Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "peshaavarii"

Nazm MATCHES FOR "peshaavarii"

Nazm

numaish-e-aligarh

shafaq naza.a me.n le rahii thii sambhaalaa
a.ndhere kaa Gam khaa rahaa thaa ujaalaa
sitaaro.n ke ruKH se naqaab uTh rahii thii
fazaa.o.n se mauj-e-shabaab uTh rahii thii
mai-e-zindagii jaam-e-mai-nosh me.n thii
vo kaif-e-masarrat, vo lamhaat-e-ra.ngii.n
vo ehsaas-e-mastii vo jazbaat-e-ra.ngii.n
vo pur-kaif aalam vo dilkash nazaare
vo jalvo.n ke bahte hu.e KHushk dhaare
vo namkiin aaGaaz-e-shab allaah allaah
numaa.ish kii vo taab-o-tab allaah allaah
vo baab-e-muzammil pe jashn-e-charaaGaa.n
falak par ho.n jaise sitaare daraKHshaa.n
fazaa.o.n me.n guu.nje hu.e vo taraane
vo jaa.n-baKHsh naGme vo pur-lutf gaane
vo har samt husn-o-lataafat kii jaane.n
vo aaraasta saaf suthrii dukaane.n
kahii.n par hai nazzaara kaariigarii kaa
kahii.n garm hotel hai peshaavarii kaa
ba-qadr-e-sukuu.n vo dilo.n kaa bahalnaa
amiiro.n Gariibo.n kaa yakjaa Tahalnaa
numaayaa.n numaayaa.n vo yaaraan-e-college
vo ishrat-ba-daamaa.n javaanaan-e-college
ko.ii tez-dastii o chustii pe naazaa.n
ko.ii sehhat o tandurustii pe naazaa.n
ko.ii husn kii jalva-rezii pe maa.il
ko.ii shoKH nazro.n kii tezii pe maa.il
idhar chashm-e-hairaa.n kii nazzaara-saazii
udhar husn vaalo kii jalva-taraazii
KHiraamaa.n KHiraamaa.n vo ham-joliyo.n me.n
nikaltii hu.ii muKHtalif Toliyo.n me.n
naqaabo.n me.n vo be-naqaabii kaa aalam
jo laataa hai dil par KHaraabii kaa aalam
kisii kaa vo chehre se aa.nchal uThaanaa
kisii kaa kisii se nigaahe.n churaanaa
kabhii yak-ba-yak chalte chalte Thaharnaa
nigaaho.n se jalvo.n kii islaah karnaa
kabhii ik tavajjoh dukaano.n kii jaanib
kabhii ik nazar naujavaano.n kii jaanib
tamaashaa Garaz kaamyaab aa rahaa thaa
numaa.ish pe goyaa shabaab aa rahaa thaa
idhar ham bhii bazm-e-taKHayyul sajaa kar
kha.De ho ga.e ek dukkaa.n pe aa kar
nazar mil ga.ii daf.atan ik nazar se
dha.Dakne lagaa dil mohabbat ke Dar se
idhar to nazar se jabii.n-saa.iyaa.n thii.n
udhar se bhii kuchh himmat-afzaa.iyaa.n thii.n
KHalish dil kii dono.n ko ta.Dpaa ga.ii thii
mohabbat kii manzil qariib aa ga.ii thii
KHayaalaat me.n is taraf ik talaatum
labo.n par udhar halkaa halkaa tabassum
nigaaho.n se ahd-e-vafaa ho rahaa thaa
ishaaro.n se matlab adaa ho rahaa thaa
idhar ishq ke baam-o-dar saj rahe the
gha.Dii me.n jo dekhaa to nau baj rahe the
yakaayak javaa.n kuchh mire paas aa.e
jo the aastiino.n pe bille lagaa.e
kahaa itnii takliif farmaa.iyegaa
numaa.ish se tashriif le jaa.iyegaa
Garaz chal diye ghar ko majbuur ho kar
mohabbat ke jalvo.n se ma.amuur ho kar
hu.i jaarii rahii thii ajab haalat-e-dil
ko.ii chhiin le jaise pa.Dhte me.n novel
ham is tarah baab-e-muzammil se nikle
lahuu jaise TuuTe hu.e dil se nikle
bahar-e-haal ab bhii vahii hai numaa.ish
naved-e-tarab de rahii hai numaa.ish
vahii jashn hai aur vahii zindagii hai
magar jaise har shai me.n ko.ii kamii hai
are o nigaaho.n pe chhaa jaane vaalii
mire dil ko rah rah ke yaad aane vaalii
tirii tarah jalva-numaa hai numaa.ish
tire husn kaa aa.inaa hai numaa.ish
numaa.ish me.n terii lataafat hai pinhaa.n
numaa.ish me.n terii nazaakat hai pinhaa.n
nigaaho.n ko naahaq tirii justujuu hai
yaqiinan numaa.ish ke parde me.n tuu hai

