa
falak ke saa.e me.n ham the kabhii panaah-guzii.n
ye farsh-e-KHaak thaa qaaliin-e-zar-fashaa.n apnaa
ye mahr o maah ye taare the apne ghar ke diye
gul-o-gayaa se hai labrez pur-bahaar zamii.n
jilau me.n husn liye daavat-e-nazar ke liye
kabhii hamaare liye thii nashist-gaah-e-hasii.n
ye zulf pech se begaana mauj-e-sahbaa thii
ki jis kaa barso.n mirii u.ngliyaa.n rahii.n shaanaa
ye terii hamdamii ik kaifiyat thii nashsha bhii
jahaa.n bhii chaahnaa fauran vahii.n chale jaanaa
vo sub.h saahil-e-dariyaa vo shaam zer-e-chiinaar
guzar ga.ii vo masarrat kii sub.h-o-shaam apnii
hamaare dosh pe jab thaa na jabr-o-qadr kaa baar
chalo chalo ye hikaayat hai talKH-kaam apnii
uTho uTho dar-o-diivaar ko sajaanaa hai
makaa.n ko ghahno.n-ladii ik dulhan banaanaa hai

Makhmoor Jalandhari
Nazm

talab hai daryuza-gar

mai.n apnii ruuh-e-azaab-gar se ye kah rahaa thaa
ki ruuh kii pyaas aur badan kii talab me.n
ek rabt-e-baahamii hai
na ruuh sarshaar hai na taabindagii-e-tan hai
ye reza reza jo rizq pahu.nchaa hai taar-o-puu kaa
sarishta-e-naa-tavaa.n hai arz-e-hunar ke daamaan-e-be-rafuu kaa
ye luqma-e-KHushk-o-halq-farsaa
kabhii to lazzat-e-shi.aar-e-kaam-o-dahan bhii hotaa
fasiil-e-tan maavaraa-e-pas-KHurdgii bhii hotii
mai.n dast-e-kotaah-giir daulat se puuchhtaa huu.n
ki umr bhar tuu ne kaaGzii pairahan siye kyuu.n
zabaan-e-aaluuda-kaar ko sii ke baiTh jaataa
tuu saKHt-kosh azaab-e-suud-o-ziyaa.n na sahtii
ye lamhe aasaar-e-baaqiya hai.n
ki jin me.n saa.nse.n bhii ghaT rahii hai.n
talab hai daryuuza-gar ki us ne
shikast dil kii panaah Dhuu.nDii
qalam chalaa hai to raushnaa.ii ke ashk Tapkaa
na lauh-e-dil par
hariif ko apne saath maqtal kii dhuup me.n laa
savaad-e-mahruumii-e-bashar to nahii.n
guzar-gaah-e-naa-muraadii
pahaa.D kaaTe hai.n jur.ato.n ne
KHaraaba-e-zehn par tamaazat Guruur kii hai
saman-barii saaya-gustarii hai
usii ko zahraab-e-aagahii de
usii se ta.amiir aashiyaa.n kar

Qamar Hashmi
Nazm

mini-bus ka safar

conveyance kuchh bhii jab nazar aayaa na daa.e.n baa.e.n
sochaa ki aaj ham bhii mini-bus me.n baiTh jaa.e.n
jaanaa thaa laaluu-khet cha.Dhe the sadr se ham
ruKHsat hu.e the sar-ba-kafan apne ghar se ham
har raah bus kii shahr-e-KHamoshaa.n kii raah thii
har seat bus kii aaKHirii aaraam-gaah thii
raqqaas-e-KHush-adaa kii tarah hil rahii thii bus
naa-aashnaa Truck se gale mil rahii thii bus
footpath se bhii haath milaatii hu.ii chalii
Thumka qadam qadam pe lagaatii hu.ii chalii
purza har ek maz.har-e-cha.ng-o-raubaab thaa
is bus kaa ittifaaq se bho.npuu KHaraab thaa
Dhiilii kamaaniyo.n me.n tarannum balaa kaa thaa
dekhaa utar ke bus se to jho.nkaa havaa kaa thaa
gaane me.n Thiik-Thaak the chalne me.n weak the
is mahfil-e-samaa.a me.n pahiye shariik the
naazuk samaa.ato.n pe sitam Dhaa rahii thii bus
ulTe suro.n me.n ko.ii Gazal gaa rahii thii bus
ho to ga.e the bus me.n musaafir sab adjust
Dar thaa ki ho na jaa.e kahii.n tyro.n me.n burst
bus me.n siku.D ke thaan se chit ho ga.e the ham
purze the aur machine me.n fiT ho ga.e the ham
jo kuchh bhii mil rahaa thaa liye jaa rahe the ham
dhakko.n kii ge.nd catch kiye jaa rahe the ham
majbuur ho ga.e the jamiil o hasiin log
murGaa bane hu.e the mu.azziz-tariin log
bus me.n misaal-e-shaaKH-e-samar jhuk ga.e the log
KHuddaar o sar-buland the par jhuk ga.e the log
kuchh shauqiya the kuchh ba-iraada jhuke hu.e
azmat-miyaa.n the sab se zyaada jhuke hu.e
aazaad tab.a vaaqif-e-garaje hii na thii
signal kii battiyo.n kii to muhtaaj hii na thii
stop se chalii to rukii ik dukaan me.n
aaKHir use panaah milii saa.ebaan me.n
vo log chal diye jo sar-e-rahguzar na the
''manzil unhe.n milii jo shariik-e-safar na the''

