Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "tasdeeq"

Nazm MATCHES FOR "tasdeeq"

Nazm

wirsa

terii taKHliiq nahii.n hai mirii taKHliiq nahii.n
ham agar zid bhii kare.n us pe to tasdiiq nahii.n

Sahir Ludhianvi
Nazm

farogh farruKH-zad ke liye ek nazm

musaahib-e-shaah se kaho ki
faqiih-e-aazam bhii aaj tasdiiq kar ga.e hai.n
ki fasl phir se gunaahgaaro.n kii pak ga.ii hai
huzuur kii jumbish-e-nazar ke
tamaam jallaad muntazir hai.n
ki kaun sii had janaab jaarii kare.n
to taamiil-e-bandagii ho
kahaa.n pe sar aur kahaa.n pe dastaar utaarnaa ahsan-ul-amal hai
kahaa.n pe haatho.n kahaa.n zabaano.n ko qat.a kiijiye
kahaa.n pe darvaaza rizq kaa band karnaa hogaa
kahaa.n pe aasaa.isho.n kii bhuuko.n ko maar diije
kahaa.n baTegii lu.aan kii chhuuT
aur kahaa.n par
rajm ke ahkaam jaarii ho.nge
kahaa.n pe nau saala bachchiyaa.n chahal saala mardo.n ke saath
sa.ngiin me.n pirone kaa hukm hogaa
kahaa.n pe iqbaalii mulzimo.n ko
kisii tarah shak kaa faa.eda ho

Parveen Shakir
Nazm

fard

itne ba.De nizaam me.n sirf ik merii hii nekii se kyaa hotaa hai
mai.n to is se ziyaada kar hii kyaa saktaa huu.n
mez par apnii saarii duniyaa
kaaGaz aur qalam aur TuuTii phuuTii nazme.n
saarii chiize.n ba.De qariine se rakh dii hai.n
dil me.n bharii hu.ii hai.n itnii achchhii achchhii baate.n
in baato.n kaa dhyaan aataa hai to ye saa.ns ba.Dii hii besh-bahaa lagtii hai
mujh ko bhii to kaisii kaisii baato.n se raahat miltii hai
mujh ko is raahat me.n saadiq paa kar
saare jhuuT mirii tasdiiq ko aa jaate hai.n
ek agar mai.n sachchaa hotaa
merii is duniyaa me.n jitne qariine saje hu.e hai.n
un kii jagah be-tartiibii se pa.De hu.e kuchh Tuk.De hote
mere jism ke Tuk.De kaale jhuuT ke is chalte aare ke niiche

Majeed Amjad
Nazm

tahqiq pahle kar lo

haamid ne ik nabii kaa qissa mujhe sunaayaa
par baat thii kuchh aisii mujh ko yaqii.n na aayaa
ammii se mai.n ne puuchhaa abbuu se mai.n ne puuchhaa
daadaa huzuur ko bhii sab vaaqi.a bataayaa
ustaad-e-mohtaram se haasil kii rahnumaa.ii
apne imaam saahab kaa dar bhii khaTkhaTaayaa
phir ambiyaa ke qisso.n vaalii kitaab dekhii
lekin kahii.n bhii aisaa qissa ko.ii na paayaa
samjhaayaa mai.n ne jaa kar haamid ko us ke ghar par
yuu.n mat sunaa.o sab ko qissa sunaa sunaayaa
jo vaaqi.a sunaa.o tahqiiq pahle kar lo
ya.anii sahii Galat kii tasdiiq pahle kar lo