Shakeel Badayuni
Nazm

izhaar-e-mohabbat

tum itne hasii.n ho tum aise hasii.n ho
haqiiqat me.n tum to surayyaa jabii.n ho
mai.n kah duu.n agar kuchh tumhe.n bhii yaqii.n ho
tumhe.n pyaar karne ko jii chaahtaa hai
labo.n par ha.nsii hai gulaabii gulaabii
nigaaho.n kii jumbish sharaabii sharaabii
tumhaaraa chehra kitaabii kitaabii
tumhe.n pyaar karne ko jii chaahtaa hai
tumhaarii nigaahe.n payaam-e-mohabbat
KHamoshii tumhaarii kalaam-e-mohabbat
salaamat tumhii.n se hai naam-e-mohabbat
tumhe.n pyaar karne ko jii chaahtaa hai
tumhaaraa tajammul qayaamat qayaamat
tumhaare ishaare mohabbat mohabbat
tumhe.n pyaar karne ko jii chaahtaa hai
tumhaaraa saraapaa hai mahshar-ba-daamaa.n
mujassam ho Gaarat-gar-e-diin-o-iimaa.n
na puuchho mire dil kii hasrat mirii jaa.n
tumhe.n pyaar karne ko jii chaahtaa hai
tumhaaraa tabassum gulo.n kii javaanii
tumhaaraa tarannum mai-e-arGavaanii
tumhaaraa takallum kitaab-e-ma.aanii
tumhe.n pyaar karne ko jii chaahtaa hai
tumhaarii nazar kaif-o-mastii liye hai
sharaab-e-mohabbat ke saaGar piye hai
ye 'afzal' kaa dil bhii iraada kiye hai
tumhe.n pyaar karne ko jii chaahtaa hai

Afzal Peshawari
Nazm

mohabbat ke siwa kuchh bhi nahin

terii duniyaa me.n to nafrat kaa jahaa.n bastaa hai
merii duniyaa me.n mohabbat ke sivaa kuchh bhii nahii.n

Afzal Peshawari
Nazm

main pachhta raha hun

musiibat me.n KHud ko giraftaar karke
javaanii ko apnii ik aazaar karke
banaa kar tumhe.n raaz-daa.n zindagii kaa
valii raaz kaa tum pe iz.haar karke
mai.n pachhtaa rahaa huu.n tumhe.n pyaar karke
mai.n samjhaa thaa mohsin sitamgaar nikle
vafaadaar samjhaa jafaa-kaar nikle
samajhtaa rahaa tum ko gul se bhii behtar
magar gul ke parde me.n tum KHaar nikle
mai.n pachhtaa rahaa huu.n tumhe.n pyaar karke
mirii zindagii zindagii ab nahii.n hai
masarrat nahii.n hai KHushii ab nahii.n hai
labo.n se mire chhiin lii muskuraahaT
muqaddar me.n jaise ha.nsii ab nahii.n hai
mai.n pachhtaa rahaa huu.n tumhe.n pyaar karke
ummiido.n kaa markaz jahaan-e-tamannaa
sukuun-e-nazar dil kii taskiin-e-bejaa
fareb-e-musalsal diye mai.n ne dil ko
KHilaaf-e-tavaqqo.a magar tum ko paayaa
mai.n pachhtaa rahaa huu.n tumhe.n pyaar karke
mirii zindagii ke gulistaa.n se khele
mirii yaas se mere armaa.n se khele
khilaunaa samajh kar mire dil ko to.Daa
mirii ziist ke saaz-o-saamaa.n se khele
mai.n pachhtaa rahaa huu.n tumhe.n pyaar karke
tamannaa.o.n kaa KHuun tum ne bahaayaa
ummiido.n kaa tum ne janaaza nikaalaa
na kii ko.ii bhuule se bhii ik inaayat
kiyaa paas ik din na merii vafaa kaa
mai.n pachhtaa rahaa huu.n tumhe.n pyaar karke
sadaa tum baratte rahe ho taGaaful
jafaa.o.n kaa ik din na TuuTaa tasalsul
fareb-e-musalsal mai.n khaataa rahaa huu.n
hamesha mire dil ko dete rahe jul
mai.n pachhtaa rahaa huu.n tumhe.n pyaar karke
KHushii KHaak me.n tum ne haa.e milaa dii
hamesha jafaa.o.n se daad-e-vafaa dii
mai.n afzal faqat naam kaa rah gayaa huu.n
yahaa.n tak mirii tum ne hastii haTaa dii
mai.n pachhtaa rahaa huu.n tumhe.n pyaar karke

