Top 10 couplets of Baqi Siddiqui
One of the most prominent modern poets of Pakistan
tum zamāne kī raah se aa.e
varna sīdhā thā rāsta dil kā
tum zamane ki rah se aae
warna sidha tha rasta dil ka
kashtiyāñ TuuT ga.ī haiñ saarī
ab liye phirtā hai dariyā ham ko
kashtiyan TuT gai hain sari
ab liye phirta hai dariya hum ko
-
Tag : Bekasi
'bāqī' jo chup rahoge to uTTheñgī uñgliyāñ
hai bolnā bhī rasm-e-jahāñ bolte raho
'baqi' jo chup rahoge to uTThengi ungliyan
hai bolna bhi rasm-e-jahan bolte raho
-
Tag : Khamoshi
har na.e hādse pe hairānī
pahle hotī thī ab nahīñ hotī
har nae hadse pe hairani
pahle hoti thi ab nahin hoti
rahne do ki ab tum bhī mujhe paḌh na sakoge
barsāt meñ kāġhaz kī tarah bhiig gayā huuñ
rahne do ki ab tum bhi mujhe paDh na sakoge
barsat mein kaghaz ki tarah bhig gaya hun
zindagī kī bisāt par 'bāqī'
maut kī ek chaal haiñ ham log
zindagi ki bisat par 'baqi'
maut ki ek chaal hain hum log
ek pal meñ vahāñ se ham uTThe
baiThne meñ jahāñ zamāne lage
ek pal mein wahan se hum uTThe
baiThne mein jahan zamane lage
vaqt ke paas haiñ kuchh tasvīreñ
koī Duubā hai ki ubhrā dekho
waqt ke pas hain kuchh taswiren
koi Duba hai ki ubhra dekho
-
Tag : Waqt
ham ki sho.ala bhī haiñ aur shabnam bhī
tū ne kis rañg meñ dekhā ham ko
hum ki shoala bhi hain aur shabnam bhi
tu ne kis rang mein dekha hum ko
ḳhud-farebī sī ḳhud-farebī hai
paas ke Dhol bhī suhāne lage
KHud-farebi si KHud-farebi hai
pas ke Dhol bhi suhane lage