hama-shuma ko nahin dost hi ko bhul gaya

hamā-shumā ko nahīñ dost hī ko bhuul gayā

na bhūlnā thā jise vo usī ko bhuul gayā

tavañgarī ne badal hī diyā hai us kā mizāj

vo mujh ko aur mirī dostī ko bhuul gayā

kamī to mai kī nahīñ thī magar mirā saaqī

kisī ko jaam diyā aur kisī ko bhuul gayā

itā.ateñ hī to jiine kā ain maqsad hai

ḳhudā kā banda magar bandagī ko bhuul gayā

vo merī jaan kā dushman hai jāntā thā maiñ

milā jo hañs ke to meñ dushmanī ko bhuul gayā

qafas meñ rahne kā sayyād ye nahīñ matlab

qafas meñ rah ke maiñ parvāz hī ko bhuul gayā

tamām-umr maiñ shāyad tirī talāsh meñ thā

tū mil gayā to maiñ āvārgī ko bhuul gayā

safar tavīl thā aur maiñ thakā huā thā 'nazīr'

lagan thī itnī ki vāmāndagī ko bhuul gayā

hama-shuma ko nahin dost hi ko bhul gaya

na bhulna tha jise wo usi ko bhul gaya

tawangari ne badal hi diya hai us ka mizaj

wo mujh ko aur meri dosti ko bhul gaya

kami to mai ki nahin thi magar mera saqi

kisi ko jam diya aur kisi ko bhul gaya

itaaten hi to jine ka ain maqsad hai

KHuda ka banda magar bandagi ko bhul gaya

wo meri jaan ka dushman hai jaanta tha main

mila jo hans ke to mein dushmani ko bhul gaya

qafas mein rahne ka sayyaad ye nahin matlab

qafas mein rah ke main parwaz hi ko bhul gaya

tamam-umr main shayad teri talash mein tha

tu mil gaya to main aawargi ko bhul gaya

safar tawil tha aur main thaka hua tha 'nazir'

lagan thi itni ki wamandagi ko bhul gaya