Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "ubhre"

Nazm MATCHES FOR "ubhre"

Nazm

26 january

aa.o ki aaj Gaur kare.n is savaal par
dekhe the ham ne jo vo hasii.n KHvaab kyaa hu.e
daulat ba.Dhii to mulk me.n iflaas kyuu.n ba.Dhaa
KHush-haalii-e-avaam ke asbaab kyaa hu.e
jo apne saath saath chale ku-e-daar tak
vo dost vo rafiiq vo ahbaab kyaa hu.e
kyaa mol lag rahaa hai shahiido.n ke KHuun kaa
marte the jin pe ham vo sazaa-yaab kyaa hu.e
be-kas barahnagii ko kafan tak nahii.n nasiib
vo va.ada-haa-e-atlas-o-kim-KHvaab kyaa hu.e
jamhuuriyat-navaaz bashar-dost amn-KHvaah
KHud ko jo KHud diye the vo alqaab kyaa hu.e
maz.hab kaa rog aaj bhii kyuu.n laa-'ilaaj hai
vo nusKHa-haa-e-naadir-o-naayaab kyaa hu.e
har kuucha sho'la-zaar hai har shahr qatl-gaah
yak-jehtii-e-hayaat ke aadaab kyaa hu.e
sahraa-e-tiirgii me.n bhaTaktii hai zindagii
ubhre the jo ufuq pe vo mahtaab kyaa hu.e
mujrim huu.n mai.n agar to gunahgaar tum bhii ho
ai rahbaraan-e-qaum KHataa-kaar tum bhii ho

Sahir Ludhianvi
Nazm

teri aawaz

raat kii sat.h par ubhre tire chehre ke nuquush
vahii chup-chaap sii aa.nhke.n vahii saada sii nazar
vahii Dhalkaa hu.aa aa.nchal vahii raftaar kaa KHam
vahii rah rah ke lachaktaa hu.aa naazuk paikar

