aankhen dikhain ghair ko meri KHata ke sath

āñkheñ dikhā.īñ ġhair ko merī ḳhatā ke saath

matlab adā vo karte haiñ aur kis adā ke saath

shoḳhī nigah ke saath taġhāful jafā ke saath

ushshāq par hujūm-e-balā hai balā ke saath

āḳhir huā na zabt shab-e-vasl mudda.ī

naala nikal gayā mirī lab se duā ke saath

tere sitam se mujh ko milā mansab-e-kalīm

ik vaj.h-e-guftagū nikal aa.ī ḳhudā ke saath

terā hijāb uThte hī aaya vo nā-gahāñ

dushman ke paaoñ khul ga.e band-e-qabā ke saath

meñ kyā ki dushmanoñ kī bhī qismat ulaT ga.ī

tirchhī adā.eñ aur terī bāñkī adā ke saath

rāh-e-talab meñ shauq kī manzūr hai numūd

miTte qadam qadam pe chale rahnumā ke saath

yārab ġhalat ho fahm-e-kaj-andesh kā gumāñ

kuchh kah rahā hai in se adū iltijā ke saath

dete nahīñ kisī ko pata apne haal kā

begāna ban ke chalte haiñ har āshnā ke saath

mai be-talab milī to huī yaar kī talab

bandoñ ke naaz bhī haiñ nirāle ḳhudā ke saath

josh-e-qalaq meñ dekhiye kyā māñgtā huuñ maiñ

yāroñ ke dam nikalte haiñ merī duā ke saath

ghar se mujhe nikālte rahiye par is tarah

gah mudda.ī ke saath gahe mudda.ā ke saath

kyuuñ shauq meñ girā.iye saath apne shān-e-ishq

aġhmāz bhī zarūr hai kuchh iltijā ke saath

kahtā huuñ ye nasīb na dushman ko ho firāq

aa maiñ vo kahte jaate haiñ merī duā ke saath

lailā kā naam zinda hai ab tak jahāñ meñ

tum bhī nibāh do kisī ahl-e-vafā ke saath

phirte hī us kī aañkh ke vābasta-tar havā

maiñ dil ke saath dil nigah-e-fitna-zā ke saath

ham ālam-e-ḳhayāl meñ kuchh bhī na ḳhush hue

hai rashk-e-ġhair yād-e-lab-e-jāñ-fazā ke saath

ab to baḌā ḳhayāl terī ranjishoñ kā hai

mahshar meñ dekh leñge ḳhudā kī ḳhudā ke saath

kahtā hai Dar ke haath vafā se uThā liyā

dushman kī baat ban ga.ī merī duā ke saath

aatā hai bū-e-dost meñ kāfir basā huā

qāsid bhī ik raqīb hai apnā sabā ke saath

kyā DhūñDhte ho dahr meñ 'anvar' jamāl-e-dost

chande phiro chalo kisī mard-e-ḳhudā ke saath

aankhen dikhain ghair ko meri KHata ke sath

matlab ada wo karte hain aur kis ada ke sath

shoKHi nigah ke sath taghaful jafa ke sath

ushshaq par hujum-e-bala hai bala ke sath

aaKHir hua na zabt shab-e-wasl muddai

nala nikal gaya meri lab se dua ke sath

tere sitam se mujh ko mila mansab-e-kalim

ek wajh-e-guftagu nikal aai KHuda ke sath

tera hijab uThte hi aaya wo na-gahan

dushman ke paon khul gae band-e-qaba ke sath

mein kya ki dushmanon ki bhi qismat ulaT gai

tirchhi adaen aur teri banki ada ke sath

rah-e-talab mein shauq ki manzur hai numud

miTte qadam qadam pe chale rahnuma ke sath

yarab ghalat ho fahm-e-kaj-andesh ka guman

kuchh kah raha hai in se adu iltija ke sath

dete nahin kisi ko pata apne haal ka

begana ban ke chalte hain har aashna ke sath

mai be-talab mili to hui yar ki talab

bandon ke naz bhi hain nirale KHuda ke sath

josh-e-qalaq mein dekhiye kya mangta hun main

yaron ke dam nikalte hain meri dua ke sath

ghar se mujhe nikalte rahiye par is tarah

gah muddai ke sath gahe muddaa ke sath

kyun shauq mein giraiye sath apne shan-e-ishq

aghmaz bhi zarur hai kuchh iltija ke sath

kahta hun ye nasib na dushman ko ho firaq

aa main wo kahte jate hain meri dua ke sath

laila ka nam zinda hai ab tak jahan mein

tum bhi nibah do kisi ahl-e-wafa ke sath

phirte hi us ki aankh ke wabasta-tar hawa

main dil ke sath dil nigah-e-fitna-za ke sath

hum aalam-e-KHayal mein kuchh bhi na KHush hue

hai rashk-e-ghair yaad-e-lab-e-jaan-faza ke sath

ab to baDa KHayal teri ranjishon ka hai

mahshar mein dekh lenge KHuda ki KHuda ke sath

kahta hai Dar ke hath wafa se uTha liya

dushman ki baat ban gai meri dua ke sath

aata hai bu-e-dost mein kafir basa hua

qasid bhi ek raqib hai apna saba ke sath

kya DhunDhte ho dahr mein 'anwar' jamal-e-dost

chande phiro chalo kisi mard-e-KHuda ke sath