Best of Jashn-e-Rekhta 2024: Young Poets

shāḳh se toḌ ke guldān meñ rakkhā ham ko

aur phir us pe hidāyat ki mahakte rahnā

shaKH se toD ke guldan mein rakkha hum ko

aur phir us pe hidayat ki mahakte rahna

akelā-pan hai aur aisā akelā-pan jis meñ

koī jo pūchh le kuchh sab batāne lagte haiñ

akela-pan hai aur aisa akela-pan jis mein

koi jo puchh le kuchh sab batane lagte hain

vo dīvāroñ meñ chunvāne kā manzar ab nahīñ dikhtā

mohabbat par magar bandish jo pahle thī so ab bhī hai

wo diwaron mein chunwane ka manzar ab nahin dikhta

mohabbat par magar bandish jo pahle thi so ab bhi hai

muflisī thī aur ham the ghar ke iklaute charāġh

varna aisī raushnī karte ke duniyā dekhtī

muflisi thi aur hum the ghar ke iklaute charagh

warna aisi raushni karte ke duniya dekhti

mujhe sukūñ nahīñ detī haiñ ab tirī yādeñ

ab in diyoñ se bahut tīrgī nikaltī hai

mujhe sukun nahin deti hain ab teri yaaden

ab in diyon se bahut tirgi nikalti hai

ye dekhne ke liye us ne phir se toḌ diyā

ki kaise TuuTā huā dil dobāra bantā hai

ye dekhne ke liye us ne phir se toD diya

ki kaise TuTa hua dil dobara banta hai

bhuul jā.ūñ maiñ koī chiiz agar rakh ke kahīñ

yaad aatā hai koī yaad dilāne vaalā

bhul jaun main koi chiz agar rakh ke kahin

yaad aata hai koi yaad dilane wala

andhe bhī banā lete haiñ tasvīr sanam kī

bīnā.ī pe mauqūf nazāre nahīñ hote

andhe bhi bana lete hain taswir sanam ki

binai pe mauquf nazare nahin hote

sahrā meñ har kisī se nahīñ hote mo'jize

vo eḌiyāñ bhī haiñ jinheñ zamzam nahīñ milā

sahra mein har kisi se nahin hote mo'jize

wo eDiyan bhi hain jinhen zamzam nahin mila

maiñ chāhtā huuñ koī naqsh vasl kā ubhre

ai rang-e-husn mire dil ke canvas pe baras

main chahta hun koi naqsh wasl ka ubhre

ai rang-e-husn mere dil ke canwas pe baras

daraḳht TūTte pattoñ kā dukh samajhte haiñ

unheñ bhī shāmil-e-yārān-e-ġham kiyā jaa.e

daraKHt TuTte patton ka dukh samajhte hain

unhen bhi shamil-e-yaran-e-gham kiya jae

ḳhāmoshī jab bhī zaa.e' ho jaatī thī

sahrā meñ jā kar chillāyā karte the

KHamoshi jab bhi zae' ho jati thi

sahra mein ja kar chillaya karte the

vo bad-nasīb log baḌe bad-nasīb log

pyāse rahe zamīn se paanī nikāl kar

wo bad-nasib log baDe bad-nasib log

pyase rahe zamin se pani nikal kar

ye bād-e-sabā ḳhushbū parindoñ kī sadā.eñ

har shai use khiḌkī pe bulāne ke liye hai

ye baad-e-saba KHushbu parindon ki sadaen

har shai use khiDki pe bulane ke liye hai

zindagī zor se pakaḌ ham ko

ḳhud-kushī kā ḳhayāl aaya hai

zindagi zor se pakaD hum ko

KHud-kushi ka KHayal aaya hai

ba.az vaqtoñ meñ apne uupar bhī

be-tahāsha malāl aaya hai

baz waqton mein apne upar bhi

be-tahasha malal aaya hai

anā ne donoñ ke biich nafrat kī ek dīvār khīñch dī hai

udhar se aane kā mas.ala hai idhar se jaane kā mas.ala hai

ana ne donon ke bich nafrat ki ek diwar khinch di hai

udhar se aane ka masala hai idhar se jaane ka masala hai

pahchānte nahīñ ho agar Thiik se mujhe

ik baar aa ke dekh lo nazdīk se mujhe

pahchante nahin ho agar Thik se mujhe

ek bar aa ke dekh lo nazdik se mujhe