maiñ ne khoyā hai tujhe yā ki tujhe paayā hai

tū hī āñkhoñ meñ basā hai ki tirā saaya hai

main ne khoya hai tujhe ya ki tujhe paya hai

tu hi aankhon mein basa hai ki tera saya hai

ishq karne ke baad bhī kuchh log

ye samajhte haiñ kuchh kiyā hī nahīñ

ishq karne ke baad bhi kuchh log

ye samajhte hain kuchh kiya hi nahin

lutf o rāhat kī havas hai to kisī shahr ko jā

ye karam dasht ke ādāb nahīñ kar sakte

lutf o rahat ki hawas hai to kisi shahr ko ja

ye karam dasht ke aadab nahin kar sakte

jab zulm hisār banātā hai to ḳhauf kī sarhad bantī hai

jab ishq hisār banātā hai zanjīr se ḳhushbū aatī hai

jab zulm hisar banata hai to KHauf ki sarhad banti hai

jab ishq hisar banata hai zanjir se KHushbu aati hai

ik rivāyat hai jo sadiyoñ se chalī aatī hai

ik taraf ishq hai aur ek taraf duniyā hai

ek riwayat hai jo sadiyon se chali aati hai

ek taraf ishq hai aur ek taraf duniya hai

ḳhud ko ham joḌne kī ḳhvāhish meñ

kitne ḳhānoñ meñ TuuT jaate haiñ

KHud ko hum joDne ki KHwahish mein

kitne KHanon mein TuT jate hain

but tarāshā thā inhī hāthoñ se maiñ ne ek din

par kise mā'lūm thā vo but ḳhudā ho jā.egā

but tarasha tha inhi hathon se main ne ek din

par kise ma'lum tha wo but KHuda ho jaega

kis qadar jhuum rahī hai duniyā

chaak par ghuum rahī hai duniyā

kis qadar jhum rahi hai duniya

chaak par ghum rahi hai duniya

ret se duniyā banāne meñ bikhar kar rah gayā

har ghaḌī ehsās hotā thā ki bas puurī huī

ret se duniya banane mein bikhar kar rah gaya

har ghaDi ehsas hota tha ki bas puri hui

apne jazbāt se judā honā

kitnā āsān hai ḳhudā honā

apne jazbaat se juda hona

kitna aasan hai KHuda hona

sab ne jis ko mushkil se ta.abīr kiyā

vo mujh par āsān bhī to ho saktā thā

sab ne jis ko mushkil se tabir kiya

wo mujh par aasan bhi to ho sakta tha

ye hijratoñ ke tamāshe ye qarz rishtoñ ke

maiñ ḳhud ko joḌte rahne meñ TuuT jaatā huuñ

ye hijraton ke tamashe ye qarz rishton ke

main KHud ko joDte rahne mein TuT jata hun

ye kaisā ma.arka hai dard kī tanāboñ se

ye kis ke haath pe āḳhir havā ne bai'at kī

ye kaisa marka hai dard ki tanabon se

ye kis ke hath pe aaKHir hawa ne bai'at ki

ḳhushbū sī phūTtī hai chamaktā hai nuur sā

shāyad kisī ke naaz meñ gūñdhī ga.ī hai ḳhaak

KHushbu si phuTti hai chamakta hai nur sa

shayad kisi ke naz mein gundhi gai hai KHak

ye to sochā hī na thā yaḳh-basta lamhoñ kā sukūt

ek din TūTegā aur sang-e-sadā ho jā.egā

ye to socha hi na tha yaKH-basta lamhon ka sukut

ek din TuTega aur sang-e-sada ho jaega

lamhe lamhe se banī hai ye zamāne kī kitāb

nuqta nuqta yahāñ sadiyoñ kā safar lagtā hai

lamhe lamhe se bani hai ye zamane ki kitab

nuqta nuqta yahan sadiyon ka safar lagta hai

sho.ala-e-ishq tirī chashm-navardī meñ nahīñ

mere siine meñ utar dekh yahāñ uThtā hai