Ahmad Hatib Siddiqi
Nazm

aaina aur main

zamaane bhar me.n aa.iina sadaaqat kii alaamat hai
magar me.n is kaa munkir huu.n
bahut jhuuTaa hai aa.iina
kabhii vo dev-qaamat hastiyo.n ko ek dam baunaa dikhaataa hai
tilasmaatii hai aa.iina
kabhii pasta-qado.n kaa qad bahut uu.nchaa dikhaataa hai
bahut bahruupiyaa hai vo
ko.ii farba ho to us ko bahut dublaa dikhaataa hai
bahut hii masKHara hai vo
chalo jaane bhii do ki aa.ina insaan kii fitrat me.n shaayad Dhal gayaa hogaa
magar kuchh sho.abda-baazii kii had bhii hai
ye aa.iina to mujh se bhii hamesha makr kartaa hai
jo meraa haath ho siidhaa to vo ulTaa dikhaataa hai
agar ulTaa dikhaataa huu.n to phir siidhaa dikhaataa hai
bahut jhuuTaa hai aa.iina
magar aa.iina-e-ayyaam me.n takziib-e-aa.iina kii haisiyyat bhalaa kyaa hai
KHudaa jaane
magar taariiKH kahtii hai
yahii takziib-e-aa.iina, zamaane bhar ke shiishagar qabiile ke liye KHatraat kaa tasdiiq-naama hai
mirii tazriib-e-paiham se ye aa.iino.n ke saudaagar shikasta hai.n
shikasta kaifiyat me.n mujh se ye daryaaft karte hai.n
ki aaKHir kaun ho tum jii
tumhe.n in aa.ino.n se dushmanii kyuu.n hai
hamesha aa.ino.n kaa mu.nh chi.Dhaate ho, sadaa taz.hiik karte ho
tum aaKHir chaahte kyaa ho
to lo mai.n aaj ye elaan kartaa huu.n
mire is ahd ke shiishagaro, saudaagaro sun lo!
suno, aagaah ho jaa.o
mai.n shaa.er huu.n
mai.n aa.iine ko aa.iina dikhaataa huu.n!

Khalid Mubashshir
Nazm

takmil

''tumhe.n saabit karnaa hogaa ki tum ho''! us ne mujhe jhinjho.Daa
''magar mai.n ye saabit nahii.n kar saktii'' mai.n ne ehtijaaj kiyaa
us ne mujhe muTThii me.n bhar kar zamii.n par bikher diyaa aur KHushii se chillaayaa! ''tum sabza hii sabza ho, rang hii rang ho''
''Thahro! zaraa socho! mujhe jald KHizaa.n ke naadiida haath ma.aduum kar de.nge...... tum ye saabit nahii.n kar sakoge ki mai.n huu.n''
us ne ghabraa kar mujhe phir sameT liyaa aur zaraa tavaqquf ke baa'd fazaa me.n uchhaal diyaa aur pur-josh ho kar bolaa
''dekhaa tum raushnii hii raushnii ho''
''haa.n magar taariikii mujhe nigalne ko betaab hai! mai.n ne kahaa thaa naa mai.n KHud ko saabit karne se qaasir huu.n''
us ne hiraasaa.n ho kar mujhe muTThii me.n jaka.D liyaa....... naa-tamaamii ke dard se merii aa.nkhe.n chhalak pa.Dii.n
us ne mujhe bahne ke liye nasheb me.n chho.D diyaa aur muskuraayaa
''dekhaa tum maaya hii maaya ho''
''mujhe vaqt kii tez dhuup jald KHushk kar degii'' mai.n ne duhaa.ii dii
vo Gusse se kaa.npne lagaa.... phir mujhe saamne rakh kar gi.Dgi.Daayaa
''KHud ko saabit karo KHudaa-raa nahii.n to mai.n miT jaa.uu.ngaa!
hamaarii takmiil zaruurii hai''
''naa-guziir hai! mai.n ne taa.iid kii
aa.o mai.n tumhe.n zeb-e-tan kar luu.n! nahii.n to ham tasdiiq ke haq se mahruum ho jaa.e.nge, ham kabhii saabit na ho sake.nge''
''haa.n hame.n apnii tasdiiq karnii hogii'' us ne mujh me.n zam hote hu.e kahaa
......aur phir ham ne dekhaa... ra.ng... roshnii... sabza... maya... husn aur hairat sab hamaare butuun kii jaagiire.n thii.n
baahar to sirf dhu.aa.n thaa

