badan pe jis ke sharafat ka pairahan dekha

badan pe jis ke sharāfat kā pairahan dekhā

vo aadmī bhī yahāñ ham ne bad-chalan dekhā

ḳharīdne ko jise kam thī daulat-e-duniyā

kisī kabīr kī muTThī meñ vo ratan dekhā

mujhe milā hai vahāñ apnā hī badan zaḳhmī

kahīñ jo tiir se ghāyal koī hiran dekhā

baḌā na chhoTā koī farq bas nazar kā hai

sabhī pe chalte samay ek sā kafan dekhā

zabāñ hai aur bayāñ aur us kā matlab aur

ajiib aaj kī duniyā kā vyākaran dekhā

luTere Daaku bhī apne pe naaz karne lage

unhoñne aaj jo santoñ kā ācharan dekhā

jo sādgī hai kuhan meñ hamāre ai 'nīraj'

kisī pe aur bhī kyā aisā bāñkpan dekhā

badan pe jis ke sharafat ka pairahan dekha

wo aadmi bhi yahan hum ne bad-chalan dekha

KHaridne ko jise kam thi daulat-e-duniya

kisi kabir ki muTThi mein wo ratan dekha

mujhe mila hai wahan apna hi badan zaKHmi

kahin jo tir se ghayal koi hiran dekha

baDa na chhoTa koi farq bas nazar ka hai

sabhi pe chalte samay ek sa kafan dekha

zaban hai aur bayan aur us ka matlab aur

ajib aaj ki duniya ka wyakaran dekha

luTere Daku bhi apne pe naz karne lage

unhonne aaj jo santon ka aacharan dekha

jo sadgi hai kuhan mein hamare ai 'niraj'

kisi pe aur bhi kya aisa bankpan dekha