kisi insan ko apna nahin rahne dete

kisī insān ko apnā nahīñ rahne dete

shahr aise haiñ ki tanhā nahīñ rahne dete

dā.ere chand haiñ gardish meñ azal se jo yahāñ

koī bhī chiiz hamesha nahīñ rahne dete

kabhī nākām bhī ho jaate haiñ vo log ki jo

vāpsī kā koī rasta nahīñ rahne dete

un se bachnā ki bichhāte haiñ panāheñ pahle

phir yahī log kahīñ kā nahīñ rahne dete

jis ko ehsās ho aflāk kī tanhā.ī kā

der tak us ko akelā nahīñ rahne dete

vāqa.ī nuur liye phirte haiñ sar pe koī

apne atrāf jo saaya nahīñ rahne dete

zindagī pyārī hai logoñ ko agar itnī 'malāl'

kyuuñ masīhāoñ ko zinda nahīñ rahne dete

kisi insan ko apna nahin rahne dete

shahr aise hain ki tanha nahin rahne dete

daere chand hain gardish mein azal se jo yahan

koi bhi chiz hamesha nahin rahne dete

kabhi nakaam bhi ho jate hain wo log ki jo

wapsi ka koi rasta nahin rahne dete

un se bachna ki bichhate hain panahen pahle

phir yahi log kahin ka nahin rahne dete

jis ko ehsas ho aflak ki tanhai ka

der tak us ko akela nahin rahne dete

waqai nur liye phirte hain sar pe koi

apne atraf jo saya nahin rahne dete

zindagi pyari hai logon ko agar itni 'malal'

kyun masihaon ko zinda nahin rahne dete