Top 10 couplets of Syed Amin Ashraf

ik chāñd hai āvāra-o-betāb o falak-tāb

ik chāñd hai āsūdgī-e-hijr kā maarā

ek chand hai aawara-o-betab o falak-tab

ek chand hai aasudgi-e-hijr ka mara

hai tā-hadd-e-imkāñ koī bastī na bayābāñ

āñkhoñ meñ koī ḳhvāb dikhā.ī nahīñ detā

hai ta-hadd-e-imkan koi basti na bayaban

aankhon mein koi KHwab dikhai nahin deta

lazzat-e-dīd ḳhudā jaane kahāñ le jaa.e

aañkh hotī hai to hotā nahīñ qaabū dil par

lazzat-e-did KHuda jaane kahan le jae

aankh hoti hai to hota nahin qabu dil par

kisī se ishq ho jaane ko afsāna nahīñ kahte

ki afsāne mata-e-kūcha-o-bāzār hote haiñ

kisi se ishq ho jaane ko afsana nahin kahte

ki afsane mata-e-kucha-o-bazar hote hain

jise nā-ḳhvāb kahte haiñ usī ko ḳhvāb kahte haiñ

tamīz-e-ḳhair-o-shar meñ nukta-e-sad-motabar kyā hai

jise na-KHwab kahte hain usi ko KHwab kahte hain

tamiz-e-KHair-o-shar mein nukta-e-sad-motabar kya hai

havā kā tabsira ye sākinān-e-shahr pe thā

ajiib log haiñ paanī pe ghar banāte haiñ

hawa ka tabsira ye sakinan-e-shahr pe tha

ajib log hain pani pe ghar banate hain

halqa-e-shām-o-sahar se nahīñ jaane vaalā

dard is dīda-e-tar se nahīñ jaane vaalā

halqa-e-sham-o-sahar se nahin jaane wala

dard is dida-e-tar se nahin jaane wala

kahīñ bhī tā.ir-e-āvāra ho magar tai hai

jidhar kamāñ hai udhar jā.egā kabhī na kabhī

kahin bhi tair-e-awara ho magar tai hai

jidhar kaman hai udhar jaega kabhi na kabhi

hai irtibāt-shikan dā.eroñ meñ baT jaanā

chaman kā mauja-e-bād-e-sabā se kaT jaanā

hai irtibaat-shikan daeron mein baT jaana

chaman ka mauja-e-baad-e-saba se kaT jaana

ajab nahīñ ki ho dīvār nuqta-e-mauhūm

makān ho ki makīñ do diloñ kā milnā dekh

ajab nahin ki ho diwar nuqta-e-mauhum

makan ho ki makin do dilon ka milna dekh