haqiqaton ko jo kar rahe hain raqam lahu se range hue hain

haqīqatoñ ko jo kar rahe haiñ raqam lahū se rañge hue haiñ

lahū se tahrīr tar-ba-tar hai qalam lahū se rañge hue haiñ

mohabbatoñ kā vo qāfila jo vafā ke parcham liye hue thā

vo hai nishāne pe qātiloñ ke alam lahū se rañge hue haiñ

muhāfizoñ ke havāle kar ke makān apnā jo so rahe the

vo luT ga.e haiñ vo ro rahe haiñ haram lahū se rañge hue haiñ

qabīle vāloñ ko kyā huā hai samajh rahe haiñ usī ko qaa.id

qiyādatoñ ke junūñ meñ jis ke qadam lahū se rañge hue haiñ

jo mehrbāñ the jo multafit the karam navāzī thī aam jin kī

karīm jo the jo kar rahe the karam lahū se rañge hue haiñ

badan ke zaḳhmoñ ko kyā gineñ ham gila kareñ kyā batāo tum se

ye sab tumhārī ināyateñ haiñ jo ham lahū se rañge hue haiñ

sahāfatoñ kā safar bhī aalam baḌā hī mushkil bharā safar hai

lahū meñ bhīge hue haiñ kāġhaz qalam lahū se rañge hue haiñ

haqiqaton ko jo kar rahe hain raqam lahu se range hue hain

lahu se tahrir tar-ba-tar hai qalam lahu se range hue hain

mohabbaton ka wo qafila jo wafa ke parcham liye hue tha

wo hai nishane pe qatilon ke alam lahu se range hue hain

muhafizon ke hawale kar ke makan apna jo so rahe the

wo luT gae hain wo ro rahe hain haram lahu se range hue hain

qabile walon ko kya hua hai samajh rahe hain usi ko qaid

qiyaadaton ke junun mein jis ke qadam lahu se range hue hain

jo mehrban the jo multafit the karam nawazi thi aam jin ki

karim jo the jo kar rahe the karam lahu se range hue hain

badan ke zaKHmon ko kya ginen hum gila karen kya batao tum se

ye sab tumhaari inayaten hain jo hum lahu se range hue hain

sahafaton ka safar bhi aalam baDa hi mushkil bhara safar hai

lahu mein bhige hue hain kaghaz qalam lahu se range hue hain