banaya ek kafir ke tain us dam main do kafir

banāyā ek kāfir ke ta.iiñ us dam maiñ do kāfir

mire muñh se jo niklā nā-gahāñ o kāfir o kāfir

musalmāñ dekh kar us but kī sūrat ko ye kahtā hai

musalmānī kahāñ kii? bāñdh le zunnār, ho kāfir

tujhe parvā nahīñ hargiz kisī kī tū hai be-parvā

tire is husn-e-kāfir par parī ho jaa.e go kāfir

shab-e-hijrāñ meñ jo dil dam-ba-dam fariyād kartā hai

ḳhafā ho kar kahūñ maiñ koī saa.at tū to so kāfir

kahāñ tak ai dil-e-shorīda tū aañsū bahāvegā

shab aa.ī sub.h hone par bas itnā bhī na ro kāfir

ham apnā dīn-o-īmāñ pahle us ko nazr karte haiñ

hamāre sāmne is shakl se aatā hai jo kāfir

tirī bātoñ se to ai 'mus.hafī' jī apnā tañg aayā

ḳhudā ke vāste chup rah na merī jaan kho kāfir

banaya ek kafir ke tain us dam main do kafir

mere munh se jo nikla na-gahan o kafir o kafir

musalman dekh kar us but ki surat ko ye kahta hai

musalmani kahan ki? bandh le zunnar, ho kafir

tujhe parwa nahin hargiz kisi ki tu hai be-parwa

tere is husn-e-kafir par pari ho jae go kafir

shab-e-hijran mein jo dil dam-ba-dam fariyaad karta hai

KHafa ho kar kahun main koi saat tu to so kafir

kahan tak ai dil-e-shorida tu aansu bahawega

shab aai subh hone par bas itna bhi na ro kafir

hum apna din-o-iman pahle us ko nazr karte hain

hamare samne is shakl se aata hai jo kafir

teri baaton se to ai 'mushafi' ji apna tang aaya

KHuda ke waste chup rah na meri jaan kho kafir