Khalid Irfan
Nazm

hinDola

dayaar-e-hind thaa gahvaara yaad hai hamdam
bahut zamaana hu.aa kis ke kis ke bachpan kaa
isii zamiin pe khelaa hai 'raam' kaa bachpan
isii zamiin pe un nanhe nanhe haatho.n ne
kisii samay me.n dhanush-baan ko sambhaalaa thaa
isii dayaar ne dekhii hai 'krishn' kii liilaa
yahii.n gharo.ndo.n me.n siitaa sulochanaa raadhaa
kisii zamaane me.n gu.Diyo.n se kheltii ho.ngii
yahii zamii.n yahii dariyaa pahaa.D jangal baaG
yahii havaa.e.n yahii sub.h-o-shaam suuraj chaa.nd
yahii ghaTaa.e.n yahii barq-o-ra.ad o qaus-e-quzah
yahii.n ke giit rivaayaat mausamo.n ke juluus
hu.aa zamaana ki 'siddhaarth' ke the gahvaare
inhii nazaaro.n me.n bachpan kaTaa thaa 'vikram' kaa
sunaa hai 'bhartarharii' bhii inhii.n se khelaa thaa
'bharat' agastya' 'kapil' 'vyaas' 'pashii' 'kautilya'
'janak' vashishth' 'manu' 'vaalmik' vishvaamitr
'kanaad' 'gautam' o ramanuj 'kumaaril-bhatt'
mohanjoDaaro ha.Dappaa ke aur ajantaa ke
banaane vaale yahii.n ballamo.n se khele the
isii hi.nDole me.n 'bhavabhut' o 'kaaliidaas' kabhii
humak humak ke jo tutlaa ke gungunaa.e the
sarasvatii ne zabaano.n ko un kii chuumaa thaa
yahii.n ke chaa.nd va suuraj khilaune the un ke
inhii.n fazaa.o.n me.n bachpan palaa thaa 'KHusrav' kaa
isii zamii.n se uThe 'tansen' aur 'akbar'
'rahiim' 'nanak' o 'chaitanya' aur 'chishti' ne
inhii.n fazaa.o.n me.n bachpan ke din guzaare the
isii zamii.n pe kabhii shazaada-e-'KHurram'
zaraa sii dil-shikanii par jo ro diyaa hogaa
bhar aayaa thaa dil-e-naazuk to kyaa ajab is me.n
in aa.nsu.o.n me.n jhalak taaj kii bhii dekhii ho
'ahalyabaa.i' 'daman' 'padmini' o 'raziya' ne
yahii.n ke pe.Do.n kii shaaKHo.n me.n Daale the jhuule
isii fazaa me.n ba.Dhaa.ii thii pe.ng bachpan kii
inhii nazaaro.n me.n saavan ke giit gaa.e the
isii zamiin pe ghuTno.n ke bal chale ho.nge
'malik-mohammad' o 'raskhan' aur 'tulsi-das'
inhii.n fazaa.o.n me.n guu.njii thii totlii bolii
'kabir-das' 'Tukaaraam' 'suur' o 'miiraa' kii
isii hi.nDole me.n 'viddypati' kaa ka.nTh khulaa
isii zamiin ke the laal 'miir' o 'Gaalib' bhii
Thumak Thumak ke chale the gharo.n ke aa.ngan me.n
'aniis' o 'haalii' o 'iqbaal' aur 'vaaris-shaah'
yahii.n kii KHaak se ubhre the 'premchand' o 'tagore'
yahii.n se uTThe the tahziib-e-hind ke me.amaar
isii zamiin ne dekhaa thaa baal-pan in kaa
yahii.n dikhaa.ii thii.n in sab ne baal-liilaa.e.n
yahii.n har ek ke bachpan ne tarbiyat paa.ii
yahii.n har ek ke jiivan kaa baalkaa.nD khulaa
yahii.n se uThte baguulo.n ke saath dau.De hai.n
yahii.n kii mast ghaTaa.o.n ke saath jhuume hai.n
yahii.n kii madh-bharii barsaat me.n nahaa.e hai.n
lipaT ke kiicha.D o paanii se bachpane un ke
isii zamiin se uTThe vo desh ke saava.nt
u.Daa diyaa thaa jinhe.n company ne topo.n se
isii zamiin se uThii hai.n an-ginat nasle.n
pale hai.n hind hi.nDole me.n an-ginat bachche
mujh aise kitne hii gumnaam bachche khele hai.n
isii zamii.n se isii me.n supurd-e-KHaak hu.e
zamiin-e-hind ab aaraam-gaah hai un kii
is arz-e-paak se uTThii.n bahut sii tahziibe.n
yahii.n tuluu hu.ii.n aur yahii.n Guruub hu.ii.n
isii zamiin se ubhre ka.ii uluum-o-funuun
faraaz-e-koh-e-himaala ye daur-e-ga.ng-o-jaman
aur in kii god me.n parvarda kaarvaano.n ne
yahii.n rumuuz-e-KHiraam-e-sukuu.n-numaa siikhe
nasiim-e-sub.h-e-tamaddun ne bhairvii.n chhe.Dii
yahii.n vatan ke taraano.n kii vo pave.n phuuTe.n
vo be-qaraar sukuu.n-zaa tarannum-e-saharii
vo kapkapaate hu.e soz-o-saaz ke sho.ale
inhii fazaa.o.n me.n a.ng.Daa.iyaa.n jo le ke uThe
lavo.n se jin ke charaaGaa.n hu.ii thii bazm-e-hayaat
jinho.n ne hind kii tahziib ko zamaana hu.aa
bahut se zaaviyo.n se aa.iina dikhaayaa thaa
isii zamii.n pe Dhalii hai mirii hayaat kii shaam
isii zamiin pe vo sub.h muskuraa.ii hai
tamaam sho.ala o shabnam mirii hayaat kii sub.h
sunaa.uu.n aaj kahaanii mai.n apne bachpan kii
dil-o-dimaaG kii kaliyaa.n abhii na chaTkii thii.n
hamesha kheltaa rahtaa thaa bhaa.ii bahno.n me.n
hamaare saath mohalle kii la.Dkiyaa.n la.Dke
machaa.e rakhte the baalak udham har ek gha.Dii
lahuu tara.ng uchhal-phaa.nd kaa ye aalam thaa
mohalla sar pe uThaa.e phire jidhar guzre
hamaare chahchahe aur shor guu.njte rahte
chahaar-samt mohalle ke goshe goshe me.n
fazaa me.n aaj bhii laa-raib guu.njte ho.nge