Naina Adil
Nazm

katba(4)

vo ik shaKHs thaa
jo akelaa thaa us kaa ko.ii bhii na thaa
ik ikaa.ii thaa vo
aur ik din KHud apnii ikaa.ii me.n zam ho gayaa
is ne marte hu.e ik vasiyyat likhii
jis me.n likkhaa thaa!
ai aadmii!
ai vo ik shaKHs
jo mire marne kii pahlii KHabar sun ke dau.De
aur aavaaz de bhaa.iyo aa.o is kaa janaaza uThaa.o
aur is aavaaz pe ko.ii aavaaz us tak na pahu.nche
aur phir mujh se bekas akele ko kaa.ndho.n pe apne dhare
aur akelii sii ik qabr me.n mujh ko pahu.nchaa ke mahfuuz kar de
meraa vo dost itnaa saa ehsaan mujh par kare
vo mirii qabr par ek saada saa katba lagaa.e
aur us par miraa naam likh de
sach kahuu.n is se mai.n apnii shohrat nahii.n chaahtaa
kyaa miraa naam aur kyuu.n vo baaqii rahe
mai.n is vaaste chaahtaa huu.n ki jab
shahr ke log ye sun ke dau.De.n
ki dekho ye mash.huur hai, log kahte hai.n vo shaKHs to mar gayaa
sochte hai.n ye usii kii sharaarat na ho
taaki ham log ab us se Gaafil rahe.n
us ke fitne se apne ko mahfuuz samjhe.n
bas yahii chaahtaa huu.n
ki aisaa ko.ii shaKHs Dhuu.nDhe mujhe
to suhulat ho us ko ye tasdiiq karne kii
ye shaKHs sach-much nahii.n hai
vo ab mar chukaa hai
mai.n to ab dushmano.n ke bhii aaraam ke haq me.n huu.n
kyuu.n kisii ko kisii se KHalal ho?
kyuu.n kisii ko naam se ek dahshat ho?
saare insaan duniyaa me.n aaraam se so.e.n aur KHush rahe.n

Khalilur Rahman Azmi
Nazm

mukammal sher

meraa ye sher sun kar us ne tho.Dii der sochaa
aur phir dhiire se apnaa naam ho.nTo.n par sajaa kar
us ne mere sher kii tasdiiq kar dii
aur miraa likhnaa mukammal ho gayaa thaa

Amit Goswami
Nazm

nind mein chalti maut

vo kyaa silsila thaa
jo ik god se gor tak reshmii taar saa tan gayaa
jis pe chalte zamaane
KHudaa-vand-e-a.alaa ke ahkaam-e-rahmat uThaa.e hu.e
raqs karte guzarte
to miTTii pe naqsh-o-nigaaraan-e-Gam muskuraate
tujhe yaad aate
tujhe yaad karte hu.e
yuu.n guzre
ki jaise kisii bhed-bhaav bharii chaa.ndnii raat se
chaa.nd kaa baa.nkpan
baadalo.n ke la.Dakpan ke gaale u.Daate hu.e
KHvaab-labrez pariyo.n se
chhup-chhup ke guzre
ye dikhne dikhaane kii saarii mashii.at
ye chhupne chhupaane kii saarii aziyyat
ko.ii jheltaa hai
jo tuu ne akele me.n jhelii
mai.n kitne dino.n baad aaya tire paa.nv chhuune
hisaab is KHajaalat kaa karte hu.e
kitne aa.nsuu gire
mai.n nahii.n gin sakaa
bhiigte phailte lafz a.adaad jab bhii samundar banaate
tire naam kii naav mujh ko kinaare lagaatii
magar ye kinaara ko.ii kahkashaa.n to nahii.n thaa
ki mai.n tere laa-vaqt saahil pe
KHud apne paa.nv ke miTte nishaa.n dekh kar muskuraataa
vo gintii kaa maa'kuusii ziina thaa
taht-us-saraa tak ravaa.n re.ngtii aabnaa.e thii
aa.nkho.n kaa kaarez thii
terii mohabbat kii vo daastaa.n
jis ko likhne kii koshish me.n laakho.n varaq
mai.n ne kaale kiye
magar ek lamha bhii mere qalam par
vo KHush-rang ilhaam ban kar na utraa
jise tere ho.nTo.n kii tasdiiq miltii