Afzal Peshawari
Nazm

ijazat ho to tumko pyar kar lun

dil-e-pazh-murda ko gulzaar kar luu.n
mohabbat ko gale kaa haar kar luu.n
javaanii husn se sarshaar kar luu.n
ijaazat ho to tum ko pyaar kar luu.n
mujhe duniyaa kii daulat de rahaa hai
ye paiGaam-e-masarrat de rahaa hai
tumhaaraa husn daavat de rahaa hai
ijaazat ho to tum ko pyaar kar luu.n
tamannaa.o.n ke baadal chhaa rahe hai.n
javaanii ko mirii ta.Dpaa rahe hai.n
mire jazbaat umDe aa rahe hai.n
ijaazat ho to tum ko pyaar kar luu.n
gulaabii aa.nkh me.n Dore pa.De hai.n
papoTe bhii to bojhal ho rahe hai.n
pataa dil kaa tumhaare de rahe hai.n
ijaazat ho to tum ko pyaar kar luu.n
hai merii jaan tishna dil hai pyaasaa
mujhe dekhoge yuu.n kab tak ta.Daptaa
karam ab to karam mujh par KHudaaraa
ijaazat ho to tum ko pyaar kar luu.n
uThaa diije bas ab parda hayaa kaa
hai dil kaa ye taqaaze par taqaazaa
zaraa sii haa.n se ban jaa.egii duniyaa
ijaazat ho to tum ko pyaar kar luu.n
tumhaare husn me.n taabindagii hai
sitaaro.n jaisii is me.n raushnii hai
kashish hai aur is me.n dilkashii hai
ijaazat ho to tum ko pyaar kar luu.n
milii hai muddato.n me.n mujh ko KHalvat
ba.De arse me.n jaagii hai ye qismat
banaa do mere Gam ko ab to raahat
ijaazat ho to tum ko pyaar kar luu.n
mirii behad tabii.at chaahtii hai
hamesha kii ye daulat chaahtii hai
tumhaarii bas ijaazat chaahtii hai
ijaazat ho to tum ko pyaar kar luu.n
tumhaaraa ruup aafat Dhaa rahaa hai
ye ik armaan bantaa jaa rahaa hai
mire pahluu me.n dil lalchaa rahaa hai
ijaazat ho to tum ko pyaar kar luu.n
mohabbat ne machaa dii dil me.n halchal
kiyaa hai zabt ne betaab bekal
bas ai ruuh-e-ravaan-e-shauq-e-'afzal'
ijaazat ho to tum ko pyaar kar luu.n

Afzal Peshawari
Nazm

aaj ki raat

dekhnaa jazb-e-mohabbat kaa asar aaj kii raat
mere shaane pe hai us shoKH kaa sar aaj kii raat
aur kyaa chaahiye ab ai dil-e-majruuh tujhe
us ne dekhaa to ba-andaaz-e-digar aaj kii raat
phuul kyaa KHaar bhii hai.n aaj gulistaa.n-ba-kanaar
sa.ng-reze hai.n nigaaho.n me.n guhar aaj kii raat
mahv-e-gulgasht hai ye kaun mire dosh-ba-dosh
kahkashaa.n ban ga.ii har raahguzar aaj kii raat
phuuT niklaa dar-o-diivaar se sailaab-e-nashaat
allaah allaah miraa kaif-e-nazar aaj kii raat
shabnamistaan-e-tajallii kaa fusuu.n kyaa kahiye
chaa.nd ne phe.nk diyaa raKHt-e-safar aaj kii raat
nuur hii nuur hai kis samt uThaa.uu.n aa.nhke.n
husn hii husn hai taa-hadd-e-nazar aaj kii raat
qasr-e-giitii me.n uma.nD aayaa hai tuufaan-e-hayaat
maut larzaa.n hai pas-e-parda-e-dar aaj kii raat
allaah allaah vo peshaani-e-siimii.n kaa jamaal
rah ga.ii jam ke sitaaro.n kii nazar aaj kii raat
aariz-e-garm pe vo ra.ng-e-shafaq kii lahre.n
vo mirii shoKH-nigaahii kaa asar aaj kii raat
nargis-e-naaz me.n vo nii.nd kaa halkaa saa KHumaar
vo mire naGma-e-shiirii.n kaa asar aaj kii raat
naGma o mai kaa ye tuufaan-e-tarab kyaa kahiye
ghar miraa ban gayaa 'KHayyaam' kaa ghar aaj kii raat
merii har saa.ns pe vo un kii tavajjoh kyaa KHuub
merii har baat pe vo jumbish-e-sar aaj kii raat
vo tabassum hii tabassum kaa jamaal-e-paiham
vo mohabbat hii mohabbat kii nazar aaj kii raat
uf vo vaaraftagi-e-shauq me.n ik vahm-e-latiif
kapkapaa.e hu.e ho.nTo.n pe nazar aaj kii raat
maz.hab-e-ishq me.n jaa.ez hai yaqiinan jaa.ez
chuum luu.n mai.n lab-e-la.alii.n bhii agar aaj kii raat
apnii rif.at pe jo naazaa.n hai.n to naazaa.n hii rahe.n
kah do anjum se ki dekhe.n na idhar aaj kii raat
un ke altaaf kaa itnaa hii fusuu.n kaafii hai
kam hai pahle se bahut dard-e-jigar aaj kii raat