agarche duusre bachcho.n kii tarah thaa mai.n bhii
ba-zaahir auro.n ke bachpan saa thaa miraa bachpan
ye sab sahii mire bachpan kii shaKHsiyat bhii thii ek
vo shaKHsiyat ki bahut shoKH jis ke the KHad-o-KHaal
adaa adaa me.n ko.ii shaan-e-infiraadii thii
Garaz kuchh aur hii lachchhan the mere bachpan ke
mujhe thaa chhoTe ba.Do.n se bahut shadiid lagaav
har ek par mai.n chhi.Daktaa thaa apnii nannhii sii jaa.n
dil umDaa aataa thaa aisaa ki jii ye chaahtaa thaa
uThaa ke rakh luu.n kaleje me.n apnii duniyaa ko
mujhe hai yaad abhii tak ki khel-kuud me.n bhii
kuchh aise vaqfe pur-asraar aa hii jaate the
ki jin me.n sochne lagtaa thaa kuchh miraa bachpan
ka.ii ma.aanii-e-be-lafz chhuune lagte the
butuun-e-Gaib se mere shu.uur-e-asGar ko
har ek manzar-e-maanuus ghar kaa har gosha
kisii tarah kii ho ghar me.n sajii hu.ii har chiiz
mire mohalle kii galiyaa.n makaa.n dar-o-diivaar
chabuutre ku.e.n kuchh pe.D jhaa.Diyaa.n bele.n
vo pherii vaale ka.ii un ke bhaa.nt bhaa.nt ke bol
vo jaane buujhe manaazir vo aasmaa.n o zamii.n
badalte vaqt kaa aa.iina garmii-o-KHunkii
Guruub-e-mahr me.n ra.ngo.n kaa jaagtaa jaaduu
shafaq ke shiish-mahal me.n gudaaz-e-pinhaa.n se
javaahro.n kii chaTaane.n sii kuchh pighaltii hu.ii.n
shajar hajar kii vo kuchh sochtii hu.ii duniyaa
suhaanii raat kii maanuus ramaziyat kaa fusuu.n
alassabaah ufuq kii vo thartharaatii bhave.n
kisii kaa jhaa.nknaa aahista phuuTtii pau se
vo dopahar kaa samay darja-e-tapish kaa cha.Dhaav
thakii thakii sii fazaa me.n vo zindagii kaa utaar
hu.aa kii bansiyaa.n ba.nsvaa.Diyo.n me.n bajtii hu.ii.n
vo din ke ba.Dhte hu.e saa.e sah-pahar kaa sukuu.n
sukuut shaam kaa jab dono.n vaqt milte hai.n
Garaz jhalakte hu.e sarsarii manaazir par
mujhe gumaan paristaaniyat kaa hotaa thaa
har ek chiiz kii vo KHvaab-naak asliyyat
mire shu.uur kii chilman se jhaa.nktaa thaa ko.ii
liye rubuubiyat-e-kaa.enaat kaa ehsaas
har ek jalve me.n Gaib o shuhuud kaa vo milaap
har ik nazaara ik aa.iina-KHaana-e-hairat
har ek manzar-e-maanuus ek hairat-zaar
kahii.n rahuu.n kahii.n khelo.n kahii.n pa.Dhuu.n likhuu.n
mire shu.uur pe ma.nDlaate the manaazir-e-dahr
mai.n akasr un ke tasavvur me.n Duub jaataa thaa
vafuur-e-jazba se ho jaatii thii mizha pur-nam
mujhe yaqiin hai in unsurii manaazir se
ki aam bachcho.n se letaa thaa mai.n ziyaada asar
kisii samay mirii tiflii rahii na be-parvaa
na chhuu sakii mirii tiflii ko Gaflat-e-tiflii
ye khel-kuud ke lamho.n me.n hotaa thaa ehsaas
du.aa.e.n detaa ho jaise mujhe sukuut-e-davaam
ki jaise haath abad rakh de dosh-e-tiflii par
har ek lamha ke raKHno.n se jhaa.nktii sadiyaa.n
kahaaniyaa.n jo sunuu.n un me.n Duub jaataa thaa
ki aadmii ke liye aadmii kii jag-biitii
se ba.Dh ke kaun sii shai aur ho hii saktii hai
inhii fasaano.n me.n pinhaa.n the zindagii ke rumuuz
inhii fasaano.n me.n khulte the raaz-haa-e-hayaat
unhe.n fasaano.n me.n miltii thii.n ziist kii qadre.n
rumuuz-e-besh-bahaa TheTh aadmiyat ke
kahaaniyaa.n thii.n ki sad-dars-gaah-e-riqqat-e-qalb
har ik kahaanii me.n shaa.istagi-e-Gam kaa sabaq
vo unsur aa.nsu.o.n kaa daastaan-e-insaa.n me.n
vo nal-daman kii kathaa sarguzasht-e-savitrii
'shakuntlaa' kii kahaanii 'bharat' kii qurbaanii
vo marg-e-bhishm-pitaamah vo sej tiiro.n kii
vo paan.cho paa.nDav kii sovarg-yaatraa kii kathaa
vatan se ruKHsat-e-'siddhaarth' 'raam' kaa ban-baas
vafaa ke baa'd bhii 'siitaa' kii vo jalaa-vatanii
vo raato.n-raat 'sirii-krishn' ko uThaa.e hu.e
balaa kii qaid se 'basdev' kaa nikal jaanaa
vo a.ndhkaar vo baarish, ba.Dhii hu.ii jamunaa
Gam-e-aafriin kahaanii vo 'hiir' 'raa.njhaa' kii
shu.uur-e-hind ke bachpan kii yaadgaar-e-aziim
ki aise vaise taKHayyul kii saa.ns ukha.D jaa.e
ka.ii muhayyur-e-idraak dev-maalaaye.n
hitopdesh ke qisse kathaa sarat-saagar
karo.Do.n siino.n me.n vo guu.njtaa hu.aa aalhaa
mai.n puuchhtaa huu.n kisii aur malak vaalo.n se
kahaaniyo.n kii ye daulat ye be-bahaa daulat
fasaane dekh lo in ke nazar bhii aatii hai
mai.n puuchhtaa huu.n ki gahvaare aur qaumo.n ke
base hu.e hai.n kahii.n aisii daastaano.n se
kahaaniyaa.n jo mai.n suntaa thaa apne bachpan me.n
mire liye vo na thii.n mahz baa.is-e-tafriih
fasaano.n se mire bachpan ne sochnaa siikhaa
fasaano.n se mujhe sanjiidgii ke dars mile
