Sher on Khwab

aisā bhī kabhī ho maiñ jise ḳhvāb meñ dekhūñ

jāgūñ to vahī ḳhvāb kī ta.abīr batā.e

aisa bhi kabhi ho main jise KHwab mein dekhun

jagun to wahi KHwab ki tabir batae

aañkh khulte hī bastiyāñ tārāj

koī lazzat nahīñ hai ḳhvāboñ meñ

aankh khulte hi bastiyan taraj

koi lazzat nahin hai KHwabon mein

vaqt-e-pīrī shabāb kī bāteñ

aisī haiñ jaise ḳhvāb kī bāteñ

waqt-e-piri shabab ki baaten

aisi hain jaise KHwab ki baaten

aa.ina aa.ina tairtā koī aks

aur har ḳhvāb meñ dūsrā ḳhvāb hai

aaina aaina tairta koi aks

aur har KHwab mein dusra KHwab hai

ḳhvāb kī tarah bikhar jaane ko jī chāhtā hai

aisī tanhā.ī ki mar jaane ko jī chāhtā hai

KHwab ki tarah bikhar jaane ko ji chahta hai

aisi tanhai ki mar jaane ko ji chahta hai

aisā ho zindagī meñ koī ḳhvāb hī na ho

añdhiyārī raat meñ koī mahtāb hī na ho

aisa ho zindagi mein koi KHwab hi na ho

andhiyari raat mein koi mahtab hi na ho

muskātī āñkhoñ meñ aksar

dekhe ham ne rote ḳhvāb

muskati aankhon mein aksar

dekhe hum ne rote KHwab

roz vo ḳhvāb meñ aate haiñ gale milne ko

maiñ jo sotā huuñ to jaag uThtī hai qismat merī

roz wo KHwab mein aate hain gale milne ko

main jo sota hun to jag uThti hai qismat meri

mujhe is ḳhvāb ne ik arse tak be-tāb rakkhā hai

ik ūñchī chhat hai aur chhat par koī mahtāb rakkhā hai

mujhe is KHwab ne ek arse tak be-tab rakkha hai

ek unchi chhat hai aur chhat par koi mahtab rakkha hai

niiñd kā rasta chhoTā hai

jis meñ ḳhvāb kī Thokar hai

nind ka rasta chhoTa hai

jis mein KHwab ki Thokar hai

āñkheñ khulīñ to jaag uThīñ hasrateñ tamām

us ko bhī kho diyā jise paayā thā ḳhvāb meñ

aankhen khulin to jag uThin hasraten tamam

us ko bhi kho diya jise paya tha KHwab mein

maiñ huuñ ik paikar-e-ḳhayāl-o-ḳhvāb

aur kitnī baḌī haqīqat huuñ

main hun ek paikar-e-KHayal-o-KHwab

aur kitni baDi haqiqat hun

kisī ḳhayāl kisī ḳhvāb ke liye 'ḳhurshīd'

diyā darīche meñ rakkhā thā dil jalāyā thā

kisi KHayal kisi KHwab ke liye 'KHurshid'