Asrarul Haq Majaz
Nazm

raat aur rail

phir chalii hai rail station se lahraatii hu.ii
niim-shab kii KHaamushii me.n zer-e-lab gaatii hu.ii
Dagmagaatii jhuumtii siiTii bajaatii kheltii
vaadii o kohsaar kii ThanDii havaa khaatii hu.ii
tez jho.nko.n me.n vo chham chham kaa suruud-e-dil-nashii.n
aa.ndhiyo.n me.n me.nh barasne kii sadaa aatii hu.ii
jaise maujo.n kaa tarannum jaise jal-pariyo.n ke giit
ek ik lai me.n hazaaro.n zamzame gaatii hu.ii
naunihaalo.n ko sunaatii miiThii miiThii loriyaa.n
naazniino.n ko sunahre KHvaab dikhlaatii hu.ii
Thokare.n khaa kar lachaktii gungunaatii jhuumtii
sarKHushii me.n ghu.ngru.o.n kii taal par gaatii hu.ii
naaz se har mo.D par khaatii hu.ii sau pech-o-KHam
ik dulhan apnii adaa se aap sharmaatii hu.ii
raat kii taariikiyo.n me.n jhilmilaatii kaa.nptii
pTriyo.n par duur tak siimaab jhalkaatii hu.ii
jaise aadhii raat ko niklii ho ik shaahii baraat
shaadyaano.n kii sadaa se vajd me.n aatii hu.ii
muntashir kar ke fazaa me.n jaa-ba-jaa chi.ngaariyaa.n
daaman-e-mauj-e-havaa me.n phuul barsaatii hu.ii
tez-tar hotii hu.ii manzil-ba-manzil dam-ba-dam
rafta rafta apnaa aslii ruup dikhlaatii hu.ii
siina-e-kohsaar par cha.Dhtii hu.ii be-iKHtiyaar
ek naagan jis tarah mastii me.n lahraatii hu.ii
ik sitaara TuuT kar jaise ravaa.n ho arsh se
rif.at-e-kohsaar se maidaan me.n aatii hu.ii
ik baguule kii tarah ba.Dhtii hu.ii maidaan me.n
ja.ngalo.n me.n aa.ndhiyo.n kaa zor dikhlaatii hu.ii
raasa-bar-andaam kartii anjum-e-shab-taab ko
aashiyaa.n me.n taa.ir-e-vahshii ko chau.nkaatii hu.ii
yaad aa jaa.e puraane devtaa.o.n kaa jalaal
un qayaamat-KHeziyo.n ke saath bal khaatii hu.ii
ek raKHsh-e-be-inaa.n kii barq-raftaarii ke saath
KHandaqo.n ko phaa.ndtii Tiilo.n se katraatii hu.ii
murG-zaaro.n me.n dikhaatii juu-e-shiirii.n kaa KHiraam
vaadiyo.n me.n abr ke maanind ma.nDlaatii hu.ii
ik pahaa.Dii par dikhaatii aabshaaro.n kii jhalak
ik bayaabaa.n me.n charaaG-e-tuur dikhlaatii hu.ii
justujuu me.n manzil-e-maqsuud kii diivaana-vaar
apnaa sar dhuntii fazaa me.n baal bikhraatii hu.ii
chhe.Dtii ik vajd ke aalam me.n saaz-e-sarmadii
Gaiz ke aalam me.n mu.nh se aag barsaatii hu.ii
re.ngtii mu.Dtii machaltii tilmilaatii haa.nptii
apne dil kii aatish pinhaa.n ko bha.Dkaatii hu.ii
KHud-ba-KHud ruuThii hu.ii biphrii hu.ii bikhrii hu.ii
shor-e-paiham se dil-e-giitii ko dha.Dkaatii hu.ii
pul pe dariyaa ke damaa-dam kau.ndtii lalkaartii
apnii is tuufan-a.ngezii pe itraatii hu.ii
pesh kartii biich naddii me.n charaaGaa.n kaa samaa.n
saahilo.n par ret ke zarro.n ko chamkaatii hu.ii
mu.nh me.n ghustii hai sura.ngo.n ke yakaayak dau.D kar
dandanaatii chiiKHtii chi.nghaa.Dtii gaatii hu.ii
aage aage justujuu-aamez nazre.n Daaltii
shab ke haibatnaak nazzaaro.n se ghabraatii hu.ii
ek mujrim kii tarah sahmii hu.ii simTii hu.ii
ek muflis kii tarah sardii me.n tharraatii hu.ii
Tez-e-raftaar ke sikke jamaatii jaa-ba-jaa
dasht o dar me.n zindagii kii lahar dau.Daatii hu.ii
Daal kar guzre manaazir par andhere kaa naqaab
ik nayaa manzar nazar ke saamne laatii hu.ii
safha-e-dil se miTaatii ahd-e-maazii ke nuquush
haal o mustaqbil ke dilkash KHvaab dikhlaatii hu.ii
Daaltii be-his chaTaano.n par haqaarat kii nazar
koh par ha.nstii falak ko aa.nkh dikhlaatii hu.ii
daaman-e-taariki-e-shab kii u.Daatii dhajjiyaa.n
qasr-e-zulmat par musalsal tiir barsaatii hu.ii
zad me.n ko.ii chiiz aa jaa.e to us ko piis kar
irtiqaa-e-zindagii ke raaz batlaatii hu.ii
zo.am me.n peshaani-e-sahraa pe Thokar maartii
phir subuk-raftaariyo.n ke naaz dikhlaatii hu.ii
ek sarkash fauj kii suurat alam khole hu.e
ek tuufaanii garaj ke saath Daraatii hu.ii
ek ik harkat se andaaz-e-baGaavat aashkaar
azmat-e-insaaiyat ke zamzame gaatii hu.ii
har qadam par top kii sii ghan-garaj ke saath saath
goliyo.n kii sansanaahaT kii sadaa aatii hu.ii
vo havaa me.n saika.Do.n ja.ngii duhal bajte hu.e
vo bigul kii jaa.n-fazaa.n aavaaz lahraatii hu.ii
al-Garaz u.Dtii chalii jaatii hai be-KHauf-o-KHatar
shaa.ir-e-aatish-nafas kaa KHuun khaulaatii hu.ii

