Best Couplets on Zulmat

zulmatoñ meñ raushnī kī justujū karte raho

zindagī bhar zindagī kī justujū karte raho

zulmaton mein raushni ki justuju karte raho

zindagi bhar zindagi ki justuju karte raho

laakh kahte raheñ zulmat ko na zulmat likhnā

ham ne sīkhā nahīñ pyāre ba-ijāzat likhnā

lakh kahte rahen zulmat ko na zulmat likhna

hum ne sikha nahin pyare ba-ijazat likhna

shikva-e-zulmat-e-shab se to kahīñ behtar thā

apne hisse kī koī sham.a jalāte jaate

shikwa-e-zulmat-e-shab se to kahin behtar tha

apne hisse ki koi shama jalate jate

ġham-e-zamāna tirī zulmateñ hī kyā kam thiiñ

ki baḌh chale haiñ ab in gesuoñ ke bhī saa.e

gham-e-zamana teri zulmaten hi kya kam thin

ki baDh chale hain ab in gesuon ke bhi sae

ik kāfir-e-mutlaq hai zulmat kī javānī bhī

be-rahm añdherā hai sham.eñ haiñ na parvāne

ek kafir-e-mutlaq hai zulmat ki jawani bhi

be-rahm andhera hai shamen hain na parwane

shab-e-firāq kī zulmat hai nā-gavār mujhe

naqāb uThā ki sahar kā hai intizār mujhe

shab-e-firaq ki zulmat hai na-gawar mujhe

naqab uTha ki sahar ka hai intizar mujhe

zindagī kī zulmateñ apne lahū meñ rach ga.iiñ

tab kahīñ jā kar hameñ āñkhoñ kī bīnā.ī milī

zindagi ki zulmaten apne lahu mein rach gain

tab kahin ja kar hamein aankhon ki binai mili

zulmateñ vahshat-e-fardā se niDhāl

DhūñDhtī phirtī haiñ ghar ḳhvāboñ kā

zulmaten wahshat-e-farda se niDhaal

DhunDhti phirti hain ghar KHwabon ka

maiñ ne zulmat ke fusūñ se bhāgnā chāhā magar

mere pīchhe bhāgtī phirtī mirī rusvā.ī thī

main ne zulmat ke fusun se bhagna chaha magar

mere pichhe bhagti phirti meri ruswai thi

zulmatoñ kā guzar kahāñ mumkin

un kā raushan ḳhayāl aatā hai

zulmaton ka guzar kahan mumkin

un ka raushan KHayal aata hai