Sahir Ludhianvi
Nazm

hinDola

dayaar-e-hind thaa gahvaara yaad hai hamdam
bahut zamaana hu.aa kis ke kis ke bachpan kaa
isii zamiin pe khelaa hai 'raam' kaa bachpan
isii zamiin pe un nanhe nanhe haatho.n ne
kisii samay me.n dhanush-baan ko sambhaalaa thaa
isii dayaar ne dekhii hai 'krishn' kii liilaa
yahii.n gharo.ndo.n me.n siitaa sulochanaa raadhaa
kisii zamaane me.n gu.Diyo.n se kheltii ho.ngii
yahii zamii.n yahii dariyaa pahaa.D jangal baaG
yahii havaa.e.n yahii sub.h-o-shaam suuraj chaa.nd
yahii ghaTaa.e.n yahii barq-o-ra.ad o qaus-e-quzah
yahii.n ke giit rivaayaat mausamo.n ke juluus
hu.aa zamaana ki 'siddhaarth' ke the gahvaare
inhii nazaaro.n me.n bachpan kaTaa thaa 'vikram' kaa
sunaa hai 'bhartarharii' bhii inhii.n se khelaa thaa
'bharat' agastya' 'kapil' 'vyaas' 'pashii' 'kautilya'
'janak' vashishth' 'manu' 'vaalmik' vishvaamitr
'kanaad' 'gautam' o ramanuj 'kumaaril-bhatt'
mohanjoDaaro ha.Dappaa ke aur ajantaa ke
banaane vaale yahii.n ballamo.n se khele the
isii hi.nDole me.n 'bhavabhut' o 'kaaliidaas' kabhii
humak humak ke jo tutlaa ke gungunaa.e the
sarasvatii ne zabaano.n ko un kii chuumaa thaa
yahii.n ke chaa.nd va suuraj khilaune the un ke
inhii.n fazaa.o.n me.n bachpan palaa thaa 'KHusrav' kaa
isii zamii.n se uThe 'tansen' aur 'akbar'
'rahiim' 'nanak' o 'chaitanya' aur 'chishti' ne
inhii.n fazaa.o.n me.n bachpan ke din guzaare the
isii zamii.n pe kabhii shazaada-e-'KHurram'
zaraa sii dil-shikanii par jo ro diyaa hogaa
bhar aayaa thaa dil-e-naazuk to kyaa ajab is me.n
in aa.nsu.o.n me.n jhalak taaj kii bhii dekhii ho
'ahalyabaa.i' 'daman' 'padmini' o 'raziya' ne
yahii.n ke pe.Do.n kii shaaKHo.n me.n Daale the jhuule
isii fazaa me.n ba.Dhaa.ii thii pe.ng bachpan kii
inhii nazaaro.n me.n saavan ke giit gaa.e the
isii zamiin pe ghuTno.n ke bal chale ho.nge
'malik-mohammad' o 'raskhan' aur 'tulsi-das'
inhii.n fazaa.o.n me.n guu.njii thii totlii bolii
'kabir-das' 'Tukaaraam' 'suur' o 'miiraa' kii
isii hi.nDole me.n 'viddypati' kaa ka.nTh khulaa
isii zamiin ke the laal 'miir' o 'Gaalib' bhii
Thumak Thumak ke chale the gharo.n ke aa.ngan me.n
'aniis' o 'haalii' o 'iqbaal' aur 'vaaris-shaah'
yahii.n kii KHaak se ubhre the 'premchand' o 'tagore'
yahii.n se uTThe the tahziib-e-hind ke me.amaar
isii zamiin ne dekhaa thaa baal-pan in kaa
yahii.n dikhaa.ii thii.n in sab ne baal-liilaa.e.n
yahii.n har ek ke bachpan ne tarbiyat paa.ii
yahii.n har ek ke jiivan kaa baalkaa.nD khulaa
yahii.n se uThte baguulo.n ke saath dau.De hai.n
yahii.n kii mast ghaTaa.o.n ke saath jhuume hai.n
yahii.n kii madh-bharii barsaat me.n nahaa.e hai.n
lipaT ke kiicha.D o paanii se bachpane un ke
isii zamiin se uTThe vo desh ke saava.nt
u.Daa diyaa thaa jinhe.n company ne topo.n se
isii zamiin se uThii hai.n an-ginat nasle.n
pale hai.n hind hi.nDole me.n an-ginat bachche
mujh aise kitne hii gumnaam bachche khele hai.n
isii zamii.n se isii me.n supurd-e-KHaak hu.e
zamiin-e-hind ab aaraam-gaah hai un kii
is arz-e-paak se uTThii.n bahut sii tahziibe.n
yahii.n tuluu hu.ii.n aur yahii.n Guruub hu.ii.n
isii zamiin se ubhre ka.ii uluum-o-funuun
faraaz-e-koh-e-himaala ye daur-e-ga.ng-o-jaman
aur in kii god me.n parvarda kaarvaano.n ne
yahii.n rumuuz-e-KHiraam-e-sukuu.n-numaa siikhe
nasiim-e-sub.h-e-tamaddun ne bhairvii.n chhe.Dii
yahii.n vatan ke taraano.n kii vo pave.n phuuTe.n
vo be-qaraar sukuu.n-zaa tarannum-e-saharii
vo kapkapaate hu.e soz-o-saaz ke sho.ale
inhii fazaa.o.n me.n a.ng.Daa.iyaa.n jo le ke uThe
lavo.n se jin ke charaaGaa.n hu.ii thii bazm-e-hayaat
jinho.n ne hind kii tahziib ko zamaana hu.aa
bahut se zaaviyo.n se aa.iina dikhaayaa thaa
isii zamii.n pe Dhalii hai mirii hayaat kii shaam
isii zamiin pe vo sub.h muskuraa.ii hai
tamaam sho.ala o shabnam mirii hayaat kii sub.h
sunaa.uu.n aaj kahaanii mai.n apne bachpan kii
dil-o-dimaaG kii kaliyaa.n abhii na chaTkii thii.n
hamesha kheltaa rahtaa thaa bhaa.ii bahno.n me.n
hamaare saath mohalle kii la.Dkiyaa.n la.Dke
machaa.e rakhte the baalak udham har ek gha.Dii
lahuu tara.ng uchhal-phaa.nd kaa ye aalam thaa
mohalla sar pe uThaa.e phire jidhar guzre
hamaare chahchahe aur shor guu.njte rahte
chahaar-samt mohalle ke goshe goshe me.n
fazaa me.n aaj bhii laa-raib guu.njte ho.nge
