ek dafa jo tere zer-e-asar andha hua

ek dafa jo tire zer-e-asar andhā huā

aglī dafa bhī vahī hogā agar andhā huā

mere andar raushnī thī ḳhuun to thā hī nahīñ

vaar karne vaalā pahle vaar par andhā huā

vo nazar aatā hai to phir kuchh nazar aatā nahīñ

us ko jis jis ne bhī dekhā umr bhar andhā huā

sab usī ko dekh kar aa.e haiñ rāh-e-ishq par

jis kā āġhāz-e-safar meñ ham-safar andhā huā

āñkheñ khul jaatī haiñ jis hālat meñ ḳhud ko dekh kar

maiñ usī hālat meñ us ko dekh kar andhā huā

us ko āñkheñ mil ga.iiñ ghar meñ hamesha kī tarah

maiñ hamesha kī tarah auroñ ke ghar andhā huā

us ne ik andhe ko tohfe meñ chhaḌī kyā bhej dī

dekhte hī dekhte saarā nagar andhā huā

mere andhe-pan kā auroñ ne uThāyā fā.eda

vo jidhar hotā nahīñ thā maiñ udhar andhā huā

aise andhe kī hukūmat hai hamāre mulk meñ

jis ko ye bhī kah nahīñ sakte kidhar andhā huā

ek dafa jo tere zer-e-asar andha hua

agli dafa bhi wahi hoga agar andha hua

mere andar raushni thi KHun to tha hi nahin

war karne wala pahle war par andha hua

wo nazar aata hai to phir kuchh nazar aata nahin

us ko jis jis ne bhi dekha umr bhar andha hua

sab usi ko dekh kar aae hain rah-e-ishq par

jis ka aaghaz-e-safar mein ham-safar andha hua

aankhen khul jati hain jis haalat mein KHud ko dekh kar

main usi haalat mein us ko dekh kar andha hua

us ko aankhen mil gain ghar mein hamesha ki tarah

main hamesha ki tarah auron ke ghar andha hua

us ne ek andhe ko tohfe mein chhaDi kya bhej di

dekhte hi dekhte sara nagar andha hua

mere andhe-pan ka auron ne uThaya faeda

wo jidhar hota nahin tha main udhar andha hua

aise andhe ki hukumat hai hamare mulk mein

jis ko ye bhi kah nahin sakte kidhar andha hua