Asrarul Haq Majaz
Nazm

manazir-e-sahar

KHunkii vo bayaabaa.n kii vo ra.ngiini-e-sahraa
vo vaadii-e-sarsabz vo taalaab-e-musaffaa
peshaani-e-garduu.n pe vo ha.nstaa hu.aa taaraa
vo raaste jangal ke vo bahtaa hu.aa dariyaa

Josh Malihabadi
Nazm

naya sal

na.e saal kii yuu.n KHushii ham manaa.e.n
ki ruuThe hu.o.n ko gale se lagaa.e.n
ga.e saal ke saare Gam bhuul jaa.e.n
nayaa saal aayaa na.e gul khilaa.e.n
sitaaro.n se dhartii kaa daaman sajaa.e.n
nazaaro.n ko tasviir-e-jannat banaa.e.n
rahe raaj dhartii pe ab shaantii kaa
na chhaa.e.n kahii.n jang kii ab ghaTaa.e.n
miTaanaa hai ham ko kuduurat dilo.n se
har ik samt se aa.e.n bas ye sadaa.e.n
hamii.n paasbaa.n kal bane.nge vatan ke
kare.n ahd jo bhii vo kar ke dikhaa.e.n
nayaa saal yaa rab mubaarak ho sab ko
na.e roz-o-shab sab ko hii raas aa.e.n
na.e saal kii yuu.n kare.n peshvaa.ii
Gamo.n ko bhulaa kar faqat muskuraa.e.n
isii gulsitaa.n ke hai.n sab phuul 'jauhar'
khile.n muskuraa.e.n ha.nse.n aur ha.nsaa.e.n

Jauhar Rahmani
Nazm

adl-e-jahangiri

qasr-e-shaahii me.n ki mumkin nahii.n Gairo.n kaa guzar
ek din nuur-jahaa.n baam pe thii jalva-figan
ko.ii shaamat-zada rahgiir udhar aa niklaa
garche thii qasr me.n har chaar taraf se qadGan
Gairat-e-husn se begam ne tamancha maaraa
KHaak par Dher thaa ik kushta-e-be-gor-o-kafan
saath hii shah-e-jahaa.ngiir ko pahu.nchii jo KHabar
Gaiz se aa ga.ii abruu-e-adaalat pe shikan
hukm bhejaa ki kaniizaan-e-shabistaan-e-shahii
jaa ke puuchh aa.e.n ki sach yaa ki Galat hai ye suKHan
naKHvat-e-husn se begam ne ba-sad-naaz kahaa
merii jaanib se karo arz ba-aa.iin-e-hasan
haa.n mujhe vaaq.ea-e-qatl se inkaar nahii.n
mujh se naamuus-e-hayaa ne ye kahaa thaa ki bazan
us kii gustaaKH-nigaahii ne kiyaa us ko halaak
kishvar-e-husn me.n jaarii hai yahii shara-e-kuhan
mufti-e-dii.n se jahaa.ngiir ne fatvaa puuchhaa
ki sharii.at me.n kisii ko nahii.n kuchh jaa-e-suKHan
mufti-e-diin ne be-KHauf-o-KHatar saaf kahaa
shar.a kahtii hai ki qaatil kii u.Daa do gardan
log darbaar me.n is hukm se tharraa uTThe
par jahaa.ngiir ke abruu pe na bal thaa na shikan
tarkasho.n ko ye diyaa hukm ki andar jaa kar
pahle begam ko kare.n basta-e-zanjiir-o-rasan
phir usii tarah use khii.nch ke baahar laa.e.n
aur jallaad ko de.n hukm ki haa.n teG bazan
ye vahii nuur-jahaa.n hai ki haqiiqat me.n yahii
thii jahaa.ngiir ke parde me.n shahanshaah-e-zaman
us kii peshaani-e-naazuk pe jo pa.Dtii thii girah
jaa ke ban jaatii thii auraaq-e-hukuumat pe shikan
ab na vo nuur-jahaa.n hai na vo andaaz-e-Guruur
na vo Gamze hai.n na vo arbada-e-sabr-shikan
ab vahii paa.nv har ik gaam pe tharraate hai.n
jin kii raftaar se paamaal the murGaan-e-chaman
ek mujrim hai ki jis kaa ko.ii haamii na shafii
ek bekas hai ki jis kaa na ko.ii ghar na vatan
KHidmat-e-shaah me.n begam ne ye bhejaa paiGaam
KHuu.n-bahaa bhii to sharii.at me.n ik amr-e-ahsan
mufti-e-sharaa se phir shaah ne fatvaa puuchhaa
bole jaa.ez hai razaa-mand huu.n gar bachcha o zan
vaariso.n ko jo diye laakh diram begam ne
sab ne darbaar me.n kii arz ki ai shaah-e-zaman
ham ko maqtuul kaa lenaa nahii.n manzuur qisaas
qatl kaa hukm jo ruk jaa.e to hai mustahsan
ho chukaa jab ki shahanshaah ko puuraa ye yaqiin
ki nahii.n is me.n ko.ii shaa.eba-e-hiila-o-fan
uTh ke darbaar se aahista chalaa suu-e-haram
thii jahaa.n nuur-jahaa.n mo'takif-e-bait-e-KHazan
daf.atan paa.nv pe begam ke giraa aur ye kahaa
tuu agar kushta shudii aah che mii kardam man