diya dariche mein rakkha tha dil jalaya tha

uTho ye manzar-e-shab-tāb dekhne ke liye

ki niiñd shart nahīñ ḳhvāb dekhne ke liye

uTho ye manzar-e-shab-tab dekhne ke liye

ki nind shart nahin KHwab dekhne ke liye

raat kyā so.e ki baaqī umr kī niiñd uḌ ga.ī

ḳhvāb kyā dekhā ki dhaḌkā lag gayā tābīr kā

raat kya soe ki baqi umr ki nind uD gai

KHwab kya dekha ki dhaDka lag gaya tabir ka

āñkhoñ meñ jo bhar loge to kāñToñ se chubheñge

ye ḳhvāb to palkoñ pe sajāne ke liye haiñ

aankhon mein jo bhar loge to kanTon se chubhenge

ye KHwab to palkon pe sajaane ke liye hain

bārhā terā intizār kiyā

apne ḳhvāboñ meñ ik dulhan kī tarah

barha tera intizar kiya

apne KHwabon mein ek dulhan ki tarah

banā.ūñ kis ko shab-e-ġham anīs-e-tanhā.ī

ki saath hai mirī taqdīr vo bhī ḳhvāb meñ hai

banaun kis ko shab-e-gham anis-e-tanhai

ki sath hai meri taqdir wo bhi KHwab mein hai

ḳhvāb jitne dekhne haiñ aaj saare dekh leñ

kyā bharosa kal kahāñ pāgal havā le jā.egī

KHwab jitne dekhne hain aaj sare dekh len

kya bharosa kal kahan pagal hawa le jaegi

raat ko sonā na sonā sab barābar ho gayā

tum na aa.e ḳhvāb meñ āñkhoñ meñ ḳhvāb aayā to kyā

raat ko sona na sona sab barabar ho gaya

tum na aae KHwab mein aankhon mein KHwab aaya to kya

log karte haiñ ḳhvāb kī bāteñ

ham ne dekhā hai ḳhvāb āñkhoñ se

log karte hain KHwab ki baaten

hum ne dekha hai KHwab aankhon se

kitāb-e-ārzū ke gum-shuda kuchh baab rakkhe haiñ

tire takiye ke nīche bhī hamāre ḳhvāb rakkhe haiñ

kitab-e-arzu ke gum-shuda kuchh bab rakkhe hain

tere takiye ke niche bhi hamare KHwab rakkhe hain

ham kis ko dikhāte shab-e-furqat kī udāsī

sab ḳhvāb meñ the raat ko bedār hamīñ the

hum kis ko dikhate shab-e-furqat ki udasi

sab KHwab mein the raat ko bedar hamin the

bhar laa.e haiñ ham aañkh meñ rakhne ko muqābil

ik ḳhvāb-e-tamannā tirī ġhaflat ke barābar

bhar lae hain hum aankh mein rakhne ko muqabil

ek KHwab-e-tamanna teri ghaflat ke barabar

kahānī likhte hue dāstāñ sunāte hue

vo so gayā hai mujhe ḳhvāb se jagāte hue

kahani likhte hue dastan sunate hue

wo so gaya hai mujhe KHwab se jagate hue

kabhī dikhā de vo manzar jo maiñ ne dekhe nahīñ

kabhī to niind meñ ai ḳhvāb ke farishte aa

kabhi dikha de wo manzar jo main ne dekhe nahin

kabhi to nind mein ai KHwab ke farishte aa

dikhā.ī detā hai jo kuchh kahīñ vo ḳhvāb na ho

jo sun rahī huuñ vo dhokā na ho samā.at kā

dikhai deta hai jo kuchh kahin wo KHwab na ho

jo sun rahi hun wo dhoka na ho samaat ka

'zeb' mujhe Dar lagne lagā hai apne ḳhvāboñ se

jāgte jāgte dard rahā kartā hai mire sar meñ

'zeb' mujhe Dar lagne laga hai apne KHwabon se

jagte jagte dard raha karta hai mere sar mein

kisī ko ḳhvāb meñ aksar pukārte haiñ ham

'atā' isī liye sote meñ hoñT hilte haiñ

kisi ko KHwab mein aksar pukarte hain hum

'ata' isi liye sote mein honT hilte hain

zindagī ḳhvāb dekhtī hai magar

zindagī zindagī hai ḳhvāb nahīñ

zindagi KHwab dekhti hai magar

zindagi zindagi hai KHwab nahin

ajiib ḳhvāb thā ta.abīr kyā huī us kī

ki ek dariyā havāoñ ke ruḳh pe bahtā thā

ajib KHwab tha tabir kya hui us ki

ki ek dariya hawaon ke ruKH pe bahta tha

balā-e-jāñ thī jo bazm-e-tamāshā chhoḌ dī maiñ ne

