ba-faiz-e-ishq humne jab KHirad ka rasta badla

ba-faiz-e-ishq ham ne jab ḳhirad kā rāsta badlā

mazāq-e-zindagī ke saath dil kā mudda.ā badlā

sukūn-e-dil kī ḳhātir aaj andāz-e-vafā badlā

mirī sūrat badal jaane se dil kā mudda.ā badlā

mohabbat hī mohabbat hai jidhar dekho zamāne meñ

mirī qismat ki un hāthoñ meñ phir rang-e-hinā badlā

mohabbat kī ye rusvā.ī ḳhudā jaane kahāñ tak ho

agar majbūr-e-ġham ho kar koī ġham-āshnā badlā

kuchh is andāz se pahlū meñ lī hai dil ne añgḌā.ī

mizāj-e-ashk-e-ġham haa.e ba-unvān-e-hinā badlā

sunā to hai badal jaatī haiñ roz-o-shab se taqdīreñ

ḳhudā jaane na kyoñ ab tak 'kalīm'-e-be-navā badlā

ba-faiz-e-ishq hum ne jab KHirad ka rasta badla

mazaq-e-zindagi ke sath dil ka muddaa badla

sukun-e-dil ki KHatir aaj andaz-e-wafa badla

meri surat badal jaane se dil ka muddaa badla

mohabbat hi mohabbat hai jidhar dekho zamane mein

meri qismat ki un hathon mein phir rang-e-hina badla

mohabbat ki ye ruswai KHuda jaane kahan tak ho

agar majbur-e-gham ho kar koi gham-ashna badla

kuchh is andaz se pahlu mein li hai dil ne angDai

mizaj-e-ashk-e-gham hae ba-unwan-e-hina badla

suna to hai badal jati hain roz-o-shab se taqdiren

KHuda jaane na kyon ab tak 'kalim'-e-be-nawa badla