Shibli Nomani
Nazm

guru-nanak

vo rahbar jis ne gumraaho.n kii aksar peshvaa.ii kii
bhalaa.ii kii hamesha jis ne bhii us se buraa.ii kii

Shatir Hakeemi
Nazm

dukan-dar

na kar sake ye tum agar
ye taajiraan-e-pesha-var
kare.nge tum se yuu.n KHitaab
intiqaam chaahiye
merii kitaab jo kahe
vo hii nizaam chaahiye

Adeel Zaidi
Nazm

guDDe guDiya ka byah

jamiila shakiila kii thii ik sahelii
sahelii bhii ik umr kii saath khelii
bahut hii thaa iKHlaas aur pyaar un me.n
hu.ii thii na jhuuTo.n bhii takraar un me.n
thii yuu.n to har ik khel se un ko raGbat
magar sab se ba.Dh kar thii gu.Diyo.n kii chaahat
jamiila kii gu.Diyaa thii chiinii kii muurat
shakiila kaa guDDaa bhii thaa KHuubsuurat
shakiila ne sochaa ki shaadii rachaae.n
jamiila sahelii ko samdhan banaa.e.n
shakiila ba.De chaav se chal ke aa.ii
vo guDDe kii ma.ngnii kaa paiGaam laa.ii
ka.ii la.Dkiyaa.n aur bhii saath aa.ii.n
jamiila ke ghar aa ke baate.n banaa.ii.n
idhar kii udhar kii hu.ii.n KHuub baate.n
ye ma.ngnii kii baate.n rahii.n chand raate.n
ye baat aur vo baat aur kabhii haa.n kabhii naa.n
ka.ii din rahii.n b shakiila pareshaa.n
par aaKHir vo aa hii ga.ii nek saa.at
na baaqii rahii ko.ii jhag.De kii suurat
jamiila ne manzuur kar lii ye shaadii
KHabar saare bachcho.n ko is kii sunaa dii
ijaazat unho.n ne ba.Do.n se bhii le lii
phir achchhii sii taariiKH shaadii kii tai kii
qariib aa.e shaadii kii taqriib ke din
to kaaTe ye din saare bachcho.n ne gin gin
vo shaadii kii taariiKH jis roz aa.ii
masarrat ne duniyaa me.n naubat bajaa.ii
shakiila ne guDDe ko duulhaa banaayaa
use ek ba.Dhiyaa saa jo.Daa pahnaayaa
vo kurtaa vo achkan vo pag.Dii vo paTkaa
vo resham kii shalvaar vaslii kaa juutaa
vo munnaa saa ruumaal moze Tasar ke
jhamaktii kalaa us ke salme sitaare
ja.Daav a.nguuThii vo motii kii maalaa
vo ra.ngiin jaama vo phuulo.n kaa sahraa
biThaa us ko gho.De pe vo saath laa.ii
baraat us ne guDDe kii apnii sajaa.ii
chale saath ban ban ke bachche baraatii
chalii paarTii ek gaatii bajaatii
ta.Daata.D vo taasho.n kii baajo.n kii Te.n-Te.n
majiire kii Tan Tan nafiirii kii pe.n-pe.n
vo logo.n kaa chalnaa paTaaKHo.n kaa chhuTnaa
havaa me.n anaaro.n ke phuulo.n kaa luTnaa
isii ThaaTh se chal ke baaraat aa.ii
dulhan kii taraf se hu.ii peshvaa.ii
jamiila ne sab kaa kyaa KHair muqaddam
mile ho ke baaham vo sab shaad-o-KHurram
jahaa.n farsh ik chaa.ndnii kaa bichhaa thaa
thii masnad na.ii gaav takiya nayaa thaa
vahaa.n mehmaano.n ko locker biThaayaa
diye paan aur sab ko sharbat pilaayaa
bulaa.e ga.e shahr se ek qaazii
dulhan aur duulhaa hu.e dono.n raazii
zaraa der me.n ho ga.ii un kii shaadii
sabhii ahl-e-mahfil ne dil se du.aa dii
chuvaare luTe phir baTii kuchh miThaa.ii
miThaa.ii ye sab ne maze le ke khaa.ii
hu.e shaad mehmaan chhoTe ba.De kul
mubaarak salaamat kaa pas mach gayaa Gul
hu.aa vaqt gu.Diyaa kii ruKHsat kaa jis dam
jamiila ke chehre pe thaa Gam kaa aalam
shakiila ne jhaT paalkii ik ma.ngaa.ii
biThaa us me.n gu.Diyaa ko ghar apne laa.ii
hu.ii KHuub shohrat hu.aa KHuub KHarcha
rahaa shahr me.n muddato.n is kaa charchaa
Garaz byaah guDDe kaa gu.Diyaa kaa jaisaa
hu.aa ye hu.aa hogaa 'nayyar' na aisaa