agarche duusre bachcho.n kii tarah thaa mai.n bhii
ba-zaahir auro.n ke bachpan saa thaa miraa bachpan
ye sab sahii mire bachpan kii shaKHsiyat bhii thii ek
vo shaKHsiyat ki bahut shoKH jis ke the KHad-o-KHaal
adaa adaa me.n ko.ii shaan-e-infiraadii thii
Garaz kuchh aur hii lachchhan the mere bachpan ke
mujhe thaa chhoTe ba.Do.n se bahut shadiid lagaav
har ek par mai.n chhi.Daktaa thaa apnii nannhii sii jaa.n
dil umDaa aataa thaa aisaa ki jii ye chaahtaa thaa
uThaa ke rakh luu.n kaleje me.n apnii duniyaa ko
mujhe hai yaad abhii tak ki khel-kuud me.n bhii
kuchh aise vaqfe pur-asraar aa hii jaate the
ki jin me.n sochne lagtaa thaa kuchh miraa bachpan
ka.ii ma.aanii-e-be-lafz chhuune lagte the
butuun-e-Gaib se mere shu.uur-e-asGar ko
har ek manzar-e-maanuus ghar kaa har gosha
kisii tarah kii ho ghar me.n sajii hu.ii har chiiz
mire mohalle kii galiyaa.n makaa.n dar-o-diivaar
chabuutre ku.e.n kuchh pe.D jhaa.Diyaa.n bele.n
vo pherii vaale ka.ii un ke bhaa.nt bhaa.nt ke bol
vo jaane buujhe manaazir vo aasmaa.n o zamii.n
badalte vaqt kaa aa.iina garmii-o-KHunkii
Guruub-e-mahr me.n ra.ngo.n kaa jaagtaa jaaduu
shafaq ke shiish-mahal me.n gudaaz-e-pinhaa.n se
javaahro.n kii chaTaane.n sii kuchh pighaltii hu.ii.n
shajar hajar kii vo kuchh sochtii hu.ii duniyaa
suhaanii raat kii maanuus ramaziyat kaa fusuu.n
alassabaah ufuq kii vo thartharaatii bhave.n
kisii kaa jhaa.nknaa aahista phuuTtii pau se
vo dopahar kaa samay darja-e-tapish kaa cha.Dhaav
thakii thakii sii fazaa me.n vo zindagii kaa utaar
hu.aa kii bansiyaa.n ba.nsvaa.Diyo.n me.n bajtii hu.ii.n
vo din ke ba.Dhte hu.e saa.e sah-pahar kaa sukuu.n
sukuut shaam kaa jab dono.n vaqt milte hai.n
Garaz jhalakte hu.e sarsarii manaazir par
mujhe gumaan paristaaniyat kaa hotaa thaa
har ek chiiz kii vo KHvaab-naak asliyyat
mire shu.uur kii chilman se jhaa.nktaa thaa ko.ii
liye rubuubiyat-e-kaa.enaat kaa ehsaas
har ek jalve me.n Gaib o shuhuud kaa vo milaap
har ik nazaara ik aa.iina-KHaana-e-hairat
har ek manzar-e-maanuus ek hairat-zaar
kahii.n rahuu.n kahii.n khelo.n kahii.n pa.Dhuu.n likhuu.n
mire shu.uur pe ma.nDlaate the manaazir-e-dahr
mai.n akasr un ke tasavvur me.n Duub jaataa thaa
vafuur-e-jazba se ho jaatii thii mizha pur-nam
mujhe yaqiin hai in unsurii manaazir se
ki aam bachcho.n se letaa thaa mai.n ziyaada asar
kisii samay mirii tiflii rahii na be-parvaa
na chhuu sakii mirii tiflii ko Gaflat-e-tiflii
ye khel-kuud ke lamho.n me.n hotaa thaa ehsaas
du.aa.e.n detaa ho jaise mujhe sukuut-e-davaam
ki jaise haath abad rakh de dosh-e-tiflii par
har ek lamha ke raKHno.n se jhaa.nktii sadiyaa.n
kahaaniyaa.n jo sunuu.n un me.n Duub jaataa thaa
ki aadmii ke liye aadmii kii jag-biitii
se ba.Dh ke kaun sii shai aur ho hii saktii hai
inhii fasaano.n me.n pinhaa.n the zindagii ke rumuuz
inhii fasaano.n me.n khulte the raaz-haa-e-hayaat
unhe.n fasaano.n me.n miltii thii.n ziist kii qadre.n
rumuuz-e-besh-bahaa TheTh aadmiyat ke
kahaaniyaa.n thii.n ki sad-dars-gaah-e-riqqat-e-qalb
har ik kahaanii me.n shaa.istagi-e-Gam kaa sabaq
vo unsur aa.nsu.o.n kaa daastaan-e-insaa.n me.n
vo nal-daman kii kathaa sarguzasht-e-savitrii
'shakuntlaa' kii kahaanii 'bharat' kii qurbaanii
vo marg-e-bhishm-pitaamah vo sej tiiro.n kii
vo paan.cho paa.nDav kii sovarg-yaatraa kii kathaa
vatan se ruKHsat-e-'siddhaarth' 'raam' kaa ban-baas
vafaa ke baa'd bhii 'siitaa' kii vo jalaa-vatanii
vo raato.n-raat 'sirii-krishn' ko uThaa.e hu.e
balaa kii qaid se 'basdev' kaa nikal jaanaa
vo a.ndhkaar vo baarish, ba.Dhii hu.ii jamunaa
Gam-e-aafriin kahaanii vo 'hiir' 'raa.njhaa' kii
shu.uur-e-hind ke bachpan kii yaadgaar-e-aziim
ki aise vaise taKHayyul kii saa.ns ukha.D jaa.e
ka.ii muhayyur-e-idraak dev-maalaaye.n
hitopdesh ke qisse kathaa sarat-saagar
karo.Do.n siino.n me.n vo guu.njtaa hu.aa aalhaa
mai.n puuchhtaa huu.n kisii aur malak vaalo.n se
kahaaniyo.n kii ye daulat ye be-bahaa daulat
fasaane dekh lo in ke nazar bhii aatii hai
mai.n puuchhtaa huu.n ki gahvaare aur qaumo.n ke
base hu.e hai.n kahii.n aisii daastaano.n se
kahaaniyaa.n jo mai.n suntaa thaa apne bachpan me.n
mire liye vo na thii.n mahz baa.is-e-tafriih
fasaano.n se mire bachpan ne sochnaa siikhaa
fasaano.n se mujhe sanjiidgii ke dars mile