Ali Mohammad Farshi
Nazm

nazm

lekin ye baat bhii ek din Galat saabit ho ga.ii
mere ghar se daftar tak ke raaste me.n
ko.ii daraKHt thaa hii nahii.n
ye mujhe ka.ii logo.n ne bataayaa
duusre ka.ii logo.n ne is baat kii tasdiiq kii
kuchh ne ye maan.ne tak se inkaar kar diyaa
ki is raaste par kabhii ko.ii daraKHt bhii thaa
us roz jab mai.n udaas aur Gamgii.n
office se ghar lauT rahaa thaa
mere raaste ke dono.n jaanib
daraKHt sa.Dak par niiche tak jhuk aa.e the
har ghar kii chaar diivaarii ke uupar se
ek na ek daraKHt jhaa.nk rahaa thaa
gharo.n kii balconiyo.n
aur chhato.n par ug aa.e the daraKHt
kuchh daraKHt to ulTe hii kha.De the
kuchh aadhe diivaaro.n me.n
aur aadhe diivaaro.n ke shagaafo.n se
baahar nikal kar
sa.Dak ko yuu.n tak rahe the
jaise raahgiiro.n ko gin rahe ho.n

Saeeduddin
Nazm

tazlil

ye bhii kahaa ki
''mutribo.n kaa taa.ifa
un ke liye hai sirf jin kaa saame.a
mo'taqid hai sub.h-e-nau ke tarbiya ilhaan kaa''
aur taa.ero.n ne yak zabaa.n
is baat kii tasdiiq kii
gardan hilaa.ii saaq par
har phuul ne
aur piiTh de kar apnii KHushbuu rok lii
mu.nh mo.D kar shaaKHo.n ne rokii hai havaa

Asif Raza
Nazm

naya frame

pahle safhe par sarkaarii KHazaane kaa hisaab hai
duusre safhe par purohit ke jaarii karda ibaadat ke ahkaam
tiisre safhe par un mujrmo.n ke naam hai.n
jinhe.n ek manhuus du.aa ke jurm me.n
duusre din saliib par cha.Dhaayaa jaanaa thaa
us ke baa'd kuchh saada safhaat hai.n
shaayad kitaab kaa musannif bhii maar diyaa gayaa
is kii tasdiiq aage kii in du.aa.o.n se hotii hai
jo mare hu.o.n kii maGfirat ke liye sarkaarii purohito.n ne maa.nge.n
aur jo badlii hu.ii tahriir me.n thii.n

Saeeduddin
Nazm

rasm-e-ijra

mirii mushkil kaa tum hii hal nikaalo
tumhii.n tasliim kar lo
haa.n mire hii naam par diivaane ne diivaan likkhaa hai
muqaddas lab se gar
tasdiiq kar do tum
mire majmuu’e kii
is se ziyaada KHuub-suurat aur mukammal
rasm-e-ijraa aur ko.ii ho nahii.n saktii

Amit Goswami
Nazm

jhulta saya

kyaa maan.naa jaan.ne kii pahlii shart hai
aur jaan.naa maan.ne kii mahz tasdiiq-bhar hai

Veneet Raja
Nazm

muft mujhe badnam kiya

naahaq kaa ye naam na do
bejaa yuu.n ilzaam na do
sach kyaa hai tasdiiq karo
rab se apne sadaa Daro
aaKHir tum ne duniyaa ko
ye kaisaa paiGaam diyaa
muft mujhe badnaam kiyaa