fasaano.n me.n nazar aatii thii mujh ko ye duniyaa
Gam o KHushii me.n rachii pyaar me.n basaa.ii hu.ii
fasaano.n se mire dil ne ghulaavaTe.n paa.ii.n
yahii nahii.n ki mashaahiir hii ke afsaane
zaraa sii umr me.n karte ho.n mujh ko muta.assir
mohalle Tole ke gumnaam aadamiyyo.n ke
kuchh aise sun.ne me.n aate the vaaqi.aat-e-hayaat
jo.n yuu.n to hote the farsuuda aur ma.amuulii
magar the aa.iine iKHlaas aur sharaafat ke
ye chand aa.ii ga.ii baate.n aisii baate.n thii.n
ki jin kii oT chamaktaa thaa dard-e-insaanii
ye vaardaat nahii.n razmiyye hayaat ke the
Garaz ki ye hai.n mire bachpane kii tasviire.n
nadiim aur bhii kuchh KHatt-o-KHaal hai.n un ke
ye merii maa.n kaa hai kahnaa ki jab mai.n bachcha thaa
mai.n aise aadmii kii god me.n na jaataa thaa
jo bad-qimaar ho aibii ho yaa ho bad-suurat
mujhe bhii yaad hai nau das baras hii kaa mai.n thaa
to mujh pe kartaa thaa jaaduu saa husn-e-insaanii
kuchh aisaa hotaa thaa mahsuus jab mai.n dekhtaa thaa
shagufta rang tar-o-taaza ruup vaalo.n kaa
ki un kii aa.nch mirii haDDiyaa.n galaa degii
ik aazmaa.ish-e-jaa.n thii ki thaa shu.uur-e-jamaal
aur us kii nashtariyyat us kii ustuKHaa.n-sozii
Gam o nashaat lagaavaT mohabbat o nafrat
ik intishaar-e-sakuu.n iztiraab pyaar itaab
vo be-panaah zakii-ul-hisii vo hilm o Guruur
kabhii kabhii vo bhare ghar me.n hiss-e-tanhaa.ii
vo vahshate.n mirii maahaul-e-KHush-gavaar me.n bhii
mirii sarisht me.n ziddain ke ka.ii jo.De
shuruu.a hii se the maujuud aab-o-taab ke saath
mire mizaaj me.n pinhaa.n thii ek jadaliyyat
rago.n me.n chhuuTte rahte the be-shumaar anaar
nadiim ye hai.n mire baal-pan ke kuchh aasaar
vafuur o shiddat-e-jazbaat kaa ye aalam thaa
ki kau.nde jast kare.n dil ke aabgiine me.n
vo bachpanaa jise bardaasht apnii mushkil ho
vo bachpanaa jo KHud apnii hii tevriyaa.n sii cha.Dhaa.e
nadiim zikr-e-javaanii se kaa.np jaataa huu.n
javaanii aa.ii dabe paa.nv aur yuu.n aa.ii
ki us ke aate hii big.Daa banaa-banaayaa khel
vo KHvaahishaat ke jazbaat ke umaDte hu.e
vo ho.nkte hu.e be-naam aag ke tuufaa.n
vo phuuTtaa hu.aa jvaalaa-mukhii javaanii kaa
rago.n me.n uThtii hu.ii aa.ndhiyo.n ke vo jhaTke
ki jo tavaazun-e-hastii jhi.njho.D ke rakh de.n
vo zalzale ki pahaa.Do.n ke pair ukha.D jaa.e.n
buluuGiyat kii vo Tiise.n vo karb-e-nashv-o-numaa
aur aise me.n mujhe byaahaa gayaa bhalaa kis se
jo ho na saktii thii hargiz mirii shariik-e-hayaat
ham ek duusre ke vaaste bane hii na the
siyaah ho ga.ii duniyaa mirii nigaaho.n me.n
vo jis ko kahte hai.n shaadii-e-KHaanaa-aabaadii
mire liye vo banii bevgii javaanii kii
luTaa suhaag mirii zindagii kaa maa.nDo me.n
nadiim khaa ga.ii mujh ko nazar javaanii kii
balaa-e-jaan mujhe ho gayaa shu.uur-e-jamaal
talaash-e-shola-e-ulfat se ye hu.aa haasil
ki nafrato.n kaa agan-ku.nD ban ga.ii hastii
vo halq o siina o rag rag me.n be-panaah chubhaa
nadiim jaise nigal lii ho mai.n ne naag-phanii
z ishq-zaadam o ishqam kamusht zaar-o-dareG
KHabar na burd ba-rustam kase ki sohraabam
na puuchh aalam-e-kaam-o-dahan nadiim mire
samar hayaat kaa jab raakh bin gayaa mu.nh me.n
mai.n chaltii-phirtii chitaa ban gayaa javaanii kii
mai.n kaa.ndhaa detaa rahaa apne jiite murde ko
ye sochtaa thaa ki ab kyaa karuu.n kahaa.n jaa.uu.n
bahut se aur masaa.ib bhii mujh pe TuuT pa.De
mai.n Dhuu.nDhne lagaa har samt sachchii jhuuTii panaah
talaash-e-husn me.n sher-o-adab me.n dostii me.n
ru.ndhii sadaa se mohabbat kii bhiik maa.ngii hai
na.e sire se samajhnaa pa.Daa hai duniyaa ko
ba.De jatan se sambhaalaa hai KHud ko mai.n ne nadiim
mujhe sambhalne me.n to chaaliis saal guzre hai.n
merii hayaat to vish-paan kii kathaa hai nadiim
mai.n zahr pii ke zamaane ko de sakaa amrit
na puuchh mai.n ne jo zahraaba-e-hayaat piyaa
magar huu.n dil se mai.n is ke liye sipaas-guzaar
larazte haatho.n se daaman KHuluus kaa na chhaTaa
bachaa ke rakkhii thii mai.n ne amaanat-e-tiflii
ise na chhiin sakii mujh se dast-burd-e-shabaab
ba-qaul shaa.er-e-mulk-e-fara.ng har bachcha
KHud apne ahd-e-javaanii kaa baap hotaa hai
ye kam nahii.n hai ki tiflii-e-rafta chho.D ga.ii
dil-e-hazii.n me.n ka.ii chhoTe chhoTe naqsh-e-qadam
mirii anaa kii rago.n me.n pa.De hu.e hai.n abhii
na jaane kitne bahut narm u.ngliyo.n ke nishaa.n
hanuuz vaqt ke be-dard haath kar na sake
