kaba o dair mein hai kis ke liye dil jata

kā'ba o dair meñ hai kis ke liye dil jaatā

yaar miltā hai to pahlū hī meñ hai mil jaatā

ḳhidmat-e-yār meñ maiñ jabki huuñ saa.il jaatā

kuchh na kuchh bosa o dushnām se hai mil jaatā

tere dāñtoñ se jo hone ko muqābil jaatā

sūrat-e-ashk guhar ḳhaak meñ mil mil jaatā

phal milā hai ye tirī teġh se ham ko ai turk

phuuT kī tarah har ik zaḳhm hai khil khil jaatā

ruḳh ke hote hue DhūñDā na dahan kā mazmūn

sahl ko chhoḌ ke kyuuñ jānib-e-mushkil jaatā

par to katre haiñ yaqīn hai ki chhurī bhī phere

zamzamoñ se mire sayyād hai hil hil jaatā

zaḳhm-e-kārī kī tirī teġh se allāh-rī ḳhushī

raqs kartā huā duniyā se hai bismil jaatā

raah bhūle hue haajī hai bhaTaktā nāhaq

kabatullah jo jaatā to sū-e-dil jaatā

tarfa rakhtī hai ḳharābāt-e-muġhāñ kaifiyyat

hoshiyār aa ke hai is bazm se ġhāfil jaatā

raah meñ shān-e-karīmī hai tirī bhar detī

phir ke ḳhālī kisī dar se jo hai saa.il jaatā

ai sabā tū hī uḌā kar ruḳh-e-lailā dikhlā

dast-e-majnūñ nahīñ tā-parda-e-mahmil jaatā

kaun sī rāhat-e-jāñ kī haiñ ye āñkheñ mushtāq

kar ke andher hai vo raunaq-e-mahfil jaatā

āmad-e-yār kī kānoñ se sunī hai jo ḳhabar

chhup ke pahlū se hai āñkhoñ kī taraf dil jaatā

ka'ba o dair mein hai kis ke liye dil jata

yar milta hai to pahlu hi mein hai mil jata

KHidmat-e-yar mein main jabki hun sail jata

kuchh na kuchh bosa o dushnam se hai mil jata

tere danton se jo hone ko muqabil jata

surat-e-ashk guhar KHak mein mil mil jata

phal mila hai ye teri tegh se hum ko ai turk

phuT ki tarah har ek zaKHm hai khil khil jata

ruKH ke hote hue DhunDa na dahan ka mazmun

sahl ko chhoD ke kyun jaanib-e-mushkil jata

par to katre hain yaqin hai ki chhuri bhi phere

zamzamon se mere sayyaad hai hil hil jata

zaKHm-e-kari ki teri tegh se allah-ri KHushi

raqs karta hua duniya se hai bismil jata

rah bhule hue haji hai bhaTakta nahaq

kabatullah jo jata to su-e-dil jata

tarfa rakhti hai KHarabaat-e-mughan kaifiyyat

hoshiyar aa ke hai is bazm se ghafil jata

rah mein shan-e-karimi hai teri bhar deti

phir ke KHali kisi dar se jo hai sail jata

ai saba tu hi uDa kar ruKH-e-laila dikhla

dast-e-majnun nahin ta-parda-e-mahmil jata

kaun si rahat-e-jaan ki hain ye aankhen mushtaq

kar ke andher hai wo raunaq-e-mahfil jata

aamad-e-yar ki kanon se suni hai jo KHabar

chhup ke pahlu se hai aankhon ki taraf dil jata