koi itna pyara kaise ho sakta hai

koī itnā pyārā kaise ho saktā hai

phir saare kā saarā kaise ho saktā hai

tujh se jab mil kar bhī udāsī kam nahīñ hotī

tere baġhair guzārā kaise ho saktā hai

kaise kisī kī yaad hameñ zinda rakhtī hai

ek ḳhayāl sahārā kaise ho saktā hai

yaar havā se kaise aag bhaḌak uThtī hai

lafz koī añgārā kaise ho saktā hai

kaun zamāne-bhar kī Thokareñ khā kar ḳhush hai

dard kisī ko pyārā kaise ho saktā hai

ham bhī kaise ek hī shaḳhs ke ho kar rah jaa.eñ

vo bhī sirf hamārā kaise ho saktā hai

kaise ho saktā hai jo kuchh bhī maiñ chāhūñ

bol nā mere yaarā kaise ho saktā hai

koi itna pyara kaise ho sakta hai

phir sare ka sara kaise ho sakta hai

tujh se jab mil kar bhi udasi kam nahin hoti

tere baghair guzara kaise ho sakta hai

kaise kisi ki yaad hamein zinda rakhti hai

ek KHayal sahaara kaise ho sakta hai

yar hawa se kaise aag bhaDak uThti hai

lafz koi angara kaise ho sakta hai

kaun zamane-bhar ki Thokaren kha kar KHush hai

dard kisi ko pyara kaise ho sakta hai

hum bhi kaise ek hi shaKHs ke ho kar rah jaen

wo bhi sirf hamara kaise ho sakta hai

kaise ho sakta hai jo kuchh bhi main chahun

bol na mere yara kaise ho sakta hai