dil wo shai hai ki jo dekhe to khiche yar ke sath

dil vo shai hai ki jo dekhe to khiche yaar ke saath

ye dukāñ vo hai ki chaltī hai ḳharīdār ke saath

ek dam-bhar ke liye ham na lagāyā thā gale

umr hī kaT ga.ī qātil tirī talvār ke saath

tāna-e-zulm-o-sitam lailā-o-shīrīñ pe abas

kyā kiyā aap ne ishq-e-dil-e-afgār ke saath

teġh chal niklī dam-e-qatl gale par mere

maiñ ne tashbīh jo dī abrū-e-ḳhamdār ke saath

hashr aġhyār kā shaddād ke hogā hamrāh

jhuuT kahtā huuñ to bas hashr ho aġhyār ke saath

na Dareñ ḳhuld meñ jaate hue jo rizvāñ se

us ke darvāze pe ruk jaa.eñ ḳhabar-dār ke saath

so ga.e baḳht shab-e-va.ada ye mujh se kah kar

kaun jaagā hai tire dīda-e-bedār ke saath

is qadar charb-zabānī nahīñ achchhī ai sham.a

bazm-e-jānāñ meñ zabāñ kaTtī hai guftār ke saath

hashr meñ zālim-o-mazlūm judā hoñge dareġh

haa.e vaañ bhī na rahe us but-e-ayyār ke saath

haa.e afsos hai 'sālik' kī javāñ-margī kā

ishq kī baat ga.ī us jigar-afgār ke saath

dil wo shai hai ki jo dekhe to khiche yar ke sath

ye dukan wo hai ki chalti hai KHaridar ke sath

ek dam-bhar ke liye hum na lagaya tha gale

umr hi kaT gai qatil teri talwar ke sath

tana-e-zulm-o-sitam laila-o-shirin pe abas

kya kiya aap ne ishq-e-dil-e-afgar ke sath

tegh chal nikli dam-e-qatl gale par mere

main ne tashbih jo di abru-e-KHamdar ke sath

hashr aghyar ka shaddad ke hoga hamrah

jhuT kahta hun to bas hashr ho aghyar ke sath

na Daren KHuld mein jate hue jo rizwan se

us ke darwaze pe ruk jaen KHabar-dar ke sath

so gae baKHt shab-e-wada ye mujh se kah kar

kaun jaga hai tere dida-e-bedar ke sath

is qadar charb-zabani nahin achchhi ai shama

bazm-e-jaanan mein zaban kaTti hai guftar ke sath

hashr mein zalim-o-mazlum juda honge daregh

hae wan bhi na rahe us but-e-ayyar ke sath

hae afsos hai 'salik' ki jawan-margi ka

ishq ki baat gai us jigar-afgar ke sath