fasaano.n me.n nazar aatii thii mujh ko ye duniyaa
Gam o KHushii me.n rachii pyaar me.n basaa.ii hu.ii
fasaano.n se mire dil ne ghulaavaTe.n paa.ii.n
yahii nahii.n ki mashaahiir hii ke afsaane
zaraa sii umr me.n karte ho.n mujh ko muta.assir
mohalle Tole ke gumnaam aadamiyyo.n ke
kuchh aise sun.ne me.n aate the vaaqi.aat-e-hayaat
jo.n yuu.n to hote the farsuuda aur ma.amuulii
magar the aa.iine iKHlaas aur sharaafat ke
ye chand aa.ii ga.ii baate.n aisii baate.n thii.n
ki jin kii oT chamaktaa thaa dard-e-insaanii
ye vaardaat nahii.n razmiyye hayaat ke the
Garaz ki ye hai.n mire bachpane kii tasviire.n
nadiim aur bhii kuchh KHatt-o-KHaal hai.n un ke
ye merii maa.n kaa hai kahnaa ki jab mai.n bachcha thaa
mai.n aise aadmii kii god me.n na jaataa thaa
jo bad-qimaar ho aibii ho yaa ho bad-suurat
mujhe bhii yaad hai nau das baras hii kaa mai.n thaa
to mujh pe kartaa thaa jaaduu saa husn-e-insaanii
kuchh aisaa hotaa thaa mahsuus jab mai.n dekhtaa thaa
shagufta rang tar-o-taaza ruup vaalo.n kaa
ki un kii aa.nch mirii haDDiyaa.n galaa degii
ik aazmaa.ish-e-jaa.n thii ki thaa shu.uur-e-jamaal
aur us kii nashtariyyat us kii ustuKHaa.n-sozii
Gam o nashaat lagaavaT mohabbat o nafrat
ik intishaar-e-sakuu.n iztiraab pyaar itaab
vo be-panaah zakii-ul-hisii vo hilm o Guruur
kabhii kabhii vo bhare ghar me.n hiss-e-tanhaa.ii
vo vahshate.n mirii maahaul-e-KHush-gavaar me.n bhii
mirii sarisht me.n ziddain ke ka.ii jo.De
shuruu.a hii se the maujuud aab-o-taab ke saath
mire mizaaj me.n pinhaa.n thii ek jadaliyyat
rago.n me.n chhuuTte rahte the be-shumaar anaar
nadiim ye hai.n mire baal-pan ke kuchh aasaar
vafuur o shiddat-e-jazbaat kaa ye aalam thaa
ki kau.nde jast kare.n dil ke aabgiine me.n
vo bachpanaa jise bardaasht apnii mushkil ho
vo bachpanaa jo KHud apnii hii tevriyaa.n sii cha.Dhaa.e
nadiim zikr-e-javaanii se kaa.np jaataa huu.n
javaanii aa.ii dabe paa.nv aur yuu.n aa.ii
ki us ke aate hii big.Daa banaa-banaayaa khel
vo KHvaahishaat ke jazbaat ke umaDte hu.e
vo ho.nkte hu.e be-naam aag ke tuufaa.n
vo phuuTtaa hu.aa jvaalaa-mukhii javaanii kaa
rago.n me.n uThtii hu.ii aa.ndhiyo.n ke vo jhaTke
ki jo tavaazun-e-hastii jhi.njho.D ke rakh de.n
vo zalzale ki pahaa.Do.n ke pair ukha.D jaa.e.n
buluuGiyat kii vo Tiise.n vo karb-e-nashv-o-numaa
aur aise me.n mujhe byaahaa gayaa bhalaa kis se
jo ho na saktii thii hargiz mirii shariik-e-hayaat
ham ek duusre ke vaaste bane hii na the
siyaah ho ga.ii duniyaa mirii nigaaho.n me.n
vo jis ko kahte hai.n shaadii-e-KHaanaa-aabaadii
mire liye vo banii bevgii javaanii kii
luTaa suhaag mirii zindagii kaa maa.nDo me.n
nadiim khaa ga.ii mujh ko nazar javaanii kii
balaa-e-jaan mujhe ho gayaa shu.uur-e-jamaal
talaash-e-shola-e-ulfat se ye hu.aa haasil
ki nafrato.n kaa agan-ku.nD ban ga.ii hastii
vo halq o siina o rag rag me.n be-panaah chubhaa
nadiim jaise nigal lii ho mai.n ne naag-phanii
z ishq-zaadam o ishqam kamusht zaar-o-dareG
KHabar na burd ba-rustam kase ki sohraabam
na puuchh aalam-e-kaam-o-dahan nadiim mire
samar hayaat kaa jab raakh bin gayaa mu.nh me.n
mai.n chaltii-phirtii chitaa ban gayaa javaanii kii
mai.n kaa.ndhaa detaa rahaa apne jiite murde ko
ye sochtaa thaa ki ab kyaa karuu.n kahaa.n jaa.uu.n
bahut se aur masaa.ib bhii mujh pe TuuT pa.De
mai.n Dhuu.nDhne lagaa har samt sachchii jhuuTii panaah
talaash-e-husn me.n sher-o-adab me.n dostii me.n
ru.ndhii sadaa se mohabbat kii bhiik maa.ngii hai
na.e sire se samajhnaa pa.Daa hai duniyaa ko
ba.De jatan se sambhaalaa hai KHud ko mai.n ne nadiim
mujhe sambhalne me.n to chaaliis saal guzre hai.n
merii hayaat to vish-paan kii kathaa hai nadiim
mai.n zahr pii ke zamaane ko de sakaa amrit
na puuchh mai.n ne jo zahraaba-e-hayaat piyaa
magar huu.n dil se mai.n is ke liye sipaas-guzaar
larazte haatho.n se daaman KHuluus kaa na chhaTaa
bachaa ke rakkhii thii mai.n ne amaanat-e-tiflii
ise na chhiin sakii mujh se dast-burd-e-shabaab
ba-qaul shaa.er-e-mulk-e-fara.ng har bachcha
KHud apne ahd-e-javaanii kaa baap hotaa hai
ye kam nahii.n hai ki tiflii-e-rafta chho.D ga.ii
dil-e-hazii.n me.n ka.ii chhoTe chhoTe naqsh-e-qadam
mirii anaa kii rago.n me.n pa.De hu.e hai.n abhii
na jaane kitne bahut narm u.ngliyo.n ke nishaa.n
hanuuz vaqt ke be-dard haath kar na sake
