hamari qismat mein kya likha hai pata nahin hai

hamārī qismat meñ kyā likhā hai pata nahīñ hai

sunā hai mehnat kā falsafa hai pata nahīñ hai

tū apnī duniyā se merī duniyā bisār baiThā

yā ab bhī mujh meñ hī mubtalā hai pata nahīñ hai

batā ki aurat ke sab masā.il kā hal hai aañsū

yā us kā aañsū hī mas.ala hai pata nahīñ hai

pata nahīñ hai ki ham ko dar-asl kyā pata hai

ki ham ko dar-asl jo pata hai pata nahīñ hai

hamāre aage hazār manzar badal rahe haiñ

ye kin manāzir pe man rukā hai pata nahīñ haiñ

har ik zamān-o-makāñ meñ sach kā badalnā tai hai

so ham ko fil-vaqt jo pata hai pata nahīñ haiñ

hamari qismat mein kya likha hai pata nahin hai

suna hai mehnat ka falsafa hai pata nahin hai

tu apni duniya se meri duniya bisar baiTha

ya ab bhi mujh mein hi mubtala hai pata nahin hai

bata ki aurat ke sab masail ka hal hai aansu

ya us ka aansu hi masala hai pata nahin hai

pata nahin hai ki hum ko dar-asl kya pata hai

ki hum ko dar-asl jo pata hai pata nahin hai

hamare aage hazar manzar badal rahe hain

ye kin manazir pe man ruka hai pata nahin hain

har ek zaman-o-makan mein sach ka badalna tai hai

so hum ko fil-waqt jo pata hai pata nahin hain