سالک لکھنوی کے 10 منتخب شعر

جو تیری بزم سے اٹھا وہ اس طرح اٹھا

کسی کی آنکھ میں آنسو کسی کے دامن میں

کہی کسی سے نہ روداد زندگی میں نے

گزار دینے کی شے تھی گزار دی میں نے

چاہا تھا ٹھوکروں میں گزر جائے زندگی

لوگوں نے سنگ راہ سمجھ کر ہٹا دیا

ناخدا ڈوبنے والوں کی طرف مڑ کے نہ دیکھ

نہ کریں گے نہ کناروں کی تمنا کی ہے

نگاہ مہر کہاں کی وہ برہمی بھی گئی

میں دوستی کو جو رویا تو دشمنی بھی گئی

مے خانۂ ہستی میں ساقی ہم دونوں ہی مجرم ہیں شاید

خم تو نے بچا کے رکھے تھے پیمانے میں نے توڑے ہیں

مال و زر اہل دول سامنے یوں گنتے ہیں

ہم فقیروں نے نہ کچھ صرف کیا ہو جیسے

بہار گلستاں ہم کو نہ پہچانے تعجب ہے

گلوں کے رخ پہ چھڑکا ہے بہت خون جگر ہم نے

نظر سے دیکھ تو ساقی اک آئینہ بنایا ہے

شکستہ شیشہ و ساغر کے ٹکڑے جوڑ کر ہم نے

دھواں دیتا ہے دامان محبت

ان آنکھوں سے کوئی آنسو گرا ہے