hayaat-e-rafta kii zinda nishaaniyo.n ko fanaa
zamaana chhiin sakegaa na merii fitrat se
mirii safaa mire tahtush-shu.uur kii ismat
taKHaiyyulaat kii doshiizgii kaa radd-e-amal
javaan ho ke bhii be-laus tifl-vash jazbaat
syaanaa hone pe bhii ye jibillate.n merii
ye sarKHushii o Gam be-riyaa ye qalb-gudaaz
baGair bair ke an-ban Garaz se paak tapaak
Garaz se paak ye aa.nsuu Garaz se paak ha.nsii
ye dasht-e-dahr me.n hamdardiyo.n kaa sar-chashma
qubuuliyat kaa ye jazba ye kaa.enaat o hayaat
is arz-e-paak par iimaan ye ham-aaha.ngii
har aadmii se har ik KHvaab o ziist se ye lagaav
ye maa.n kii god kaa ehsaas sab manaazir me.n
qariib o duur zamii.n me.n ye buu-e-vataniyyat
nizaam-e-shams-o-qamar me.n payaam-e-hifz-e-hayaat
ba-chashm-e-shaam-o-sahar maamtaa kii shabnam sii
ye saaz o dil me.n mire naGma-e-analkaunain
har iztiraab me.n ruuh-e-sukuun-e-be-paayaa.n
zamaana-e-guzaraa.n me.n davaam kaa sargam
ye bazm-e-jashn-e-hayaat-o-mamaat sajtii hu.ii
kisii kii yaad kii shahnaa.iyaa.n sii bajtii hu.ii
ye ramaziiyat ke anaasir shu.uur-e-puKHta me.n
falak pe vajd me.n laatii hai jo farishto.n ko
vo shaa.erii bhii buluuG-e-mizaaj-e-tiflii hai
ye nashtariyyat-e-hastii ye is kii sheriyat
ye pattii pattii pe gulzaar-e-zindagii ke kisii
latiif nuur kii parchhaa.iyaa.n sii pa.Dtii hu.ii
baham ye hairat o maanuusiyat kii sargoshii
bashar kii zaat ki mahr-e-uluuhiyat ba-jabii.n
abad ke dil me.n ja.De.n maartaa hu.aa sabza
Gam-e-jahaa.n mujhe aa.nkhe.n dikhaa nahii.n saktaa
ki aa.nkhe.n dekhe hu.e huu.n mai.n ne apne bachpan kii
mire lahuu me.n abhii tak sunaa.ii detii hai.n
sukuut-e-huzn me.n bhii ghu.nghru.o.n kii jhankaare.n
ye aur baat ki mai.n is pe kaan de na sakuu.n
isii vadii.at-e-tiflii kaa ab sahaaraa hai
yahii hai.n marham-e-kaafuur dil ke zaKHmo.n par
unhii ko rakhnaa hai mahfuuz taa-dam-e-aaKHir
zamiin-e-hind hai gahvaara aaj bhii hamdam
agar hisaab kare.n das karo.D bachcho.n kaa
ye bachche hind kii sab se ba.Dii amaanat hai.n
har ek bachche me.n hai.n sad-jahaan-e-imkaanaat
magar vatan kaa hal-o-aqd jin ke haath me.n hai
nizaam-e-zindagii-e-hind jin ke bas me.n hai
ravayya dekh ke un kaa ye kahnaa pa.Dtaa hai
kise pa.Dii hai ki samjhe vo is amaanat ko
kise pa.Dii hai ki bachcho.n kii zindagii ko bachaa.e
KHaraab hone se Talne se suukh jaane se
bachaa.e kaun in aazurda honhaaro.n ko
vo zindagii jise ye de rahe hai.n bhaarat ko
karo.Do.n bachcho.n ke miTne kaa ik alamiyya hai
churaa.e jaate hai.n bachche abhii gharo.n se yahaa.n
ki jism to.D diye jaa.e.n un ke taaki mile
churaane vaalo.n ko KHairaat maagh-mele kii
jo is azaab se bach jaa.e.n to gale pa.D jaa.e.n
vo la.ante.n ki hamaare karo.Do.n bachcho.n kii
nadiim KHair se miTTii KHaraab ho jaa.e
vo muflisii ki KHushii chhiin le vo be-bargii
udaasiyo.n se bharii zindagii kii be-ra.ngii
vo yaasiyaat na jis ko chhu.e shu.aa-e-umiid
vo aa.nkhe.n dekhtii hai.n har taraf jo be-nuurii
vo TukTukii ki jo pathraa ke rah ga.ii ho nadiim
vo be-dilii kii ha.nsii chhiin le jo ho.nTo.n se
vo dukh ki jis se sitaaro.n kii aa.nkh bhar aa.e
vo gandagii vo kasaafat maraz-zada paikar
vo bachche chhin ga.e ho.n jin se bachpane un ke
hamii.n ne gho.nT diyaa jis ke bachpane kaa galaa
jo khaate-piite gharo.n ke hai.n bachche un ko bhii kyaa
samaaj phuulne-phalne ke de sakaa saadhan
vo saa.ns lete hai.n tahziib-kush fazaa.o.n me.n
ham un ko dete hai.n be-jaan aur Galat ta.aliim
milegaa ilm-e-jihaalat-numaa se kyaa un ko
nikal ke madraso.n aur universitiyyo.n se
ye bad-nasiib na ghar ke na ghaaT ke ho.nge
mai.n puuchhtaa huu.n ye ta.aliim hai ki makkaarii
karo.Do.n zindagiyo.n se ye be-panaah daGaa
nisaab aisaa ki mehnat kare.n agar is par
bajaa.e ilm jahaalat kaa iktisaab kare.n
ye ulTaa dars-e-adab ye sa.Dii hu.ii ta.aliim
dimaaG kii ho Gizaa yaa Gizaa-e-jismaanii
har ik tarah kii Gizaa me.n yahaa.n milaavaT hai
vo jis ko bachcho.n kii ta.aliim kah ke dete hai.n
vo dars ulTii chhurii hai gale pe bachpan ke
zamiin-e-hind hi.nDolaa nahii.n hai bachcho.n kaa
karo.Do.n bachcho.n kaa ye des ab janaaza hai
ham inqalaab ke KHatro.n se KHuub vaaqif hai.n
kuchh aur roz yahii rah ga.e jo lail-o-nahaar
to mol lenaa pa.Degaa hame.n ye KHatra bhii
ki bachche qaum kii sab se ba.Dii amaanat hai.n