ḳhushā ai zindagī ḳhvāboñ kī duniyā chhoḌ dī maiñ ne

bala-e-jaan thi jo bazm-e-tamasha chhoD di main ne

KHusha ai zindagi KHwabon ki duniya chhoD di main ne

kaisā jaadū hai samajh aatā nahīñ

niiñd merī ḳhvāb saare aap ke

kaisa jadu hai samajh aata nahin

nind meri KHwab sare aap ke

dikhā.ī ḳhvāb meñ dī thī Tuk ik muñh kī jhalak ham kuuñ

nahīñ tāqat añkhiyoñ ke kholne kī ab talak ham kuuñ

dikhai KHwab mein di thi Tuk ek munh ki jhalak hum kun

nahin taqat ankhiyon ke kholne ki ab talak hum kun

rahā ḳhvāb meñ un se shab bhar visāl

mire baḳht jaage maiñ soyā kiyā

raha KHwab mein un se shab bhar visal

mere baKHt jage main soya kiya

nahīñ ab koī ḳhvāb aisā tirī sūrat jo dikhlā.e

bichhaḌ kar tujh se kis manzil par ham tanhā chale aa.e

nahin ab koi KHwab aisa teri surat jo dikhlae

bichhaD kar tujh se kis manzil par hum tanha chale aae

shorish-e-vaqt huī vaqt kī raftār meñ gum

din guzarte haiñ tire ḳhvāb ke āsār meñ gum

shorish-e-waqt hui waqt ki raftar mein gum

din guzarte hain tere KHwab ke aasar mein gum

har ek raat ko mahtāb dekhne ke liye

maiñ jāgtā huuñ tirā ḳhvāb dekhne ke liye

har ek raat ko mahtab dekhne ke liye

main jagta hun tera KHwab dekhne ke liye

lete hī naam us kā sote se chauñk uTThe

hai ḳhair 'mīr'-sāhib kuchh tum ne ḳhvāb dekhā

lete hi nam us ka sote se chaunk uTThe

hai KHair 'mir'-sahib kuchh tum ne KHwab dekha

jis kī kuchh tābīr na ho

ḳhvāb usī ko kahte haiñ

jis ki kuchh tabir na ho

KHwab usi ko kahte hain

sarā-e-dil meñ jagah de to kaaT luuñ ik raat

nahīñ hai shart ki mujh ko sharīk-e-ḳhvāb banā

sara-e-dil mein jagah de to kaT lun ek raat

nahin hai shart ki mujh ko sharik-e-KHwab bana

itnā bedāriyoñ se kaam na lo

dosto ḳhvāb bhī zarūrī hai

itna bedariyon se kaam na lo

dosto KHwab bhi zaruri hai

jāgtī aañkh se jo ḳhvāb thā dekhā 'anvar'

us kī ta.abīr mujhe dil ke jalāne se milī

jagti aankh se jo KHwab tha dekha 'anwar'

us ki tabir mujhe dil ke jalane se mili

maiñ ne dekhā hai bahāroñ meñ chaman ko jalte

hai koī ḳhvāb kī tābīr batāne vaalā

main ne dekha hai bahaaron mein chaman ko jalte

hai koi KHwab ki tabir batane wala

ab judā.ī ke safar ko mire āsān karo

tum mujhe ḳhvāb meñ aa kar na pareshān karo

ab judai ke safar ko mere aasan karo

tum mujhe KHwab mein aa kar na pareshan karo

haañ kabhī ḳhvāb-e-ishq dekhā thā

ab tak āñkhoñ se ḳhuuñ Tapaktā hai

han kabhi KHwab-e-ishq dekha tha

ab tak aankhon se KHun Tapakta hai

har ek aañkh ko kuchh TuuTe ḳhvāb de ke gayā

vo zindagī ko ye kaisā azaab de ke gayā

har ek aankh ko kuchh TuTe KHwab de ke gaya

wo zindagi ko ye kaisa azab de ke gaya

tark-e-ta.alluqāt meñ mahjūr to hue

lekin ḳhayāl-o-ḳhvāb meñ vo rū-ba-rū rahe

tark-e-talluqat mein mahjur to hue

lekin KHayal-o-KHwab mein wo ru-ba-ru rahe

pyaar gayā to kaise milte rañg se rañg aur ḳhvāb se ḳhvāb

ek mukammal ghar ke andar har tasvīr adhūrī thī

pyar gaya to kaise milte rang se rang aur KHwab se KHwab

ek mukammal ghar ke andar har taswir adhuri thi

kyā hasīñ ḳhvāb mohabbat ne dikhāyā thā hameñ

khul ga.ī aañkh to tābīr pe ronā aayā

kya hasin KHwab mohabbat ne dikhaya tha hamein

khul gai aankh to tabir pe rona aaya