ڈاکٹر نجمہ رحمانی شعبہ اردو ، دہلی یونیورسٹی میں تدریسی خدمات سے منسلک ہیں۔ ان کی متعدد کتابیں شائع ہو چکی ہیں حال ہی میں شائع ہونے والی کتاب "اردو افسانہ کا سفر" بہت مشہور ہوئی ہے۔ ان کی اس زیر نظر کتاب میں صرف ان منتخب شاعرات کا ذکر کیا گیا ہے جن کا اپنا طرز سخن اور اپنا مخصوص رجحان ہے ۔ کتاب تین ابواب میں منقسم ہے۔ پہلا باب کلاسیکی شاعرات کے ذکر پر مشتمل ہے۔ اس میں اٹھارویں صدی کے سیاسی و سماجی حالات کا جائزہ لیتے ہوئے اس عہد کی چند شاعرات کا مختصر ذکر کیا گیا ہے دوسرا باب آزادی کے بعد کے جدید شعری رجحانات پر مشتمل ہے ۔ اس میں ترقی پسند تحریک اور فنی و لسانی اعتبار سے شاعری میں ہونے والی تبدیلیوں کا مختصر جائزہ لیا گیا ہے اور تیسرے باب میں اردو کی چند شاعرات جو کہ شہرت کے بام عروج پر فائز ہیں ، ان کے کلام کا تنقیدی جائزہ پیش کیا گیا ہے۔ حالانکہ کتاب کا موضوع آزادی کے بعد کی شاعرات ہیں مگر مقدمہ میں " آزادی سے قبل شاعرات " کا جو جائزہ پیش کیا گیا ہے ، اس میں ماقبل کی تاریخ کو دلائل و شواہد کے ساتھ پیش کرنے کے سبب تاریخ کا ایک اہم گوشہ اس کتاب کا حصہ بن گیا ہے۔