Firaq Gorakhpuri
Nazm

parchhaiyan

1
ye shaam ik aa.iina-e-niil-guu.n ye nam ye mahak
ye manzaro.n kii jhalak khet baaG dariyaa gaa.nv
vo kuchh sulagte hu.e kuchh sulagne vaale alaav
siyaahiyo.n kaa dabe-paa.nv aasmaa.n se nuzuul
laTo.n ko khol de jis tarah shaam kii devii
puraane vaqt ke bargad kii ye udaas jaTaa.e.n
qariib o duur ye go dhuul kii ubhartii ghaTaa.e.n
ye kaa.enaat kaa Thahraa.o ye athaah sukuut
ye niim-tiirah fazaa roz-e-garm kaa taabuut
dhu.aa.n dhu.aa.n sii zamii.n hai ghulaa ghulaa saa falak
2
ye chaa.ndnii ye havaa.e.n ye shaaKH-e-gul kii lachak
ye daur-e-baada ye saaz-e-KHamosh fitrat ke
sunaa.ii dene lagii jagmagaate siino.n me.n
dilo.n ke naazuk o shaffaaf aabgiino.n me.n
tire KHayaal kii pa.Dtii hu.ii kiran kii khanak
3
ye raat chhantii havaa.o.n kii so.ndhii so.ndhii mahak
ye khet kartii hu.ii chaa.ndnii kii narm damak
sugandh raat kii raanii kii jab machaltii hai
fazaa me.n ruuh-e-tarab karvaTe.n badaltii hai
ye ruup sar se qadam tak hasiin jaise gunaah
ye aarizo.n kii damak ye fusuun-e-chashm-e-siyaah
ye dhaj na de jo ajantaa kii san.ato.n ko panaah
ye siina pa.D hii ga.ii dev lok kii bhii nigaah
ye sar-zamiin se aakaash kii parastish-gaah
utaarte hai.n tirii aartii sitaara o maah
sajal badan kii bayaa.n kis tarah ho kaifiyyat
sarasvatii ke bajaate hu.e sitaar kii gat
jamaal-e-yaar tire gulsitaa.n kii rah rah ke
jabiin-e-naaz tirii kahkashaa.n kii rah rah ke
dilo.n me.n aa.iina-dar-aa.iina suhaanii jhalak
4
ye chhab ye ruup ye joban ye saj ye dhaj ye lahak
chamakte taaro.n kii kirno.n kii narm narm phuvaar
ye rasmasaate badan kaa uThaan aur ye ubhaar
fazaa ke aa.iina me.n jaise lahlahaa.e bahaar
ye be-qaraar ye be-iKHtiyaar josh-e-numuud
ki jaise nuur kaa favvaara ho shafaq-aaluud
ye jalve paikar-e-shab-taab ke ye bazm-e-shohuud
ye mastiyaa.n ki mai-e-saaf-o-durd sab be-buud
KHajil ho laal-e-yaman uzv uzv kii vo Dalak
5
bas ik sitaara-e-shi.ngaraf kii jabii.n pe jhamak
vo chaal jis se labaalab gulaabiyaa.n chhalke.n
sakuu.n-numaa KHam-e-abru ye adh-khulii.n palke.n
har ik nigaah se aiman kii bijliyaa.n lapke.n
ye aa.nkh jis me.n ka.ii aasmaa.n dikhaa.ii pa.De.n
u.Daa de.n hosh vo kaano.n kii saada saada lave.n
ghaTaa.e.n vajd me.n aa.e.n ye gesu.o.n kii laTak
6
ye kaif-o-ra.ng-e-nazaara ye bijliyo.n kii lapak
ki jaise krishn se raadhaa kii aa.nkh ishaare kare
vo shoKH ishaare ki rabbaaniyat bhii jaa.e jhapak
jamaal sar se qadam tak tamaam sho.ala hai
sukuun jumbish o ram tak tamaam sho.ala hai
magar vo sho.ala ki aa.nkho.n me.n Daal de ThanDak
7
ye raat nii.nd me.n Duube hu.e se hai.n diipak
fazaa me.n bujh ga.e u.D u.D ke jugnu.o.n ke sharaar
kuchh aur taaro.n kii aa.nkho.n kaa ba.Dh chalaa hai KHumaar
fasurda chhiTkii hu.ii chaa.ndnii kaa dhundlaa Gubaar
ye bhiigii bhiigii uudaahaT ye bhiigaa bhiigaa nuur
ki jaise chashma-e-zulmaat me.n jale kaafuur
ye Dhaltii raat sitaaro.n ke qalb kaa ye gudaaz
KHunuk fazaa me.n tiraa shabnamii tabassum-e-naaz
jhalak jamaal kii ta.abiir KHvaab aa.iina-saaz
jahaa.n se jism ko dekhe.n tamaam naaz-o-niyaaz
jahaa.n nigaah Thahar jaa.e raaz-andar-raaz
sukuut-e-niim-shabii lahlahe badan kaa nikhaar
ki jaise nii.nd kii vaadii me.n jaagtaa sansaar
hai bazm-e-maah ki parchhaa.iyo.n kii bastii hai
fazaa kii oT se vo KHaamushii barastii hai
ki buu.nd buu.nd se paidaa ho gosh o dil me.n khanak
8
kisii KHayaal me.n hai Garq chaa.ndnii kii chamak
havaa.e.n nii.nd ke kheto.n se jaise aatii ho.n
hayaat o maut me.n sargoshiyaa.n sii hotii hai.n
karo.Do.n saal ke jaage sitaare nam-diida
siyaah gesu.o.n ke saa.np niim-KHvaabiida
ye pichhlii raat ye rag rag me.n narm narm kasak

