jab kucha-e-qatil mein hum lae gae honge

jab kūcha-e-qātil meñ ham laa.e ga.e hoñge

parde bhī darīchoñ ke sarkā.e ga.e hoñge

mai-ḳhāne meñ jab zāhid pahuñchā.e ga.e hoñge

ḳhātir ke salīqe sab apnā.e ga.e hoñge

jab satvat-e-shāhī ko kuchh Thes lagī hogī

suulī pe ka.ī sarmad laTkā.e ga.e hoñge

chāñdī ke gharoñdoñ kī jab baat chalī hogī

miTTī ke khilaunoñ se bahlā.e ga.e hoñge

jab shīsh-mahal koī ta.amīr huā hogā

dīvāroñ meñ dīvāne chunvā.e ga.e hoñge

vo kuchh bhī kaheñ lekin tanhā.ī ke aalam meñ

kuchh giit tire 'bekal' dohrā.e ga.e hoñge

jab kucha-e-qatil mein hum lae gae honge

parde bhi darichon ke sarkae gae honge

mai-KHane mein jab zahid pahunchae gae honge

KHatir ke saliqe sab apnae gae honge

jab satwat-e-shahi ko kuchh Thes lagi hogi

suli pe kai sarmad laTkae gae honge

chandi ke gharondon ki jab baat chali hogi

miTTi ke khilaunon se bahlae gae honge

jab shish-mahal koi tamir hua hoga

diwaron mein diwane chunwae gae honge

wo kuchh bhi kahen lekin tanhai ke aalam mein

kuchh git tere 'bekal' dohrae gae honge