Amanul Haque Balapuri
Nazm

aatish-e-diwar

bhuulne vaale aa.o phir se tajdiid-e-vafaa karte hai.n
jahaa.n se haath kii lakiire.n noch Daalii thii.n
phir se un me.n rang bharte hai.n
jab Dhalne lage raat kaa pahra
phir sub.h kaa dam bharte hai.n
tujh ko vo pal yaad to ho.nge
naGme band aa.nkho.n me.n tairte ho.nge
yaad hai vo sab qahr kii ThanDii raate.n
qaus-e-quzah ke rango.n sii baate.n
tasavvur-o-tasviir banii hai taKHliiq merii
kuchh taariif kuchh tasdiiq terii
merii baato.n se kuchh mausam yaad aa jaa.e.nge
tujh ko sab mafhuum samajh aa jaa.e.nge
yaqiin hai mujh ko aise hii phir ik din aa milegaa tuu
merii tarah kuchh sulagtaa saa kuchh bujhaa-bujhaa saa
bikhraa bikhraa udaasiyo.n me.n sisaktaa saa
jhukii-jhukii aa.nkho.n me.n aa.nsuu kuchh pashemaanii sii
chehre pe KHaamoshii Thahrii kuchh hairaanii sii
zaKHm kaa ghaav jab bhar jaa.egaa
tab chain kahii.n aa jaa.egaa
tuu bichh.Daa thaa ik zid me.n aa kar
KHud hii ab aatishii diivaar giraa.egaa

Farkhanda Razvi
Nazm

mujhse pahli si mohabbat meri mahbub na mang

mujh se pahlii sii mohabbat mirii mahbuub na maa.ng
mai.n ne samjhaa thaa ki tuu hai to daraKHshaa.n hai hayaat
teraa Gam hai to Gam-e-dahr kaa jhag.Daa kyaa hai
terii suurat se hai aalam me.n bahaaro.n ko sabaat
terii aa.nkho.n ke sivaa duniyaa me.n rakkhaa kyaa hai
tuu jo mil jaa.e to taqdiir niguu.n ho jaa.e
yuu.n na thaa mai.n ne faqat chaahaa thaa yuu.n ho jaa.e
aur bhii dukh hai.n zamaane me.n mohabbat ke sivaa
raahate.n aur bhii hai.n vasl kii raahat ke sivaa

