ghar se nikal bhi aaen magar yar bhi to ho

ghar se nikal bhī aa.eñ magar yaar bhī to ho

jī ko lage kahīñ koī kirdār bhī to ho

ye kyā ki barg-e-zard sā TuuTe bikhar ga.e

āñdhī chale havāoñ kī yalġhār bhī to ho

sar ko abas hai sañg-e-tavātur kā sāmnā

sahn-e-makāñ meñ shāḳh-e-samar-bār bhī to ho

anmol ham guhar haiñ magar tere vāste

bik jaa.eñ koī aisā ḳharīdār bhī to ho

kāġhaz kī kashtiyoñ meñ samundar lapeT leñ

pahlū meñ tere qurb kī patvār bhī to ho

sab ko usī ke lahje kī tauqīr chāhiye

'mohsin' kisī ko miir sā āzār bhī to ho

ghar se nikal bhi aaen magar yar bhi to ho

ji ko lage kahin koi kirdar bhi to ho

ye kya ki barg-e-zard sa TuTe bikhar gae

aandhi chale hawaon ki yalghaar bhi to ho

sar ko abas hai sang-e-tawatur ka samna

sahn-e-makan mein shaKH-e-samar-bar bhi to ho

anmol hum guhar hain magar tere waste

bik jaen koi aisa KHaridar bhi to ho

kaghaz ki kashtiyon mein samundar lapeT len

pahlu mein tere qurb ki patwar bhi to ho

sab ko usi ke lahje ki tauqir chahiye

'mohsin' kisi ko mir sa aazar bhi to ho