Firaq Gorakhpuri
Nazm

nashat-e-umid

ai mirii ummiid merii jaa.n-navaaz
ai mirii dil-soz merii kaarsaaz
merii sipar aur mire dil kii panaah
dard-o-musiibat me.n mirii takiya-gaah
aish me.n aur ranj mai.n merii shafiiq
koh me.n aur dasht me.n merii rafiiq
kaaTne vaalii Gam-e-ayyaam kii
thaamne vaalii dil-e-naakaam kii
dil pa pa.Daa aan ke jab ko.ii dukh
tere dilaase se milaa ham ko sukh
tuu ne na chho.Daa kabhii Gurbat me.n saath
tuu ne uThaayaa na kabhii sar se haath
jii ko ho kabhii agar usrat kaa ra.nj
khol diye tuu nai qanaa.at ke ganj
tujh se hai mohtaaj kaa dil be-hiraas
tujh se hai biimaar ko jiine kii aas
KHaatir-e-ranjuur kaa darmaa.n hai tuu
aashiq-e-mahjuur kaa iimaa.n hai tuu
nuuh kii kashtii kaa sahaaraa thii tuu
chaah me.n yuusuf kii dil-aaraa thii tuu
raam ke ham-raah cha.Dhii ran me.n tuu
paa.nDav ke bhii saath phirii ban me.n tuu
tuu ne sadaa qais kaa bahlaayaa dil
thaam liyaa jab kabhii ghabraayaa dil
ho gayaa farhaad kaa qissa tamaam
par tire fiqro.n pe rahaa KHush mudaam
tuu ne hii raa.njhe kii ye ba.ndhvaaii aas
hiir thii furqat me.n bhii goyaa ki paas
hotii hai tuu pusht pe himmat kii jab
mushkile.n aasaa.n nazar aatii hai.n sab
haath me.n jab aa ke liyaa tuu ne haat
saat samundar se guzarnaa hai baat
saath milaa jis ko tiraa do qadam
kahtaa hai vo ye hai arab aur ajam
gho.De kii lii apne jahaa.n tuu ne baag
saamne hai tere gayaa aur praag
azm ko jab detii hai tuu mel jast
gumbad-e-garduu.n nazar aataa hai past
tuu ne diyaa aa ke ubhaaraa jahaa.n
samjhe ki muTThii me.n hai saaraa jahaa.n
zarre ko KHurshiid me.n de khapaa
bande ko allaah se de tuu milaa
dono.n jahaa.n kii hai ba.ndhii tujh se la.D
diin kii tuu asl hai duniyaa kii ja.D
nekiyo.n kii tujh se hai qaa.em asaas
tuu na ho to jaa.e.n na nekii ke paas
diin kii tujh bin kahii.n pursish na ho
tuu na ho to haq kii parastish na ho
KHushk thaa bin tere daraKHt-e-amal
tuu ne lagaa.e hai.n ye sab phuul phal
dil ko lubhaatii hai kabhii ban ke huur
gaah dikhaatii hai sharaab-e-tahuur
naam hai sidra kabhii tuubaa tiraa
roz niraalaa hai tamaashaa tiraa
kausar o tasniim hai yaa salsabiil
jalve hai.n sab tere ye be-qaal-o-qiil
ruup hai.n har panth me.n tere alag
hai kahii.n firdaus kahii.n hai sovarg
chhuuT ga.e saare qariib aur ba.iid
ek na chhuuTii to na chhuuTii umiid
tere hii dam se kaTe jo din the saKHt
tere hii sadqe se milaa taaj-o-taKHt
KHaakiyo.n kii tujh se hai himmat buland
tuu na ho to kaam ho.n duniyaa ke band
tujh se hii aabaad hai kaun-o-makaa.n
tuu na ho to hai bhii barham jahaa.n
ko.ii pa.Dtaa phirtaa hai bahr-e-ma.aash
hai ko.ii iksiir ko kartaa talaash
ik tamannaa me.n hai aulaad kii
ek ko dil-daar kii hai lau lagii
ek ko hai dhan jo kuchh haath aa.e
dhuum se aulaad kii shaadii rachaa.e
ek ko kuchh aaj agar mil gayaa
kal kii hai ye fikr ki khaa.e.nge kyaa
qaum kii bahbuud kaa bhuukaa hai ek
jin me.n ho un ke liye anjaam-e-nek
ek ko hai tishnagii-e-qurb-e-haq
jis ne kiyaa dil se jigar tak hai shaq
jo hai Garaz us kii na.ii justujuu
laakh agar dil hai.n to laakh aarzuu
