koi tanhai ka ehsas dilata hai mujhe

koī tanhā.ī kā ehsās dilātā hai mujhe

maiñ bahut duur huuñ nazdīk bulātā hai mujhe

maiñ ne mahsūs kiyā shahr ke hañgāme meñ

koī sahrā meñ hai, sahrā meñ bulātā hai mujhe

tū kahāñ hai ki tirī zulf kā saaya saaya

har ghanī chhāñv meñ le jā ke biThātā hai mujhe

ai mire hāl-e-pareshāñ ke nigah-dār ye kyā

kis qadar duur se ā.īna dikhātā hai mujhe

ai makīn-e-dil-o-jāñ maiñ tirā sannāTā huuñ

maiñ imārat huuñ tirī kis liye Dhātā hai mujhe

rahm kar maiñ tirī mizhgāñ pe huuñ aañsū kī tarah

kis qayāmat kī bulandī se girātā hai mujhe

'shāz' ab kaun sī tahrīr ko taqdīr kahūñ

koī likhtā hai mujhe koī miTātā hai mujhe

koi tanhai ka ehsas dilata hai mujhe

main bahut dur hun nazdik bulata hai mujhe

main ne mahsus kiya shahr ke hangame mein

koi sahra mein hai, sahra mein bulata hai mujhe

tu kahan hai ki teri zulf ka saya saya

har ghani chhanw mein le ja ke biThata hai mujhe

ai mere haal-e-pareshan ke nigah-dar ye kya

kis qadar dur se aaina dikhata hai mujhe

ai makin-e-dil-o-jaan main tera sannaTa hun

main imarat hun teri kis liye Dhata hai mujhe

rahm kar main teri mizhgan pe hun aansu ki tarah

kis qayamat ki bulandi se giraata hai mujhe

'shaz' ab kaun si tahrir ko taqdir kahun

koi likhta hai mujhe koi miTata hai mujhe