میں تو غزل سنا کے اکیلا کھڑا رہا

سب اپنے اپنے چاہنے والوں میں کھو گئے

آئنہ یہ تو بتاتا ہے کہ میں کیا ہوں مگر

آئنہ اس پہ ہے خاموش کہ کیا ہے مجھ میں

یہی ملنے کا سمے بھی ہے بچھڑنے کا بھی

مجھ کو لگتا ہے بہت اپنے سے ڈر شام کے بعد

زندگی سے بڑی سزا ہی نہیں

اور کیا جرم ہے پتا ہی نہیں

کیسی عجیب شرط ہے دیدار کے لیے

آنکھیں جو بند ہوں تو وہ جلوہ دکھائی دے

چاہے سونے کے فریم میں جڑ دو

آئنہ جھوٹ بولتا ہی نہیں

میں جس کے ہاتھ میں اک پھول دے کے آیا تھا

اسی کے ہاتھ کا پتھر مری تلاش میں ہے

اتنے حصوں میں بٹ گیا ہوں میں

میرے حصے میں کچھ بچا ہی نہیں

سچ گھٹے یا بڑھے تو سچ نہ رہے

جھوٹ کی کوئی انتہا ہی نہیں

مٹے یہ شبہ تو اے دوست تجھ سے بات کریں

ہماری پہلی ملاقات آخری تو نہیں

ہوس نے توڑ دی برسوں کی سادھنا میری

گناہ کیا ہے یہ جانا مگر گناہ کے بعد

تشنگی کے بھی مقامات ہیں کیا کیا یعنی

کبھی دریا نہیں کافی کبھی قطرہ ہے بہت

کیوں آئینہ کہیں اسے پتھر نہ کیوں کہیں

جس آئینے میں عکس نہ اس کا دکھائی دے

جتنے موسم ہیں سبھی جیسے کہیں مل جائیں

ان دنوں کیسے بتاؤں جو فضا ہے مجھ میں

آئنہ یہ تو بتاتا ہے میں کیا ہوں لیکن

آئنہ اس پہ ہے خاموش کہ کیا ہے مجھ میں

اک طرف قانون ہے اور اک طرف انسان ہے

ختم ہوتا ہی نہیں جرم و سزا کا سلسلہ

زندگی سے بڑی سزا ہی نہیں

اور کیا جرم ہے پتا ہی نہیں

ایسا نہ ہو گناہ کی دلدل میں جا پھنسوں

اے میری آرزو مجھے لے چل سنبھال کے

جیسے ان دیکھے اجالے کی کوئی دیوار ہو

بند ہو جاتا ہے کچھ دوری پہ ہر اک راستا

موسم ہیں دو ہی عشق کے صورت کوئی بھی ہو

ہیں اس کے پاس آئنے ہجر و وصال کے