koi shai Dube to dariya mein lahar jage hai

koī shai Duube to dariyā meñ lahar jaage hai

kab azaañ murġh ke dene se sahar jaage hai

kañkarī maare se paanī meñ asar jaage hai

ik zarā ḳhvāhish-e-parvāz se par jaage hai

un ko mimbar kī bulandī se tashaffī na huī

jin kī āvāz pe tahrīk kā sar jaage hai

niiñd kī kaa.ī se bojhal hai har ik aañkh magar

sañg ke ḳhauf se shīshe kā nagar jaage hai

lazzat-e-dard samundar se nahīñ siip se pūchh

jis kī āġhosh meñ qatre se guhar jaage hai

rañg-o-roġhan ke badalne se bhalā kyā hāsil

nannhī kilkāriyāñ jaage hai to ghar jaage hai

phir ḳhañghalne ko hai kyā ḳhitta-e-nā-dīda koī

phir kaf-e-pā meñ sar-e-shuq-e-safar jaage hai

ghar ke pichhvāḌe mahaktī huī sargoshī se

kitne biite hue lamhoñ kā khañDar jaage hai

koi shai Dube to dariya mein lahar jage hai

kab azan murgh ke dene se sahar jage hai

kankari mare se pani mein asar jage hai

ek zara KHwahish-e-parwaz se par jage hai

un ko mimbar ki bulandi se tashaffi na hui

jin ki aawaz pe tahrik ka sar jage hai

nind ki kai se bojhal hai har ek aankh magar

sang ke KHauf se shishe ka nagar jage hai

lazzat-e-dard samundar se nahin sip se puchh

jis ki aaghosh mein qatre se guhar jage hai

rang-o-roghan ke badalne se bhala kya hasil

nannhi kilkariyan jage hai to ghar jage hai

phir KHanghalne ko hai kya KHitta-e-na-dida koi

phir kaf-e-pa mein sar-e-shuq-e-safar jage hai

ghar ke pichhwaDe mahakti hui sargoshi se

kitne bite hue lamhon ka khanDar jage hai