shoala-e-ishq teri chashm-nawardi mein nahin

mere sine mein utar dekh yahan uThta hai

apnī zaat se aage jaanā hai jis ko

us ko barf se paanī honā paḌtā hai

apni zat se aage jaana hai jis ko

us ko barf se pani hona paDta hai

maiñ ne har sang ko pāsañg kiyā hai din-rāt

saḳht-jānī hī batā.egī ki lazzat kaisī

main ne har sang ko pasang kiya hai din-raat

saKHt-jaani hi bataegi ki lazzat kaisi

maiñ to Duubā thā kahīñ aur ubharne ke liye

mujh se har mauj ināyat kā sabab pūchhtī hai

main to Duba tha kahin aur ubharne ke liye

mujh se har mauj inayat ka sabab puchhti hai

shahr ab māñgtā hai saañs bhī lene kā hisāb

zindagī mujh se qayāmat kā sabab pūchhtī hai

shahr ab mangta hai sans bhi lene ka hisab

zindagi mujh se qayamat ka sabab puchhti hai

ḳhud ko ham joḌne kī ḳhvāhish meñ

kitne ḳhānoñ meñ TuuT jaate haiñ

KHud ko hum joDne ki KHwahish mein

kitne KHanon mein TuT jate hain

havas kī dhuup meñ phailā hai shor-e-ḳhalq-e-ḳhudā

sunā kisī ne nahīñ bastiyoñ meñ girya-e-ḳhāk

hawas ki dhup mein phaila hai shor-e-KHalq-e-KHuda

suna kisi ne nahin bastiyon mein girya-e-KHak

jab bhī aql banātī hai pahlā misrā

dil ko misra-e-sānī honā paḌtā hai

jab bhi aql banati hai pahla misra

dil ko misra-e-sani hona paDta hai

karne baiThā shumār ḳhud ko maiñ

sāmne koī taar taar aaya

karne baiTha shumar KHud ko main

samne koi tar tar aaya

us ko bhī kisī tarah bharosā nahīñ thā

maiñ ne bhī kisī taur safā.ī nahīñ dī

us ko bhi kisi tarah bharosa nahin tha

main ne bhi kisi taur safai nahin di

fazā meñ chup kī siyāhī ghulī hai aaj kī raat

lahū se hukm kī ta.amīl hone vaalī hai

faza mein chup ki siyahi ghuli hai aaj ki raat

lahu se hukm ki tamil hone wali hai

ye shahr roz talab kartā hai mujhe is taur

ki zindagī bhī koī chiiz ho zarūrat kī

ye shahr roz talab karta hai mujhe is taur

ki zindagi bhi koi chiz ho zarurat ki

ham banda-e-be-yār-o-madadgār the ḳhāmosh

ḳhāmosh rahā kūcha-e-qātil meñ ḳhudā tak

hum banda-e-be-yar-o-madadgar the KHamosh

KHamosh raha kucha-e-qatil mein KHuda tak

abhī be-vaqt hai ḳhvāboñ se jaanā

bichhaḌne kā abhī mausam nahīñ hai

abhi be-waqt hai KHwabon se jaana

bichhaDne ka abhi mausam nahin hai

ik imārat mire bāhar abhī toḌī ga.ī thī

ek malba mire andar kahīñ bikhrā huā hai

ek imarat mere bahar abhi toDi gai thi

ek malba mere andar kahin bikhra hua hai

ai samundar kī taraf dekhne vaale tū ne

apne tūfāñ kā nazāra to kiyā hotā kabhī

ai samundar ki taraf dekhne wale tu ne

apne tufan ka nazara to kiya hota kabhi

ham yahī samjhe the ik dil hī to hai apne liye

ham kahāñ samjhe the itnā sar-phirā ho jā.egā

hum yahi samjhe the ek dil hi to hai apne liye

hum kahan samjhe the itna sar-phira ho jaega

vo safar thā use paane ke liye

