main hun mushtaq-e-jafa mujh pe jafa aur sahi

maiñ huuñ mushtāq-e-jafā mujh pe jafā aur sahī

tum ho bedād se ḳhush is se sivā aur sahī

ġhair kī marg kā ġham kis liye ai ġhairat-e-māh

haiñ havas-pesha bahut vo na ho aur sahī

tum ho but phir tumheñ pindār-e-ḳhudā.ī kyoñ hai

tum ḳhudāvand hī kahlāo ḳhudā aur sahī

husn meñ huur se baḌh kar nahīñ hone ke kabhī

aap kā sheva-o-andāz-o-adā aur sahī

tere kūche kā hai maa.il dil-e-muztar merā

kā'ba ek aur sahī qibla-numā aur sahī

koī duniyā meñ magar baaġh nahīñ hai vā'iz

ḳhuld bhī baaġh hai ḳhair āb-o-havā aur sahī

kyoñ na firdaus meñ dozaḳh ko milā leñ yārab

sair ke vāste thoḌī sī fazā aur sahī

mujh ko vo do ki jise khā ke na paanī māñgūñ

zahr kuchh aur sahī āb-e-baqā aur sahī

mujh se 'ġhālib' ye 'alā.ī' ne ġhazal likhvā.ī

ek bedād-gar-e-ranj-fizā aur sahī

main hun mushtaq-e-jafa mujh pe jafa aur sahi

tum ho bedad se KHush is se siwa aur sahi

ghair ki marg ka gham kis liye ai ghairat-e-mah

hain hawas-pesha bahut wo na ho aur sahi

tum ho but phir tumhein pindar-e-KHudai kyon hai

tum KHudawand hi kahlao KHuda aur sahi

husn mein hur se baDh kar nahin hone ke kabhi

aap ka shewa-o-andaz-o-ada aur sahi

tere kuche ka hai mail dil-e-muztar mera

ka'ba ek aur sahi qibla-numa aur sahi

koi duniya mein magar bagh nahin hai wa'iz

KHuld bhi bagh hai KHair aab-o-hawa aur sahi

kyon na firdaus mein dozaKH ko mila len yarab

sair ke waste thoDi si faza aur sahi

mujh ko wo do ki jise kha ke na pani mangun

zahr kuchh aur sahi aab-e-baqa aur sahi

mujh se 'ghaalib' ye 'alai' ne ghazal likhwai

ek bedad-gar-e-ranj-fiza aur sahi