hayaat-e-rafta kii zinda nishaaniyo.n ko fanaa
zamaana chhiin sakegaa na merii fitrat se
mirii safaa mire tahtush-shu.uur kii ismat
taKHaiyyulaat kii doshiizgii kaa radd-e-amal
javaan ho ke bhii be-laus tifl-vash jazbaat
syaanaa hone pe bhii ye jibillate.n merii
ye sarKHushii o Gam be-riyaa ye qalb-gudaaz
baGair bair ke an-ban Garaz se paak tapaak
Garaz se paak ye aa.nsuu Garaz se paak ha.nsii
ye dasht-e-dahr me.n hamdardiyo.n kaa sar-chashma
qubuuliyat kaa ye jazba ye kaa.enaat o hayaat
is arz-e-paak par iimaan ye ham-aaha.ngii
har aadmii se har ik KHvaab o ziist se ye lagaav
ye maa.n kii god kaa ehsaas sab manaazir me.n
qariib o duur zamii.n me.n ye buu-e-vataniyyat
nizaam-e-shams-o-qamar me.n payaam-e-hifz-e-hayaat
ba-chashm-e-shaam-o-sahar maamtaa kii shabnam sii
ye saaz o dil me.n mire naGma-e-analkaunain
har iztiraab me.n ruuh-e-sukuun-e-be-paayaa.n
zamaana-e-guzaraa.n me.n davaam kaa sargam
ye bazm-e-jashn-e-hayaat-o-mamaat sajtii hu.ii
kisii kii yaad kii shahnaa.iyaa.n sii bajtii hu.ii
ye ramaziiyat ke anaasir shu.uur-e-puKHta me.n
falak pe vajd me.n laatii hai jo farishto.n ko
vo shaa.erii bhii buluuG-e-mizaaj-e-tiflii hai
ye nashtariyyat-e-hastii ye is kii sheriyat
ye pattii pattii pe gulzaar-e-zindagii ke kisii
latiif nuur kii parchhaa.iyaa.n sii pa.Dtii hu.ii
baham ye hairat o maanuusiyat kii sargoshii
bashar kii zaat ki mahr-e-uluuhiyat ba-jabii.n
abad ke dil me.n ja.De.n maartaa hu.aa sabza
Gam-e-jahaa.n mujhe aa.nkhe.n dikhaa nahii.n saktaa
ki aa.nkhe.n dekhe hu.e huu.n mai.n ne apne bachpan kii
mire lahuu me.n abhii tak sunaa.ii detii hai.n
sukuut-e-huzn me.n bhii ghu.nghru.o.n kii jhankaare.n
ye aur baat ki mai.n is pe kaan de na sakuu.n
isii vadii.at-e-tiflii kaa ab sahaaraa hai
yahii hai.n marham-e-kaafuur dil ke zaKHmo.n par
unhii ko rakhnaa hai mahfuuz taa-dam-e-aaKHir
zamiin-e-hind hai gahvaara aaj bhii hamdam
agar hisaab kare.n das karo.D bachcho.n kaa
ye bachche hind kii sab se ba.Dii amaanat hai.n
har ek bachche me.n hai.n sad-jahaan-e-imkaanaat
magar vatan kaa hal-o-aqd jin ke haath me.n hai
nizaam-e-zindagii-e-hind jin ke bas me.n hai
ravayya dekh ke un kaa ye kahnaa pa.Dtaa hai
kise pa.Dii hai ki samjhe vo is amaanat ko
kise pa.Dii hai ki bachcho.n kii zindagii ko bachaa.e
KHaraab hone se Talne se suukh jaane se
bachaa.e kaun in aazurda honhaaro.n ko
vo zindagii jise ye de rahe hai.n bhaarat ko
karo.Do.n bachcho.n ke miTne kaa ik alamiyya hai
churaa.e jaate hai.n bachche abhii gharo.n se yahaa.n
ki jism to.D diye jaa.e.n un ke taaki mile
churaane vaalo.n ko KHairaat maagh-mele kii
jo is azaab se bach jaa.e.n to gale pa.D jaa.e.n
vo la.ante.n ki hamaare karo.Do.n bachcho.n kii
nadiim KHair se miTTii KHaraab ho jaa.e
vo muflisii ki KHushii chhiin le vo be-bargii
udaasiyo.n se bharii zindagii kii be-ra.ngii
vo yaasiyaat na jis ko chhu.e shu.aa-e-umiid
vo aa.nkhe.n dekhtii hai.n har taraf jo be-nuurii
vo TukTukii ki jo pathraa ke rah ga.ii ho nadiim
vo be-dilii kii ha.nsii chhiin le jo ho.nTo.n se
vo dukh ki jis se sitaaro.n kii aa.nkh bhar aa.e
vo gandagii vo kasaafat maraz-zada paikar
vo bachche chhin ga.e ho.n jin se bachpane un ke
hamii.n ne gho.nT diyaa jis ke bachpane kaa galaa
jo khaate-piite gharo.n ke hai.n bachche un ko bhii kyaa
samaaj phuulne-phalne ke de sakaa saadhan
vo saa.ns lete hai.n tahziib-kush fazaa.o.n me.n
ham un ko dete hai.n be-jaan aur Galat ta.aliim
milegaa ilm-e-jihaalat-numaa se kyaa un ko
nikal ke madraso.n aur universitiyyo.n se
ye bad-nasiib na ghar ke na ghaaT ke ho.nge
mai.n puuchhtaa huu.n ye ta.aliim hai ki makkaarii
karo.Do.n zindagiyo.n se ye be-panaah daGaa
nisaab aisaa ki mehnat kare.n agar is par
bajaa.e ilm jahaalat kaa iktisaab kare.n
ye ulTaa dars-e-adab ye sa.Dii hu.ii ta.aliim
dimaaG kii ho Gizaa yaa Gizaa-e-jismaanii
har ik tarah kii Gizaa me.n yahaa.n milaavaT hai
vo jis ko bachcho.n kii ta.aliim kah ke dete hai.n
vo dars ulTii chhurii hai gale pe bachpan ke
zamiin-e-hind hi.nDolaa nahii.n hai bachcho.n kaa
karo.Do.n bachcho.n kaa ye des ab janaaza hai
ham inqalaab ke KHatro.n se KHuub vaaqif hai.n
kuchh aur roz yahii rah ga.e jo lail-o-nahaar
to mol lenaa pa.Degaa hame.n ye KHatra bhii
ki bachche qaum kii sab se ba.Dii amaanat hai.n

