apni nazron ko bhi diwar samajhta hoga

apnī nazroñ ko bhī dīvār samajhtā hogā

jo musāfir tire kūche se guzartā hogā

aaj Thahrā hai mirā harf-e-vafā qābil-e-dār

kal tū hī merī vafāoñ ko tarastā hogā

zabt kā had se guzarnā bhī hai ik sail-e-balā

dard kyā hogā agar had se guzartā hogā

us kī tārīf meñ jab koī kahī jaa.e ġhazal

kuchh na kuchh rañg qasīde kā jhalaktā hogā

kushta-e-zabt-e-fuġhāñ naġhma-e-be-sāz-o-sadā

uf vo aañsū jo lahū ban ke Tapaktā hogā

sher ban kar mire kāġhaz pe jo aayā hai lahū

ashk ban kar tire dāman se ulajhtā hogā

haiñ jo larzāñ mah-o-anjum kī shuā.eñ 'aḳhgar'

koī betāb falak par bhī taḌaptā hogā

apni nazron ko bhi diwar samajhta hoga

jo musafir tere kuche se guzarta hoga

aaj Thahra hai mera harf-e-wafa qabil-e-dar

kal tu hi meri wafaon ko tarasta hoga

zabt ka had se guzarna bhi hai ek sail-e-bala

dard kya hoga agar had se guzarta hoga

us ki tarif mein jab koi kahi jae ghazal

kuchh na kuchh rang qaside ka jhalakta hoga

kushta-e-zabt-e-fughan naghma-e-be-saz-o-sada

uf wo aansu jo lahu ban ke Tapakta hoga

sher ban kar mere kaghaz pe jo aaya hai lahu

ashk ban kar tere daman se ulajhta hoga

hain jo larzan mah-o-anjum ki shuaen 'aKHgar'

koi betab falak par bhi taDapta hoga