Sher on Love

dil thaam ke karvaT pe liye jā.ūñ huuñ karvaT

vo aag lagī hai ki bujhā.e na bane hai

dil tham ke karwaT pe liye jaun hun karwaT

wo aag lagi hai ki bujhae na bane hai

huā hai tujh se bichhaḌne ke ba.ad ye ma.alūm

ki tū nahīñ thā tire saath ek duniyā thī

hua hai tujh se bichhaDne ke baad ye malum

ki tu nahin tha tere sath ek duniya thi

aap ke ba.ad har ghaḌī ham ne

aap ke saath hī guzārī hai

aap ke baad har ghaDi hum ne

aap ke sath hi guzari hai

ab ke ham bichhḌe to shāyad kabhī ḳhvāboñ meñ mileñ

jis tarah sūkhe hue phuul kitāboñ meñ mileñ

ab ke hum bichhDe to shayad kabhi KHwabon mein milen

jis tarah sukhe hue phul kitabon mein milen

jab tum se mohabbat kī ham ne tab jā ke kahīñ ye raaz khulā

marne kā salīqa aate hī jiine kā shu.ūr aa jaatā hai

jab tum se mohabbat ki hum ne tab ja ke kahin ye raaz khula

marne ka saliqa aate hi jine ka shuur aa jata hai

mohabbat meñ ye kyā maqām aa rahe haiñ

ki manzil pe haiñ aur chale jā rahe haiñ

mohabbat mein ye kya maqam aa rahe hain

ki manzil pe hain aur chale ja rahe hain

dil pe aa.e hue ilzām se pahchānte haiñ

log ab mujh ko tire naam se pahchānte haiñ

dil pe aae hue ilzam se pahchante hain

log ab mujh ko tere nam se pahchante hain

kisī sabab se agar boltā nahīñ huuñ maiñ

to yuuñ nahīñ ki tujhe sochtā nahīñ huuñ maiñ

kisi sabab se agar bolta nahin hun main

to yun nahin ki tujhe sochta nahin hun main

bas ek hī balā hai mohabbat kaheñ jise

vo pāniyoñ meñ aag lagātī hai aaj bhī

bas ek hi bala hai mohabbat kahen jise

wo paniyon mein aag lagati hai aaj bhi

ilaaj apnā karāte phir rahe ho jaane kis kis se

mohabbat kar ke dekho nā mohabbat kyuuñ nahīñ karte

ilaj apna karaate phir rahe ho jaane kis kis se

mohabbat kar ke dekho na mohabbat kyun nahin karte

hosh vāloñ ko ḳhabar kyā be-ḳhudī kyā chiiz hai

ishq kiije phir samajhiye zindagī kyā chiiz hai

hosh walon ko KHabar kya be-KHudi kya chiz hai

ishq kije phir samajhiye zindagi kya chiz hai

ishq nāzuk-mizāj hai behad

aql kā bojh uThā nahīñ saktā

ishq nazuk-mizaj hai behad

aql ka bojh uTha nahin sakta

aarzū hai ki tū yahāñ aa.e

aur phir umr bhar na jaa.e kahīñ

aarzu hai ki tu yahan aae

aur phir umr bhar na jae kahin

ibtidā vo thī ki jiine ke liye martā thā maiñ

intihā ye hai ki marne kī bhī hasrat na rahī

ibtida wo thi ki jine ke liye marta tha main

intiha ye hai ki marne ki bhi hasrat na rahi

terā milnā ḳhushī kī baat sahī

tujh se mil kar udaas rahtā huuñ

tera milna KHushi ki baat sahi

tujh se mil kar udas rahta hun

badan meñ jaise lahū tāziyāna ho gayā hai

use gale se lagā.e zamāna ho gayā hai

badan mein jaise lahu taziyana ho gaya hai

use gale se lagae zamana ho gaya hai

ishq par zor nahīñ hai ye vo ātish 'ġhālib'

ki lagā.e na lage aur bujhā.e na bane

ishq par zor nahin hai ye wo aatish 'ghaalib'