Firaq Gorakhpuri
Nazm

zindan ki ek subh

sehn-e-zindaa.n me.n rafiiqo.n ke sunahre chehre
sath-e-zulmat se damakte hu.e ubhre kam kam
nii.nd kii os ne un chehro.n se dho Daalaa thaa
des kaa dard firaaq-e-ruKH-e-mahbuub kaa Gam

Faiz Ahmad Faiz
Nazm

mere KHwab

ai mire hasii.n-KHvaabo
tum kahaa.n se aa.e ho
kis ufuq se ubhre ho
kis shafaq se nikhre ho
kin gulo.n kii sohbat me.n
tum ne tarbiyat paa.ii
kis jahaa.n se laa.e ho
ye jamaal-o-ra.anaa.ii

Ali Sardar Jafri
Nazm

mahatma-gandhi ka qatl

jab naaKHun-e-hikmat hii TuuTe dushvaar ko aasaa.n kaun kare
jab KHushk hu.aa abr-e-baaraa.n hii shaaKHo.n ko gul-afshaa.n kaun kare

Anand Narayan Mulla
Nazm

tulu-e-ishtirakiyat

aaj puraanii tadbiiro.n se aag ke sho.ale tham na sake.nge
ubhre jazbe dab na sake.nge ukh.De parcham jam na sake.nge

Sahir Ludhianvi
Nazm

ganga ke kinare

ashnaan nigaahe.n kartii thii.n parkaash kii cha.Dhtii naddii me.n
aakaash ke ubhre taare the Duube hu.e kaif-o-mastii me.n
baiThe nazar aate the ham tum chandaa kii rupahlii kashtii me.n
jab chaa.ndnii raato.n me.n ham tum ga.ngaa ke kinaare hote the

Nazeer Banarasi
Nazm

ras ki anokhi lahren

mai.n ye chaahtii huu.n ki duniyaa kii aa.nkhe.n mujhe dekhtii jaa.e.n yuu.n dekhtii jaa.e.n jaise
ko.ii pe.D kii narm Tahnii ko dekhe
lachaktii hu.ii narm Tahnii ko dekhe
magar bojh patto.n kaa utre hu.e pairahan kii tarah sach ke saath hii farsh par ek maslaa hu.aa
Dher ban kar pa.Daa ho
mai.n ye chaahtii huu.n ki jho.nke havaa ke lipaTte chale jaa.e.n mujh se
machalte hu.e chhe.D karte hu.e ha.nste ha.nste ko.ii baat kahte hu.e laaj ke bojh
se rukte rukte sambhalte hu.e ras kii ra.ngiin sargoshiyo.n me.n
mai.n ye chaahtii huu.n kabhii chalte chalte kabhii dau.Dte dau.Dte ba.Dhtii jaa.uu.n
havaa jaise nadii kii lahro.n se chhuute hu.e sarsaraate hu.e bahtii jaatii hai ruktii
nahii.n hai
agar ko.ii panchhii suhaanii sadaa me.n kahii.n giit gaa.e
to aavaaz kii garm lahre.n mire jism se aa ke Takraa.e.n aur lauT jaa.e.n Thaharne na paa.e.n
kabhii garm kirne.n kabhii narm jho.nke
kabhii miiThii miiThii fusuu.n-saaz baate.n
kabhii kuchh kabhii kuchh na.e se nayaa rang ubhre
ubharte hii tahliil ho jaa.e phailii fazaa me.n
ko.ii chiiz mere masarrat ke ghere me.n rukne na paa.e

Meeraji
Nazm

hindostani bachche

phir ko.ii jai-chand na ubhre phir ko.ii jaafar na uTThe
Gairo.n kaa dil KHush karne ko apno.n par KHanjar na uTThe

Sahir Ludhianvi
Nazm

barsat

barkhaa aa.ii baadal aa.e
o.Dhe kaale kambal aa.e
ThanDii ThanDii aa.ii.n havaa.e.n
kaalii kaalii chhaa.ii.n ghaTaa.e.n
garmii ne Deraa uThvaayaa
dhuup pe saaya Gaalib aayaa
baadal se amrit jal barsaa
amrit jal kaisaa komal barsaa
ho ga.ii zinda murda khetii
Dhal ga.e zarre chamkii khetii
dariyaa aur samundar ubhre
taaza mauje.n le kar ubhre
baaGo.n me.n sabza lahraayaa
phuulo.n kaliyo.n me.n ras aayaa
phir shaaKHo.n ne KHil.at pahnii
phir paa.e hariyaale gahne
phuul khile kaliyaa.n lahraa.ii.n
ko.nple.n phir shaaKHo.n me.n aa.ii.n
motii baadal ne barsaa.e
patto.n ne daaman phailaa.e
taalaabo.n me.n me.nDak bole
siipo.n ne mu.nh apne khole
baadal garjaa bijlii chamkii
aa.ii sadaa rim-jhim rim-jhim kii

