itni mushkil mein bhi ahbab na Dalen mujhko

itnī mushkil meñ bhī ahbāb na Dāleñ mujh ko

ki sambhalnā bhī na chāhūñ to sambhāleñ mujh ko

ġham-e-daurāñ ġham-e-jānāñ ġham-e-jāñ ek hue

Dar rahā huuñ ye kahīñ maar na Dāleñ mujh ko

munfarid merī tabī.at hai ye hālāt kahīñ

ravish-e-ām ke sāñche meñ na Dhāleñ mujh ko

maiñ to is par bhī huuñ raazī ki tire shahr ke log

mere bante nahīñ apnā hī banā leñ mujh ko

aap mujh se kisī ta.abīr kī phir baat kareñ

pahle is ḳhvāb-e-tamannā se jagā leñ mujh ko

nahīñ ma.alūm ki kal tak maiñ rahūñ yā na rahūñ

mehrbāñ aaj hī jī-bhar ke satā leñ mujh ko

gardishoñ ke liye ab tak na ye mumkin na huā

kisī sūrat mire mehvar se haTā leñ mujh ko

in bulandī ke makīnoñ ko mayassar hī nahīñ

'lais' vo haath jo pastī se uThā leñ mujh ko

itni mushkil mein bhi ahbab na Dalen mujh ko

ki sambhalna bhi na chahun to sambhaalen mujh ko

gham-e-dauran gham-e-jaanan gham-e-jaan ek hue

Dar raha hun ye kahin mar na Dalen mujh ko

munfarid meri tabiat hai ye haalat kahin

rawish-e-am ke sanche mein na Dhaalen mujh ko

main to is par bhi hun raazi ki tere shahr ke log

mere bante nahin apna hi bana len mujh ko

aap mujh se kisi tabir ki phir baat karen

pahle is KHwab-e-tamanna se jaga len mujh ko

nahin malum ki kal tak main rahun ya na rahun

mehrban aaj hi ji-bhar ke sata len mujh ko

gardishon ke liye ab tak na ye mumkin na hua

kisi surat mere mehwar se haTa len mujh ko

in bulandi ke makinon ko mayassar hi nahin

'lais' wo hath jo pasti se uTha len mujh ko