ki lagae na lage aur bujhae na bane

kū-ba-kū phail ga.ī baat shanāsā.ī kī

us ne ḳhushbū kī tarah merī pazīrā.ī kī

ku-ba-ku phail gai baat shanasai ki

us ne KHushbu ki tarah meri pazirai ki

ai dost ham ne tark-e-mohabbat ke bāvajūd

mahsūs kī hai terī zarūrat kabhī kabhī

ai dost hum ne tark-e-mohabbat ke bawajud

mahsus ki hai teri zarurat kabhi kabhi

garmī-e-hasrat-e-nākām se jal jaate haiñ

ham charāġhoñ kī tarah shaam se jal jaate haiñ

garmi-e-hasrat-e-nakaam se jal jate hain

hum charaghon ki tarah sham se jal jate hain

jab se tū ne mujhe dīvāna banā rakkhā hai

sañg har shaḳhs ne hāthoñ meñ uThā rakkhā hai

jab se tu ne mujhe diwana bana rakkha hai

sang har shaKHs ne hathon mein uTha rakkha hai

ab to miliye bas laḌā.ī ho chukī

ab to chaliye pyaar kī bāteñ kareñ

ab to miliye bas laDai ho chuki

ab to chaliye pyar ki baaten karen

dil dhaḌakne kā sabab yaad aayā

vo tirī yaad thī ab yaad aayā

dil dhaDakne ka sabab yaad aaya

wo teri yaad thi ab yaad aaya

āshiqī sabr-talab aur tamannā betāb

dil kā kyā rañg karūñ ḳhūn-e-jigar hote tak

aashiqi sabr-talab aur tamanna betab

dil ka kya rang karun KHun-e-jigar hote tak

aaj dekhā hai tujh ko der ke ba.ad

aaj kā din guzar na jaa.e kahīñ

aaj dekha hai tujh ko der ke baad

aaj ka din guzar na jae kahin

mohabbat meñ nahīñ hai farq jiine aur marne kā

usī ko dekh kar jiite haiñ jis kāfir pe dam nikle

mohabbat mein nahin hai farq jine aur marne ka

usi ko dekh kar jite hain jis kafir pe dam nikle

jis kī āñkhoñ meñ kaTī thiiñ sadiyāñ

us ne sadiyoñ kī judā.ī dī hai

jis ki aankhon mein kaTi thin sadiyan

us ne sadiyon ki judai di hai

āḳhrī hichkī tire zānūñ pe aa.e

maut bhī maiñ shā.irāna chāhtā huuñ

aaKHri hichki tere zanun pe aae

maut bhi main shairana chahta hun

sirf us ke hoñT kāġhaz par banā detā huuñ maiñ

ḳhud banā letī hai hoñToñ par hañsī apnī jagah

sirf us ke honT kaghaz par bana deta hun main

KHud bana leti hai honTon par hansi apni jagah

log kahte haiñ ki tū ab bhī ḳhafā hai mujh se

terī āñkhoñ ne to kuchh aur kahā hai mujh se

log kahte hain ki tu ab bhi KHafa hai mujh se

teri aankhon ne to kuchh aur kaha hai mujh se

chalo achchhā huā kaam aa ga.ī dīvāngī apnī

vagarna ham zamāne bhar ko samjhāne kahāñ jaate

chalo achchha hua kaam aa gai diwangi apni

wagarna hum zamane bhar ko samjhane kahan jate

kabhī yuuñ bhī aa mirī aañkh meñ ki mirī nazar ko ḳhabar na ho

mujhe ek raat navāz de magar is ke baad sahar na ho

kabhi yun bhi aa meri aankh mein ki meri nazar ko KHabar na ho

mujhe ek raat nawaz de magar is ke baad sahar na ho

vafā tujh se ai bevafā chāhtā huuñ

mirī sādgī dekh kyā chāhtā huuñ

wafa tujh se ai bewafa chahta hun

meri sadgi dekh kya chahta hun

ek muddat se tirī yaad bhī aa.ī na hameñ

aur ham bhuul ga.e hoñ tujhe aisā bhī nahīñ

ek muddat se teri yaad bhi aai na hamein

