Top 15 couplets of Rajinder Manchanda Bani

vo TūTte hue rishtoñ kā husn-e-āḳhir thā

ki chup sī lag ga.ī donoñ ko baat karte hue

wo TuTte hue rishton ka husn-e-aKHir tha

ki chup si lag gai donon ko baat karte hue

vo ek aks ki pal bhar nazar meñ Thahrā thā

tamām umr kā ab silsila hai mere liye

wo ek aks ki pal bhar nazar mein Thahra tha

tamam umr ka ab silsila hai mere liye

zarā chhuā thā ki bas peḌ aa girā mujh par

kahāñ ḳhabar thī ki andar se khokhlā hai bahut

zara chhua tha ki bas peD aa gira mujh par

kahan KHabar thi ki andar se khokhla hai bahut

aaj kyā lauTte lamhāt mayassar aa.e

yaad tum apnī ināyāt se baḌh kar aa.e

aaj kya lauTte lamhat mayassar aae

yaad tum apni inayat se baDh kar aae

ajiib tajraba thā bhiiḌ se guzarne kā

use bahāna milā mujh se baat karne kā

ajib tajraba tha bhiD se guzarne ka

use bahana mila mujh se baat karne ka

jaane vo kaun thā aur kis ko sadā detā thā

us se bichhḌā hai koī itnā pata detā thā

jaane wo kaun tha aur kis ko sada deta tha

us se bichhDa hai koi itna pata deta tha

maiñ chup khaḌā thā ta.alluq meñ iḳhtisār jo thā

usī ne baat banā.ī vo hoshiyār jo thā

main chup khaDa tha talluq mein iKHtisar jo tha

usi ne baat banai wo hoshiyar jo tha

tū koī ġham hai to dil meñ jagah banā apnī

tū ik sadā hai to ehsās kī kamāñ se nikal

tu koi gham hai to dil mein jagah bana apni

tu ek sada hai to ehsas ki kaman se nikal

na jaane kal hoñ kahāñ saath ab havā ke haiñ

ki ham parinde maqāmāt-e-gum-shuda ke haiñ

na jaane kal hon kahan sath ab hawa ke hain

ki hum parinde maqamat-e-gum-shuda ke hain

koī bhūlī huī shai tāq-e-har-manzar pe rakkhī thī

sitāre chhat pe rakkhe the shikan bistar pe rakkhī thī

koi bhuli hui shai taq-e-har-manzar pe rakkhi thi

sitare chhat pe rakkhe the shikan bistar pe rakkhi thi

harī sunahrī ḳhaak uḌāne vaalā maiñ

shafaq shajar tasvīr banāne vaalā maiñ

hari sunahri KHak uDane wala main

shafaq shajar taswir banane wala main

kisī ke lauTne kī jab sadā sunī to khulā

ki mere saath koī aur bhī safar meñ thā

kisi ke lauTne ki jab sada suni to khula

ki mere sath koi aur bhi safar mein tha

paiham mauj-e-imkānī meñ

aglā paañv na.e paanī meñ

paiham mauj-e-imkani mein

agla panw nae pani mein

qadam zamīñ pe na the raah ham badalte kyā

havā bañdhī thī yahāñ piiTh par sambhalte kyā

qadam zamin pe na the rah hum badalte kya

hawa bandhi thi yahan piTh par sambhalte kya

damak rahā thā bahut yuuñ to pairahan us kā

zarā se lams ne raushan kiyā badan us kā

damak raha tha bahut yun to pairahan us ka

zara se lams ne raushan kiya badan us ka