tujh se hai.n dil sab ke magar baaG baaG
gul ko.ii hone nahii.n paataa charaaG
sab ye samajhte hai.n ki paa.ii muraad
kahtii hai jab tuu ki ab aa.ii muraad
va.ada tiraa raast ho yaa ho daroG
tuu ne diye hai.n use kyaa kyaa faroG
va.ade vafaa kartii hai go chand tuu
rakhtii hai har ek ko KHursand tuu
bhaatii hai sab ko tirii lait-o-la.al
tuu ne kahaa.n siikhii hai ye aaj kal
talKH ko tuu chaahe to shiirii.n kare
bazm-e-azaa ko tarab-aagii.n kare
aane na de ranj ko muflis ke paas
rakhe Ganii us ko rahe jis ke paas
yaas kaa paatii hai jo tuu kuchh lagaav
saik.Do.n kartii hai utaar aur cha.Dhaa.o
aane nahii.n detii dilo.n par hiraas
TuuTne detii nahii.n taalib kii aas
jin ko mayassar na ho kamlii phaTii
KHush hai.n tavaqqo.a pe vo zar-baft kii
chaTnii se roTii kaa hai jin kii banaav
baiThe pakaate hai.n KHayaalii polaav
paa.nv me.n juutii nahii.n par hai ye zauq
gho.Daa jo sabza ho to niilaa ho tauq
faiz ke khole hai.n jahaa.n tuu ne baab
dekhte hai.n jho.npa.De mahlo.n ke KHvaab
tere karishme hai.n Gazab dil-fareb
dil me.n nahii.n chho.Dte sabr-o-shakeb
tujh se muhavvis ne jo shuuraa liyaa
phuu.nk diyaa kaan me.n kyaa jaane kyaa
dil se bhulaayaa zan o farzand ko
lag gayaa ghun naKHl-e-baroma.nd ko
khaane se piine se hu.aa sard jii
aisii kuchh iksiir kii hai lau lagii
diin kii hai fikr na duniyaa se kaam
dhun hai yahii raat din aur sub.h shaam
dho.nknii hai baiTh ke jab dho.nknaa
shah ko samajhtaa hai ik adnaa gadaa
paise ko jab taav pe detaa hai taav
puuchhtaa yaaro.n se hai sone kaa bhaav
kahtaa hai jab ha.nste hai.n sab dekh kar
rah ga.ii ik aa.nch kii baaqii kasar
hai isii dhu.nd me.n vo aasuuda-haal
tuu ne diyaa aql pe parda saa Daal
tol kar gar dekhiye us kii KHushii
ko.ii KHushii is ko na pahu.nche kabhii
phirte hai.n mohtaaj ka.ii tiira-baKHt
jan ke pairo.n me.n thaa kabhii taaj-o-taKHt
aaj jo bartan hai.n to kal ghar karo
maltii hai mushkil se inhe.n naan-e-jau
taire sivaa KHaak nahii.n in ke paas
saarii KHudaa.ii me.n hai le de ke aas
phuule samaate nahii.n is aas par
saahib-e-aalam unhe.n kahiye agar
khaate hai.n is aas pa qasme.n ajiib
jhuuTe ko ho taKHt na yaa-rab nasiib
hotaa hai naumiidiyo.n kaa jab hujuum
aatii hai hasrat kii ghaTaa jhuum jhuum
lagtii hai himmat kii kamar TuuTne
hausla kaa lagtaa hai jii chhuuTne
hotii hai be-sabrii o taaqat me.n ja.ng
arsa-e-aalam nazar aataa hai ta.ng
jii me.n ye aataa hai ki sam khaa.iye
phaa.D ke yaa kap.De nikal jaa.iye
baiThne lagtaa hai dil aave kii tarah
yaas Daraatii hai chhalaave kii tarah
hotaa hai shikva kabhii taqdiir kaa
u.Dtaa hai KHaaka kabhii tadbiir kaa
Thantii hai garduu.n se la.Daa.ii kabhii
hotii hai qismat kii ha.nsaa.ii kabhii
jaataa hai qaabuu se aaKHir dil nikal
kartii hai in mushkilo.n ko tuu hii hal
kaan me.n pahu.nchii tirii aahaT jo hai.n
raKHt-e-safar yaas nai baa.ndhaa vahii.n
saath ga.ii yaas ke pazhmurdagii
ho ga.ii kaafuur sab afsurdagii
tujh me.n chhupaa raahat-e-jaa.n kaa hai bhed
chho.Diyo 'haalii' kaa na saath ai umiid

Altaf Hussain Hali
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now