humne mana dil hamara aap ke qabil nahin

ham ne maanā dil hamārā aap ke qābil nahīñ

kyā ise fariyād bhī karne kā haq hāsil nahīñ

jazba-e-ulfat na ho aisā to koī dil nahīñ

āshnā-e-ġham nahīñ to zindagī kāmil nahīñ

is jahān-e-ārzū se duur jaanā hai tujhe

jāda-paimā.ī zamāne kī tirī manzil nahīñ

haq bahāroñ par hamārā bhī hai ahl-e-gulsitāñ

kaun se gul meñ hamārā ḳhūn-e-dil shāmil nahīñ

hai haqīqat-bīñ nigāhoñ kī kamī is daur meñ

tang-nazarī se mubarrā kyā koī mahfil nahīñ

garche duniyā ke jhameloñ meñ hai uljhī zindagī

ai ḳhayāl-e-yār phir bhī tujh se ye ġhāfil nahīñ

ye talātum-ḳhez dariyā ye havā-e-pur-ḳhatar

hai bhañvar meñ naav 'ḳhālid' duur tak sāhil nahīñ

hum ne mana dil hamara aap ke qabil nahin

kya ise fariyaad bhi karne ka haq hasil nahin

jazba-e-ulfat na ho aisa to koi dil nahin

aashna-e-gham nahin to zindagi kaamil nahin

is jahan-e-arzu se dur jaana hai tujhe

jada-paimai zamane ki teri manzil nahin

haq bahaaron par hamara bhi hai ahl-e-gulsitan

kaun se gul mein hamara KHun-e-dil shamil nahin

hai haqiqat-bin nigahon ki kami is daur mein

tang-nazari se mubarra kya koi mahfil nahin

garche duniya ke jhamelon mein hai uljhi zindagi

ai KHayal-e-yar phir bhi tujh se ye ghafil nahin

ye talatum-KHez dariya ye hawa-e-pur-KHatar

hai bhanwar mein naw 'KHalid' dur tak sahil nahin