Faiz Ahmad Faiz
Nazm

shikwa

kyuu.n ziyaa.n-kaar banuu.n suud-faraamosh rahuu.n
fikr-e-fardaa na karuu.n mahv-e-Gam-e-dosh rahuu.n
naale bulbul ke sunuu.n aur hama-tan gosh rahuu.n
ham-navaa mai.n bhii ko.ii gul huu.n ki KHaamosh rahuu.n
jur.at-aamoz mirii taab-e-suKHan hai mujh ko
shikva allaah se KHaakam-ba-dahan hai mujh ko
hai bajaa sheva-e-tasliim me.n mash.huur hai.n ham
qissa-e-dard sunaate hai.n ki majbuur hai.n ham
saaz KHaamosh hai.n fariyaad se maamuur hai.n ham
naala aataa hai agar lab pe to ma.azuur hai.n ham
ai KHudaa shikva-e-arbaab-e-vafaa bhii sun le
KHuugar-e-hamd se tho.Daa saa gila bhii sun le
thii to maujuud azal se hii tirii zaat-e-qadiim
phuul thaa zeb-e-chaman par na pareshaa.n thii shamiim
shart insaaf hai ai saahib-e-altaaf-e-amiim
buu-e-gul phailtii kis tarah jo hotii na nasiim
ham ko jam.iiyat-e-KHaatir ye pareshaanii thii
varna ummat tire mahbuub kii diivaanii thii
ham se pahle thaa ajab tere jahaa.n kaa manzar
kahii.n masjuud the patthar kahii.n ma.abuud shajar
KHuugar-e-paikar-e-mahsuus thii insaa.n kii nazar
maantaa phir ko.ii an-dekhe KHudaa ko kyuu.nkar
tujh ko ma.aluum hai letaa thaa ko.ii naam tiraa
quvvat-e-baazu-e-muslim ne kiyaa kaam tiraa
bas rahe the yahii.n saljuuq bhii tuuraanii bhii
ahl-e-chii.n chiin me.n iiraan me.n saasaanii bhii
isii maamuure me.n aabaad the yuunaanii bhii
isii duniyaa me.n yahuudii bhii the nasraanii bhii
par tire naam pe talvaar uThaa.ii kis ne
baat jo big.Dii hu.ii thii vo banaa.ii kis ne
the hamii.n ek tire maarka-aaraa.o.n me.n
KHushkiyo.n me.n kabhii la.Dte kabhii dariyaa.o.n me.n
dii.n azaane.n kabhii europe ke kaliisaa.o.n me.n
kabhii africa ke tapte hu.e sahraa.o.n me.n
shaan aa.nkho.n me.n na jachtii thii jahaa.n-daaro.n kii
kalma pa.Dhte the hamii.n chhaa.nv me.n talvaaro.n kii
ham jo jiite the to jango.n kii musiibat ke liye
aur marte the tire naam kii azmat ke liye
thii na kuchh teGzanii apnii hukuumat ke liye
sar-ba-kaf phirte the kyaa dahr me.n daulat ke liye
qaum apnii jo zar-o-maal-e-jahaa.n par martii
but-faroshii ke evaz but-shikanii kyuu.n kartii
Tal na sakte the agar jang me.n a.D jaate the
paa.nv shero.n ke bhii maidaa.n se ukha.D jaate the
tujh se sarkash hu.aa ko.ii to biga.D jaate the
teG kyaa chiiz hai ham top se la.D jaate the
naqsh-e-tauhiid kaa har dil pe biThaayaa ham ne
zer-e-KHanjar bhii ye paiGaam sunaayaa ham ne
tuu hii kah de ki ukhaa.Daa dar-e-KHaibar kis ne
shahr qaisar kaa jo thaa us ko kiyaa sar kis ne
to.De maKHluuq KHudaa-vando.n ke paikar kis ne
kaaT kar rakh diye kuffaar ke lashkar kis ne
kis ne ThanDaa kiyaa aatish-kada-e-iiraa.n ko
kis ne phir zinda kiyaa tazkira-e-yazdaa.n ko
kaun sii qaum faqat terii talabgaar hu.ii
aur tere liye zahmat-kash-e-paikaar hu.ii
kis kii shamshiir jahaa.ngiir jahaa.n-daar hu.ii
kis kii takbiir se duniyaa tirii bedaar hu.ii
kis kii haibat se sanam sahme hu.e rahte the
mu.nh ke bal gir ke huu-allahu-ahad kahte the
aa gayaa ain la.Daa.ii me.n agar vaqt-e-namaaz
qibla-ruu ho ke zamii.n-bos hu.ii qaum-e-hijaaz
ek hii saf me.n kha.De ho ga.e mahmuud o ayaaz
