Top 10 couplets of Salik Lakhnavi

jo terī bazm se uTThā vo is tarah uTThā

kisī kī aañkh meñ aañsū kisī ke dāman meñ

jo teri bazm se uTTha wo is tarah uTTha

kisi ki aankh mein aansu kisi ke daman mein

kahī kisī se na rūdād-e-zindagī maiñ ne

guzār dene kī shai thī guzār dī maiñ ne

kahi kisi se na rudad-e-zindagi main ne

guzar dene ki shai thi guzar di main ne

chāhā thā Thokaroñ meñ guzar jaa.e zindagī

logoñ ne sañg-e-rāh samajh kar haTā diyā

chaha tha Thokaron mein guzar jae zindagi

logon ne sang-e-rah samajh kar haTa diya

nāḳhudā Dūbne vāloñ kī taraf muḌ ke na dekh

na kareñge na kināroñ kī tamannā kī hai

naKHuda Dubne walon ki taraf muD ke na dekh

na karenge na kinaron ki tamanna ki hai

nigāh-e-mehr kahāñ kī vo barhamī bhī ga.ī

maiñ dostī ko jo royā to dushmanī bhī ga.ī

nigah-e-mehr kahan ki wo barhami bhi gai

main dosti ko jo roya to dushmani bhi gai

mai-ḳhāna-e-hastī meñ saaqī ham donoñ hī mujrim haiñ shāyad

ḳhum tū ne bachā ke rakkhe the paimāne maiñ ne toḌe haiñ

mai-KHana-e-hasti mein saqi hum donon hi mujrim hain shayad

KHum tu ne bacha ke rakkhe the paimane main ne toDe hain

māl-o-zar ahl-e-duval sāmne yuuñ ginte haiñ

ham faqīroñ ne na kuchh sarf kiyā ho jaise

mal-o-zar ahl-e-duwal samne yun ginte hain

hum faqiron ne na kuchh sarf kiya ho jaise

bahār-e-gulistāñ ham ko na pahchāne ta.ajjub hai

guloñ ke ruḳh pe chhiḌkā hai bahut ḳhūn-e-jigar ham ne

bahaar-e-gulistan hum ko na pahchane tajjub hai

gulon ke ruKH pe chhiDka hai bahut KHun-e-jigar hum ne

nazar se dekh to saaqī ik ā.īna banāyā hai

shikasta shīsha-o-sāġhar ke TukḌe joḌ kar ham ne

nazar se dekh to saqi ek aaina banaya hai

shikasta shisha-o-saghar ke TukDe joD kar hum ne

dhuāñ detā hai dāmān-e-mohabbat

in āñkhoñ se koī aañsū girā hai

dhuan deta hai daman-e-mohabbat

in aankhon se koi aansu gira hai