Mohammad Shafiuddin Nayyar
Nazm

KHaibar mel

shaam peshawar kaa station
saj kar banaa hu.aa thaa dulhan
station par bhii.D ba.Dii thii
saamne KHaibar mail kha.Dii thii
log hii log the andar baahar
kaale gore afsar naukar
qulii uThaa.e trunk aur bistar
number de kar bhaage andar
baabaa ne ham ko Thahraayaa
ticket karachi kaa kaTvaayaa
bhii.D-bha.Dakkaa shor-sharaaba
piichhe ham aur aage baabaa
apnii baGal me.n basta daabe
ik Dabbe me.n aan biraaje
chalii peshawar se jo gaa.Dii
nau-shahraa junction par Thahrii
chale yahaa.n se khaa kar bhinDii
raat ko pahu.nche raavalpinDii
Thahre yahaa.n ham aadhaa ghanTa
rail ne bhii yaa.n engine badlaa
pinDii me.n thii baarish kam-kam
rail chhukaa-chhuk pahu.nchii jehlam
me.nh jehlam me.n chhaajo.n barsaa
bijlii chamkii baadal garjaa
aaKHir is barsaat se guzre
sub.h hu.ii gujraat se guzre
utar ga.ii gujraat me.n KHaala
aage aayaa gujranwala
mail ne gujranwala chho.Daa
aur lahore se rishta jo.Daa
ham ne pii lahore me.n chaa.e
phir chhuk chhuk multaan ko aa.e
garmii thii multaan me.n bhaa.ii
aage rail ne ret u.Daa.ii
rail chhukaa-chhuk aage dau.Dii
ret u.Daatii pahu.nchii roh.Dii
yaa.n sikkhar ke biscuit chakkhe
phir ham TanDu aadam pahu.nche
chalaa yahaa.n sustaa kar engine
aayaa Hyderabad station
uu.nT yahaa.n kahlaa.e Daachii
aage chale to aayaa karachi
rasta KHatm thaa rail kaa aage
vo jaa so.ii aur ham jaage
ham ne baGal me.n daabaa basta
aur liyaa baahar kaa rasta
logo.n ne saamaan uThvaa.e
care.n Taa.nge rikshe aa.e
big.De jhag.De chuke kiraa.e
apne apne pate bataa.e
ko.ii musaafir hotel pahu.nchaa
KHair se ko.ii ghar ko aayaa
jo jo naam nahii.n ginvaa.e
vahaa.n vahaa.n ham so kar aa.e

Khatir Ghaznavi
Nazm

kanpur

sunaa.ii daastaa.n lahore aur us ke shahiido.n kii
to merii peshvaa.ii ke liye shor-e-nushuur aaya

Zafar Ali Khan
Nazm

suraj

har roz kii tarah din
aaj bhii
suuraj kii gavaahii le kar
aaKHir a.ndherii galiyo.n me.n ghus aayaa
aur ham
apne apne ghar ke nayaaydhiish
suuraj kii gavaahii ke aadii ho chuke hai.n
sach maan lete hai.n aur yuu.n
kahii.n na kahii.n apne hii bikhraa.o me.n
saajhii ho chuke hai.n
hame.n us suuraj kii gavaahii nahii.n chaahiye
jo kisii peshevar gavaah kii tarah
din kii partiit karaane
piile chehro.n par
kachche gharo.n ke aa.ngan me.n
karunaa kaa biij ban ugnaa chaahtaa hai
nahii.n chaahiye hame.n
us suuraj kii gavaahii jo har baar
nayaa svaa.ng bhar
sub.h se shaam tak Tokre Dhone vaale
jiivant chehro.n kaa mukhauTaa lagaa kar
o.Dhii hu.ii naagriktaa me.n nahaa kar
vo suuraj ab ThanDaa pa.D chukaa hai
aur ab
hamaare hii antar se sulagnaa chaahtaa hai
ham suuraj ko
apne laal tave ke uupar
paktaa hu.aa dekhnaa chaahte hai.n
suuraj nahii.n hai kisii kii bapautii
har bastii kii ummiid hai vo
goyaa har haath kii roTii

