chaal apnī adā se chalte haiñ
ham kahāñ kaj-ravī se Talte haiñ
zindagī be-ruḳhī se pesh na aa
tujh pe ehsāñ mire nikalte haiñ
kārdāñ haiñ balā ke sab chehre
aa.ine ko hunar se chhalte haiñ
koī ātish-fishāñ hai siine meñ
ashk misl-e-sharar nikalte haiñ
us ke tarz-e-suḳhan ke maare log
apnā lahja kahāñ badalte haiñ
aaj so luuñ ki hai suhulat-e-shab
din kahāñ roz roz Dhalte haiñ
aa ga.ī lau ḳhizāñ kī parbat tak
vādiyoñ meñ chinār jalte haiñ
panja-e-zehn ke tale paiham
tā.ir-e-dil ka.ī machalte haiñ
ḳhvāb kā jin na aa.egā bāhar
be-sabab aap aañkh malte haiñ
tujh se kirdār hoñ 'bakul' jin meñ
aise qisse kahāñ sambhalte haiñ
chaal apni ada se chalte hain
hum kahan kaj-rawi se Talte hain
zindagi be-ruKHi se pesh na aa
tujh pe ehsan mere nikalte hain
kardan hain bala ke sab chehre
aaine ko hunar se chhalte hain
koi aatish-fishan hai sine mein
ashk misl-e-sharar nikalte hain
us ke tarz-e-suKHan ke mare log
apna lahja kahan badalte hain
aaj so lun ki hai suhulat-e-shab
din kahan roz roz Dhalte hain
aa gai lau KHizan ki parbat tak
wadiyon mein chinar jalte hain
panja-e-zehn ke tale paiham
tair-e-dil kai machalte hain
KHwab ka jin na aaega bahar
be-sabab aap aankh malte hain
tujh se kirdar hon 'bakul' jin mein
aise qisse kahan sambhalte hain
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
