زیر تبصرہ کتاب "تنقید نامہ" پروفیسر عنوان چشتی کی تصنیف ہے۔ اس کتاب میں ان کے تنقیدی مضامین اور تبصرے شامل ہیں۔ سائنس و ٹیکنالوجی کی ترقی اور اس کے فوائد و نقصانات پر روشنی ڈالی گئی ہے، اصلاح اور تنقید کا فرق بیان کیا گیا ہے، اصلاح کی خوبیاں بیان کی گئی ہیں، مرزا غالب کی اصلاح سخن کو مدلل انداز میں پیش کیا گیا ہے، مولوی عبدالحق کی تنقید نگاری پر تفصیلی اور مدلل گفتگو کی گئی ہے، خواجہ حسن نظامی کے شخصی کمالات اور فن کی بلندیوں کو واضح کیا گیا ہے، مسعود حسین کی مرقع نگاری پر تفصیلی اور مدلل انداز میں روشنی ڈالی گئی ہے، جدید اردو غزل کی صورت حال مضامین و موضوعات پر روشنی ڈالی گئی ہے، یہ مطالعہ دہلی اور بنگال کے ساتھ مخصوص ہے، مولانا آزاد کے فکر و فن کو واضح کیا گیا ہے، چار شخصیات کا تعارف کرایا گیا ہے ، اور ان کے فن پر گفتگو کی گئی ہے، اس میں مرزا مظہر جان جاناں، سراج اورنگ آبادی، غالب، احسن مارہروی، شامل ہیں، آخر میں دو شعری مجموعوں 'اطراف' اور 'سنگ جاں' کا تجزیہ کیا گیا ہے۔

نام افتخار الحسن، ڈاکٹر اورتخلص عنوان تھا۔وہ۱۹۳۵ء قصبہ منگلور، ضلع سہارن پور(اترانچل) میں پیدا ہوئے۔ ایم اے (جغرافیہ) ایم اے (اردو) کے امتحانات پاس کیے۔ اور پی ایچ ڈی کی ڈگری حاصل کی ۔جامعہ ملیہ اسلامیہ میں لکچرر،ریڈر، پروفیسر اور صدرشعبہ اردو رہے اور وہیں پر ڈین فیکلٹی کے منصب سے ۱۹۹۷ میں ریٹائر ہوئے۔ انھیں ابراحسنی گنوری سے تلمذ حاصل تھا۔ وہ یکم فروری ۲۰۰۴ء کو نوئیڈا میں انتقال کرگئے۔ انھوں نے تقریبا چالیس علمی اور ادبی کتابیں تصنیف کی ہیں۔ چند تصانیف کے نام یہ ہیں: ’ذوق جمال‘، ’نیم باز‘(شعری مجموعے)، ’عکس وشخص‘(شخصیات)، ’تنقیدی پیرائے‘، ’اردو شاعری میں ہیئت کے تجربے‘، ’اردو شاعری میں جدیدیت کی روایت‘، ’عروض اور فنی مسائل‘، ’تنقید سے تحقیق تک‘، ’مکاتیب احسن‘(مقدمہ وحواشی ۔جلد اول ودوم)، ان کو اردو اکادمی ، دہلی نے ۱۹۹۱ء میں اردو شاعری ایوارڈ سے نوازا۔ اس کے علاوہ ان کو مختلف اداروں ، انجمنوں اور اکادمیوں نے متعدد ایوارڈ عطا کیے۔ موصوف ایک دانشور، سیرت نگار، تنقید نگار، شاعر، ماہر عروض اور استاد شاعر کے طور پر جانے جاتے تھے۔ بحوالۂ:پیمانۂ غزل(جلد دوم)،محمد شمس الحق،صفحہ:303