Seemab Akbarabadi
Nazm

baDa pyara mera hindostan hai

yahaa.n ubhre hazaaro.n dharam-o-iimaa.n
hai.n ik parcham tale hinduu musalmaa.n

Ahmad Wasi
Nazm

shabab-e-gurezan

tire aasmaa.n kaa,
mai.n ik taaza vaarid sitaaraa sahii
jaantaa huu.n ki, is aasmaa.n par
bahut chaa.nd, suuraj, sitaare ubhar kar
jo ik baar Duube to ubhre nahii.n hai.n
faraamosh-gaarii ke niile ufuq se,
unhii kii tarah mai.n bhii
naa-tajarba-kaar insaa.n kii himmat se aage ba.Dhaa huu.n,
jo aage ba.Dhaa huu.n,
to dil me.n havas ye nahii.n hai
ki ab se hazaaro.n baras baa'd kii daastaano.n me.n
zinda ho ik baar phir naam meraa!
ye shaam-e-dil-aavez to ik bahaana hai,
ik koshish-e-naa-tavaa.n hai
shabaab-e-gurezaa.n ko jaate hu.e rokne kii
vagarna hai kaafii mujhe ek pal kaa sahaaraa,
huu.n ik taaza vaarid, musiibat kaa maaraa
mai.n kar luu.ngaa durd-e-tah-e-jaam pii kar guzaaraa!

Noon Meem Rashid
Nazm

safar-e-aKHir-e-shab

hazaar dasht pa.De, laakh aaftaab ubhre
jabii.n pe gard, palak par namii nahii.n aa.ii
kahaa.n kahaa.n na luTaa kaarvaa.n faqiiro.n kaa
mataa-e-dard me.n ko.ii kamii nahii.n aa.ii

Mustafa Zaidi
Nazm

taswiren

yak-ra.ng me.n saika.Do.n rang hote hai.n
halke, gahre, maddham shaffaaf
raushniyo.n se bhare, chamakte, jagmagaate
surma.ii abreshmii naqaabe.n Daale
ghule mile
dhuup chhaa.nv kii aa.nkh-miicholii khelte
anokhe nuquush me.n ubhre u.Dte hu.e
yaa phir itne gambhiir
jaise jahaazo.n ke la.ngar
in me.n lahre.n hotii hai.n
ta.Daptii bechain tuufaanii
aur aisii bhii
jin par sukuun ke saa.e
chhaa.e hu.e hote hai.n
lekin un ke niiche
pahaa.Dii jharno.n kii tezii, tilmilaahaT
justujuu kii lahak
aarzuu kii paagal mahak
chhupii hotii hai
aur jab ka.ii ra.ng
un kii be-shumaar tara.nge.n
tarah tarah kii chhoTii ba.Dii
chhupii aur zaahir lahre.n
miltii ek duusre se Takraatii hai.n
tab na.e hairat-naak hayuule
aadhe puure bal khaate daa.ere
mauhuum lakiire.n
laa-javaab shakle.n
aur aise paikar jo kisii duusrii chiiz kii tarah nahii.n hote
lekin jo KHud apnii alag anuup hastii me.n
na.ii-navelii dulhan
nau-zaa.ida bachche kii tarah
achchhe lagte hai.n
vajuud me.n aa jaate hai.n
jhilmilaate dhabbo.n kaa ye sho.ala
insaanii u.ngliyo.n zehn aur ruuh kaa ye karishma
zabaan kaa ye jauhrii dhamaaka
zindagii ko par lagaa detaa hai
use itnaa uu.nchaa u.Daa le jaataa hai
jahaa.n se is dhartii
aur is par basne vaalo.n ko
ham yuu.n dekhte hai.n
jaise tiitof ne use dekhaa thaa
aur us kii sab achchhaa.iyo.n
KHuubsuurtiyo.n
is kii KHushbu.o.n
lataafato.n ra.ngiiniyo.n kaa partav
hamaarii ruuho.n par bhii pa.Dtaa hai
ham badal jaate hai.n
aisaa hii ek chhitr
tum ko ma.aluum nahii.n
kin aasmaanii ra.ngo.n se khii.nchaa
apsaraa.o.n kii na jaane kaisii jaaduu mudraa.o.n se bharaa
sovarg ke kaun se madhur raago.n me.n Dhaalaa
aur chupke se
man ke garm tapte aa.ngan me.n rakh diyaa
daf.atan hazaaro.n bahaare.n jaag pa.Dii.n
gulaabii pa.nkhu.Diyaa.n barasne lagii.n
mahaktii havaa.o.n se
halkii halkii ThanDii narmiyaa.n Tapak pa.Dii.n
aur zindagii kii KHaalii maa.ng
sindoor se bhar ga.ii!