na ko.ii banda rahaa aur na ko.ii banda-navaaz
banda o saahab o mohtaaj o Ganii ek hu.e
terii sarkaar me.n pahu.nche to sabhii ek hu.e
mahfil-e-kaun-o-makaa.n me.n sahar o shaam phire
mai-e-tauhiid ko le kar sifat-e-jaam phire
koh me.n dasht me.n le kar tiraa paiGaam phire
aur ma.aluum hai tujh ko kabhii naakaam phire
dasht to dasht hai.n dariyaa bhii na chho.De ham ne
bahr-e-zulmaat me.n dau.Daa diye gho.De ham ne
safha-e-dahr se baatil ko miTaayaa ham ne
nau-e-insaa.n ko Gulaamii se chhu.Daayaa ham ne
tere ka.abe ko jabiino.n se basaayaa ham ne
tere qur.aan ko siino.n se lagaayaa ham ne
phir bhii ham se ye gila hai ki vafaadaar nahii.n
ham vafaadaar nahii.n tuu bhii to dildaar nahii.n
ummate.n aur bhii hai.n un me.n gunahgaar bhii hai.n
ijz vaale bhii hai.n mast-e-mai-e-pindaar bhii hai.n
un me.n kaahil bhii hai.n Gaafil bhii hai.n hushyaar bhii hai.n
saik.Do.n hai.n ki tire naam se be-zaar bhii hai.n
rahmate.n hai.n tirii aGyaar ke kaashaano.n par
barq girtii hai to bechaare musalmaano.n par
but sanam-KHaano.n me.n kahte hai.n musalmaan ga.e
hai KHushii un ko ki ka.abe ke nigahbaan ga.e
manzil-e-dahr se uu.nTo.n ke hudii-KHvaan ga.e
apnii baGlo.n me.n dabaa.e hu.e qur.aan ga.e
KHanda-zan kufr hai ehsaas tujhe hai ki nahii.n
apnii tauhiid kaa kuchh paas tujhe hai ki nahii.n
ye shikaayat nahii.n hai.n un ke KHazaane maamuur
nahii.n mahfil me.n jinhe.n baat bhii karne kaa shu.uur
qahr to ye hai ki kaafir ko mile.n huur o qusuur
aur bechaare musalmaa.n ko faqat vaada-e-huur
ab vo altaaf nahii.n ham pe inaayaat nahii.n
baat ye kyaa hai ki pahlii sii mudaaraat nahii.n
kyuu.n musalmaano.n me.n hai daulat-e-duniyaa naayaab
terii qudrat to hai vo jis kii na had hai na hisaab
tuu jo chaahe to uThe siina-e-sahraa se habaab
rah-rav-e-dasht ho sailii-zada-e-mauj-e-saraab
taan-e-aGyaar hai rusvaa.ii hai naadaarii hai
kyaa tire naam pe marne kaa evaz KHvaarii hai
banii aGyaar kii ab chaahne vaalii duniyaa
rah ga.ii apne liye ek KHayaalii duniyaa
ham to ruKHsat hu.e auro.n ne sa.nbhaalii duniyaa
phir na kahnaa hu.ii tauhiid se KHaalii duniyaa
ham to jiite hai.n ki duniyaa me.n tiraa naam rahe
kahii.n mumkin hai ki saaqii na rahe jaam rahe
terii mahfil bhii ga.ii chaahne vaale bhii ga.e
shab kii aahe.n bhii ga.ii.n sub.h ke naale bhii ga.e
dil tujhe de bhii ga.e apnaa sila le bhii ga.e
aa ke baiThe bhii na the aur nikaale bhii ga.e
aa.e ushshaaq ga.e vaada-e-fardaa le kar
ab unhe.n Dhuu.nD charaaG-e-ruKH-e-zebaa le kar
dard-e-lailaa bhii vahii qais kaa pahluu bhii vahii
najd ke dasht o jabal me.n ram-e-aahuu bhii vahii
ishq kaa dil bhii vahii husn kaa jaaduu bhii vahii
ummat-e-ahmad-e-mursil bhii vahii tuu bhii vahii
phir ye aazurdagi-e-Gair sabab kyaa ma.anii
apne shaidaa.o.n pe ye chashm-e-Gazab kyaa ma.anii
tujh ko chho.Daa ki rasuul-e-arabii ko chho.Daa
but-garii pesha kiyaa but-shikanii ko chho.Daa
ishq ko ishq kii aashufta-sarii ko chho.Daa
rasm-e-salmaan o uvais-e-qaranii ko chho.Daa
aag takbiir kii siino.n me.n dabii rakhte hai.n
zindagii misl-e-bilaal-e-habashii rakhte hai.n
ishq kii KHair vo pahlii sii adaa bhii na sahii
