tujh se kahaa thaa mai.n ne kal ai be-naziir-e-KHush-liqaa

tujh se kahā thā maiñ ne kal ai be-nazīr-e-ḳhush-liqā

ai rashk se tere falak par chāñd dohrā ho gayā

imroz tū jo kuchh bhī hai hājib thā tū sultāñ banā

tū yūsuf-e-kan'āñ banā tū husn-e-nūr-e-mustafā

imshab satā.ish maiñ ne kī kal hogī bartar ai parī

kal ye zamīn-o-āsmāñ tā'rīf meñ hoñge fanā

imshab ġhanīmat hai mujhe naukar huuñ maiñ chākar tirā

hoñge farishte hamd-ḳhvāñ kal 'arsh phāḌegā qabā

nāgāh sarsar aa.egī ye baam hogā aur na dar

miT jā.eñge sab bad-nafas kīḌe-makoḌoñ kī tarah

āñdhī chalegī jab tirī tābinda us meñ hogā tū

har zarra hañstā pā.egā us nuur meñ shamsuzzuhā

vo dil-rubā.ī pā.eñge pahle na thī un meñ kabhī

tā'līm zarre pā.eñge ai āftāb-e-ḳhush-liqā

tujh se kaha tha main ne kal ai be-nazir-e-KHush-liqa

ai rashk se tere falak par chand dohra ho gaya

imroz tu jo kuchh bhi hai hajib tha tu sultan bana

tu yusuf-e-kan'an bana tu husn-e-nur-e-mustafa

imshab sataish main ne ki kal hogi bartar ai pari

kal ye zamin-o-asman ta'rif mein honge fana

imshab ghanimat hai mujhe naukar hun main chaakar tera

honge farishte hamd-KHwan kal 'arsh phaDega qaba

nagah sarsar aaegi ye baam hoga aur na dar

miT jaenge sab bad-nafas kiDe-makoDon ki tarah

aandhi chalegi jab teri tabinda us mein hoga tu

har zarra hansta paega us nur mein shamsuzzuha

wo dil-rubai paenge pahle na thi un mein kabhi

ta'lim zarre paenge ai aaftab-e-KHush-liqa