aur ye ḳhud ko bhulāne kā safar

wo safar tha use pane ke liye

aur ye KHud ko bhulane ka safar

tirā qatra mirī āñkhoñ meñ lahū utrā hai

ye tirā dard hai siine meñ ki tū utrā hai

tera qatra meri aankhon mein lahu utra hai

ye tera dard hai sine mein ki tu utra hai

ek be-chehragī kā mātam hai

aur hāthoñ meñ aa.ina bhī nahīñ

ek be-chehragi ka matam hai

aur hathon mein aaina bhi nahin

nafas nafas meñ badaltā huā sā kuchh to hai

havā ke bhes meñ chaltā huā sā kuchh to hai

nafas nafas mein badalta hua sa kuchh to hai

hawa ke bhes mein chalta hua sa kuchh to hai

nashe meñ Duub ke zaḳhm-e-sadā hue bhī to kyā

ḳhud apnī ḳhaak kuchal kar ḳhudā hue bhī to kyā

nashe mein Dub ke zaKHm-e-sada hue bhi to kya

KHud apni KHak kuchal kar KHuda hue bhi to kya

is baar mirī ruuh pe talvār chalī hai

is baar sañbhalne meñ zarā der lagegī

is bar meri ruh pe talwar chali hai

is bar sanbhalne mein zara der lagegi

bahā le jā.egī sab

baḌī pāgal havā hai

baha le jaegi sab

baDi pagal hawa hai

ye mirā shahr ki jiine nahīñ detā mujh ko

ab tirā naam bhī lete hue Dar lagtā hai

ye mera shahr ki jine nahin deta mujh ko

ab tera nam bhi lete hue Dar lagta hai

itnā āsāñ nahīñ lafzoñ ko ġhazal kar lenā

shor ko sher banāne meñ jigar lagtā hai

itna aasan nahin lafzon ko ghazal kar lena

shor ko sher banane mein jigar lagta hai

jo bichhaḌ gayā vo milā nahīñ ye savāl thā

jo milā nahīñ vo bichhaḌ gayā ye kamāl hai

jo bichhaD gaya wo mila nahin ye sawal tha

jo mila nahin wo bichhaD gaya ye kamal hai

mujh ko paane kī tamanna meñ vo ġharqāb huā

maiñ ne sāhil kī tamanna meñ use khoyā hai

mujh ko pane ki tamanna mein wo gharqab hua

main ne sahil ki tamanna mein use khoya hai

zindagī aur hī duniyā meñ tujhe le jaatī

apnī miTTī se kinārā to kiyā hotā kabhī

zindagi aur hi duniya mein tujhe le jati

apni miTTi se kinara to kiya hota kabhi

kuchh ajnabī rastoñ se charāġhoñ kī thakan kā

be-nām sā rishta hai to be-nām hī rah jaa.e

kuchh ajnabi raston se charaghon ki thakan ka

be-nam sa rishta hai to be-nam hi rah jae

bojh saarā safar meñ chalne kā

apne saa.e pe rakh diyā maiñ ne

bojh sara safar mein chalne ka

apne sae pe rakh diya main ne

ab ke vahshat ne mujhe rok liyā hai varna

pichhle mausam kī tarah lauT ke ghar jaanā thā

ab ke wahshat ne mujhe rok liya hai warna

pichhle mausam ki tarah lauT ke ghar jaana tha

āñgan kā aahaT se rishta aur aahaT kā banjar-pan

kitne mausam biit ga.e haiñ is dil ko samjhāne meñ

aangan ka aahaT se rishta aur aahaT ka banjar-pan

kitne mausam bit gae hain is dil ko samjhane mein

rūh-o-badan meñ jaarī hai ik ma.arka-e-ḳhūñ sadiyoñ se

ek havāla miTTī kā hai ek havāla paanī kā

ruh-o-badan mein jari hai ek marka-e-KHun sadiyon se

ek hawala miTTi ka hai ek hawala pani ka