jaada-paimaali-e-tasliim-o-razaa bhii na sahii
muztarib dil sifat-e-qibla-numaa bhii na sahii
aur paabandi-e-aa.iin-e-vafaa bhii na sahii
kabhii ham se kabhii Gairo.n se shanaasaa.ii hai
baat kahne kii nahii.n tuu bhii to harjaa.ii hai
sar-e-faaraa.n pe kiyaa diin ko kaamil tuu ne
ik ishaare me.n hazaaro.n ke liye dil tuu ne
aatish-andoz kiyaa ishq kaa haasil tuu ne
phuu.nk dii garmi-e-ruKHsaar se mahfil tuu ne
aaj kyuu.n siine hamaare sharer-aabaad nahii.n
ham vahii soKHta-saamaa.n hai.n tujhe yaad nahii.n
vaadii-e-najd me.n vo shor-e-salaasil na rahaa
qais diivaana-e-nazzaara-e-mahmil na rahaa
hausle vo na rahe ham na rahe dil na rahaa
ghar ye uj.Daa hai ki tuu raunaq-e-mahfil na rahaa
ai KHushaa aa.n roz ki aa.ii o ba-sad naaz aa.ii
be-hijaabaana suu-e-mahfil-e-maa baaz aa.ii
baada-kash Gair hai.n gulshan me.n lab-e-juu baiThe
sunte hai.n jaam-ba-kaf naGma-e-kuu-kuu baiThe
daur ha.ngaama-e-gulzaar se yaksuu baiThe
tere diivaane bhii hai.n muntazir-e-huu baiThe
apne parvaano.n ko phir zauq-e-KHud-afrozii de
barq-e-deriina ko farmaan-e-jigar-sozii de
qaum-e-aavaara inaa.n-taab hai phir suu-e-hijaaz
le u.Daa bulbul-e-be-par ko mazaaq-e-parvaaz
muztarib-e-baaG ke har Gunche me.n hai buu-e-niyaaz
tuu zaraa chhe.D to de tishna-e-mizraab hai saaz
naGme betaab hai.n taaro.n se nikalne ke liye
tuur muztar hai usii aag me.n jalne ke liye
mushkile.n ummat-e-marhuum kii aasaa.n kar de
mor-e-be-maaya ko ham-dosh-e-sulaimaa.n kar de
jins-e-naayaab-e-mohabbat ko phir arzaa.n kar de
hind ke dair-nashiino.n ko musalmaa.n kar de
juu-e-KHuu.n mii chakad az hasrat-e-dairiina-e-maa
mii tapad naala ba-nishtar kada-e-siina-e-maa
buu-e-gul le ga.ii bairuun-e-chaman raaz-e-chaman
kyaa qayaamat hai ki KHud phuul hai.n Gammaaz-e-chaman
ahd-e-gul KHatm hu.aa TuuT gayaa saaz-e-chaman
u.D ga.e Daaliyo.n se zamzama-pardaaz-e-chaman
ek bulbul hai ki mahv-e-tarannum ab tak
us ke siine me.n hai naGmo.n kaa talaatum ab tak
qumriyaa.n shaaKH-e-sanobar se gurezaa.n bhii hu.ii.n
pattiyaa.n phuul kii jha.D jha.D ke pareshaa.n bhii hu.ii.n
vo puraanii raushe.n baaG kii viiraa.n bhii hu.ii.n
Daaliyaa.n pairahan-e-barg se uryaa.n bhii hu.ii.n
qaid-e-mausam se tabii.at rahii aazaad us kii
kaash gulshan me.n samajhtaa ko.ii fariyaad us kii
lutf marne me.n hai baaqii na maza jiine me.n
kuchh maza hai to yahii KHuun-e-jigar piine me.n
kitne betaab hai.n jauhar mire aa.iine me.n
kis qadar jalve ta.Dapte hai.n mire siine me.n
is gulistaa.n me.n magar dekhne vaale hii nahii.n
daaG jo siine me.n rakhte ho.n vo laale hii nahii.n
chaak is bulbul-e-tanhaa kii navaa se dil ho.n
jaagne vaale isii baa.ng-e-daraa se dil ho.n
ya.anii phir zinda na.e ahd-e-vafaa se dil ho.n
phir isii baada-e-dairiina ke pyaase dil ho.n
ajamii KHum hai to kyaa mai to hijaazii hai mirii
naGma hindii hai to kyaa lai to hijaazii hai mirii

Allama Iqbal
Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

taj-mahal

merii mahbuub pas-e-parda-e-tash.hiir-e-vafaa
tuu ne satvat ke nishaano.n ko to dekhaa hotaa

Sahir Ludhianvi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now