Sajjad Zaheer
Nazm

laghzish

jab hinaa.ii u.ngliyo.n kii ju.nbishe.n aatii hai.n yaad
jazb kar letaa huu.n aa.nkho.n kii ju.nbishe.n aatii hai.n yaad
ab magar maazii kii har shai par a.ndheraa chhaa gayaa
aur hii raaho.n se guzartii jaa rahii hai zindagii
zehn me.n ubhre hu.e hai.n chand be-jaa se nuquush
aur un me.n bhii nahii.n hai ko.ii rabt-e-baahamii

Akhtarul Iman
Nazm

baadal aur tare

KHatm hu.aa din suuraj Duubaa
shaam hu.ii aur ubhre taare
jagmag jagmag karte aa.e
nuur ke Tuk.De pyaare pyaare
duur kahii.n se ThanDe ThanDe
tez havaa ke jho.nke aa.e
kaa.ndho.n par apne vo uThaa kar
chhoTe chhoTe baadal laa.e
un ko dekh ke aur bhii barsaa
nuur masarrat kaa taaro.n se
ko.ii chhupaa aur ko.ii niklaa
baadal ke in ambaaro.n se
khel rahe ho.n jaise bachche
aa.nkh-miicholii galii galii me.n
yaa shabnam ke qatre chamke.n
ojhal ho kar galii galii me.n

Tilok Chand Mahroom
Nazm

irtiqa

KHaak par ik buu.nd lapkii
buu.nd jam kar loth.Daa
is loth.De me.n haDDiyaa.n
phir haDDiyo.n par maas aayaa
maas jis par naqsh ubhre
naqsh ko jumbish milii
aur KHaamushii kii kokh KHaalii ho ga.ii
chiiKH pahlii guftuguu thii
tham ga.ii to is se phuuTaa qahqaha
jab thak ke TuuTaa qahqaha
tab aaKHirii aavaaz siskii
jumbishe.n saakit hu.ii.n
aur qabr kii KHaamoshiyo.n me.n
naqsh pighle maas utraa
haDDiyaa.n uryaa.n hu.ii.n aur munhadim
loth.Daa gal sa.D ke phir se buu.nd thaa
aur buu.nd dhartii khaa ga.ii
haa.e mere ibtilaa kii intihaa ibtidaa tak aa ga.ii

Syed Mubarak Shah
Nazm

barsat

barkhaa aa.ii baadal aa.e
o.Dhe kaale kambal aa.e
ThanDii ThanDii aa.ii.n havaa.e.n
kaalii kaalii chhaa.ii.n ghaTaa.e.n
garmii ne Deraa uThvaayaa
dhuup pe saaya Gaalib aayaa
phailaa din ke saath dhu.ndalkaa
bhuuraa bhuuraa halkaa halkaa
badlii aa.ii shor machaatii
bhiige bhiige naGme gaatii
baadal se amrit jal barsaa
amrit jal kyaa komal barsaa
ho ga.ii zinda murda khetii
dhul ga.e zarre chamkii retii
dariyaa aur samundar ubhre
taaza mauje.n le kar ubhre
taazgiyaa.n hai.n jangal jangal
har jangal me.n hai ab mangal
ye rut yaa barsaat kaa mausam
hai goyaa jazbaat kaa mausam

Seemab Akbarabadi
Nazm

jahan main khaDi thi

jahaa.n mai.n kha.Dii thii
vahaa.n se qadam, do qadam hii kaa rasta thaa
jis jaa pe mausam badalne ko tayyaar baiThe the
mere ye bas me.n nahii.n thaa ki mai.n
apnii khi.Dkii ke aage pighalte hu.e
manzaro.n me.n ko.ii
apnii marzii kaa hii rang bhar duu.n
KHizaa.n kii aka.Dtii hu.ii zard baa.nho.n ko
apne jharoke ke aage ye bad-ra.ng piile manaazir
sajaane se hii rok paa.uu.n
daraKHto.n kii mazbuut shaaKHo.n se daaman chhu.Daate
hu.e zard patto.n ko rokuu.n
bikharte hu.e phuul lachkiilii, sarsabz shaaKHo.n pe phir se KHilaa.u.n
havaa.o.n kii pazhmurda saa.nso.n me.n phir zindagii dau.D jaa.e
parindo.n kii chahkaar ubhre, nadii muskuraa.e
jahaa.n mai.n kha.Dii thii
vahaa.n se qadam, do qadam hii kaa rasta thaa
raste me.n bikhre hu.e kitne pal the
adhuure safar the
magar mere bas me.n nahii.n thaa ki mai.n
saare bikhre hu.e pal hii tartiib de duu.n
masaafat ke maare hu.e raaste manzilo.n se milaa duu.n
ulajhtii hu.ii, sar paTaKHtii hu.ii tund maujo.n ke aage kinaare bichhaa duu.n
jahaa.n mai.n kha.Dii thii
vahaa.n se qadam, do qadam hii kaa rasta thaa
jis jaa pe duniyaa thii, Thahraa hu.aa vaqt thaa
jis jagah zindagii thii
magar mere bas me.n nahii.n thaa ki mai.n
zindagii se ye kah duu.n
ki Thahre hu.e vaqt se aage kuchh pal nikalne na paa.e
ye duniyaa ko jaa ke bataa.e
mujhe saa.ns lene ko tho.Dii jagah chaahiye
vaqt kaa ek ujlaa kinaara mile
zindagii se kuchh aisaa ishaara mile
is zamaane kaa hii saath saaraa mile
mai.n use jaa ke kah duu.n
magar mere bas me.n nahii.n thaa ki mai.n
apnii baa.nhe.n uThaa.uu.n
qadam ko ba.Dhaa.uu.n
nigaaho.n se us ko bulaa.uu.n
use kah hii paa.uu.n
ki hai ye qadam, do qadam hii kaa rasta
jahaa.n mai.n kha.Dii huu.n!

Ambarin Salahuddin
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now