جیسے جیسے انسان تیزی سے مستقبل کی جانب بھاگ رہا ہے وہ ماضی کوبھی چھوڑتا چلا جارہا ہے۔ نئی تاریخیں رقم ہورہی ہیں، تہذیب و ثقافت کا قدامت سے رشتہ منقطع ہورہا ہے جب سے دنیا گلوبل ولیج میں بدل گئی ہے تب سے تہذیب و ثقافت بھی عالمی ہورہی ہے ۔ انسان ماضی کی جانب بہت ہی کم جاتا ہے جہاں سے کسی بھی ملک و قوم کی ابتدائی سفر کا پتہ ملتا ہے یعنی ہر انسا ن اپنی اصل اور ماضی سے منقطع ہوتا جارہا ہے۔ ایسے میں کتابیں ہی ہوتی ہیں جو ہمیں ماضی میں لے جاتی ہیں اور ہماری سنہری تاریخ و ثقافت سے ہمیں روشناس کراتی ہیں ۔ اس کتاب کو سات ابواب میں تقسیم کیاگیا ہے ۔ پہلا باب تاریخی پس منظر ۔ دوسرے باب میں تاریخ سے ماقبل کی حیات قدیمہ کو پانچ عناوین میں پیش کیا گیا ہے ۔ تیسرے باب میں ہندو ستان کے اولین شہر سندھ کی تاریخی ، ثقافتی ، تہذیبی اور سماجی ذکرہے ۔ چوتھا باب آریائی اقوام پر ہے ۔ پانچویں باب میں ہندوستان کیسے قبائل سے سماج کی طرف منتقل ہوا اس پر تاریخی و سماجی گفتگو ہے۔ چھٹے باب میں ریاست مگدھ اور مگدھ کے مذہب پر ہے ۔ ساتویں باب میں بدھ مذہب کا ارتقا ء اورسماجی وسیاسی نظام پر معلومات ہیں ۔ اخیر میں سنسکرت ادب اور ڈرامہ پر بھی تحقیقی وتنقیدی گفتگو ہے ۔ الغرض تار یخ سے دلچسپی رکھنے والے ہر فرد کے لیے انمول ہے ۔