aur hum bhul gae hon tujhe aisa bhi nahin

zālim thā vo aur zulm kī aadat bhī bahut thī

majbūr the ham us se mohabbat bhī bahut thī

zalim tha wo aur zulm ki aadat bhi bahut thi

majbur the hum us se mohabbat bhi bahut thi

tumhārī yaad ke jab zaḳhm bharne lagte haiñ

kisī bahāne tumheñ yaad karne lagte haiñ

tumhaari yaad ke jab zaKHm bharne lagte hain

kisi bahane tumhein yaad karne lagte hain

ye ishq nahīñ āsāñ itnā hī samajh liije

ik aag kā dariyā hai aur Duub ke jaanā hai

ye ishq nahin aasan itna hi samajh lije

ek aag ka dariya hai aur Dub ke jaana hai

ujāle apnī yādoñ ke hamāre saath rahne do

na jaane kis galī meñ zindagī kī shaam ho jaa.e

ujale apni yaadon ke hamare sath rahne do

na jaane kis gali mein zindagi ki sham ho jae

mere ham-nafas mere ham-navā mujhe dost ban ke daġhā na de

maiñ huuñ dard-e-ishq se jāñ-ba-lab mujhe zindagī kī duā na de

mere ham-nafas mere ham-nawa mujhe dost ban ke dagha na de

main hun dard-e-ishq se jaan-ba-lab mujhe zindagi ki dua na de

dil kī choToñ ne kabhī chain se rahne na diyā

jab chalī sard havā maiñ ne tujhe yaad kiyā

dil ki choTon ne kabhi chain se rahne na diya

jab chali sard hawa main ne tujhe yaad kiya

ik raat vo gayā thā jahāñ baat rok ke

ab tak rukā huā huuñ vahīñ raat rok ke

ek raat wo gaya tha jahan baat rok ke

ab tak ruka hua hun wahin raat rok ke

ik roz khel khel meñ ham us ke ho ga.e

aur phir tamām umr kisī ke nahīñ hue

ek roz khel khel mein hum us ke ho gae

aur phir tamam umr kisi ke nahin hue

maañg luuñ tujh se tujhī ko ki sabhī kuchh mil jaa.e

sau savāloñ se yahī ek savāl achchhā hai

mang lun tujh se tujhi ko ki sabhi kuchh mil jae

sau sawalon se yahi ek sawal achchha hai

bulbul ke kārobār pe haiñ ḳhanda-hā-e-gul

kahte haiñ jis ko ishq ḳhalal hai dimāġh kā

bulbul ke karobar pe hain KHanda-ha-e-gul

kahte hain jis ko ishq KHalal hai dimagh ka

ai dil tamām naf.a hai saudā-e-ishq meñ

ik jaan kā ziyāñ hai so aisā ziyāñ nahīñ

ai dil tamam nafa hai sauda-e-ishq mein

ek jaan ka ziyan hai so aisa ziyan nahin

is ta.alluq meñ nahīñ mumkin talāq

ye mohabbat hai koī shādī nahīñ

is talluq mein nahin mumkin talaq

ye mohabbat hai koi shadi nahin

ek chehra hai jo āñkhoñ meñ basā rahtā hai

ik tasavvur hai jo tanhā nahīñ hone detā

ek chehra hai jo aankhon mein basa rahta hai

ek tasawwur hai jo tanha nahin hone deta

'qatīl' ab dil kī dhaḌkan ban ga.ī hai chaap qadmoñ kī

koī merī taraf aatā huā mahsūs hotā hai

'qatil' ab dil ki dhaDkan ban gai hai chap qadmon ki

koi meri taraf aata hua mahsus hota hai

vo to ḳhush-bū hai havāoñ meñ bikhar jā.egā

mas.ala phuul kā hai phuul kidhar jā.egā

wo to KHush-bu hai hawaon mein bikhar jaega

masala phul ka hai phul kidhar jaega

us ko judā hue bhī zamāna bahut huā

ab kyā kaheñ ye qissa purānā bahut huā

us ko juda hue bhi zamana bahut hua

ab kya kahen ye qissa purana bahut hua