Gobind Parsad
Nazm

peshawar ki sair

har ek dilrubaa milaa
har ek baa-vafaa milaa
jise thaa paas-e-dostii
vahii uThaa ba.Dhaa milaa
nashist jis kii duur thii
qariib aa gayaa milaa
peshawar aane kaa mujhe
sahii jo lutf thaa milaa
ha.nsii milii KHushii milii
KHudii milii KHudaa milaa
raqiib thaa khichaa khichaa
habiib thaa ghulaa milaa
nazar nazar adaa adaa
mai.n dekhtaa chalaa gayaa

Abul Fitrat Meer Zaidi
Nazm

girya-e-sagan

jab kutte raat ko rote hai.n
to aksar log samajhte hai.n
kuchh aisaa hone vaalaa hai
jo ham ne ab tak sochaa thaa na hii samjhaa thaa
jo honaa thaa vo kab kaa lekin ho bhii chukaa
ye shahr jalaa
is shahr me.n raushan ha.nste baste ghar the ka.ii
sab raakh hu.e
aur un ke makii.n
kuchh qatl hu.e
kuchh jaan bachaa kar bhaag ga.e
jo baa-ismat thii.n
rusvaa.ii kii KHaak o.Dh ke raahguzar par baiThii hai.n
kuchh beva hai.n
kuchh paa-basta rishto.n kii vahshat sahtii hai.n
kuchh adh-na.nge bhuuke bachche
din bhar aavaara phirte hai.n
har jaanib mujrim hii mujrim
un me.n se kuchh hai.n pesha-var
kuchh siikh rahe hai.n jurm ke fan ke raaz na.e asraar na.e

Balraj Komal
Nazm

salamat sabucha tera saqiya

abhii aab-o-gil me.n gu.ndhii
aur abhii parda-e-Gaib se jhaa.nktii yaad-daasht
bahut us ne dekhe tuluu-o-Guruub
bahut pesha-var sach kaa phailaa hu.aa kaarobaar
jaraa.em kii jin ke tanaavar tane
ye fannii mahaarat kii ik bartarii
aur vo power sipar
mukaafaat kii un ke sar par jo rut aa ga.ii
sutuu.n-dar-sutuu.n thaa dhu.aa.n ug rahaa
un ke thaalo.n ke beach

Shafiq Fatima Shera
Nazm

naukri

kisii shaKHs ke saath leTaa hu.aa mai.n
nihaayat zaruurii kisii baat par
apnii saarii samajh laa ke mad.hosh huu.n
aur apne hii andar se chillaa rahaa huu.n
ki kal sub.h mujh ko kisii bhii tarah
is ajiib aadmii se mafar chaahiye
ki ye aadmii bhii mujhe ik jagah roknaa chaahtaa hai
magar mai.n to mai.n huu.n ki mujh ko to keval safar chaahiye
haa.n mafar chaahiye mujh ko is shaKHs se jo
mirii shakl me.n merii marzii se haT kar
mirii soch ke daa.ero.n se pare hii jiye jaa rahaa hai
jo karne nahii.n hai.n vo sab aise pesha kiye jaa rahaa hai
mafar chaahiye is kii naadaaniyo.n se
mafar chaahiye is ke hisse me.n aatii pareshaaniyo.n se
mafar chaahiye is kii us zaat se jis ko duniyaa
mire naam se to bhale jaantii hai magar ek shaa.ir nahii.n maantii
balki ik pesha-var aadmii kii tarah dekhtii rahtii hai
ab mai.n is ke binaa shaa.irii ke samundar me.n tanhaa safar chaahtaa huu.n
mai.n misro.n kii maujo.n pe bahtaa hu.aa apne haatho.n ke hisse hunar chaahtaa huu.n
mai.n Dar chaahtaa huu.n ki is nazm me.n bhii fauulun fauulun kii tai-shuda ravaanii banii hii rahe
kuchh zaruurii tavaazun-o-tartiib kho.e binaa is ke usluub me.n ik javaanii banii hii rahe
KHair ye shaKHs jo mere sang mere andar hii
leTaa hu.aa hai bahut DhiiT hai
is ko merii tarah ko.ii parvaa nahii.n hai
ki ab is kii duniyaa me.n duniyaa nahii.n hai
ai bujhte qamar ham-safiir-e-bashar
ab mai.n so jaataa huu.n aur ye tuu dekhnaa
raat kii vus.ate.n kyaa nigal jaa.e.ngii
aur mirii sub.h ke hisse kyaa aa.egaa

Nivesh Sahu
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now